SULA MAR PUONJRUOK 11
Winj Dwond Jehova
“Ma Wuoda . . . Winjeuru.”—MAT. 17:5.
WER 89 Chik Iti, Iwinj, Mondo Oguedhi
GIMA SULANI WUOYE *
1-2. (a) Jehova osebedo ka tiyo gi yore mage e wuoyo gi dhano? (b) Ang’o ma wadwaro nono?
JEHOVA ohero wuoyo kodwa. E kinde machon, nowuoyo gi dhano kotiyo gi jonabi, malaike, kod Yesu Kristo Wuode. (Amos 3:7; Gal. 3:19; Fwe. 1:1) E ndalowagi, owuoyo kodwa kokalo kuom Wachne ma en Muma. Omiyowa Muma mondo Muma okonywa fwenyo pache kod yorene.
2 Ka ne Yesu ni e piny, nitie kinde ma dwond Jehova nowinjore nyadidek koa e polo. We wanon ane weche ma Jehova nowacho, puonj ma wayudo kuom wechego, kod ber ma wechego kelonwa.
“IN WUODA MA AHERO”
3. Kaka oler e Mariko 1:9-11, ang’o ma Jehova nowacho ka nobatis Yesu, to wechego nojiwo ang’o?
3 Mariko 1:9-11 nyisowa chieng’ mokwongo ma dwond Jehova nowinjore kowuok e polo e kinde ma Yesu ne ni e piny. (Som.) Jehova nowacho kama: “In Wuoda ma ahero; aseyie kodi.” Nyaka bed ni Yesu ne mor ahinya ka nowinjo ka Wuon-gi wacho wechego! Weche ma Jehova nowachogo nojiwo gik moko adek madongo kuom Yesu. Mokwongo en ni Yesu en Wuode. Mar ariyo en ni Jehova ohero Wuodeno. To mar adek en ni Jehova oyie gi Wuodeno. Wanon ane moro ka moro kuom wechego e yo matut.
4. Ka ne obatis Yesu, en winjruok mane manyien ma nodonje gi Jehova?
4 “In Wuoda.” Ka ne Jehova owacho wechego, nonyiso ni Wuode moherono koro nodonjo e winjruok manyien kode. E kinde ma Yesu pok nobiro e piny ka, ne en achiel kuom yawuot Nyasaye ma gin chuech mag roho. Sama ne obatise, nowale gi roho maler. E sechego, Nyasaye nonyiso ni nikech nosewal Yesu Wuode, koro ne en gi geno mar dok e polo mondo okete obed Ruoth kendo Jadolo Maduong’. (Luka 1:31-33; Hib. 1:8, 9; 2:17) Kare ne en gima owinjore mondo Wuon-gi owachne ni, “In Wuoda,” sama ne obatise.—Luka 3:22.
Sama ipwoyowa kendo ijiwowa, mano miyowa mijing’o mar timo maber moloyo (Ne paragraf mar 5) *
5. Ere kaka wanyalo luwo ranyisi mar Jehova e nyiso jomamoko hera kendo jiwogi?
5 “Ma ahero.” Bedo ni Jehova nowacho gi dhoge kaka ohero Yesu kendo omor kode paronwa ni wan be onego wamanyga thuolo mag jiwo jomamoko. (Joh. 5:20) Sama ng’at ma wageno nyiso kaka oherowa kendo opwoyowa kuom gik mabeyo ma watimo, wawinjoga maber ahinya kendo mano miyowa mijing’o mar timo maber moloyo. E yo ma kamano, joodwa kod owete gi nyimine ma wan-go e kanyakla winjoga maber sama wanyiso ni waherogi kendo wajiwogi. Sama wapwoyo jowetewa, wamiyogi mijing’o mar dhi nyime makore gi Jehova. To ahinya-ahinya, jonyuol onego ojiw nyithindgi kendo gipwogi. Sama gitimo kamano kowuok e chunygi kendo e yor hera, mano miyo nyithindogo winjo maber kendo gibedo motegno.
