1-2. a) A Zeova maana wãn n taas ninsaalbã a koeese? b) Bõe la d na n wɛgs sõs-kãnga pʋgẽ?

A ZEOVA sã n taasd ninsaalbã a koeese, a sũur noomame. Pĩnd wẽndẽ wã, a tũnuga ne no-rɛɛsdba, malɛgse, la a Zeezi Kirist sẽn yaa a Biigã, n gom ne ninsaalbã. (Amoos 3:7; Gal. 3:19; Vẽn. 1:1) Rũndã-rũndã, a tũnugda ne Biiblã sẽn yaa a Gomdã n taasd tõnd a koeesã. A sẽn kõ-d Biiblã, yaa sẽn na yɩl tɩ d bãng a tagsg bũmb wʋsg zugu, la d wʋm a manesem toɛy-toɛy võore.

² A Zeezi sẽn wa n be tẽngã zugã, naoor a tãab la b wʋm a Zeova sẽn zĩnd saasẽ n gome. D na n wɛgsa a sẽn yeel bũmb ninsã, n ges rẽ sẽn wilgd tõnd bũmb ninga, la sẽn nafd tõnd to-to.

3. Sã n yaa ne Mark 1:9-11 wã, a Zeezi sẽn deeg lisg n sa wã, bõe la a Zeova yeel-yã? A gom-kãensã wilgda bũmb a tãab sẽn tar yõod wʋsgo. Yaa bõe?

³ A Zeova sẽn na n zĩnd saasẽ n gom pipi n yeel bũmb ningã bee Mark 1:9-11 wã pʋgẽ. (Karm-y-yã.) A yeela a Zeezi yaa: “Fo yaa mam Bi-ribl-nongr sẽn ta mam yam zãnga.” A Zeezi sẽn wʋm a Ba wã sẽn yeel woto n na n wilg t’a nong-a lame, la t’a kɩs-a-la sɩdã, tog n kẽe a sũur hal sõma! A Zeova sẽn yeelã wilgda bũmb a tãab sẽn tar yõod wʋsgo. Pipi, a wilgame t’a Zeezi yaa a Biiga, yiib-n-soaba, t’a nonga a Biigã, la tãab-n-soaba, t’a Biigã taa a yam zãnga. D maneg n wɛgs goam a tãabã ball-balle.

4. A Zeezi lisgã tɛka, bõe n toeeme?

 ⁴ ‘Fo yaa mam Biiga.’ A Zeova sẽn yeel woto wã rat n wilgame t’a Zeezi lisgã tɛka, bũmb n toeeme. A sẽn wa n be saasẽ wã, a ra yaa Wẽnnaam biig sẽn yaa malɛka. La a lisgã tɛka, Wẽnnaam zae-a-la ne a vʋʋsem sõngã, t’a na n wa leb saasẽ, n tɩ lebg rĩm a sẽn yãke, la maan-kʋʋdb kãsma. (Luk 1:31-33; Ebre. 1:8, 9, MN; 2:17) Dẽnd Wẽnnaam bee bʋʋm la a sẽn yeel-a a lisgã sasa t’a yaa yẽ Biigã.—Luk 3:22.

5. Wãn to la d tõe n dɩk a Zeova togs-n-taare, n wilgd d taabã tɩ d nong-b lame, la d kengd b raoodo?

⁵ ‘Fo yaa mam bi-ribl-nongre.’ A Zeova sẽn yeel a Zeezi woto n na n wilg t’a nong-a lame, la t’a sũur yaa noog ne-a wã, tẽegda tõnd tɩ yɩta sõma tɩ d gũusdẽ tɩ d sã n paam segb fãa bɩ d keng d taabã raoodo. (Zã 5:20) Ned d sẽn nand wʋsg sã n maan bũmb sẽn wilgd t’a nonga tõndo, la a pẽg tõnd d tʋʋm-sõma yĩnga, noogda d sũur la paasd d pãnga. Woto me, d tẽed-n-taasã la d zakã neb ratame tɩ d mi n wilg-b tɩ d nong-b lame, la d keng b raoodo. D sã n pẽgd d taabã, paasda b tẽebã pãnga, la sõngd-b tɩ b kell n maan sɩd ne a Zeova. Sẽn yɩɩd fãa, yaa sõma tɩ roagdbã kengd b kambã raoodo. Roagdbã sã n minim n pẽgd b kambã ne pʋ-peelem, la b wilgd-b tɩ b nong-b lame, noogda kambã sũur la kengd b raoodo.

