1-2. (a) Jehovaba mati khoen ǀkha gere ǃhoa? (b) Tae-e da nē ǁkhāǁkhāǃâs ǃnâ nî ǃhoaǃgao?

JEHOVAB ge sida ǀkha ǃhoas xa a ǃgâibahe. ǃKharu ge ǁaeb ǃnâb ge kēbo-aogu, ǀhomǃgāgu tsî ǁîb ǀGôab Jesub Xristub ǃnâ-ū ǁîb ǂâisa gere ǂoaxa kai. (Amob 3:7; Gal. 3:19; J.ǂHa. 1:1) Nētsēb ge ǁîb mîs ǃnâ-ū ra ǃhoa-ū da. ǁÎb mîsab ge ge mā da î da ǁîb ǂâi ǀgauba ǂan tsî ǁîb ǀgauga ǁnâuǃā.

² Jesub ge ǃhūbaib ai hâ io, ob ge Jehovaba ǀhomma xu gere ǃhoa. Hā re î da Jehovab ge tae-e mîs tsî mati da nēsa xū a ǀama ǁkhās tsîna ǃhoaǃgao.

3. Markub 1:9-11 ǃnâb ge Jehovaba tae-e mî Jesub ge ǁāǁnâhe o tsî nē mîde mâ ǂhâǂhâsa xūna ge ǁkhāǁkhā?

³ Markub 1:9-11 ge ǂguro ǃnās Jehovab ge ǀhomma xu a ǃhoas xa ra ǃhoa. (Khomai re.) ǁÎb ge ge mî: “Sats ge ti Ôats ǀnam ta ats, ǃgâiǃgâibasensa ta ūǃnâ hâtsa.” Jesub ge kaise ge tsâǀkhāhe hâ i ǁîb ǁgûb dommab ge ǁnâu o ǀnammi tsî ǂgomǃgâsib tsîna ǁîb ǃnâ ra ǁgause. Jehovab mîdi ge ǃnona xūna Jesub xa ge ǁgau. ǂGurose Jesub ge a ǁîb ǀGôa. ǀGamǁîse, Jehovab ge Jesuba a ǀnam. Tsî ǃnonaǁîse, Jehovab ge ǁîb ǀGôaba ge ūǃoa. Hā re î da nēna ǂōrisase kō.

4. Jesuba mâ ǀasa ǀhōsagusisa Elob ǀkha ge hō ǁîb ǁāǁnâs tawa?

⁴ ‘Sats ge ti Ôatsa.’ Jehovab ge nē mîdi ǃnâ-ū ge ǁgau ǁîb ǀnamǀnamsa ǀGôab Jesub ge ǁîb ǀkha ǀasa ǀhōsagusisa ge kuru di. Jesub ge ǀhommi ǃnâb ge hâ io, o ge Elob  gagasi ǀGôa i. Xaweb ge ǁîb ǁāǁnâs tawa ǃanu gagab ǀkha ge ǂkhau-e. Nē ǁaeb ǃnâb ge Eloba ge ǁgau Jesub a ǁîb ǂkhauhesa ǀGôa ǃkhaisa tsîb Gao-ao tamas ka io nî ǀGapi prister kaisa. (Lukab 1:31-33; Heb. 1:8, 9; 2:17) ǁNās ǀkha î ge a ǃgāsa Jesub ǁāǁnâs tawab ge ǁîb ǁgûba tae-i ǃaroma: “Sats ge a ti Ôa” di a mîsa.—Lukab 3:22.

5. Mati da Jehovab aiǁgausa a ǁgae ǁkhā ǀnammi tsî ǂkhâǃnâs tsîna mās ǃnâ?

⁵ “Sats ge . . . ǀnam ta atsa.” Jehovab aiǁgaus ǀnammi tsî ǁîb ǀGôaba ūǃoas tsîn dis ge ra hōhōǃnâ da î da nau khoena ǃēsa da ga hō o, o ǂkhâǃnâ. (Johaneb 5:20) Kaise da ge ra ǃgâiaǂgao ǀnam da a khoe-i ga ǀnamma ga ra ǁgau da tsî ǃgâi xūn hîna da ra dīn ǃgao koa da o. ǁNās ǁkhās khami î ge sida ǃgâsan hîna ǀhaohâb ǃnâ hâna sida ǀnammi tsî ǂkhâǃnâs tsîna ǂhâ hâ. Nau ǃgâsana da ga koa o, o da ge ǁîn ǂgomsa ra ǀgaiǀgai tsî ǁîna ra hui în Jehovaba ǂgomǂgomsase ǃoaba. ǁGûn ge ǃgōsase ǁîn ǀgôana nî ǂkhâǃnâ. ǁGûn ga ǁîn ǀgôana ga ra koa o tsî ǀnamma ǁgau o, on ge ǀgôana ra ǀgai.

