1-2. (a) Yaˬhoˉvaˬ chaw yaˇ geh hkʼaˬ hkʼe te caˉ daꞈ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Yaˬhoˉvaˬ ngaˬ hui geh yaw daꞈ gaˇ ve yoˬ. Awˉ lawˉ peuˇ htaˇ tcuh kaˍ paˍ, mvuhˇ naw ma tcuh yaˇ, leh yawˇ ve Yaˇ paˍ Yeˍsuˆ Hkriꞈ htaꞈ cuˇ leh ngaˬ hui Gʼuiˬ sha ve dawˇ hkʼaˇ htaꞈ shiˍ tuˬ ga laˇ ve yoˬ. (Aˍmoˆ 3:7; Gaˍlaˍtiˆ 3:19; Hpeuꞈ maˍ ve 1:1) Chi beuꞈ teˇ co˗e yawˇ ngaˬ hui htaꞈ caˉ daꞈ tuˬ Liꞈ hpu htaꞈ cuˇ ve yoˬ. Yawˇ ve te hkʼaˇ dawˇ hkʼaˇ htaꞈ ngaˬ hui shiˍ tuˬ yawˇ Liꞈ hpu peꞈ laˇ ve yoˬ.

² Yeˍsuˆ miˬ guiˬ hkʼoˆ chehˇ htaˇ, Yaˬhoˉvaˬ ve hkawˇ mvuhˇ naw ma hkʼoˆ 3 pawˆ bvuhˬ tawˆ la ve yoˬ. Yaˬhoˉvaˬ aˬ htoꞈ ma kʼoˆ ve, yawˇ ve tawˇ ngaˬ hui htaꞈ aˬ htoꞈ ma maˍ laˇ ve, leh awˬ bon hkʼaˬ hkʼe gʼa ve teˇ geh dawˇ nyi sheˍ.

3. Maˍkuˆ liꞈ 1:9-11 hkʼaw Yeˍsuˆ Baˆtiˆsaˬ haꞈ yuˬ htaˇ Yaˬhoˉvaˬ aˬ htoꞈ ma kʼoˆ piˇ ve le? Yaˬhoˉvaˬ ve tawˇ hkawˇ maˍ laˇ ve awˬ tehˬ ve 3 lawn aˬ htoꞈ ma le?

³ Maˍkuˆ liꞈ 1:9-11 hkʼaw yawˇ Awˬ pa ve hkawˇ mvuhˇ naw ma hkʼoˆ bvuhˬ tawˆ la ve awˉ lawˉ teˇ pawˆ bvuhꞈ taˍ ve yoˬ. (Gʼaw sheˍ.) Yawˇ kʼoˆ ve, “nawˬ lehˬ ngaˬ haꞈ jaˇ ve ngaˬ ve Yaˇ hpu yoˬ. Nawˬ htaꞈ ngaˬ nyi hkʼaˇ suh jaˇ.” Mvuhˇ naw ma hkʼoˆ Awˬ pa chi hkʼe kʼoˆ ve htaꞈ Yeˍsuˆ gʼa kaˇ htaˇ, yawˇ ha lehˬ jaˇ ve yoˬ hehˉ! Yaˬhoˉvaˬ ve tawˇ hkawˇ chi ve hkʼaw Yeˍsuˆ htaꞈ caˉ daꞈ ve awˬ tehˬ ve 3 lawn htaꞈ hkʼa dehꞈ maˍ laˇ ve yoˬ. (1) Yeˍsuˆ Gʼuiˬ sha ve yaˇ hpehꞈ ve yoˬ. (2) Yaˬhoˉvaˬ yawˇ ve Yaˇ htaꞈ haꞈ jaˇ. (3) Yaˬhoˉvaˬ yawˇ ve Yaˇ htaꞈ nyi hkʼaˇ suh jaˇ. Awˬ tehˬ ve 3 lawn chi htaꞈ teˇ geh dawˇ nyi sheˍ.

4. Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ Gʼuiˬ sha geh awˬ vuiˬ awˬ suhˉ aˬ htoꞈ ma gʼa ve le?

