CILONGESA 11
Tolilileni Kuli Yehova
“Ou ikeye munange . . . mutolilileni.”—MATEO 17:5.
MWASO 89 Muutwe, Mumamele, mi Mukafuyolwa
BILI MUNO MU CILONGESA *
1-2. (a) Yehova nasimutwiya bati na banu? (b) Bika bitusimutwiya muno mu cilongesa?
YEHOVA washaka kusimutwiya netu. Kusañulu, Yehova wapangesele tupolofweto, tungelo na Munendi Yesu Kilisitu mu kutuleka biyongola byendi. (Amo 3:7; Ngala 3:19; Kujo 1:1) Ano matangwa, ali na kusimutwiya netu kupangesa Lijwi lyendi Mbimbiliya. Natwanayo mangana itukwase kuzibuka cifwa cendi.
2 Ha simbu yakele Yesu hano hasi, Yehova wendekele lutatu kutundilila mwilu. Tusimutwiyeni ha byuma byendekele Yehova nebi bitulilongesaho na bubwa buli mu majwi endekele.
“YOBE U MUNANGE INJAZEMA”
3. (a) Ha simbu ibambwitikile Yesu, majwi muka endekele Yehova ali ku Mako 1:9-11? (b) Majwi endekele Yehova asholwele byuma muka bitatu bya seho?
3 Ku Mako 1:9-11 banamwesa simbu ya kulibanga yendekele Yehova kutundilila mwilu. (Tandeni.) Yehova wendekele ngwendi: “Yobe u Munange injazema. Njili na kubwahelela hali yobe.” Yesu wabwahelele kuziba Ishe amuleka ngwendi wamuzema na kumukulahela. Majwi endekele Yehova asholwele byuma bitatu bya seho. Ca kulibanga, asholwele ngwawo Yesu wapwa Munendi. Ca mu cibali, Yehova wazema Munendi. Ca mu citatu, Yehova akabwahelela hali Munendi. Tusimutwiyeni ha cuma na cuma cendekele Yehova.
4. Busamba muka bwabuha bwalikutile Yehova na Munendi Yesu ha simbu ibamumbwitikile?
4 “Yobe u Munange.” Awa majwi amwesa ngwawo Yehova walikutile busamba bwabuha na Munendi Yesu. Yesu mwakele mwilu, wapwile muna Njambi wa ku sipilitu. Oloni ha simbu ibamumbwitikile, bamubwabesele na sipilitu ya kujela. Ha simbu ije, Njambi wamwesele ngwendi Yesu ikeye Munendi wa kubwabesa kulumbununa ngwabo wakele na lilabelelo lya kwiluka mwilu na kukapwa Mwene na Kapilisitu Wakama ibanangula kuli Njambi. (Luka 1:31-33; Heve 1:8, 9; 2:17) Ebi bikebyo byalingisile Njambi endeke ngwendi “Yobe u Munange” ha simbu ibambwitikile Yesu.—Luka 3:22.
Tubwahelela nga bakwetu batushangala na kututakamesa (Taleni palagilafu 5) *
5. Twasa kutembwinina bati Yehova?
5 “Yobe. . . injazema.” Yehova natumwesa mwanja wa kuzema na kushangazala bakwetu. (Yowa 5:20) Tukabwahelela nga bakwetu batumwesa cizemo na kutushangazala ha byuma byabibwa bitunalingi. Mu ngila imo lika, netu tunapande kuzema na kushangazala bandolome na bandokazi na baka-naanga yetu. Nga tushangala bakwetu, likulahelo lyabo likanyama, co tubakwasa bapangele Yehova mu kulongwa. Bisemi banapande kushangazala bana babo. Nga bisemi bazema na kushangazala bana babo, co babakwasa bapwe ba kubwahelela.
6. Bika bitulingisa tukulahele Yesu?
6 “Njili na kubwahelela hali yobe.” Awa majwi amwesa ngwawo Yehova wakulahelele ngwendi Yesu asa kulinga cizango cendi. Netu twakulahela ngwetu Yesu asa kulinga byuma byoshe byanakulahesa Yehova, mwafwa Yehova nendi namukulahela. (2 Koli 1:20) Nga tusinganyekesesa ha mwanja wa Yesu, co tumutembwinina. Yehova wakulahelele Yesu, ngeci netu natukulahela ngwendi twasa kutwalelelaho kutembwinina Munendi.—1 Petu 2:21.
