1-2. (a) Jehova uambolanga cwañi ni batu? (b) Lukanyakisisañi mwa taba ye?

JEHOVA walata kuambola ni luna. Kwamulaho, naaitusisize bapolofita, mangeloi, ni Mwanaa hae, yena Kreste Jesu, kutaluseza batu mihupulo yahae. (Amo. 3:7; Magal. 3:19; Sin. 1:1) Kacenu, ubulelanga ku luna ka kuitusisa Linzwi lahae, yona Bibele. Naalufile Linzwi lahae kuli lilutuse kuutwisisa mwaangela lika ni milelo yahae.

² Jesu hanaali fa lifasi, linzwi la Jehova neliutwahezi halaalu kuzwelela kwa lihalimu. Halunyakisiseñi zanaabulezi Jehova ka linako zetaalu zeo, zelukona kuituta kwa manzwi ahae, ni molutusezwa ki manzwi ao.

3. Ka kuya ka liñolo la Mareka 1:9-11, Jehova naabuleziñi Jesu hanaakolobezwa, mi manzwi ao aluluta lituto mañi za butokwa?

³ Kwa liñolo la Mareka 1:9-11, lubala za nako yeo Jehova naabulezi lwapili kuzwelela kwa lihalimu. (Mubale.) Naabulezi kuli: “Ki wena Mwanaka, yalatwa; yanitabisa.” Kusina kukakanya, Jesu naatiisizwe hahulu hanaautwile kuli Ndatahe naamulata mi naamusepile. Manzwi anaabulezi Jehova ao, aluluta lituto zetaalu ka za Jesu. Tuto yapili kikuli, Jesu ki Mwanaa Mulimu. Yabubeli kikuli, Jehova walata Mwanaa hae. Mi tuto yabulaalu kikuli, Jehova utabiswa ki Mwanaa hae. Halunyakisiseñi lituto zetaalu zeo ka butungi.

4. Jesu naabile cwañi Mwanaa Mulimu ka nzila yeipitezi hanaakolobezwa?

⁴ “Ki wena Mwanaka.” Jehova hanaabulezi manzwi ao, naabonisize kuli Jesu naabile Mwanaa hae ka nzila yeñwi yeipitezi. Ki niti kuli Jesu neli Mwanaa Mulimu pili asika taha  kale fa lifasi. Kono hanaakolobezwa, naabile Mwanaa Mulimu ka nzila yeipitezi. Naatozizwe ka moya okenile, mi naanani sepo ya kukutela kwa lihalimu kuyo ba Mulena ni Muprisita Yapahami yaketilwe ki Mulimu. (Luka 1:31-33; Maheb. 1:8, 9; 2:17) Ki lona libaka Jehova hanaabulelezi Jesu ka nako yanaakolobezwa kuli: “Ki wena Mwanaka.”—Luka 3:22.

5. Lukona kulikanyisa cwañi mutala wa Jehova wa kubonisa lilato ni kubabaza babañwi?

⁵ “Yalatwa.” Jehova ulutomezi mutala wa kubonisa lilato ni kubabaza babañwi, mi ni luna luswanela kuitusisa kolo yelunani yona kaufela kuli lususueze babañwi. (Joa. 5:20) Lwasusuezwangwa luli haiba mutu yomuñwi abonisa kuli walulata mi alubabaza kabakala nto yeñwi yende yeluezize. Kacwalo, ni luna luswanela kususueza ni kulata mizwale ni likaizeli baluna hamohocwalo ni banabahabo luna. Haiba lubabaza babañwi, lukatiisa tumelo yabona ni kubatusa kusebeleza Jehova ka busepahali. Bashemi sihulu baswanela kubabazanga bana babona. Haiba bashemi bababaza bana babona kuzwelela kwatasaa pilu ni kubabonisa lilato, baka batusa kueza hande kwa moya.