⁴ “Nawˬ lehˬ ngaˬ ve Yaˇ hpu yoˬ.” Yawˇ haꞈ jaˇ ve Yaˇ htaꞈ awˬ vuiˬ awˬ suhˉ piˇ tuˬ Yaˬhoˉvaˬ ve tawˇ hkawˇ chi hkʼa dehꞈ maˍ laˇ ve yoˬ. Yeˍsuˆ mvuhˇ naw ma hkʼoˆ chehˇ htaˇ, yawˇ Gʼuiˬ sha ve Yaˇ hpehꞈ ve yoˬ. Yaꞈ hkʼaˇ, Baˆtiˆsaˬ haꞈ yuˬ peuˬ hkʼawꞈ nawˉ daꞈ kehˬ ve  awˬ ha hpu yawˇ htaꞈ leuˆ yuˬ ve yoˬ. Oˇ teˇ yanˇ Gʼuiˬ sha hkʼa dehꞈ maˍ laˇ ve Yeˍsuˆ co ha hpawˇ Gʼuiˬ sha ve Yaˇ hpehꞈ ve yoˬ. Chi kʼoˆ gaˇ ve lehˬ Yeˍsuˆ mvuhˇ naw ma hkʼoˆ kʼawꞈ˗e tuˬ dawˇ law kuiˬ cawˬ leh Gʼuiˬ sha leuˆ yuˬ taˍ ve Jawˇmawˇ leh Paw hkuˇ lonˉ hpehꞈ tuˬ yoˬ. (Luˉkaꞈ 1:31-33; Heˍbrehˇ 1:8, 9; 2:17) Chi htaꞈ pa taw Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ Yaˬhoˉvaˬ kʼoˆ ve, “nawˬ lehˬ ngaˬ ve Yaˇ hpu yoˬ.”—Luˉkaꞈ 3:22.

5. Yaˬhoˉvaˬ haꞈ pehnˇ ve htaꞈ ngaˬ hui henˇ yuˬ leh hkʼaˬ hkʼe te shu htaꞈ awˬ gʼaˇ piˇ gʼa tuˬ le?

⁵ “Nawˬ lehˬ ngaˬ haꞈ jaˇ ve Yaˇ hpu yoˬ.” Yaˬhoˉvaˬ ve haꞈ pehnˇ ve awˬ lawn chi ngaˬ hui shu htaꞈ awˬ gʼaˇ piˇ tuˬ shaˍ tiꞈ peꞈ laˇ ve yoˬ. (Yoˇhanˬ 5:20) Ngaˬ hui haꞈ ve chaw teˇ gʼaˇ yawˇ ngaˬ hui htaꞈ haꞈ ve tehꞈ hpeuꞈ maw laˇ leh chiˇ mvuh laˇ htaˇ, ngaˬ hui ha lehˬ ve yoˬ. Chi ve hkʼa shuˍ Hkriꞈ yaˇ awˬ moˍ hkʼaw leh yehˬ kʼa hkʼaw ve chaw kaꞈ awˬ gʼaˇ gʼa tuˬ loˍ ve yoˬ. Ngaˬ hui shu htaꞈ chiˇ mvuh piˇ htaˇ, yawˇ hui ve yonˍ hkʼaˇ uiˍ la mvuh la tuˬ te piˇ leh yawˇ hui Yaˬhoˉvaˬ ve kanˉ ka tiꞈ yeˬ ve hkʼaw te gʼa ve yoˬ. Awˬ pa awˬ e yaˇ htaꞈ awˬ gʼaˇ gʼa piˇ ve yoˬ. Awˬ pa awˬ e yaˇ htaꞈ haꞈ leh awˬ tehˬ chiˇ mvuh piˇ htaˇ, yaˇ uiˍ la mvuh la tuˬ ga piˇ ve yoˬ.