“MUTOLILILENI”
7. Kwesekesa na Mateo 17:1-5, simbu muka ije Yehova wendekele kutundilila mwilu, co bika byendekele?
7 Tandeni Mateo 17:1-5. Simbu ya mu cibali yendekele Yehova kutundilila mwilu yapwile simbu ya cimona cije Yesu wemukile mweka. Yesu walekele Petulu, Yakomba na Yowano ngwendi baye nendi ha munkinda. Mubakele haje ha munkinda bamwene cimona cije cabakomokesele. Cihanga ca Yesu cabyazimine, co buzalo bwendi bwatokele ngwe ceke. Banu babali baje bemanenene Mosesa na Elinja bakele na kwendeka na Yesu bya kutsa na kusanguka kwendi. Nameme mesho a baje tupositolo batatu alemene na tulo, oloni bamwene cije cimona ca kukomokesa mubanyangumukile. (Luka 9:29-32) Kutundaho lishelwa lyabafwikile, co bazibile lijwi litundilila mu lishelwa. Lije lijwi lyapwile lya Njambi. Yehova wendekele majwi a kulifwa ngwe aje endekele ha litangwa libambwitikile Yesu. Wendekele ngwendi: “Ou ikeye Munange injazema, njili na kubwahelela hali ikeye.” Oloni aha wabwezeleleleko ngwendi: “Mutolilileni.”
8. Cije cimona cakwasele bati Yesu na bandongesi bendi?
8 Cije cimona camwesele bumpau bwakakala nabwo Yesu ha kupwa Mwene wa Bumwene bwa Njambi. Co lalo cazembelekele Yesu na kumukanyamesa, mwafwa wapandele kwita mu tuyando na kutsa. Tupositolo nabo bakanyamene mubamwene cije cimona, mwafwa nabo bapandele kwita mu byeseko, co lalo cabakwasele bapange na nzili. Munima ya myaka 30, kapositolo Petulu wendekele bya cije cimona, oku kwamwesele ngwabo wacikele na kwanuka bwino byuma byamwene mu cimona.—2 Petu 1:16-18.
9. Binangulo muka byanene Yesu kuli bandongesi bendi?
9 “Mutolilileni.” Awa majwi amwesa ngwawo Yehova atonda ngwendi tutolilile Munendi na kumwononoka. Bika byendekele Yesu mwakele hano hasi? Wendekele byuma byabingi bije bitunapande kutolilila. Cakumwenako, walongesele bandongesi bendi mwakwambulwila muzimbu waubwa, co lalo wabanangwile ngwendi bapwe ba kutona. (Mateo 24:42; 28:19, 20) Wabashongangeyeye ngwendi keti bazeye, oloni batwaleleleho kupanga na nzili. (Luka 13:24) Yesu walekele bandongesi bendi ngwendi balizeme, balikwatasane na kwononoka mashiko endi. (Yowa 15:10, 12, 13) Binangulo byanene Yesu kuli bandongesi bendi byabakwasele. Ebi binangulo bicili na kupanga.
10-11. Twasa kumwesa bati ngwetu tuli na kutolilila kuli Yesu?
10 Yesu wendekele ngwendi: “Woshe nakundama ku busunga atolilila majwi ange.” (Yowa 18:37) Nga mwecelela tupenga twa bakweni na kulikonekela umo na mukwabo, co mumwesa ngweni muli na kutolilila kuli Yesu. (Kolo 3:13; Luka 17:3, 4) Mumwesa lalo ngweni muli na kutolilila kuli Yesu nga mwambulula na nzili muzimbu waubwa mu simbu yaibwa na mu simbu yaikalu.—Tima 4:2.
