1-2. (a) Ngapi omu Jehova nga uyungisa vantu mosiruwo sanare ntani mosiruwo setu? (b) Yisinke natu ka konakona mosirongwa esi?

JEHOVA kwa hara kutuuyungisa. Mosiruwo sanare, age nga gava mbudi zendi kovantu kupitira movaporofete novaengeli ntani mwaMunwendi Jesus Kristusa. (Amosa 3:7; Gar. 3:19; Ehor. 1:1) Naina age kutuuyungisa kupitira moNonkango dendi Bibeli. Age kwa tu pa Bibeli yipo tu kwate egano magazaro gendi noyirugana yendi.

² Apa Jesus ga kere pevhu, Jehova kwa uyungire nage kutundilira meguru yikando yitatu. Tu zeni tu ka tare eyi ga uyungire Jehova neyi natu lirongera ko kononkango dendi ntani nomu natu gwanena mo mauwa.

3. Kuliza naMarukusa 1:9-11, yisinke ga uyungire Jehova apa Jesus ga gwene ekuho, ntani yininke musinke yomulyo a di likida nonkango odo?

³ Marukusa 1:9-11 kwa uyunga kuhamena sikando sokuhova apa Jehova ga uyungire naMunwendi kutundilira meguru. (Resa.) Age kwa tente asi: “Ove nyove Munwange ogu na hara, wa za nge komutjima.” Nonkango odo nampo da hafesere Jesus apa oGuhwe va mu likidire eharo nokumukorangeda. Nonkango daJehova kwa likidire yininke yitatu yomulyo kuhamena Jesus. Sokuhova, Jesus MunwaKarunga. Sauvali, Jehova kwa hara Munwendi. Sautatu, Jesus kwa zire Karunga komutjima. Tu zeni tu ka konakone yininke oyo simwe nasimwe.

4. Ngapi omu Jesus ga ya kere munwaKarunga monkedi zokulikarera apa ga gwene ekuho?

⁴ “Ove nyove Munwange.” Apa Jehova ga uyungire nonkango edi, age kwa likidire asi Jesus kwa tulire po elikwatakano  lyepe nendi. Komeho Jesus a wize pevhu, age kwa kere nare MunwaKarunga gopampepo. Nye apa ga gwene ekuho, kwa mu gwavekere nompepo zokupongoka. Posiruwo oso, Karunga kwa likidire asi, Jesus ga kere nehuguvaro lyokukaparukira meguru yipo a ka kare Hompa ntani Mupristeli goMunene. (Ruk. 1:31-33; Heb. 1:8, 9; 2:17) Ngesi kuvhura tu kwate egano konda zeyi oGuhwe va uyungilire pekuho lyendi asi: “Ove Munwange.”—Ruk. 3:22.

5. Yisinke natu lirongera ko kosihonena saJehova?

⁵ “Ove nyove . . . na hara.” Sihonena saJehova kuturonga asi twa hepa kukorangeda wopeke. (Joh. 5:20) Ayo kutuhafesa apa gumwe atu likida eharo nokutupandadeka koyirugana yetu. Yipo nye, twa hepa kulikida eharo nokupandadeka vanavazinyetu ntani vemepata lyetu. Nsene tu pandadeka wopeke, ayo ngayi nkondopeka epuro lyawo ntani ngayi va vatera va karere Jehova noulimburukwi. Vakurona va hepa kupandadeka vana vawo. Nsene vakurona va pandadeka vana vawo nokuvalikida eharo, ayo ngayi nkondopeka epuro lyawo.

6. Morwasinke natu huguvarera Jesus?

⁶ “Wa za nge komutjima.” Nonkango edi kulikida asi Jehova ga kere nehuguvaro asi Jesus nga sikisa mo mpango zoGuhwe. Mokumona asi Jehova ga huguvarere Jesus, nose kuvhura tu huguvare asi Jesus nga ka sikisa mo matumbwidiro gaJehova nagenye. (2 Kol. 1:20) Nsene tu gazadara ko kosihonena saJesus, ayo ngayi tu tumangeda tu mu honene. Jehova ga kara nehuguvaro asi vakareli vendi ngava twikira kulirongera ko kwaMunwendi.—1 Pet. 2:21.

7. Kuliza naMateusa 17:1-5, siruwo musinke Jehova ga uyungire kutundilira meguru ntani yisinke ga uyungire?

⁷ Resa Mateusa 17:1-5. Sikando sauvali esi Jehova ga uyungire kutundilira meguru kuna kara apa Jesus ga ‘lisitunukire’ komeho zovarongwa vendi. Jesus kwa zire kondundu zonde kumwe naPeturusa naJakopo ntani Johanesa. Varongwa owo kwa mwene emoneko lyokutetukisa. Sipara saJesus tasi lisitunuka ano yikoverero yendi tayi vembere. Makura memoneko olyo tava mono mo Eliya naMosesa awo kuna kuuyunga kuhamena nomfa nevhumbuko lyaJesus. Nampili ngomu vapositoli vatatu da va ‘gwene nompofu’ awo kwa mwene emoneko olyo apa va pindukire. (Ruk. 9:29-32) Hava za mokuuyunga tava mono eremo lina va kara keguru, ntani tava zuvhu ezwi lyaKarunga kuna kutundilira meremo. Ngwendi moomu tupu ga yi rugene apa Jesus ga gwene ekuho, Jehova kwa likidire asi age ga hara Munwendi ntani ga mu za komutjima pokutanta asi: “Ogu yige Munwange ogu na hara, ga za nge komutjima.” Nye sikando esi kwa gwederere ko hena asi: “Omu mu zuvhe.”