6. Aˬ htoꞈ ma te ngaˬ hui Yeˍsuˆ htaꞈ yonˍ gʼa ve le?

⁶ “Nawˬ htaꞈ ngaˬ nyi hkʼaˇ suh jaˇ.” Yeˍsuˆ ka tiꞈ yeˬ leh Yaˬhoˉvaˬ ve a loˍ htaꞈ gʼaꞈ te gʼa tuˬ yawˇ yonˍ gʼa ve tehꞈ tawˇ hkawˇ chi hpeuꞈ maw laˇ ve yoˬ. Yaˬhoˉvaˬ yawˇ ve Yaˇ paˍ htaꞈ yonˍ gʼa jaˇ. Chi htaꞈ pa taw, Yeˍsuˆ ka tiꞈ yeˬ leh Yaˬhoˉvaˬ ve a loˍ htaꞈ te biˇ gʼa ve tehꞈ ngaˬ hui kaꞈ yonˍ gʼa ve yoˬ. (2 Kawˇrenˍhtuˆ 1:20) Yeˍsuˆ ve awˬ lawn htaꞈ nyi htaˇ, ngaˬ hui kaꞈ henˇ yuˬ gaˇ ve yoˬ. Yaˬhoˉvaˬ ve chaw yawˇ ve Yaˇ paˍ htaꞈ caˉ leh henˇ yuˬ tuˬ yoˬ tehꞈ yawˇ yonˍ ve yoˬ.—1 Peˍtruˆ 2:21.

7. Maꞈhtehˍ liꞈ 17:1-5 hkʼaw kʼoˆ taˍ ve hkʼe yawˇ Awˬ pa ve hkawˇ mvuhˇ naw ma hkʼoˆ bvuhˬ tawˆ la ve hkʼaˬ hkʼe htaˇ le? Aˬ htoꞈ ma kʼoˆ ve le?

⁷ Maꞈhtehˍ liꞈ 17:1-5 gʼaw sheˍ. Nyiˇ pawˆ teˇ pawˆ Awˬ pa ve hkawˇ mvuhˇ naw ma hkʼoˆ bvuhˬ tawˆ la htaˇ lehˬ Yeˍsuˆ ve “awˬ hoꞈ awˬ han pa” htaˇ yoˬ. yawˇ geh hkʼaw pui hkʼoˆ lo kʼai tuˬ Peˍtruˆ, Yaˍkoˆ, Yoˇhanˬ htaꞈ jehˬ piˇ ve yoˬ. Oˇ kaˬ lo chehˇ htaˇ yawˇ hui daꞈ jaˇ ve awˬ ha htaꞈ mawˬ ve yoˬ. Yeˍsuˆ ve mehˆ hpfuhˇ mvuhˇ nyi gʼeuˆ hkʼe ba jaˇ leh yawˇ ve veuꞈ kʼaˇ kaꞈ hpu leh awˬ gʼeuˆ ba jaˇ. Moˉseˍ leh Eˇliˇyaꞈ ve awˬ tan te shehˍ hpaˇ 2 gʼaˇ awˬ gʼuˇ suhˍ hpawˇ Yeˍsuˆ kʼawꞈ teꞈ tu la ve awˬ lawn yawˇ geh tanˬ yaw daꞈ ve yoˬ. Awˉ lawˉ htaˇ tcuh yaˇ 3 gʼaˇ “zuhꞈ muiˉ geuꞈ jaˇ leh zuhꞈ muiˉ jo ve” htawˇ, daꞈ jaˇ ve awˬ ha htaꞈ gʼa mawˬ leh zuhꞈ muiˉ maˇ jo˗o. (Luˉkaꞈ 9:29-32) Peuˬ leh moˬ yawˇ hui htaꞈ hoˆ beh leh Gʼuiˬ sha ve hkawˇ moˬ hkʼaw bvuhˬ tawˆ la ve yoˬ! Yeˍsuˆ Baˆtiˆsaˬ haꞈ yuˬ htaˇ hkʼe Yaˬhoˉvaˬ yawˇ ve Yaˇ paˍ htaꞈ awˬ gʼaˇ piˇ leh haꞈ pehnˇ ve hkʼaw kʼoˆ piˇ ve, “chaw chi lehˬ, ngaˬ haꞈ jaˇ ve ngaˬ ve Yaˇ hpu hpehꞈ leh, yawˇ htaꞈ ngaˬ nyi hkʼaˇ suh jaˇ.” Yawˇ kʼawꞈ kʼoˆ ve, ‘Yaˇ hpu ve tawˇ hkawˇ htaꞈ na yuˬ˗oꞈ.’