11 Yesu wendekele ngwendi: “Bimanga bange [bakatolilila ku] lijwi lyange.” (Yowa 10:27) Baka-kukabangeya Kilisitu kubesi kutolilila lika kuli Yesu, oloni bakapangesa na byuma byabaleka. Kubesi kwecelela bishoti bibatanganese. (Luka 21:34) Oloni bamona ngwabo kwononoka Yesu kwa seho manene nameme byuma bikaluwe bati. Bwingi bwa bandolome betu bali na kulifwita na bukalu bwa kubalwisa, buhutu na bukalu bwa kulizila. Nameme bali na kuliwana na bukalu bwa cifwa eci, banatwalelelaho kupwa ba kulongwa kuli Yehova. Yesu nabakulahesa ngwendi: “Woshe uje natambula mashiko ange na kuwononoka ikeye uje anjizema. Co Tate akazema woshe uje anjizema.”—Yowa 14:21.
Cipangi ca kwambulula citukwasa tupwe ba kutona (Taleni palagilafu 12) *
12. Ngila muka ikwabo itwasa kumweselamo ngwetu tuli na kutolilila kuli Yesu?
12 Ngila ikwabo itwasa kumweselamo ngwetu tuli na kutolilila kuli Yesu inapu kulikwatasana na baje banangula ngwendi batutwamenene. (Heve 13:7, 17) Mu myaka ino, munga ya Njambi inatengululako byuma byabingi. Cakumwenako, twashangumuka kupangesa bikwata byabiha na bingila byeka bya kwambulwilamo. Co biwano byetu bya mukati ka calumingo nabyo binatenguluka. Co lalo tungisi na bingila bya kunyungilamo Binjubo byetu bya Bumwene binatenguluka. Tuli na kukandelela ha kututwamenena mwamubwa. Nga tulinga byuma biili na kutuleka munga yendi, co Yehova atubezikisa.
13. Bubwa muka butuwana nga tutolilila ku byuma byalongesele Yesu?
13 Muli bubwa bwakama mu kutolilila ku byuma byalongesele Yesu. Yesu walekele bandongesi bendi ngwendi bilongesa byendi bibashubulwisa. Wabalekele ngwendi: “Mukawana kuhwima ku myonyo yeni. Omwo [njoko] yange yayasi, na citelele cange cacehu.” (Mateo 11:28-30) Mu Mbimbiliya muli biñanda bije bimwesa buyoye bwa Yesu na cipangi cendi. Ebi biñanda bitutakamesa ku sipilitu na kutwana mana. (Myaso 19:7; 23:3) Yesu wendekele ngwendi: “Banabezika baje baziba lijwi lya Njambi na kulyononoka.”—Luka 11:28.
‘NJIKASHANGAZALA LIZINA LYANGE’
14-15. Kwesekesa na mukanda wa Yowano 12:27, 28 simbu muka ya mu citatu yendekele Yehova kutundilila mwilu? (b) Bika twendekela ngwetu majwi a Yehova azembelekele Yesu na kumutakamesa?
14 Tandeni Yowano 12:27, 28. Mukanda wa Yowano umwesa simbu ya mu citatu yendekele Yehova kutundilila mwilu. Yesu wakele mu Yelusalema ku cilika ca Paseka te kunasala lika matangwa amandondo kweta ku kutsa kwendi. Yesu wendekele ngwendi: “Mbunge yange ili na kuyanda.” Ngeci, walombelele ngwendi: “Tate, shangazala [amesa] lizina lyobe.” Co Ishe wamukumbulwile kutundulila mwilu ngwendi: “Njinalishangazala [njinalyamesa] laja, co njikalishangazala [njikalyamesa] lalo.”
15 Yesu walishoshomwenene mwafwa washakele kupwa wa kulongwa kuli Yehova. Yesu wazibukile ngwendi bakamuyandesa manene na kumutsiya. (Mateo 26:38) Nameme ngoco, ikeye washakele kwamesa lizina lya Ishe. Yesu bamubangeyeye ngwabo wapwile muka-kushaula, co washotele mbunge ngwendi kutsa kwendi kulingisa banu bashaule Njambi. Ngeci, majwi a Yehova atakamesele Yesu. Wakulahelele ngwendi lizina lya Yehova balyamesa. Majwi a Ishe amuzembelekele mangana akolese mu bukalu buje bwakele na kwija kulutwe. Nameme Yesu lika ikeye wazibisisile byendekele Ishe, oloni Yehova wasonekele aje majwi endi mu Mbimbiliya mangana netu atukwase.—Yowa 12:29, 30.