6. Bõe yĩng tɩ tõnd tõe n kɩs a Zeezi Kirist sɩda?

⁶ ‘Fo taa mam yam zãnga.’ Gom-kãensã wilgdame t’a Zeova ra kɩsa sɩd zãng t’a Zeezi na n maana yẽ raabã bal kɛpɩ. A Zeova sẽn kɩs a Biigã sɩd woto wã, tõnd me tõe n basa d yam zãnga, t’a Zeezi na n gesame tɩ bũmb nins fãa a Zeova sẽn pʋlmã pidsi. (2 Kor. 1:20) D sã n tagsd a Zeezi mak-sõngã  yelle, pʋd n na n kɩtame tɩ d rat n maneg n nang pãng n bãng-a n paase, la d rɩk a togs-n-taare. A Zeova kɩsa sɩd me t’a nin-buiidã na n ket n dɩkda yam a Biigã nengẽ, n tũud a naoã.—1 Pɩy. 2:21.

7. Sẽn zems ne Matye 17:1-5 wã, wakat bʋg yɛs la a Zeova zĩnd saasẽ n gome, la bõe la a yeel-yã?

⁷ Karm-y Matye 17:1-5. Naoor a yiib-n-soab a Zeova sẽn zĩnd saasẽ n gomã yɩɩ a Zeezi ‘tedgrã’ sasa. Baraarã, a Zeezi peega a Pɩyɛɛr ne a Zak la a Zã tɩ b rʋ tãn-luglug zugu. B sẽn wa n be be wã, b yãa bũmb sẽn sek yɛɛsgo: A Zeezi tedgame, t’a nengã rag n yãgda, t’a futã lebg peelse. Neb a yiib sẽn wõnd a Moyiiz ne a Eli n puki, n sɩng sõsg ne a Zeezi, n gomd a kũumã la a vʋʋgrã yelle. Baa gõeemã sẽn dag n namsd tʋm-tʋmdbã, b sẽn wa n na n yã bõn-makrã tɩ b nekame. (Luk 9:29-32) Rẽ poore, sawadg sẽn pɩnd n wa n lud-ba. B wʋma koɛɛg sẽn yi sawadgẽ wã. Yaa Wẽnnaam koɛɛga. Wa a sẽn da yeel a Zeezi lisgã sasa wã, a le yeelame t’a nonga a Biigã, la t’a taa a yam zãnga. A yeelame: “Ada yaa mam Bi-ribl-nongr sẽn ta mam yam zãnga.” La so-kãnga wã, a paasame yaa: “Kelg-y-yã-a.”

8. Wãn to la bõn-makrã sõng a Zeezi la a karen-biisã?

⁸ Tʋm-tʋmdbã sẽn yã bõn-makr ningã ra wilgda ziir la naam ning a Zeezi sẽn na n wa paame, a sã n wa lebg Wẽnnaam Rĩungã Rĩma. Kiristã sẽn da na n yã namsg la a ki kũ-toaagã, yaa vẽeneg tɩ woto kenga a pɛlga, n kõ-a raood t’a na n tõog toogo. Kenga a karen-biisã me tẽeb la kõ-b raoodo, bala bãmb me na n wa tʋma tʋʋmd ning a sẽn kõ-bã, la b paam makr buud toor-toore. Na maan yʋʋm 30 poore, tʋm-tʋmd a Pɩyɛɛr goma a Zeezi tedgrã b sẽn yã wã yelle, tɩ wilgdẽ t’a ra ket n tẽra sõma.—2 Pɩy. 1:16-18.

