1-2. (a) Ġeħova kif ikkomunika mal-​bnedmin? (b) X’se nikkunsidraw f’dan l-​artiklu?

ĠEĦOVA jħobb jikkomunika magħna. Fil-​passat, hu uża lill-​profeti, lill-​anġli, u lil Ibnu, Kristu Ġesù, biex inkunu nafu l-​ħsibijiet tiegħu. (Għam. 3:7; Gal. 3:19; Riv. 1:1) Illum, jikkomunika magħna permezz tal-​Kelma tiegħu, il-​Bibbja. Hu tahielna biex inkunu nistgħu nitgħallmu dwar il-​ħsibijiet tiegħu u nifhmu l-​mogħdijiet tiegħu.

² Meta Ġesù kien fuq l-​art, Ġeħova tkellem mis-​sema fi tliet okkażjonijiet. Ejja nikkunsidraw x’qal Ġeħova, x’nistgħu nitgħallmu minn kliemu, u kif nibbenefikaw minn dak li qal.

3. Bħalma naqraw f’​Marku 1:9-11, x’qal Ġeħova meta tgħammed Ġesù, u dan il-​kliem liema veritajiet importanti kkonferma?

³ F’​Marku 1:9-​11 hemm imniżżel dwar l-​ewwel okkażjoni li fiha Ġeħova tkellem mis-​sema. (Aqra.) Hu qal: “Int Ibni, il-​maħbub; jien approvajtek.” Min jaf kemm Ġesù ħassu grat meta semaʼ leħen Missieru jesprimi mħabba lejh u fiduċja fih! Kliem Ġeħova kkonferma tliet veritajiet importanti dwar Ġesù. L-​ewwel, Ġesù hu Ibnu. It-​tieni, Ġeħova jħobb lil Ibnu. U t-​tielet, Ġeħova approva lil Ibnu. Ejja neżaminaw sew kull waħda.

4. Fil-​magħmudija tiegħu, Ġesù daħal f’liema relazzjoni ġdida m’Alla?

⁴ “Int Ibni.” B’dan il-​kliem, Ġeħova wera li Ibnu l-​maħbub, Ġesù, kien daħal f’relazzjoni ġdida Miegħu. Meta Ġesù kien fis-​sema, hu kien iben spirtu t’Alla.  Madankollu, fil-​magħmudija tiegħu, ġie midluk bl-​ispirtu qaddis. F’dak il-​ħin, Alla wera li bħala l-​Iben midluk Tiegħu, Ġesù issa kellu t-​tama li jerġaʼ lura fis-​sema biex isir Sultan maħtur t’Alla u Qassis il-​Kbir. (Lq. 1:31-​33; Ebr. 1:8, 9; 2:17) Mela fil-​magħmudija taʼ Ġesù, Missieru kellu raġun jgħid: “Int Ibni.”—Lq. 3:22.

5. Aħna kif nistgħu nimitaw l-​eżempju taʼ Ġeħova f’li nesprimu mħabba u inkuraġġiment?

⁵ “Int . . . il-​maħbub.” L-​eżempju taʼ Ġeħova f’li jesprimi mħabba u approvazzjoni jfakkarna biex infittxu għal opportunitajiet biex ninkuraġġixxu lil oħrajn. (Ġw. 5:20) Aħna niżviluppaw kwalitajiet tajbin meta xi ħadd li jimpurtana minnu jurina li jħobbna u jfaħħarna għat-​tajjeb li nagħmlu. Bl-​istess mod, ħutna fil-​kongregazzjoni u l-​membri tal-​familja tagħna jeħtieġu l-​imħabba u l-​inkuraġġiment tagħna. Meta nfaħħru lil oħrajn, aħna nsaħħu l-​fidi tagħhom u ngħinuhom jaqdu lil Ġeħova lealment. Il-​ġenituri speċjalment jeħtieġ li jinkuraġġixxu lil uliedhom. Meta l-​ġenituri jfaħħru sinċerament lil uliedhom u juruhom affezzjoni, huma jkunu qed jgħinuhom jimxu ’l quddiem.