6. Ki kabakalañi haluswanela kusepa Jesu Kreste?

⁶ “Yanitabisa.” Pulelo ye ibonisa kuli Jehova naanani buikolwiso bwa kuli Jesu naakazwelapili kusepahala ni kueza tato ya Ndatahe. Haiba Jehova usepile Mwanaa hae cwalo, uzibe ni luna luswanela kusepa Jesu ka kutala kuli ukataleleza lisepiso kaufela zalufile Jehova. (2 Makor. 1:20) Haiba lunyakisisa mutala wa Jesu, lukasusuezwa kumulikanyisa. Jehova hape unani buikolwiso bwa kuli batanga bahae kaufela sina sikwata,  bakazwelapili kulikanyisa mutala wa Mwanaa hae.—1 Pit. 2:21.

7. Ka kuya ka liñolo la Mateu 17:1-5, ki nako ifi yeñwi yeo Jehova naabulezi kuzwelela kwa lihalimu, mi naabuleziñi?

⁷ Mubale Mateu 17:1-5. Jehova naabulezi lwabubeli kuzwelela kwa lihalimu, muta ‘ponahalo ya Jesu neifetuhile.’ Jesu naamemile Pitrosi, Jakobo, ni Joani kuya ni yena fa lilundu lelilumbile. Hane bali fa lilundu leo, babona pono yemakaza. Pata ya Jesu yabenya sina lizazi, mi liapalo zahae za fahalimu zabenya sina liseli. Mi kwabonahala baana bababeli babaswana ni Mushe ni Elia, mi bakalisa kubulela ni Jesu ka za lifu lahae ni kuzusiwa kwahae. Ka nako yeo, baapositola babalaalu bao ‘nebaswelwi ki buloko,’ kono hase bazuhile, babona pono yemakaza yeo. (Luka 9:29-32) Hasamulaho, lilu lelibenya labaapesa, mi bautwa linzwi la Mulimu kuzwelela mwa lilu leo. Sina feela mone kubezi ka nako yanaakolobezwa Jesu, Jehova naabonisize kuli naakatelwa Mwanaa hae, mi naamulata, ka kubulela kuli: “Yo ki Mwanaka, yalatwa, yanitabisa.” Kono ka nako ye, Jehova naaekelize kubulela kuli: “Mumuteeleze.”

8. Pono ya kufetuha kwa ponahalo ya Jesu, neitusize cwañi Jesu ni balutiwa bahae?

⁸ Pono yeo, neibonisa kanya ni maata anaaka fiwa Jesu ka nako yanaakaba Mulena wa Mubuso wa Mulimu. Kusina kukakanya, pono yeo neisusuelize hahulu Kreste, mi nei mutusize kutiyela manyando anaatalimani ni ona hasamulaho, hamohocwalo ni lifu. Pono yeo hape, neitiisize tumelo ya balutiwa, ni kubatusa kutiyela miliko yene batalimani ni yona hasamulaho, mi hape nei batusize kupeta zeñata mwa bukombwa. Hamulaho wa lilimo zebato ba 30 kuzwa fo, muapositola Pitrosi naabulezi za pono yeo, ili kubonisa kuli naasa ihupula.—2 Pit. 1:16-18.

9. Jesu naasusuelize balutiwa bahae kuezañi?

⁹ “Mumuteeleze.” Jehova naabonisize hande kuli ubata kuli luteeleze ku Mwanaa hae ni kumamela milao yahae. Ki lika mañi zanaabulezi Jesu hanaali fa lifasi? Naabulezi lika zeñata za butokwa. Ka mutala, ka lilato, naabonisize balateleli bahae mwakukutaleza taba yende, mi naakuta-kutezi kubahupulisa kuli baswanela kuzwelapili kutona. (Mat. 24:42; 28:19, 20) Hape naabasusuelize kuikataza kueza lika zende, ni kuli basike bazwafa. (Luka 13:24) Jesu naasusuelize hahulu balateleli bahae kuli balatane, baswalisane, mi bamamele milao yahae. (Joa. 15:10, 12, 13) Litaba zanaa babulelezi neli batusize luli! Litaba zeswana zeo zakona kulutusa ni luna kacenu.

10-11. Lukona kubonisa cwañi kuli lwateeleza ku Jesu?