6. Ang’o momiyo wanyalo bedo gadier ni Yesu Kristo biro chopo gik ma Jehova osingo?
6 “Aseyie kodi.” Wechegi nyiso ni Jehova ne ni gadier ni Yesu ne dhi makore kode kendo timo tich ma nomiye nyaka giko. Ka Jehova ni gadier gi Wuode kamano, donge wan to koro onego wabed gadier chuth ni Yesu biro timo duto ma dwarore e chopo gik ma Jehova osingo? (2 Kor. 1:20) Ka waparo matut kuom ranyisi ma Yesu noketo, mano chwalowa mondo wadhi nyime puonjore mathoth kuome kendo luwo ondamone. Jehova ni gadier bende ni jotichne—ka gin kaka oganda—biro dhi nyime puonjore gik mathoth kuom Wuode.—1 Pet. 2:21.
“WINJEURU”
7. Ka luwore gi Mathayo 17:1-5, en karang’o kendo ma dwond Jehova nowinjore kowuok e polo, to nowacho ang’o?
7 Som Mathayo 17:1-5. Chieng’ mar ariyo ma dwond Jehova nowinjore kowuok e polo en chieng’ ma “kit Yesu nolokore.” Noyudo Yesu nigi Petro, Jakobo, kod Johana e wi got moro. Ka ne gin kanyo, ne gineno fweny moro makende. Lela wang’ Yesu kod lepe ne orieny. Ranyisi moko ariyo ma chalo gi Musa kod Elija nochako wuoyo gi Yesu e wi thone kod chierne. Kata obedo ni nindo nonuro Petro, Jakobo, kod Johana, sama honono notimore noyudo ka nindo pok oterogi, omiyo, ne gineno honono maber ahinya. (Luka 9:29-32) Kae to boche polo noumogi, kendo ne giwinjo dwol moro e i bochego, mana dwond Jehova owuon! Jehova notimo mana gima nosetimo ka ne obatis Yesu. Nowacho kama: “Ma Wuoda ma ahero, ma aseyiego.” Kae to wang’ni to Jehova nomedo ni, “Winjeuru.”
8. Fweny ma Yesu kod jopuonjrene noneno nokonyogi nade?
8 Fwenyno nonyiso motelo kaka Yesu ne dhi bedo gi duong’ kod teko ka koro osekete obedo Ruoth e Pinyruodh Nyasaye. Onge kiawa ni fwenyno nojiwo Yesu kendo miye teko mar nano e sand kod tho ma nochome. Fwenyno nojiwo bende yie mar jopuonjre Yesu kendo notegogi ne tembe ma ne gidhi romogo kod tich maduong’ ma ne gidhi timo. Higni 30 bang’e, jaote Petro nowuoyo kuom fwenyno e yo ma nyiso ni pod nopare maber ahinya.—2 Pet. 1:16-18.
9. Gin weche mage ma Yesu nowacho monego jopuonjrene owinj?
9 “Winjeuru.” Jehova nonyiso maler ni odwaro ni wawinj weche Wuode kendo wati gi wechenego. Gin weche mage ma Yesu nowacho ka ne en e piny ka? Nowacho gik mang’eny monego wawinj. Kuom ranyisi, nopuonjo jolupne kaka ne ginyalo yalo wach maber, kendo nonyisogi nyading’eny ni gisik ka gineno. (Mat. 24:42; 28:19, 20) Nojiwogi bende ni giked matek ne ngima mochwere, kendo kik chunygi ol. (Luka 13:24) Yesu nowacho bende gimomiyo dwarore ni jolupne oherre, gisik e achiel, kendo giluw chikene. (Joh. 15:10, 12, 13) Mago ne gin weche mowinjore ahinya! Wechego pod konyo e kindewagi mana kaka ne gikonyo e kinde ma Yesu nowachogie.
10-11. Ere kaka wanyalo nyiso ni wawinjo dwond Yesu?
10 Nitie kinde ma Yesu nowacho niya: “Ng’ato ka ng’ato man kor adiera winjo dwonda.” (Joh. 18:37) Wanyiso ni wawinjo dwond Yesu sama ‘wadhi nyime nano gi jowetewa kendo weyonegi kethogi gi chuny ma ni thuolo.’ (Kol. 3:13; Luka 17:3, 4) Yo machielo ma wanyisogo ni wawinjo dwond Yesu en yalo wach maber gi kinda, obed “e kinde ma weche beyo kata e kinde ma weche tek.”—2 Tim. 4:2.