6. Għala jistaʼ jkollna fiduċja f’Ġesù Kristu?

⁶ “Jien approvajtek.” Dan il-​kliem juri li Ġeħova kien fiduċjuż li Ġesù kien se jagħmel ir-​rieda taʼ Missieru lealment. Ġeħova għandu fiduċja bħal din f’Ibnu, allura anke aħna jistaʼ jkollna fiduċja sħiħa li Ġesù b’lealtà se jwettaq il-​wegħdi taʼ Ġeħova kollha kemm huma. (2 Kor. 1:20) Meta naħsbu dwar l-​eżempju taʼ Ġesù, aħna nsaħħu d-​determinazzjoni tagħna biex nitgħallmu minnu u nimxu  fuq l-​eżempju tiegħu. Bħalma Ġeħova kellu fiduċja f’Ġesù, Hu fiduċjuż ukoll li, bħala grupp, il-​qaddejja tiegħu se jkomplu jitgħallmu minn Ibnu.—1 Pt. 2:21.

7. Skont Mattew 17:1-5, f’liema okkażjoni Ġeħova tkellem mis-​sema, u x’qal?

⁷ Aqra Mattew 17:1-​5. It-​tieni darba li Ġeħova tkellem mis-​sema kienet fit-​trasfigurazzjoni taʼ Ġesù. Ġesù kien stieden lil Pietru, Ġakbu, u Ġwanni biex imorru miegħu fuq muntanja għolja. Waqt li kienu hemm raw viżjoni straordinarja. Wiċċ Ġesù beda jiddi u ħwejġu bdew ileqqu. Żewġt irġiel, li rrappreżentaw lil Mosè u Elija, bdew jitkellmu maʼ Ġesù dwar il-​mewt u l-​qawmien tiegħu. Għalkemm dawn it-​tliet appostli “kellhom għajnejhom tqal bin-​ngħas,” huma raw din il-​viżjoni tal-​istagħġib meta ġew f’sensihom. (Lq. 9:29-​32) Imbagħad, sħaba tiddi għattiethom, u semgħu leħen minn ġos-​sħaba—il-​leħen t’Alla. L-​istess bħalma ġara fil-​magħmudija taʼ Ġesù, Ġeħova qal li approva lil Ibnu u esprima mħabbtu lejh, billi qal: “Dan hu Ibni, il-​maħbub, li lilu jien approvajt.” Imma din id-​darba, Ġeħova żied jgħid: “Isimgħu minnu.”

8. X’effett kellha l-​viżjoni fuq Ġesù u d-​dixxipli?

⁸ Il-​viżjoni tat stampa bil-​quddiem tal-​glorja u tal-​qawwa futura taʼ Ġesù bħala Sultan tas-​Saltna t’Alla. Ċertament, Kristu ġie inkuraġġit u msaħħaħ għat-​tbatijiet u mewta taʼ wġigħ li kellu jissaporti. Il-​viżjoni bniet ukoll il-​fidi tad-​dixxipli u saħħithom għall-​provi taʼ integrità u snin taʼ xogħol iebes li kien hemm quddiemhom. Xi 30 sena wara, l-​appostlu Pietru rrefera għall-​viżjoni tat-​trasfigurazzjoni, u b’hekk wera li l-​viżjoni kienet għadha friska f’moħħu.—2 Pt. 1:16-18.

9. Liema parir prattiku Ġesù ta lid-​dixxipli tiegħu?

⁹ “Isimgħu minnu.” Ġeħova għamilha ċara li jridna nisimgħu kliem Ibnu u nobduh. Ġesù x’qal meta kien fuq l-​art? Qal ħafna affarijiet taʼ min jismagħhom! Pereżempju, hu bi mħabba għallem lis-​segwaċi tiegħu kif jippritkaw l-​aħbar tajba, u darba wara l-​oħra fakkarhom biex jibqgħu għassa. (Mt. 24:42; 28:19, 20) Ħeġġiġhom ukoll biex jistinkaw kemm jifilħu, u inkuraġġiehom biex ma jaqtgħux qalbhom. (Lq. 13:24) Ġesù enfasizza li s-​segwaċi tiegħu kien jeħtiġilhom iħobbu lil xulxin, jibqgħu magħqudin, u josservaw il-​kmandamenti tiegħu. (Ġw. 15:10, 12, 13) X’parir prattiku Ġesù ta lid-​dixxipli tiegħu! Dan il-​parir għadu jgħodd illum daqskemm kien meta Ġesù tah.

10-11. Aħna kif nistgħu nuru li qed nisimgħu lil Ġesù?