¹⁰ Jesu naabulezi kuli: “Mutu kaufela ya kwa lineku la niti uteeleza kwa linzwi laka.” (Joa. 18:37) Nzila yeñwi yelukona kubonisa ka yona kuli lwateeleza kwa linzwi lahae ki ka ‘kuzwelapili kutuhelelana ni kuswalelana ka pilu kaufela.’ (Makolo. 3:13; Luka 17:3, 4) Hape, lukona kubonisa kuli lwateeleza kwa linzwi lahae, halukutaza taba yende ka kutukufalelwa “mwa linako zende ni mwa linako zetaata.”—2 Tim. 4:2.

¹¹ Jesu naabulezi kuli: “Lingu zaka liteeleza kwa linzwi laka.” (Joa. 10:27) Balateleli ba Kreste babonisa kuli bateeleza ku Jesu isiñi feela ka kuutwa litaba zabulela, kono ni kueza zababulelela. Habayaululwi ki “lipilaelo za bupilo.” (Luka 21:34) Kono nto ya butokwa mwa bupilo bwabona ki kumamela milao ya Jesu niha kukona kuba taata kueza cwalo.  Mizwale baluna babañata bakopana ni miinelo yetaata yecwale ka twaniso, bubotana, ni likozi za ka taho. Kono kusina taba ni miinelo yeo kaufela, bazwelapili kusepahala ku Jehova. Jesu ubasepisa kuli: “Mutu kaufela yanani milao yaka mi aimamela ki yena yanilata. Mi mutu kaufela yanilata ukalatwa ki Ndate.”—Joa. 14:21.

12. Ki ifi nzila yeñwi yelukona kubonisa ka yona kuli lwateeleza ku Jesu?

¹² Nzila yeñwi hape yelukona kubonisa ka yona kuli lwateeleza ku Jesu ki ka kuutwa baana baketile kuli baokamele mwa kopano. (Maheb. 13:7, 17) Cwanoñu fa, kuezizwe licinceho zeñata mwa kopano ya Mulimu, zecwale ka lihatiso zenca za kuitusisa mwa bukombwa ni mikutalezo yeminca, licinceho ka za moiezezwa mikopano ya mwahalaa sunda, miyahelo yeminca, hamohocwalo ni licinceho za mwakulukiseza ni mwakubabalelela Mandu A Mubuso. Kaniti luli, lwaitebuha ketelelo yende yeo yelufiwa! Lunani buikolwiso bwa kuli Jehova uka lufuyaula haiba luzwelapili kulatelela ketelelo yelufiwa ki kopano yahae.

13. Lukatusiwa cwañi haiba luteeleza ku Jesu?

¹³ Haiba lumamela manzwi kaufela anaabulezi Jesu, lukatusiwa. Jesu naasepisize balutiwa bahae kuli lituto zahae nelika bakatulusa. Naabulezi kuli: “Mukakatuluha. Kakuli coko yaka ibunolo, mi mulwalo waka ububebe.” (Mat. 11:28-30) Linzwi la Mulimu, mona mokufumaneha libuka za Evangeli zebulela za bupilo bwa Jesu ni bukombwa bwahae, lalukatulusa, lilukutiseza maata, ni kulutalifisa. (Samu 19:7; 23:3) Jesu naabulezi kuli: “Babatabile . . . ki babautwa linzwi la Mulimu ni kulimamela!”—Luka 11:28.

14-15. (a) Ka kuya ka liñolo la Joani 12:27, 28, ki nako ifi yeñwi yeo Jehova naabulezi kuzwelela kwa lihalimu lwabulaalu? (b) Ki kabakalañi manzwi anaabulezi Jehova hanaakona kuomba-omba ni kutiisa Jesu?

¹⁴ Mubale Joani 12:27, 28. Buka ya Evangeli ya Joani italusa za nako yeñwi yeo Mulimu naabulezi kuzwelela kwa lihalimu lwabulaalu. Mazazi asikai pili Jesu asika bulaiwa kale, naaile kwa Jerusalema kuli ayo fumaneha kwa Paseka lwa mafelelezo. Naabulezi kuli: “Niziyelehile.” Hasamulaho, alapela kuli: “Ndate, kanyisa libizo lahao.” Mi autwa Ndatahe habulela kuzwelela kwa lihalimu kuli: “Nilikanyisize mi nika likanyisa hape.”