8. Ngapi emoneko olyo lya kundamene Jesus novarongwa vendi?

⁸ Emoneko olyo kwa likidire uyerere nononkondo edi ga ya gwene Jesus ngaHompa goUhompa waKarunga. Emoneko eli kwa korangedere nokunkondopeka Jesus a vhure kulididimikira maudigu nonomfa edi da mu karerere komeho. Emoneko olyo hena kwa nkondopekere epuro lyovarongwa vaJesus. Alyo kwa va vaterere va liwapaikire maudigu ntani nosirugana esi sa va karerere komeho. Konyima zonomvhura 30, Peturusa kwa ya tjenge kuhamena emoneko olyo, eyi kulikida asi kapi ga divarere sihorokwa oso.—2 Pet. 1:16-18.

9. Mapukururo musinke ga geve Jesus kovarongwa vendi?

⁹ “Omu mu zuvhe.” Nonkango odo kulikida asi Jehova ana hara tu purakene nokulimburukwa kononkango daMunwendi. Yisinke ga uyungire Jesus apa ga kere pevhu? Age kwa uyungire yininke yoyinzi yomulyo. Pasihonena, age kwa rongere varongwa vendi omu nava zuvhisa mbudi zongwa nokukara vana vangarara. (Mat. 24:42; 28:19, 20) Age kwa va korangedere va kondje unene ntani va twikire kulididimika. (Ruk. 13:24) Jesus kwa uyungire hena asi varongwa vendi va hepa kulihara-hara nokukara mouumwe ntani va sikise mo nompango dendi. (Joh. 15:10, 12, 13) Mapukururo ogo kwa kere gomawa ntani ago mulyo simpe kwetu naina.

10-11. Ngapi natu yi likida asi ose kuna kupurakena kwaJesus?

¹⁰ Jesus kwa tente asi: “Nkenye ogu ga hamena kousili, kupurakena ezwi lyange.” (Joh. 18:37) Ose kulikida asi kuna kupurakena kezwi lyaJesus ‘pokulididimikira-didimikira, nokuligusa-gusira po, nsene tuna lizono novakwetu.’ (Koros. 3:13; Ruk. 17:3, 4) Ose kulikida hena asi kuna kupurakena kezwi lyaJesus pokuzuvhisa mbudi zongwa noupampi “posiruwo sosiwa nesi sosidona.”—2 Tim. 4:2.

¹¹ Jesus kwa tente asi: “Nonzwi dange kuzuvha ezwi lyange.” (Joh. 10:27) Varongwa vaJesus kulikida asi awo kupurakena hena kezwi lyaJesus pokusikisa mo nonkango dendi. Awo kapi a yi va donganesa  “yinka youzuni ou.” (Ruk. 21:34) Nye awo kutura muhowo nompango daJesus nokudilimburukwa nampili yi kare udigu. Sinzi sovanavazinyetu kuna kulididimikira maudigu ngwendi marwaneso noruhepo ntani yimpagwa. Vanavazinyetu kuna kutwikira kulimburukwa Jehova nampili ngomu vana kupita momaudigu ogo. Jesus kwa tumbwidilire navenye ava vana kupita momaudigu asi: “Ogu ga kara noyipango yange, nye age ta yi sikisa mo, yige nye googo ga hara nge. Ano Tate nga hara ogu ga hara nge.”—Joh. 14:21.

12. Ngapi natu yi likida hena asi ose kupurakena kwaJesus?

¹² Nkedi zimwe hena omu natu purakena kwaJesus kuna kara pokuruganena kumwe nava ava tu pitisire. (Heb. 13:7, 17) Monomvhura edi, mbunga zaJehova kwa tura po marunduruko gomanzi, kukwatera mo yiruganeso nononkedi donompe dokuzuvhisa nomu atu rugana epongo lyomokatji kosivike ntani monkedi omu atu tungu nokuwapukurura Yinyanga yetu. Marunduruko musi kouwa! Jehova nga tu vatera yipo tu vhure kukwama marunduruko aga azi tura po mbunga zendi.