¹⁰ Ġesù qal: “Kulmin qiegħed fuq in-​naħa tal-​verità jismaʼ leħni.” (Ġw. 18:37) Aħna nuru li qed nisimgħu leħnu meta ‘nkomplu nissaportu lil xulxin u naħfru lil xulxin mill-​qalb.’ (Kol. 3:13; Lq. 17:3, 4) Ukoll, nuru li qed nisimgħu leħnu billi b’żelu nippritkaw l-​aħbar tajba “fi żmien favorevoli u fi żmien taʼ inkwiet.”—2 Tim. 4:2.

¹¹ Ġesù qal: “In-​nagħaġ tiegħi jisimgħu leħni.” (Ġw. 10:27) Is-​segwaċi taʼ Kristu juru li jisimgħu lil Ġesù billi mhux biss joqogħdu attenti għal kliemu imma wkoll billi jaġixxu fuqu. Huma ma jiġux aljenati bl-​“ansjetajiet tal-​ħajja.” (Lq. 21:34) Minflok, jaraw li l-​ubbidjenza  tagħhom għall-​kmandi taʼ Ġesù tkun prijorità fil-​ħajja, anke meta jkunu ffaċċjati b’ċirkustanzi veru diffiċli. Ħafna minn ħutna qed jissaportu provi ħorox, inkluż attakki minn opponenti, faqar estrem, u diżastri naturali. Minkejja dak kollu li għandhom mnejn jissaportu, huma jibqgħu leali lejn Ġeħova. Lil dawn, Ġesù jagħtihom din il-​wegħda: “Min għandu l-​kmandamenti tiegħi u josservahom, dan iħobbni. U min iħobbni jkun maħbub minn Missieri.”—Ġw. 14:21.

12. B’liema mod ieħor nistgħu nuru li qed nisimgħu lil Ġesù?

¹² Mod ieħor kif nistgħu nuru li qegħdin nisimgħu lil Ġesù hu billi nikkoperaw maʼ dawk li hu ħatar biex imexxu fostna. (Ebr. 13:7, 17) L-​organizzazzjoni t’Alla għamlet ħafna aġġustamenti f’dawn l-​aħħar snin, inkluż l-​użu taʼ għodod u metodi ġodda fil-​ministeru tagħna, il-​mod kif issir il-​laqgħa taʼ matul il-​ġimgħa, u l-​mod kif nibnu, nirranġaw, u nieħdu ħsieb is-​Swali tas-​Saltna. Kemm napprezzaw il-​gwida bi mħabba u maħsuba sew li ningħataw! Nistgħu nibqgħu ċerti li Ġeħova se jbierek l-​isforzi tagħna biex insegwu d-​direzzjoni f’waqtha tal-​organizzazzjoni.

13. X’inhuma l-​benefiċċji taʼ li nisimgħu minn Ġesù?

¹³ Aħna nibbenefikaw milli nisimgħu mill-​affarijiet kollha li Ġesù għallem. Ġesù wiegħed lid-​dixxipli li t-​tagħlim tiegħu kien se jkun taʼ serħan għalihom. “Intom issibu serħan għal ruħkom,” hu qal. “Għax il-​madmad tiegħi ħelu u t-​tagħbija tiegħi ħafifa.” (Mt. 11:28-​30) Il-​Kelma t’Alla, li tinkludi l-​erbaʼ rakkonti tal-​Evanġelju dwar il-​ħajja u l-​ministeru taʼ Ġesù, iġġibilna serħan u tagħtina l-​għerf. (Salm 19:7; 23:3) Ġesù stqarr: “Henjin dawk li jisimgħu l-​kelma t’Alla u jħarsuha!”—Lq. 11:28.

14-15. (a) Liema kienet it-​tielet okkażjoni, imniżżla fi Ġwanni 12:27, 28, li fiha Ġeħova tkellem mis-​sema? (b) Kliem Ġeħova għala kien se jfarraġ u jsaħħaħ lil Ġesù?

¹⁴ Aqra Ġwanni 12:27, 28. Fl-​Evanġelju taʼ Ġwanni hemm imniżżel it-​tielet okkażjoni li fiha Ġeħova tkellem mis-​sema. Xi ġranet qabel mewtu, Ġesù kien Ġerusalemm biex jiċċelebra l-​aħħar  Qbiż tiegħu. Hu qal: “Ruħi mnikkta.” Imbagħad talab: “Missier, igglorifika lil ismek.” Bi tweġiba, Missieru tkellem mis-​sema: “Jien igglorifikajtu u nerġaʼ nigglorifikah.”