9. Sagl-sõma bʋs la a Zeezi kõ a karen-biisã?

⁹ “Kelg-y-yã-a.” A Zeova gom-kãngã wilgda vẽeneg t’a ratame tɩ tõnd kelg a Biigã goamã la d tũ. Bõe la a Zeezi togs nebã a sẽn wa n be tẽngã zugã? Bũmb wʋsg la a togs-yã, tɩ d segd n kelg neere! Wala makre, a zãmsa a karen-biisã b sẽn tog n moon koe-noogã to-to, la a togs-b n yɩlem tɩ b wɩng ne gũubu. (Mat. 24:42; 28:19, 20) A sagl-b lame me tɩ b nang pãng ne Wẽnnaam tũubu, la a yeel-b tɩ b modg n da koms raood n bas ye. (Luk 13:24) A wilga vẽeneg me tɩ yaa tɩlɛ ne a poorẽ dãmbã tɩ b nong taaba, la b kell n yɩ yam a yembre, la b tũud yẽ noyã. (Zã 15:10, 12, 13) Ad yaa sagl-sõma tɛkẽ! Hal ne rũndã, a saglsã yõod ket n waooga wa b togsgã wakatã.

10-11. Bõe la d tõe n maan tɩ wilg tɩ d kelgda a Zeezi?

¹⁰ A Zeezi leb n yeelame: “Ned ning fãa sẽn yaa sɩdã rẽnd kelgda mam koɛɛga.” (Zã 18:37) D sã n ket n ‘maand sũ-mar ne taaba, la d kõt taab sugri,’ wilgdame tɩ d kelgda a Zeezi koɛɛga. (Kol. 3:13, Wẽnnaam Sebre, 1983; Luk 17:3, 4) D sã n moond koe-noogã ne yẽesem “nana walla toog pʋgẽ,” wilgdame me tɩ d kelgda a Zeezi koɛɛga.—2 Tɩm. 4:2, Wẽnnaam Sebre, 1983.

¹¹ A Zeezi yeelame me yaa: “Mam piisã wʋmda mam koɛɛga.” (Zã 10:27) Kiristã poorẽ dãmbã pa kelgd a goamã neer bal ye. B tũudame. Yaa woto me n wilgd tɩ b wʋmda a koɛɛga. B pa basd tɩ “vɩɩmã yɛl yɩɩr” tiis-b ye. (Luk 21:34) Yaa a Zeezi noyã tũub la b lʋɩɩsd taoor b vɩɩmã pʋgẽ, baa sã n wa pa nana. D tẽed-n-taas wʋsg paamda nams-toaag tũudmã yĩnga. Kẽer me nengẽ,  yaa far wall sabab-wẽns n namsd-ba. La ne rẽ fãa, b maanda sɩd ne a Zeova, baa sẽn na n yɩ a soaba. A Zeezi yeela bũmb sẽn kõt nin-kãensã bas-m-yam. Ad a sẽn yeelã: “Ned ning sẽn talld-a mam tõodã n sakd-ba, yaa yẽnda soab n nong maam. Ned ning sẽn nong-a maam, m ba na n nong-a.”—Zã 14:21.

12. Bõe me la d tõe n maan tɩ wilg tɩ d kelgda a Zeezi?

¹² Ad bũmb a to me d sẽn tõe n maan tɩ wilg tɩ d kelgda a Zeezi: D sakd n tũud neb nins a sẽn yãk tɩ b lʋɩt tõnd taoorã. (Ebre. 13:7, 17) Bũmb wʋsg la siglgã toeem yʋʋmã noorã. Wala makre, b yiisa koe-moonegã tʋʋm-te-paala, la b wilg-d koɛɛgã taasg yam-paalse. D sẽn maand semennã pʋgẽ pipi tigsgã to-to wã me toeemame. Sẽn paase, d sẽn met Rĩungã rot to-to wã, d sẽn lebsd n manegd-b la d get b yell to-to wã me toeemame. D sũur nooma wʋsgo! Bala, woto fãa yaa tõnd neer yĩnga, tɩ wilgdẽ t’a Zeova siglgã nonga tõndo. D tõe n kɩsa sɩd t’a Zeova na n ning-d-la barka, d sẽn modgd n tũud a siglgã saglsã sẽn yaa sagls sẽn zems a wakatã.