13. Mauwa musinke atu gwanene mo pokupurakena kwaJesus?

¹³ Ose kugwanena mo mauwa apa atu purakene kweyi nga rongo Jesus. Jesus kwa tumbwidilire varongwa vendi asi erongo lyendi ngali va pwizumukisa. Age kwa tente asi: “Ngomu gwane rufuwo monomwenyo deni. Yeeyi ndjoko zange nderu, ano mudigo gwange kwa pepuka.” (Mat. 11:28-30) Nonkango daKarunga omu ga kara Mavangeli gane aga ga simwitira eyi ga rugene Jesus pevhu, kutupwizumukisa ntani kutuvatera tu kare nonondunge. (Epis. 19:7; 23:3) Jesus kwa tente asi: “Ava ava zuvhu nonkango daKarunga nye tava di pungura, yiwo po verago.”—Ruk. 11:28.

14-15. (a) Kuliza naJohanesa 12:27, 28, yisinke ya horokere posikando sautatu apa Jehova ga uyungire naJesus kutundilira meguru? (b) Ngapi omu nonkango daJehova da vaterere Jesus?

¹⁴ Resa Johanesa 12:27, 28. Sikando sautatu esi Jehova ga uyungire kutundilira meguru kusigwana mEvangeli lyaJohanesa.  Mazuva gongandi komeho zonomfa daJesus, age kwa zire koJerusarema kosipito soPaska. Age kwa tente asi: “Yina limbi nge.” Makura ta kanderere asi: “Tate, yererepeka edina lyoge!” Makura oGuhwe tava uyunga kutundilira meguru asi: “Na li yererepeka, nye ngani li yererepeka hena.”

¹⁵ Jesus kwa tente asi yina mu limbi morwa ga kere nosinka nsene nga vhura kutwikira kulimburukwa Jehova. Jesus ga yi divire asi tava ka mu hepeka no ku ka mu dipaga. (Mat. 26:38) Nye unene po, age kwa kere nosinka morwa ga here kuyererepeka oGuhwe. Mokumona asi age kwa mu rundilire asi kuswaura Karunga, age kwa gazarere asi nomfa dendi ngadi reta eswau kedina lyaKarunga. Nonkango daJehova da vaterere Jesus a kare nehuguvaro asi edina lyoGuhwe ngava li yererepeka. Ado hena da mu hengagwidire nokumunkondopeka yipo a ya pite momaudigu aga ga kere komeho. Nampili ngomu nonkango dina ga di zuvhire Jesus gelike, Jehova kwa di tura moBibeli yipo nose tu gwanene mo uwa.—Joh. 12:29, 30.

16. Morwasinke pamwe atu karere nosinka kweyi yina kuhorokera edina lyaKarunga?

¹⁶ Ngwendi Jesus, nose kuvhura tu kare nosinka kweyi yina kuhorokera edina lyaKarunga. Nampo nose kuna kututekura momudona ngwendi moomu ya horokerere Jesus. Ndi kuvhura tu kare nosinka kuhamena nombudi doyimpempa  edi vana kuuyunga vantu kutuhamena. Nombudi edi kuvhura kuretera edina lyaKarunga eswau nombunga zendi. Momaukaro gangoso ose kuvhura tu gwane ehengagwido mononkango edi Jehova ga tanterere Jesus. Kapisi hepero tu kare nosinka sosinene. Twa kara nehuguvaro asi “mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.” (Fil. 4:6, 7) Jehova nga twikira kuyererepeka edina lyendi. Kupitira moUhompa wendi, age nga ka gusa po nayinye eyi ga retesa po Satana.—Epis. 94:22, 23; Jes. 65:17.

17. Kuliza naJesaya 30:21, ngapi Jehova a tu uyungisa naina?

¹⁷ Jehova kuuyungisa simpe vakareli vendi naina. (Resa Jesaya 30:21.) Age kapi atu uyungisa kutundilira meguru. Nye, age kwa tu pa Bibeli omu mwa kara mavyukiso gendi. Ntani age kuruganesa mpepo zendi zokupongoka yipo “erenga lyokulimburukwa” li tu pe nondya dopampepo. (Ruk. 12:42) Ose kugwana nondya dononzi dopampepo kupitira moyimbapiratjangwa nonovidiyo edi adi tu vatere tu pameke epuro lyetu.

18. Ngapi omu nonkango daJehova adi pameke epuro lyetu nokutupa uradi?

¹⁸ Tu twikireni kudiworoka nonkango daJehova edi ga tanterere Munwendi apa ga kere pevhu. Ngano nonkango odo di tu hengagwide pokudiva asi Jehova nga ka rugana ko yuma mokukagusa po nayinye eyi ga retesa po Satana. Ntani tu tokomeneni kupurakena kezwi lyaJehova. Nsene tu yi rugana, ngayi tu tompoka kulididimikira maudigu aga tuna kupita naga ngatu ligwanekera nago komeho. Bibeli kututantera asi: “One nyone kulididimika, mu rugane eyi ya za Karunga komutjima, ngava mu pe eyi va mu tumbwidira.”—Heb. 10:36.