8. Awˬ ha Yeˍsuˆ awˬ hoꞈ awˬ ha pa ve htaꞈ caˉ daꞈ ve chi yawˇ leh awˬ laꞈ gʼawˇ awˬ pon aˬ htoꞈ ma awˬ bon cawˬ ve le?

⁸ Awˬ ha chi awˬ gʼuˇ suhˍ hpawˇ Yeˍsuˆ htaꞈ caˉ daꞈ ve kʼoˆ maˍ laˇ ve yoˬ. Yawˇ Gʼuiˬ sha ve mvuhˇ miˬ hkʼaw Jawˇmawˇ te htaˇ, awˬ meꞈ awˬ hponˇ leh kanˇ paˆ gʼa tuˬ yoˬ. Yeˍsuˆ tuꞈ jaˇ hkanˍ jaˇ ve hkʼaw suh tuˬ ve htaꞈ yeunˇ hkanˍ gʼaˇ tuˬ awˬ gʼaˇ gʼa ve yoˬ. Awˬ ha chi awˬ laꞈ gʼawˇ htaꞈ yonˍ yeˬ tuˬ te piˇ leh, yawˇ hui awˬ gʼuˇ suhˍ hpawˇ beˬ ve lawˇ ve gʼa hpuˇ htaˇ ka tiꞈ yeˬ gʼa tuˬ ga piˇ ve yoˬ. 30 hkʼawꞈ peuˬ hkʼawꞈ nawˉ tcuh yaˇ Peˍtruˆ Yeˍsuˆ awˬ hoꞈ awˬ ha pa ve htaꞈ kʼoˆ sheˍ ve yoˬ. Awˬ ha oˇ ve yawˇ ve dawˇ hkʼaˇ hkʼaw cawˬ sheˍ ve tehꞈ ngaˬ hui htaꞈ maˍ laˇ ve yoˬ.—2 Peˍtruˆ 1:16-18.

9. Awˬ laꞈ gʼawˇ awˬ tehˬ yehˇ gʼa ve Yeˍsuˆ aˬ htoꞈ ma kʼoˆ maˍ piˇ ve le?

⁹ “Yawˇ ve tawˇ hkawˇ htaꞈ na yuˬ˗oꞈ.” Yaˬhoˉvaˬ hkʼa tawˍ lehˆ kʼoˆ laˇ ve, yawˇ ve Yaˇ paˍ ve hkawˇ htaꞈ na yuˬ leh gʼaꞈ te˗o. Yeˍsuˆ miˬ guiˬ hkʼoˆ chehˇ htaˇ aˬ htoꞈ ma kʼoˆ ve le? Ngaˬ hui na yuˬ cawˇ ve laiˉ ceuˬ kʼoˆ laˇ ve yoˬ. Tawˇ pa haˉ te kʼo, yawˇ ve awˬ laꞈ gʼawˇ htaꞈ daꞈ ve awˬ lawn sha tanˇ hto toˇ tuˬ haꞈ pehnˇ ve hkʼaw maˍ piˇ leh shaw taˍ˗oꞈ tehꞈ laiˉ pawˆ kʼoˆ piˇ ve yoˬ. (Maꞈhtehˍ 24:42; 28:19, 20) Gʼuiˬ sha ve kanˉ te tcuhˉ taˍ tuˬ Yeˍsuˆ awˬ gʼaˇ piˇ ve yoˬ. (Luˉkaꞈ 13:24) Yeˍsuˆ ve awˬ laꞈ gʼawˇ haꞈ daꞈ tuˬ, teˇ moˍ tiˉ hpehꞈ tuˬ, leh yawˇ ve tawˇ hkawˇ htaꞈ gʼaꞈ te tuˬ a yeˇ uiˍ jaˇ tehꞈ kʼoˆ piˇ ve yoˬ. (Yoˇhanˬ 15:10, 12, 13) Yeˍsuˆ awˬ laꞈ gʼawˇ htaꞈ kʼoˆ maˍ piˇ ve awˬ tehˬ yehˇ gʼa ve yoˬ! Chi ngaˬ hui awˬ co˗e kaꞈ a yeˇ uiˍ jaˇ.

10-11. Ngaˬ hui Yeˍsuˆ ve tawˇ hkawˇ na yuˬ ve tehꞈ hkʼaˬ hkʼe hpeuꞈ maw piˇ gʼa tuˬ le?