¹⁵ Ġesù kien imnikket minħabba r-​responsabbiltà kbira li kellu biex jibqaʼ leali lejn Ġeħova. Ġesù kien jaf li kien se jsofri swat bla ħniena u mewta krudila. (Mt. 26:38) Iżjed minn kull ħaġa oħra, Ġesù ried jigglorifika l-​isem taʼ Missieru. Ġesù ġie akkużat li dagħa, u hu kien inkwetat li l-​mewt tiegħu kienet se ġġib tmaqdir fuq Alla. Kemm żgur li kien taʼ faraġ kliem Ġeħova għal Ġesù! Hu setaʼ jkun ċert li isem Ġeħova kien se jiġi glorifikat. Il-​kliem taʼ Missieru żgur li farraġ bil-​kbir lil Ġesù u saħħu għal dak li kien se jiġi. Għalkemm Ġesù setaʼ kien l-​uniku wieħed li fehem x’qal Missieru f’dak il-​ħin, Ġeħova għamel ċert li Kliemu jitniżżel bil-​miktub għalina lkoll.—Ġw. 12:29, 30.

16. Għala kultant għandu mnejn ninkwetaw dwar it-​tmaqdir fuq l-​isem t’Alla?

¹⁶ Bħal Ġesù, anke aħna għandu mnejn ninkwetaw dwar li nġibu tmaqdir fuq l-​isem taʼ Ġeħova. Forsi, bħal Ġesù, aħna vittmi taʼ trattament inġust. Jew forsi ninkwetaw minħabba stejjer foloz li l-​opponenti jxerrdu dwarna. Għandu mnejn naħsbu dwar it-​tmaqdir li stejjer bħal dawn iġibu fuq l-​isem taʼ Ġeħova u l-​organizzazzjoni tiegħu. F’mumenti  bħal dawn, kliem Ġeħova hu taʼ faraġ kbir għalina. M’għandniex għalfejn inkunu ansjużi żżejjed. Aħna nistgħu nkunu ċerti li ‘l-​paċi t’Alla li tisboq kull ħsieb tgħasses lil qalbna u l-​qawwa mentali tagħna permezz taʼ Kristu Ġesù.’ (Flp. 4:6, 7) Ġeħova mhux se jonqos milli jigglorifika lil ismu. Permezz tas-​Saltna, hu se jreġġaʼ lura l-​ħsara kollha li Satana u din id-​dinja jġibu fuq il-​qaddejja leali Tiegħu.—Salm 94:22, 23; Is. 65:17.

17. Fi qbil maʼ Isaija 30:21, Ġeħova kif ikellimna llum?

¹⁷ Ġeħova għadu jkellimna llum. (Aqra Isaija 30:21.) Veru, aħna ma nisimgħux lil Alla jkellimna mis-​sema. Madankollu, hu pprovda l-​Kelma miktuba tiegħu, il-​Bibbja, li permezz tagħha jagħtina struzzjonijiet. Ukoll, l-​ispirtu taʼ Ġeħova jqanqal lill-​“prokuratur leali” biex jibqaʼ jagħti lill-​qaddejja Tiegħu l-​ikel tagħhom. (Lq. 12:42) X’abbundanza taʼ ikel spiritwali nirċievu kemm stampat kif ukoll onlajn, vidjows, u pubblikazzjonijiet bl-​awdjo!

18. Kliem Ġeħova kif jibnilek il-​fidi u jinkuraġġik?

¹⁸ Ejja nżommu f’moħħna l-​kliem li Ġeħova qal meta Ibnu kien fuq l-​art! Jalla l-​kliem t’Alla stess, kif imniżżel fil-​Bibbja, jagħtina l-​fiduċja li Ġeħova għandu kollox fil-​kontroll u li se jreġġaʼ lura kull ħsara li tiġi fuqna minn Satana u d-​dinja ħażina tiegħu. U jalla nkunu determinati li nisimgħu sew minn leħen Ġeħova. Jekk nagħmlu dan, aħna se jirnexxilna nissaportu kwalunkwe problema li issa niffaċċjaw u kull sfida li għad trid tiġi. Il-​Bibbja tfakkarna: “Teħtieġu s-​sabar sabiex, wara li tkunu għamiltu r-​rieda t’Alla, tirċievu t-​twettiq tal-​wegħda.”—Ebr. 10:36.