1-2. a) Manannani Yehova cinwuulumanaawe atthu? b) Makohoni anhaleehu woopela mwaha?

YEHOVA unancivela cinene woolumana atthu. Khalayi, Yehova aawuulumana atthu aavarelaka nteko maporofeeta, malayikha ni Mwanawe, Yesu Kristu. (Amos 3:7; Akalas. 3:19; Apoka. 1:1) Ilelo, Yehova nonuulumana mbiiblyani. Ni Ibiiblya, hiiva ninaakhitiri ucuwela inoopuwelaawe Yehova ni mananna cimpankaawe citthu.

² Ukati Yesu waaryaawe watuninyani, Yehova ahooluma wiirimu imaara tthaaru. Isiyani Yehova yoolumalyaawe uyo ukatyuuyo? Citthu coolumalyaawe maanaaya isiyani? Isiyani ineetthuceehu ni citthu coolumalyaawe? Ala phi makoho anhaleehu woopela mwaha.

3. Toko cinhimyaaya ilivuru ya Markus 1:9-11, isiyani Yehova yoolumalyaawe ukati Yesu waapattisiyaawe, ni moolumwaawe anthoonyera ikhweelini?

³ Ilivuru ya Markus 1:9-11 inaahimya ikwaha yoopacera Yehova yoolumalyaawe wiirimu. (Nsome.) Uyo aheera: “We uri Mwanaka, kinoofentaaka; mi kinaawaamini.” Mmuupuwele Yesu aviriyanaka ncu na Athumwaane yanfenta ni yankhuluvela. Unawoonannya wiira Yesu ahotteeliya cinene! Ayo moolumwaayo anaathoonyera ikhweeli cuulupale tthaaru ca Yesu. Yoopacera, Yesu Mwaana a Yehova. Yonayeeli, Yehova nanfenta Mwanawe. Ni yoneeraru, Yesu ahaaminiya ni Yehova. Nttwee noopele mwaha khula ikhweeli ca Yesu.

4. Manannani makina Yesu ciwaalyaawe akhalaka Mwaana a Nluku ukati waapattisiyaawe?

⁴ “We uri Mwanaka.” Ni ayo moolumwaayo, Yehova hothoonyera wiira ahancera waatanaca ni Yesu wo mananna  makina. Ukati Yesu waaryaawe wiirimu, uyo aari Mwaana a Nluku oomminepani. Masi ukati waapattisiyaawe, Yesu ahothanliya ni nnepa wootteela. Uyo ukatyuuyo, Nluku ahothoonyera wiira Yesu khampa Mwanawe oothanliya, aanaaweherera uturuwela-tho wiirimu wiira akhale Mwene ni Nankhutto Muulupale oothanliya ni Nluku. (Luka. 1:31-33; Mabere. 1:8, 9; 2:17) Phimaana, ukati Yesu waapattisiyaawe, Athumwaane yahaana isariya yoomwiirela: “We ukhanle Mwanaka.”—Luka 3:22.

5. Ninlamuliya untakiha cani Yehova ukati weeralyaawe wiira aananfenta Yesu?

⁵ “Kinoofentaaka.” Yehova aheera wiira aananfenta Yesu ni ahonttottopela. Iyo itthu yomaana inlamuliyeehu utakiha. Nihaana natothaka ukati wo waalipiha makhuva ni waattottopela akhwiihu. (Joau 5:20) Mwattottopeliyaka awula moonaka wiira atthu akina anawuuwacerani, nyuuva nnaakhalaka ootteeliya, keera? Inanna imoca, naattottopelaka amuciihu, asuulupaleehu ni asirokorihu o wanlokoni anaakhala ootteeliya. Ayo anaapheela wiira naafente ni naalipihe makhuva. Nanttottopelaka ntthu, waamini wawe unaalipa cinene ni naatepa ulakela unvaresesa Yehova. Uttottopela unaareera, utepa wakhala wiira nhaana asaana. Mwaattottopele asaaneenyu weekhweeli ni mwaawacere ratta khula ukati unhaleenyu ukhitiri upanka iyo. Mwapanka commo, nnaahala waakavihera asaaneenyu wuunuwa ratta.