¹⁰ Yeˍsuˆ kʼoˆ ve, “hteˇ ve cawˇ ve htaꞈ caˉ daꞈ ve chaw hkʼa peu˗eˬ lehˬ, ngaˬ ve tawˇ hkawˇ htaꞈ na ve yoˬ.” (Yoˇhanˬ 18:37) “Teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ˗oꞈ” ngaˬ hui chi hkʼe te ve kʼo, Yeˍsuˆ kʼoˆ ve htaꞈ gʼaꞈ te chehˇ ve yoˬ. (Kawˇlawˇsehˇ 3:13; Luˉkaꞈ 17:3, 4) Chi hkʼoˆ kaꞈ ngaˬ hui ‘awˬ yanˇ cawˬ ve maˇ kʼoˆ, maˇ cawˬ ve maˇ kʼoˆ’ hto toˇ ve kanˉ coˇ caˇ leh te ve yoˬ.—2 Tiˆmoˉseˍ 4:2.

¹¹ Yeˍsuˆ kʼoˆ ve, “ngaˬ ve yawˬ teˇ hpaˍ lehˬ ngaˬ ve tawˇ hkawˇ htaꞈ na yuˬ ve yoˬ.” (Yoˇhanˬ 10:27) Awˬ laꞈ gʼawˇ Yeˍsuˆ ve hkawˇ na yuˬ leh gʼaꞈ te ve tehꞈ hpeuꞈ maw laˇ ve yoˬ. Yawˇ hui “dawˇ haˍ gaˇ haˍ tuˬ” htaꞈ ceh maˇ dawˇ nyi. (Luˉkaꞈ 21:34) Yaꞈ hkʼaˇ, yawˇ hui a shaꞈ teꞈ kuiˬ lo Yeˍsuˆ ve hkawˇ a yeˇ uiˍ jaˇ tehꞈ shawˍ ve yoˬ. Haˍ jaˇ ve htawˇ na  yuˬ ve yoˬ. Awˬ viˉ awˬ nyi laiˉ gʼaˇ beˬ ve lawˇ ve hehnˇ jaˇ ve htaꞈ gʼa hpuˇ ve kaꞈ yeunˇ hkanˍ ve yoˬ. Tawˍ taˍ paˍ ngaˬ hui htaꞈ ca yaꞈ la ve, haˍ ve gʼawˇ ve, leh mvuhˇ yeˬ mvuhˇ haw lonˉ gʼa hpuˇ ve htaꞈ kʼoˆ gaˇ ve yoˬ. Yawˇ hui chi hkʼe gʼa hpuˇ ve htawˇ Yaˬhoˉvaˬ htaꞈ ka tiꞈ yeˬ gʼa ve yoˬ. Yeˍsuˆ yawˇ hui htaꞈ ka tiꞈ te piˇ ve, “ngaˬ piˇ taˍ ve tawˇ hkawˇ htaꞈ kaˇ leh te ve chaw lehˬ, ngaˬ htaꞈ haꞈ ve chaw hpehꞈ ve yoˬ. Ngaˬ htaꞈ haꞈ ve chaw teˇ gʼaˇ htaꞈ ngaˬ Awˬ pa haꞈ tuˬ yoˬ. Ngaˬ htawˇ chaw oˇ ve htaꞈ haꞈ leh ngaˬ ve awˬ to yawˇ htaꞈ hkʼa tawˍ lehˆ maw piˇ tuˬ yoˬ.”—Yoˇhanˬ 14:21.

12. Ngaˬ hui Yeˍsuˆ ve hkawˇ na yuˬ ve tehꞈ aˬ htoꞈ ma hpeuꞈ maw piˇ gʼa sheˍ ve le?

¹² Ngaˬ hui Yeˍsuˆ ve hkawˇ na ve teˇ hkʼaˇ lehˬ yawˇ leuˆ yuˬ taˍ ve chaw hkawˇ htaꞈ na yuˬ ve yoˬ. (Heˍbrehˇ 13:7, 17) Ponˬ laˬ ve hkʼaˬ nyiˇ hkʼawꞈ maˇ gaˬ sheˍ Gʼuiˬ sha ve kanˉ hkʼaˇ laiˉ ceuˬ pa ve yoˬ. Chi kʼoˆ gaˇ ve lehˬ ngaˬ hui hto toˇ kuiˬ hkʼaw liꞈ kʼoˆ leh awˬ hkʼaˇ awˬ suhˉ yehˇ ve, mvuhˇ hpeuꞈ hpawnˬ daꞈ ve pa leh hpawn daꞈ kuiˬ te leh haꞈ shaˉ ve yoˬ. Beˆ maˍ laˇ ve chi teˇ hpaˍ ngaˬ hui awˬ pon awˬ bon cawˬ leh, Gʼuiˬ sha ve kanˉ hkʼaˇ ngaˬ hui htaꞈ haꞈ ve tehꞈ hpeuꞈ maw laˇ ve yoˬ. Chi teˇ hpaˍ htaꞈ ngaˬ hui awˬ hpfuhˇ shiˍ ve yoˬ! Gʼuiˬ sha ve kanˉ hkʼaˇ beˆ maˍ laˇ ve htaꞈ ngaˬ hui gʼaꞈ te ve kʼo, yawˇ awˬ bon naꞈ laˇ tuˬ tehꞈ yonˍ gʼa ve yoˬ.