11 Yesu nowacho bende niya: “Rombena winjo dwonda.” (Joh. 10:27) Jolup Kristo winjo dwonde kuom timo gik mowacho, to ok mana winjogi kende. Ok giyie mondo “parruok mag ngima” ogalgi. (Luka 21:34) Kar mano, gima giketo motelo en luwo chike Yesu kata mana sama weche tek. Owetewa mang’eny kalo e tembe, akwede mager, dhier, kod masiche moko ma ok nyal geng’, kaka yiengni piny. E wechego duto, gisiko ka gimakore gi Jehova kata ang’o ma timre. Yesu singonegi kama: “Ng’ato ang’ata ma nigi chikena kendo ma ritogi, mano e ng’at mohera. Kamano bende, ng’ato ang’ata mohera, Wuora biro here.”—Joh. 14:21.
Tijwa mar lendo konyowa dhi nyime winjo dwond Yesu (Ne paragraf mar 12) *
12. En yo mane machielo ma wanyalo nyisogo ni wawinjo dwond Yesu?
12 Yo machielo ma wanyalo nyisogo ni wawinjo dwond Yesu en luwo kaka joma oketo mondo otawa chikowa. (Hib. 13:7, 17) Higni ma sanigi, riwruok mar oganda Jehova osebedo ka timo lokruok mang’eny e yo ma watimogo gik moko. Lokruogego oriwo gik ma watiyogo e lendo, yore ma walendogo, kod chokruok ma kor juma. Giriwo bende yo ma wagerogo Ute Romo, kaka waritogi, kaachiel gi loso kuonde mokethore kuomgi. Wamor ahinya gi lokruok mabeyo ma timorego! Wan gadier chuth ni ka wadhi nyime luwo yo ma riwruok mar oganda Jehova tayowago, Jehova biro guedhowa.
13. Winjo Yesu kelo ber mage?
13 Sama wawinjo gik ma Yesu nopuonjo kendo tiyo gi gigo, wayudo ber mathoth. Yesu nosingo ne jolupne ni puonjge ne dhi duogo chunygi. Nowacho kama: ‘Ununwang’ yueyo nikech jok mara yom kendo ting’na yot.’ (Mat. 11:28-30) Wach Nyasaye—moriwo nyaka buge ang’wen mag Injili ma lero ngima Yesu kod tije—duogo chunywa, miyowa teko, kendo miyo wabedo mariek. (Zab. 19:7; 23:3) Yesu nowacho niya: “Joma mor gin jogo ma winjo wach Nyasaye kendo timo!”—Luka 11:28.
‘ABIRO MIYO NYINGA DUONG’’
14-15. (a) Yesu ne ni e chal mane chieng’ ma dwond Jehova nowinjore mar adek kowuok e polo kaka wasomo e Johana 12:27, 28? (b) Ang’o momiyo nyaka bed ni weche ma Jehova nowacho nohoyo chuny Yesu kendo miye teko?
14 Som Johana 12:27, 28. Injili mar Johana nyisowa chieng’ mar adek ma dwond Jehova nowinjoree kowuok e polo. Yesu ne ni Jerusalem e Pasaka mogik ka pok otho. Ka en kanyo, nowacho kama: “Chunya chandore.” Kae to nomedo ni, “Wuora, mi nyingi duong’.” Jehova nodwoke kama: “Asemiye duong’, kendo abiro miye duong’.”
15 Chuny Yesu ne chandore nikech ting’ mapek ma ne en-go mar siko komakore gi Jehova. Yesu nong’eyo ni ne idhi sande malit mi nege. (Mat. 26:38) To gima ne chando chunye moloyo en ni nodwaro ni omi nying Wuon-gi duong’. Ne odonjne ni noyanyo Nyasaye, kendo noneno ni thone ne dhi kelo ne Nyasaye wich-kuot. Donge nyaka bed ni weche ma ne Jehova owachogo noduogo chuny Yesu! Koro nonyalo bedo gadier ni nying Jehova ne idhi mi duong’. Weche ma Wuon-gi nowachogo nohoyo chunye kendo nomiye teko mar nano e masiche ma nodhi romogo. Kuom joma ne ni kanyo, samoro Yesu kende e ma ne owinjo tiend weche ma Wuon-gi nowachogo. Kata kamano, Jehova noneno ni ber ka ondik wechego e Muma mondo waduto wayud jip.—Joh. 12:29, 30.