6. Nlattuni ninlamuliyeehu unkhuluvela Yesu Kristu?

⁶ “Mi kinaawaamini.” Ni ayo moolumwaayo, Yehova hothoonyera wiira nankhuluvela cinene Yesu. Yehova aanaakhuluvela wiira Yesu khaahala uhiya upanka ile impheelaaya Athumwaane. Ukhala wiira Yehova nankhuluvela Mwanawe, hiiva ciicammo pooti  unkhuluvela Yesu wiira naahala wiirannyeeha citthu cotheene Yehova cinikhuluvelihalyaawe. (2 Akor. 1:20) Noopuwelaka meettelo a Yesu, ninaatepa upheela wiitthucihiya ni uyo, ciicammo “uttharihelela meettelwaawe.” Khampa Yehova cankhuluvenlyaawe Yesu, Uyo naawaakhuluvela ale anonswalela, wiira khanhala uhiya wiitthuca ntakihero na Mwanawe.—1 Pet. 2:21.

7. Toko cinhimyaaya ilivuru ya Matewus 17:1-5, ikwahani yonayeeli Yehova oolumalyaawe wiirimu, ni oolumale isiyani?

⁷ Nsome Matewus 17:1-5. Ikwaha yonayeeli Yehova yoolumalyaawe wiirimu waari ukati Yesu ‘waarukunuwalyaawe ikhove’. Yesu aanoomwiihana Peturu, Tiyaku ni Joau wiira arwaace nkhayi wamwaakoni. Waaphiyalyaaya, maapostolu ooraaru “cahaakhitiri ikhove”. Masi yahokhumelela itthu yaavusale. Ayo yahoona iwooni yootikhiniha! Ikhove ya Yesu yahopharela ni ikuwo cawe ciicammo caanaapharela, nlattu wootepa utteela. Vano, alopwana eeli, Moses ni Eliyasi, yahancera umuulumana Yesu yoopelaka mwaha ukhwa ni wunwelelihiya wawe. (Luka 9:29-32) Woohipica, ayo yahokhuneliya ni nihutte noopharela ni yaheewa ncu naakhuma wanihutteni — naari ncu na Nluku! Toko coolumacilyaawe ukati waapattisiyaawe Yesu, Yehova aheera wiira aananfenta ni ahonttottopela Yesu. Uyo aheera: “Ula phiri Mwanaka, kinonfentaaka, kimmwaaminnyaaka.” Masi ila ikwaheela, Yehova aheera ciicammo: “Munviriyane.”

8. Iwooni yankavihenre cani Yesu ni maapostolu?

⁸ Iyo iwooniiyo yaathoonyera ikuru ni uttitthima waahalaawe ukhalana Yesu khampa Mwene o Umwene wa Nluku. Iwooniile yahonva ikuru Yesu ni yahonlipiha nrima, kontha woohipica, yaanaahala umphwanya mahuviho ni ukhwa woowerya. Ciicammo yaholipihaca waamini wo maapostolu, kontha imaannyaaya yaanaahala uttehiya ni yaahaana nteko mwinci woopheela upanka myaakha caahala uwa. Peturu khaaliyanle mena vakaani ile iwooniile, kontha hataa caviraka myaakha cookhalaka 30, uyo ahantikha iwooniile mmawarakhani wawe.—2 Pet. 1:16-18.

9. Ikanoni Yesu caavahalyaawe attharyaawe?

⁹ “Munviriyane.” Yehova hohimya ratta-raatta wiira ninlamuliya unviriyana Mwanawe ni umwiiwelela. Ukati Yesu waaryaawe watuninyani, uyo aheetthuciha attharyaawe citthu cofayita cinci. Ooniheraka nifento, uyo aheetthuciha ulalyeera ihapari comaana, ni imaara cinci ahoopusera wiira khayaalamuliya wiitthaala. (Mat. 24:42; 28:19, 20) Uyo ciicammo ahaasovenriha attharyaawe wiikurumica ni uvilela. (Luka 13:24) Yesu heetthuciha wiira attharyaawe anlamuliya ufentana, uhihiya wiiwanana ni wiiwelela citthu cinrumaawe. (Joau 15:10, 12, 13) Ikano Yesu caavahalyaawe attharyaawe yaakhala ule ukatyuule, caanaakavihera. Ni hiiva ilelo cinaanikavihera.

10-11. Ninlamuliya uthoonyera cani wiira ninanviriyana Yesu?