13. Yeˍsuˆ kʼoˆ ve htaꞈ ngaˬ hui na yuˬ htaˇ aˬ htoꞈ ma awˬ bon gʼa ve le?

¹³ Yeˍsuˆ maˍ ve htaꞈ ngaˬ hui na yuˬ htaˇ awˬ bon gʼa ve yoˬ. Yeˍsuˆ awˬ laꞈ gʼawˇ hui htaꞈ ka tiꞈ te piˇ ve, yawˇ maˍ ve tawˇ lehˬ yawˇ hui nyi ma sha tuˬ te piˇ ve yoˬ. Yawˇ kʼoˆ ve, “nawˬ hui ve nyi ma htawˇ gʼaˇ gʼa jehˇ tuˬ yoˬ. Awˬ lawn kʼo, ngaˬ ve taˆ tuˬ taˆ sha leh, ngaˬ ve mawˇ htawˇ lawˬ ve yoˬ.” (Maꞈhtehˍ 11:28-30) Yeˍsuˆ ve a shaꞈ teꞈ hkʼaˇ leh Gʼuiˬ sha ve kanˉ te ve, Liꞈ hpu hkʼaw 4 daw cawˬ ve chi ngaˬ hui ha lehˬ tuˬ leh, co ha hpawˇ uiˍ la mvuh la tuˬ, leh ngaˬ hui cuˇ yiˍ cawˬ tuˬ ga laˇ ve yoˬ. (Chiˇ mvuh ve 19:7; 23:3) Yeˍsuˆ kʼoˆ ve, “awˬ tehˬ awˬ na awˬ bon uiˍ ve chaw teˇ hpaˍ lehˬ, Gʼuiˬ sha ve tawˇ hkawˇ htaꞈ na yuˬ leh te kʼai ve chaw hui yoˬ!”—Luˉkaꞈ 11:28.

14-15. (a) Yoˇhanˬ liꞈ 12:27, 28 hkʼaw Yaˬhoˉvaˬ ve hkawˇ mvuhˇ naw ma hkʼoˆ bvuhˬ tawˆ la ve shehˆ pawˆ teˇ pawˆ hkʼaˬ hkʼe htaˇ le? (b) Aˬ htoꞈ ma te Yaˬhoˉvaˬ ve hkawˇ Yeˍsuˆ nyi ma sha leh awˬ gʼaˇ gʼa jaˇ ve le?

¹⁴ Yoˇhanˬ liꞈ 12:27, 28 gʼaw sheˍ. Yoˇhanˬ ve ha lehˬ ve bon hkawˇ liꞈ chi hkʼaw Yaˬhoˉvaˬ ve  hkawˇ mvuhˇ naw ma hkʼoˆ bvuhˬ tawˆ la ve shehˆ pawˆ teˇ pawˆ htaˇ ve bvuhꞈ taˍ ve yoˬ. Yeˍsuˆ suh˗e tuˬ hkʼaˬ nyiˇ nyi maˇ cawˬ˗o htaˇ, yawˇ Yeˍruˆsaˍlehnˍ venˇ lo chehˇ leh Paˍsaˍhkaˍ awˬ leh meuˇ teˇ pawˆ te ve yoˬ. Yawˇ kʼoˆ ve “ngaˬ nyi ma dawˇ haˍ jaˇ.” Peuˬ leh Yeˍsuˆ bon lawˬ ve, “A pa˗oˬ, nawˬ ve awˬ meh htaꞈ awˬ meꞈ awˬ hponˇ tawˆ la piˇ˗oˆ.” Yawˇ Awˬ pa ve hkawˇ mvuhˇ naw ma hkʼoˆ tawˆ la leh hkʼawꞈ piˇ ve, “ngaˬ ve awˬ meh htaꞈ awˬ meꞈ awˬ hponˇ cawˬ piˇ peuˬ. Ngaˬ teˇ pawˆ kʼawꞈ cawˬ piˇ tuˬ sheˍ.”