Yehova akamesa lizina lyendi na kwobola banu bendi (Taleni palagilafu 16) *
16. Twasa kuliziba bati nga banu bashaula lizina lya Njambi?
16 Ngeci mwa Yesu, netu twasa kushota mbunge nga banu bashaula lizina lya Yehova. Hamo netu bali na kutulinga mwamubi ngwe mubalingile Yesu. Indi hamo tuli na kuliziba kubihya mwafwa ya biñanda bya makuli bibakatwendeka baka-kutulwisa. Twasa kulishoshomwena ngwetu ebi biñanda bishawisa lizina lya Yehova na munga yendi. Nga tuliziba ngoco, co majwi endekele Yehova atuzembeleka. Kutwapandele kushota manene mbunge ha banu baje bashaula lizina lya Yehova na munga yendi. Twakulahela ngwetu “kwoloka kwa Njambi, kuje munu na umo wahi asa kuzibisisa, kukanyunga biyongola byeni mwamubwa muli Kilisitu Yesu.” (Fili 4:6, 7) Yehova kasa kwonowa kwamesa lizina lyendi. Akapangesa Bumwene bwendi mu kutundisa mazilo oshe ananene Satana na kaye kendi hali bangamba ba Njambi ba kulongwa.—Myaso 94:22, 23; Isaya 65:17.
BUBWA BUTUWANA NGA TUTOLILILA KU LIJWI LYA YEHOVA
17. Kwesekesa na Isaya 30:21, Yehova ali na kwendeka bati netu?
17 Ano Matangwa, Yehova acili na kwendeka netu. (Tandeni Isaya 30:21.) Nameme ngoco, kutwesi kuziba Yehova endeka netu kutundilila mwilu. Oloni natwana Lijwi lyendi Mbimbiliya muje muli mashiko aje atukwasa. Kutundaho lalo sipilitu ya Yehova ili na kukwasa “ngamba wa kulongwa na kunyanyama” mangana ane banu ba Njambi byakulya bya ku sipilitu. (Luka 12:42) Tuli na byakulya byabingi bya ku sipilitu bya kufwa ngwe mabulu, mavidio na mabulu ali ha intaneti aje atukwasa tukanyame ku sipilitu.
18. Lijwi lya Yehova likanyamesa bati likulahelo lyetu?
18 Keti twibale majwi endekele Yehova kuli Munendi mwakele hano hasi. Tukulaheleni majwi a Njambi ali mu Mbimbiliya, aje amwesa ngwawo Yehova ali na nzili ya kumanesa mazilo oshe anatukwiti Satana na kaye kendi. Ngeci, tutolilileni mwamubwa ku lijwi lya Yehova. Nga tulinga ngoco, co tuhyana bukalu bwoshe butuli nabwo na buje bucija. Mbimbiliya ngwayo: “Munapande kupwa baka-kusimpa, ngeci mulinge cizango ca Njambi, co mukatambula bije byanakulahesa.”—Heve 10:36.
MWASO 4 “Jehova ki Mulisana Waka”
^ par. 5 Ha simbu yakele Yesu hano hasi, Yehova wendekele lutatu kutundilila mwilu. Simbu imo, Yehova washongangeyeye bandongesi ba Kilisitu ngwendi batolilile Munendi. Ano matangwa, Yehova akendeka netu kwitila mu Mbimbiliya, muje mutuwana bilongesa bya Yesu, co lalo akendeka netu kwitila mu munga yendi. Muno mu cilongesa, tusimutwiya bubwa butunda mu kutolilila kuli Yehova na Yesu.
^ par. 52 KULUMBUNUNA BIKUPULO: Mukulunu namono muka-kupangela ali na kujelesa Njubo ya Bumwene, co lalo namumono ali na kwana banu mabulu. Ngeci, ali na kumushangala.
^ par. 54 KULUMBUNUNA BIKUPULO: Baka-kulyambata ba ku Sierra Leone bali na kulanya muka-kutsiya bisi aye ku biwano.
^ par. 56 KULUMBUNUNA BIKUPULO: Bakaleho baje bali mu lifuti mubanashoko cipangi cetu bali na kulingila biwano mu njubo. Kubazalele ngwe baje bali ku biwano mangana keti babazibuke.