¹⁰ Yesu aheera: “Otheene ule ri mphantte wo ikhweeli naaviriyana ncu naka.” (Joau 18:37) Ahaavo mananna menci oothoonyera wiira ninaaviriyana ncu na Yesu. Inanna imoca ikhanle ‘uhihiya uvilelana ni ulevelelana ni iraati’. (Akol. 3:13; Luka 17:3, 4) Inanna ikhwaawe ikhanle wiikurumica ulalyeera ihapari comaana, “ukati woohirikarika ni hataa ukati woorikarika.”—2 Tim. 4:2.

¹¹ Yesu aheera: “Ikhontwaa caka cinaaviriyana ncu naka.” (Joau 10:27) Uviriyana moolumo a Yesu khunakhala wiiwa paasi ayo  moolumwaayo. Nihaana neettelaka. Phimaana atthari a Yesu khampheela wiitthaala nlattu wo “masukhuli omuukumini.” (Luka 21:34) Atthari a Yesu anoona ukhala itthu yuulupale cinene wiiwelela citthu cinrumaawe Yesu, hataa ukhalaka ukati woorikarikaca. Mayamunneehu enci anaavilela masankiho menci, toko ulupatthiya, umasikhini ni ihasara. Masi ayo khanonhiya Yehova, hataa yaakhumelelaka isiyani. Yesu nawaakhuluveliha ayo atthwaayo: “Ule notthuna ni neewelela citthu cinrumaaka phinkifenta. Vano ule nokifenta naahala ufentiya ni Apaapa.”—Joau 14:21.

12. Manannani makhwaawe ninlamuliyeehu uthoonyera wiira ninanviriyana Yesu?

¹² Ahaavo-tho mananna makhwaawe oothoonyera wiira ninanviriyana Yesu: waakavihera ale yaathanlalyaawe uhoolela. (Mabere. 13:7, 17) Myaakha coomalelannya, citthu cinci cihorukunusiya wamphwinkoni wa Yehova. Nihaana mananna makina oolalyeera, ahorukunusiya mapankeliyo nkutthaano weeriyari isumana ni nihaakhela malakihero annihimyera mananna ooteka ni urehererya Isalau Coomwene. Ninaasukhuru cinene marukunuso otheene ayo, kontha wahoopuweliya ratta ni apankiye ni nifento. Naamini ni nikupali wiira Yehova naahala univaha iparakha naahihiyeke wiikurumica utthara malakihero anvahiyeehu ni mphwinko wa Yehova.

13. Nanviriyanaka Yesu, ninkaviheriya cani?

¹³ Naviriyanaka citthu cotheene Yesu ciniitthucihalyaawe, ninaakaviheriya. Yesu ahaakhuluveliha attharyaawe wiira citthu ceetthucihaawe caanaahala waakhaliha ratta. Uyo aheera: “Nnaahala upwaanya utteeliya waroohoni winyu. Kontha nivanko awula nikonkwa naka niri nowoolwa ni nrintti kinoovahaakani khunlemela.” (Mat. 11:28-30) Nuulumo na Nluku, ninhela nhina invangeeliyu 4 cintaphulela ukumi ni nteko woolalyeera wa Yesu, ninaanikhaliha ratta, ninaanikhomaaliha mminepani ni ninaanikhaliha oocuwelaca. (Isaa. 19:7; 23:3) Yesu heetthuciha eeraka: “Ootteeliya akhanle atthu aneewelela moolumo a Nluku nuuttharenla!”—Luka 11:28.

14-15. a) Toko cinhimyaaya ilivuru ya Joau 12:27, 28, ikwahani yoneeraru Yehova oolumalyaawe wiirimu? b) Kontha isiyani moolumo a Yehova yahommaaliha ni yahonlipiha Yesu?

¹⁴ Nsome Joau 12:27, 28. Ivangeeliyu ya Joau inaahimya ikwaha yoneeraru Yehova oolumalyaawe wiirimu. Yahalaka mahuku vakaani hinaaya ukhwa, Yesu aari uYerusalemu, aarwaale uPaaskuwani oomalela aahalaawe  umuupuwelela. Yesu ahomwiirela Yehova: “Kiri ni masukhuli.” Vano Yesu phaalompaawe eeraka: “Paapa, nttitthimihe ncina ninyu.” Yoole ukatyuule, Yesu aheewa Athumwaane yaakhulaka wiirimu, yeeraka: “Mi kihottitthimiha ni kinaahala uttitthimiha-tho.”