¹⁵ Yeˍsuˆ Yaˬhoˉvaˬ htaꞈ ka tiꞈ yeˬ tuˬ a yeˇ uiˍ jaˇ ve awˬ vuiˬ cawˬ ve pa taw, yawˇ nyi ma tuꞈ hkanˍ jaˇ. Yawˇ shu jawꞈ leh tuꞈ jaˇ hkanˍ jaˇ ve hkʼaw gʼa suh˗e tuˬ shiˍ ve yoˬ. (Maꞈhtehˍ 26:38) Yaꞈ hkʼaˇ, a yeˇ uiˍ jaˇ ve lehˬ Yeˍsuˆ yawˇ ve Awˬ pa ve awˬ meh htaꞈ chiˇ mvuh gaˇ ve yoˬ. Yeˍsuˆ Gʼuiˬ sha htaꞈ maˇ shawˍ maˇ caˆ kʼoˆ ve tehꞈ shu she pfuhˍ piˇ leh, yawˇ suh˗e ve Gʼuiˬ sha ve awˬ meh luˬ la ve htaꞈ kawˆ ve yoˬ. Yaˬhoˉvaˬ ve hkawˇ Yeˍsuˆ gʼa kaˇ htaˇ, awˬ gʼaˇ gʼa jaˇ ve yoˬ hehˉ! Yaˬhoˉvaˬ ve awˬ meh awˬ meꞈ awˬ hponˇ gʼa tuˬ yoˬ tehꞈ yawˇ hkʼa dehꞈ yonˍ gʼa ve yoˬ. Awˬ pa ve tawˇ Yeˍsuˆ nyi ma sha tuˬ te piˇ leh gʼa hpuˇ tuˬ ve htaꞈ yeunˇ hkanˍ gʼaˇ tuˬ ga piˇ ve yoˬ. Oˇ ve teˇ yanˇ Yeˍsuˆ teˇ gʼaˇ tiˉ Awˬ pa ve tawˇ hkʼawˇ gʼa kaˇ ve htawˇ, ngaˬ hui gʼa gʼaw tuˬ Yaˬhoˉvaˬ Liꞈ hpu hkʼaw bvuhꞈ tcuh taˍ ve yoˬ.—Yoˇhanˬ 12:29, 30.

16. Aˬ htoꞈ ma te teˇ pawˆ pawˆ Gʼuiˬ sha ve awˬ meh htaꞈ shu nyi cha la ve ngaˬ hui kawˆ ve le?

¹⁶ Yeˍsuˆ hkʼa shuˍ Yaˬhoˉvaˬ ve awˬ meh htaꞈ shu  nyi cha la ve ngaˬ hui kaꞈ kawˆ ve yoˬ. Yeˍsuˆ hkʼa shuˍ ngaˬ hui kaꞈ maˇ hteˇ maˇ cawˇ ve gʼa hpfuhˇ la ve yoˬ. Tawˍ taˍ paˍ ngaˬ hui htaꞈ caˉ daꞈ ve awˬ lawn heˍ laˇ ve ngaˬ hui maˇ dawˇ cawˇ ve yoˬ hehˉ. Chi hkʼe ve Yaˬhoˉvaˬ ve awˬ meh leh yawˇ ve kanˉ hkʼaˇ luˬ la ve yoˬ. Chi ngaˬ hui gʼa hpuˇ htaˇ Yaˬhoˉvaˬ ve hkawˇ awˬ gʼaˇ peꞈ laˇ gʼa ve yoˬ. Ngaˬ hui maˇ dawˇ haˍ dawˇ hkiˉ cawˇ. Ngaˬ hui yonˍ gʼa ve, “Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ lehˬ, [nawˬ hui] ve nyi ma leh nawˬ hui ve dawˇ hkʼaˇ teˇ hpaˍ htaꞈ Yeˍsuˆ Hkriꞈ awˬ hkʼaw lo haꞈ shaˉ laˇ tuˬ yoˬ.” (Hpiˇliˇpiˆ 4:6, 7) Yaˬhoˉvaˬ yawˇ ve awˬ meh awˬ meꞈ awˬ hponˇ gʼa tuˬ te tuˬ yoˬ. Saˍtanˍ leh miˬ guiˬ chi Yaˬhoˉvaˬ ve chaw ka tiꞈ yeˬ ve htaꞈ tawˍ piˇ ve hkʼa peu˗eˬ yawˇ ve mvuhˇ miˬ htaꞈ cuˇ leh gu tuˬ yoˬ.—Chiˇ mvuh ve 94:22, 23; Iˉsaˍyaˆ 65:17.