13. D sã n kelgd a Zeezi, wãn to la nafd tõndo?

¹³ D sã n kelgd bũmb nins fãa a Zeezi sẽn zãms nebã, la d tũudẽ, nafd-d lame. A Zeezi ra yeela a karen-biisã vẽeneg tɩ yẽ sẽn zãmsd-b bũmb ninsã na n yols-b lame. Ad a sẽn yeele: “Mam na n kõo yãmb vʋʋsgo. . . . Bala, yubl-balgr ning mam sẽn pit yãmbã yaa faoogo, la zɩɩb ning mam sẽn tʋkd yãmbã yaa faasga.” (Mat. 11:28-30) D sã n karemd Wẽnnaam Gomdã, wala makre, evãnzill-dãmb a naasã sẽn gomd a Zeezi koe-moonegã la bũmb a taab a sẽn maan yellã, d paamda yolsgo, kengda d tẽebã, la kõt-d yam. (Yɩɩn. 19:8; 23:3) Ad a Zeezi sẽn yeele: “Yaa neb nins sẽn kelgd Wẽnnaam goamã n sakdẽ wã n tar barkã.”—Luk 11:28.

14-15. a) Wa Zã 12:27, 28 wã sẽn wilgdã, yɩɩ wakat bʋg la a Zeova sẽn zĩnd saasẽ n gom naoor a tãab-n-soabã? b) Bõe yĩng tɩ d yetẽ t’a gomdã tog n belsa a Zeezi la keng a raoodo?

¹⁴ Karm-y Zã 12:27, 28. Yaa a Zã sebrã pʋgẽ la b togs a Zeova sẽn zĩnd saasẽ n gom naoor a tãab-n-soabã. Yɩɩ a Zeezi kũumã ket tɩ rasem a wãna. A ra kẽnga Zerizalɛm n na n tɩ maan a yaoolem Pakã. Baraarã, a  Zeezi reng n yeelame yaa: “Sũ-sãang n tar maam.” Rẽ poore, a pʋʋsa a Zeova, n yeele: “M ba, waoog-y y yʋʋrã!” A Ba wã zĩnda saasẽ n leok yaa: “Mam waooga m yʋʋrã, la m na n le waoog-a lame yɛsa.”

¹⁵ A Zeezi ra maanda yɩɩre, bala, a ra miime t’a sẽn tog n kell n maan sɩd ne a Zeova wã yaa yel-kãseng sẽn zao yẽnda zugu. A ra miime me tɩ b na n nams-a-la wʋsgo, t’a ki kũ-toaaga. (Mat. 26:38) La sẽn yɩɩd menga, a ra rata ne a sũur fãa t’a Ba wã yʋʋr paam waoogre. B rõd-a lame t’a yaa wẽn-tʋʋsa, t’a ra maand yɩɩr tɩ Wẽnnaam yʋʋrã na n wa sãame, b sẽn na n kʋ-a rẽ yĩngã. Ad a Zeova sẽn yeel bũmb ning baraarã tog n kenga a raood hal sõma! A tõe n basa a yam t’a Zeova yʋʋrã na n paama waoogre. A Ba wã gom-kãensã leb n bels-a lame la keng a raoodo, t’a na n tõog toog baa ne namsg ning fãa a sẽn na n paamã. Wõnda neb kʋʋngã sʋka, yaa a Zeezi bal n wʋm a Ba wã gomdã võore. La baasgo, a Zeova kɩtame tɩ b gʋls a sẽn yeelã tõnd ned kam fãa yĩnga.—Zã 12:29, 30.