¹⁵ Yesu aari ni masukhuli kontha ahaana nrintti muulupale. Uyo aanaacuwela wiira aanaahala utulumwiya mpaka wiiviya ni mananna oowerya. (Mat. 26:38) Unookhalaru commo, uyo ahaana anvaresesaka Yehova. Ni uttitthimiha ncina na Athumwaane, phaatepale unhiya Yesu ni masukhuli. Yesu ahootherihiya wuuluma citthu canruwana awula canveeha Nluku. Uyo khaapheela wiira citthu cootheriyaawe cinanarihe ncina na Yehova. Unawoonannya wiira khweeliini, itthu yoolumalyaawe Yehova yahommaaliha Yesu. Yesu pooti waakupalyaawe wiira ncina na Athumwaane naanaahala uttitthimihiya. Moolumo a Yehova yahommaaliha Yesu ni yahonlipiha wiira avilele citthu caahala unkhumelela. Ule ukatyuule, atthunaka Yesu veekhaawe phaacuwenle itthu Yehova yoolumalyaawe. Masi Yehova horuma wantikhiya mbiiblyani ayo moolumwaayo wiira anikavihere hiiva.—Joau 12:29, 30.

16. Citthuni cinnihiya ni masukhuli nlattu wo ncina na Yehova?

¹⁶ Toko Yesu, hiiva ciicammo khanimpheela wiira ncina na Yehova nuulumiye pusya. Ni khampa Yesu, atthunaka hiiva pooti upankiya citthu coohisariya. Awula pooti ukhalaka wiira hiiva unaanirusa cinene nawoonaka atthu yawuulumaka pusya apoovu a Yehova. Khunnitteela nrima nacuwelaka wiira citthu cowoothiya  cinoolumiya pooti unanariha ncina na Yehova ni mphwinkwaawe. Ceerannyaaka nnya citthunnya, khaninlamuliya utepa ukhala ni masukhuli. Ninlamuliya wuupuwela moolumo a Yehova ari nhina Joau 12:27, 28. Ni pooti wankupaliihu wiira “ineema ya Nluku, invikana moopuwelelo otheene, inaarwa usunka [nrimeehu] ni [moopuwelelweehu] iriyari wa Yesu Kristu.” (Afili. 4:6, 7) Khweeliini, Yehova naahala uttitthimiha ncina nawe. Avarelaka nteko Umwennyaawe, Yehova naahala umaliha mahuviho otheene Sotwani ni ituninyaawe yaawaanenlyaaya ale ahinhiya unswalela Nluku.—Isaa. 94:22, 23; Isai. 65:17.

17. Toko cinhimyaaya ilivuru ya Isaiya 30:21, ninviriyana cani ncu na Yehova ilelo?

¹⁷ Mahukwaala, Yehova nanlelo naawuulumana atthu. (Nsome Isaiya 30:21.) Ninawaamini wiira khanimmwiiwa Yehova oolumaka wiirimu. Masi uyo honivaha moolumwaawe yantikhiye mbiiblyani. Mbiiblyani, Yehova naaniitthuciha. Ciicammo, Yehova nanvarela nteko “nsatoro ookhuluvelyaa” wiira aavahe iyoolya yoominepani ale anonswalela. (Luka 12:42) Ninawaakhela iyoolya yoominepani yinci, toko ilivuru co makhanta ni co mwinternetini. Ciicammo, khacimala ividiyu ni coorumihaciya cinnikavihera ulipiha waamini wihu.

18. Kontha isiyani ukhala nuupuwelaka moolumo a Yehova unaanikhitiriha ukhuluvela cinene?

¹⁸ Khaninlamuliya uliyala citthu Yehova caamulumenlyaawe Yesu ukati waaryaawe watuninyani. Citthu Yehova coolumalyaawe cihantikhiya mbiiblyani ni cinaanikavihera ukupali wiira khiivo inooceelaawe. Moolumo a Yehova anaanikhuluveliha wiira uyo naahala umalamaliha mahuviho otheene awaanalyaawe Sotwani ni ituninyaawe. Khanimpheela uhiya uviriyana ratta ncu na Nlukweehu. Napankaka commo, ninaahala ukhitiri uvilela masakha otheene annikhumelela ilelo ni ale anhala unikhumelela wahoolo. Ibiiblya inaanuupusera: “Nyuuva nhaana nvilelaka, wiira mwapankaka intthunaawe Nluku, mwaakhele itthu ikhuluvelihiyeenyu.”—Mabere. 10:36.