17. Iˉsaˍyaˆ liꞈ 30:21 hkʼaw kʼoˆ taˍ ve hkʼe, chi beuꞈ teˇ co˗e Yaˬhoˉvaˬ ngaˬ hui htaꞈ tawˇ hkʼaˬ hkʼe yaw laˇ ve le?

¹⁷ Chi beuꞈ teˇ co˗e Yaˬhoˉvaˬ ngaˬ hui htaꞈ tawˇ yaw laˇ chehˇ sheˍ. (Iˉsaˍyaˆ 30:21 gʼaw sheˍ.) Mvuhˇ naw ma hkʼoˆ Yaˬhoˉvaˬ ngaˬ hui htaꞈ tawˇ yaw laˇ ve maˇ heˆ. Yaꞈ hkʼaˇ, yawˇ ve tawˇ Liꞈ hpu hkʼaw bvuhꞈ taˍ ve ngaˬ hui htaꞈ beˆ maˍ laˇ ve yoˬ. Chi hkʼoˆ kaꞈ Yaˬhoˉvaˬ ve daꞈ kehˬ ve awˬ ha hpu ‘ka tiꞈ yeˬ leh cuˇ yiˍ cawˬ ve awˬ ceˬ’ htaꞈ cuˇ leh yawˇ ve chaw co ha hpawˇ ve caˇ tuˬ piˇ ve yoˬ. (Luˉkaꞈ 12:42) Liꞈ kʼoˆ, awn laiˉ, VDO, leh awˬ hkawˇ hpaˇ ve hkʼaw ngaˬ hui co ha hpawˇ ve caˇ tuˬ laiˉ ceuˬ gʼa ve yoˬ!

18. Yaˬhoˉvaˬ ve tawˇ ngaˬ hui yonˍ leh hkʼaˬ hkʼe te haꞈ hanˉ gʼa tuˬ le?

¹⁸ Yaˬhoˉvaˬ yawˇ ve Yaˇ miˬ guiˬ hkʼoˆ chehˇ htaˇ tawˇ yaw piˇ ve htaꞈ ngaˬ hui tawnˇ taˍ cawˇ ve yoˬ! Gʼuiˬ sha ve tawˇ Liꞈ hpu hkʼaw cawˬ taˍ ve ngaˬ hui yonˍ gʼa tuˬ te laˇ ve yoˬ. Yaˬhoˉvaˬ lehˬ hkʼa peu˗eˬ htaꞈ uˉ peunˍ gʼa leh Saˍtanˍ leh yawˇ ve miˬ guiˬ te taˍ ve shoꞈ shaꞈ ve htaꞈ gu laˇ tuˬ yoˬ. Yaˬhoˉvaˬ ve hkawˇ coˇ caˇ leh hkʼa dehꞈ na sheˍ. Ngaˬ hui chi hkʼe te ve kʼo, chi teˇ hkui aˬ htoꞈ ma ve awˬ lawn gʼa hpuˇ ve htawˇ awˬ gʼuˇ suhˍ hpawˇ ngaˬ hui yeunˇ hkanˍ gʼa tuˬ yoˬ. Liꞈ hpu hkʼaw ngaˬ hui htaꞈ shaˍ tiꞈ peꞈ laˇ ve, “Gʼuiˬ sha ve a loˍ htaꞈ nawˬ hui te leh, yawˇ kʼoˆ taˍ ve hkʼe gʼa hpehꞈ tuˬ, yeunˇ hkanˍ puiˉ ve nyi ma htaꞈ nawˬ hui loˍ ve yoˬ.”—Heˍbrehˇ 10:36.