 ¹⁵ Jesu naaikutwile kuziyeleha kabakala kuli naaziba kuli naanani buikalabelo bobutuna bwa kuzwelapili kusepahala ku Jehova. Jesu naaziba kuli naakanyandiswa maswe ni kubulaiwa ka nzila yesituhu. (Mat. 26:38) Kono sa butokwa nikufita kikuli, naabata kukanyisa libizo la Ndatahe. Naatamelelizwe mulatu wa kuli naanyefuzi Mulimu, mi naaikalezwi kuli lifu lahae nelika shwaulisa libizo la Mulimu. Kaniti, Jesu naatiisizwe hahulu hanaautwile manzwi a Jehova! Manzwi ao naamutusize kuziba kuli libizo la Jehova nelika kanyiswa. Manzwi anaabulezi Ndatahe, aswanela kuba anaaomba-ombile Jesu ni kumutusa kutiyela manyando anaatalimani ni ona hasamulaho. Nihaike kuli mwendi Jesu ki yena feela yanaautwisisize zanaabulezi Ndatahe ka nako yeo, Jehova naaboni teñi kuli manzwi anaabulezi añolwa mwa Bibele kuli kaufelaa luna lutusiwe.—Joa. 12:29, 30.

16. Ki lika mañi zekona kutahisa kuli luikalelwe kuli libizo la Mulimu likashubulwa?

¹⁶ Ka kuswana ni Jesu, ni luna lukana lwaikalelwa kuli libizo la Jehova likashubulwa. Ni luna mwendi lwanyandiswa sina Jesu. Kamba mwendi lubilaezwa ki litaba za buhata zebasweli kuhasanya batu baba lulwanisa. Lukona kuikutwa bumaswe kabakala kuli litaba zeo lisinya libizo la Jehova ni kopano yahae. Mwa muinelo ocwalo, manzwi anaabulezi Jehova akona kuluomba-omba.  Halutokwi kuikalelwa hahulu. Luswanela kuba ni buikolwiso bwa kuli “kozo ya Mulimu yefita kutwisiso kaufela ikasileleza lipilu [zaluna] ni maata [aluna] a kunahana ka Kreste Jesu.” (Mafil. 4:6, 7) Jehova haana kupalelwa kukanyisa libizo lahae. Ukaitusisa Mubuso wahae kufelisa lika kaufela zemaswe zalutahiselize Satani ni lifasi lahae.—Samu 94:22, 23; Isa. 65:17.

17. Ka kuya ka liñolo la Isaya 30:21, Jehova ubulela cwañi ku luna kacenu?

¹⁷ Jehova usabulela ku luna kacenu. (Mubale Isaya 30:21.) Ki niti kuli haluutwangi linzwi la Mulimu halibulela kuzwelela kwa lihalimu. Nihakulicwalo, Mulimu ulufanga litaelo ka kuitusisa Linzwi lahae, yona Bibele. Kutuha fo, moya wa Jehova utusanga “sikombwa yasepahala” kuli azwelepili kufa batanga ba Mulimu lico za kwa moya. (Luka 12:42) Kaniti, lunani lico zeñata za kwa moya zelufilwe zecwale ka lihatiso, litaba za fa webusaiti yaluna, mavidio, ni litaba za kuteeleza feela!

18. Manzwi a Jehova akona kutiisa cwañi tumelo yamina ni kumitusa kuba ni bundume?

¹⁸ Luzweleñipili kuhupulanga manzwi anaabulezi Jehova ka nako yanaasa pila Mwanaa hae fa lifasi. Haike manzwi a Mulimu, ona añozwi mwa Bibele, azwelepili kulutusa kuba ni buikolwiso bwa kuli Jehova ukafelisa bumaswe kaufela bwatisize Satani ni lifasi lahae kakuli unani maata amatuna hahulu. Mi haike luikatulele kuteeleza ku Jehova ka tokomelo. Haiba lueza cwalo, lukakona kutiyela miinelo yetaata kaufela yelutalimana ni yona kacenu, ni miinelo yeluka kopana ni yona kwapili. Bibele ibulela kuli: “Mutokwa kuba ni buitiiso, ilikuli hase muezize tato ya Mulimu, mukone kufiwa semusepisizwe.”—Maheb. 10:36.