Jehova biro miyo nyinge duong’ kendo reso joge (Ne paragraf mar 16) *
16. Ang’o momiyo chunywa nyaloga chandore sama ji ketho nying Jehova?
16 Mana kaka Yesu, wan be chunywa nyaloga chandore sama ji timo gik maricho ma ketho nying Jehova. Samoro wan be ji timonwa gik maricho kaka ne otim ne Yesu. Kata, nyalo bedo ni miriambo ma ji wacho kuomwa chando chunywa. Wanyaloga siko ka waparo kaka miriambogo ketho nying Jehova kod joge. E seche kaka mago, ka waparo weche ma Jehova nowacho e Johana 12:28, wayudo jip kendo chunywa bedo gi kue. Ok onego waparre mokalo tong’ e wi gik maricho ma ji wacho kuom Jehova kod Jonenone. Onego wabed gadier ni ‘kue mar Nyasaye ma loyo ng’eyo duto biro rito chunywa kod pachwa kokalo kuom Kristo Yesu.’ (Fil. 4:6, 7) Kinde duto, Jehova biro miyo nyinge duong’. Kokalo kuom Pinyruodhe, obiro tieko gik maricho duto ma Satan gi pinye marachni osebedo ka hinyogo jotichne.—Zab. 94:22, 23; Isa. 65:17.
WINJ DWOND JEHOVA MONDO IYUD BER E KINDEWAGI
17. Ka luwore gi Isaiah 30:21, Jehova wuoyo kodwa e yo mane e kindewagi?
17 Jehova pod wuoyoga kodwa nyaka sani. (Som Isaiah 30:21.) En adier ni ok wanyal winjo dwonde achiel kachiel kowuok e polo. Kata kamano, kokalo kuom Wachne ma en Muma, owuoyo kodwa konyisowa gik monego watim. E wi mano, otayo “jarit mogen” gi rohone mondo jaritno odhi nyime miyo jotichne chiemb chuny. (Luka 12:42) To mano kaka wayudo chiemb chuny modhuro! Moko igoyonwa e buk, moko ni e websaitwa, vidio bende thoth, to weche momak miwinjo bende ng’eny.
18. Ere kaka weche Jehova gero yieni kendo miyi chir?
18 Kinde duto wasikuru ka waparo weche ma Jehova nowacho ka ne Wuode ni e piny ka! Wayieuru mondo weche Jehova mondik e Muma okonywa bedo gadier ni ong’eyo kaka otayo weche, kendo ni obiro golonwa chandruok duto ma Satan kod piny marachni osebedo ka kelonwa. Wang’aduru e chunywa ni wabiro dhi nyime winjo dwond Jehova. Ka watimo kamano, wabiro nano maber e chandruok duto ma wan-go sani kod mamoko ma pod wabiro yudo nyime. Muma paronwa kama: “Dwarore ni ubed gi sinani mondo bang’ ka usetimo dwaro mar Nyasaye, gik ma ne osing ochopnu.”—Hib. 10:36.
WER 4 “Jehova e Jakwadha”
^ par. 5 E kinde ma Yesu ne ni e piny ka, dwond Jehova nowinjore nyadidek e odiechienge mopogore opogore. E achiel kuom odiechiengego, Jehova nonyiso jolup Kristo ni giwinj Wuode. E ndalowagi, Jehova wuoyo kodwa kokalo kuom Wachne ma en Muma moriwo nyaka gik ma Yesu nopuonjo kod riwruokne motiyogo e piny ka. Sulani wuoyo kuom ber ma wayudo sama wawinjo Jehova gi Yesu.
^ par. 52 WECHE MA LERO PICHNI: Jaduong’-kanyakla neno kaka jakony-tich moro konyo e rito ler e Od Romo kod kaka otimo kinda e migawo mar buge. Opwoye ahinya.
^ par. 54 WECHE MA LERO PICHNI: Owadwa moro gi chiege e piny Sierra Leone gwelo jalupo moro e chokruok.
^ par. 56 WECHE MA LERO PICHNI: Joneno ma timo chokruok e od owadwa moro e piny mogoye tijwa marfuk. Mondo kik jowasigu fwenygi mayot, ok girwakore kaka warwakorega ka wadhi e chokruok.