16. Bõe yĩng tɩ wakat ning bɩ d mi n maand yɩɩre, a Zeova yʋʋrã sãang yĩnga?

¹⁶ Wa a Zeezi, tõe tɩ tõnd me mi n maanda yɩɩr tɩ bũmb ning na sãam a Zeova yʋʋrã. Wala makre, tõe tɩ b maan-d-la kɛgr wa a Zeezi. Tõe me tɩ yaa ziri nins sɩdã kɩɩsdbã sẽn yelgdã n kɩt tɩ d maand yɩɩre. Tõeeme tɩ d tagsda b goamã sẽn sãamd a Zeova yʋʋre,  la sãamd a siglgã yʋʋrã. Sã n wa yaa woto, a Zeova sẽn yeel bũmb ningã tõe n bels-d-la wʋsgo. Pa segd tɩ d maan yɩɩr tɩ loog ye. D tõe n basa d yam tɩ ‘Wẽnnaam laafɩ wã sẽn yɩɩd ninsaalbã bãngr fãa wã na n gũu tõnd sũyã ne d tagsdã a Zeezi Kiris pʋga.’ (Fili. 4:6, 7) Wakat fãa, a Zeova kɩtdame t’a yʋʋrã paamd waoogre. Ne a Rĩungã maasem, a na n wa kɩtame tɩ wẽng ning fãa a Sʋɩtãan ne a dũniyã sẽn maan a nin-buiidã sa fasɩ.—Yɩɩn. 94:22, 23; Eza. 65:17.

17. Wa sẽn zems ne Ezayi 30:21 wã, wãn to la a Zeova gomd ne tõnd rũndã-rũndã?

¹⁷ Baa rũndã-rũndã, a Zeova ket n gomda ne tõndo. (Karm-y Ezayi 30:21.) Yaa sɩd t’a pa na n zĩnd saasẽ n gom tɩ d wʋm a koɛɛg ye. La a kɩtame tɩ b gʋls Biiblã sẽn yaa a Gomdã, n na n wilg tõnd a sẽn dat tɩ d maane. Sẽn paase, ne a vʋʋsem sõngã maasem, wakat fãa, tʋm-tʋmd sẽn tũud sɩdã kõta a nin-buiidã bũmb nins sẽn kengd b tẽebã. (Luk 12:42) D paamda sɛb buud toor-toore, la bũmb wʋsg sẽn be d sɩtã zugu. Wala makre, video-rãmba, la bũmb a taab d sẽn tõe n kelge. Hakɩɩka, bũmb nins d sẽn paamd d tẽebã kengr yĩngã waoogame!

18. Wãn to la a Zeova sẽn yeel bũmb ningã kengd yãmb tẽebã, la paasd y raoodo?

¹⁸ D ket n tẽegd a Zeova sẽn zĩnd saasẽ n togs koees ninsi, a Biigã sẽn wa n be tẽngã zugã. Bɩ a sẽn yeel bũmb ningã kɩt tɩ d kɩs sɩd tɩ bũmb kae n yɩɩd a pãnga, la t’a na n wa kɩtame tɩ zu-loees nins fãa a Sʋɩtãan ne a dũniyã sẽn wa ne wã sa fasɩ. Bɩ d fãa yãk yam n na n ket n kelgd a Zeova koɛɛgã neere. Rẽ, masã menga, d na n tõoga toog zu-loɛɛg buud fãa pʋgẽ, la d wa tõog me n mao ne zu-loees nins sẽn nan watã. Ad Biiblã sẽn yete: “Yãmb sɩd tog n nanga pãnga, tɩ yãmb sẽn maan Wẽnnaam daabã, y na reeg bũmb ning b sẽn kãab yãmbã.”—Ebre. 10:36.