6. Tae-i ǃaroma da Jesub Xristub ǃnâ ǂgomǃgâsiba a ūhâ ǁkhā?

⁶ “ǃGâiǃgâibasensa ta ūǃnâ hâtsa.” Nē mîdi ge ra ǁgau Jehovab ge ǂgomǃgâsiba ūhâ isa Jesub ǂgomǂgomsase ǁîb ǁGûb ǂâisa nî dīsa. Jehovab ge ǁîb ǀGôab ǃnâ ǂgomǃgâsiba ūhâ ǁnās ǀkha da ge sida tsîna Jesuba nî ǂgomǃgâ Jehovab mîmâideb nî dīǀoaǀoasa. (2Kor. 1:20) Jesub aiǁgausa da ra kō o, o da ge ra ǂkhâǃnâ-e ǁîba xu ǁkhāǁkhāsen tsî ǁîb  ǂaidi ǃnâ ǃgûsa. Jehovab ge ǂgomǃgâsiba ūhâ ǁîb ǃoaba-aon ase da ǁîb ǀGôaba xu nî ǁkhāǁkhāsensa.—1Pet. 2:21.

7. Mateub 17:1-5 ǃoagub ge Jehovaba mâpa ǀhomma xu ǃhoa tsî tae-eb ge mî?

⁷ Khomai re Mateub 17:1-5. ǀGamǁî ǃnās hînab ge Jehovaba ǀhomma xu Jesub ǀkha a ǃhoas ge Jesub ge a “ǀkharaǀkharahe” ǁaeb ai. Jesub ge Petrub, Jakobub tsî Johaneb tsîna ge ǁkhau îgu ǀgapi ǃhomma ǃoa ī. ǁNāpa gu hâ hîna gu ge ǀō-aisa xū-e ge mû. Jesub ais tsî saran tsîn ge gere ǂkhai. ǀGam xoaǂgā-aira ge ge ǂhai hîna Moseb tsî Eliab tsîkha ra ǂnûǁkhaeba ra hîna ge Jesub ǁōb tsî khâis tsîn xa gere ǃhoa ra. Nē ǃnona apostelgu ge ‘ǂoms xa dāhe’ hâ i xawe gu ge nēsa gu ge mû o, o ge khâi. (Lukab 9:29-32) Sao rase î ge ǃnâ ra ǃâusa ǁîgu ǂam-ai ge hā tsî gu ge dom-e ǃâusa xu ge ǁnâu—Elob domma. Jesub ǁāǁnâs tawab ge dī khamib ge Jehovaba ǁîb ǀGôabab ra ūǃoa ǃkhaisa ge ǁgau tsî ǁîbab a ǀnam ǃkhais tsîna mî rase: “Nēb ge ti ǀnamǀnamsa ǀGôab, ǃgâiǃgâibasensa ta ūǃnâ hâba.” Xaweb ge Jehovaba nē ǃnās ai “ǁîba ǁnâu” di ge mî.

8. Nē kēbosa mati Jesub tsî ǁkhāǁkhāsabegu tsîna ge tsâǀkhā?

⁸ Nē kēbos ge Jesub tae-e hānîǁaeb ǃnâ ǁîb ǀgaib ǀkha nî dīsa ra ǁgau Elob Gaosib di Gao-aose. Jesub ge ge ǂkhâǃnâhe hâ i ǃgomsin hînab gere tsân tsî tsûtsûsa ǁōb hînab ge ǁōb ǃgao. Nē kēbos ge ǁkhāǁkhāsabegu ǂgoms tsîna ge ǀgaiǀgai ǃgomsin hîna gu nî hōǃân ǃgao tsî sîsenni hîna gu nî dī i ǃgaos tsîna. 30 Kuriga ǃkharu hâseb ge apostel Petruba nē kēbos xa gere ǃhoa nēs ge gere ǁgau ǁîb noxoba Jesub ǀkharaǀkharahes xa gere ǂâisa.—2 Pet. 1:16-18.

9. Jesuba mâ ǂhâǂhâsa ǂkhâǃnâsa ǁîb ǁkhāǁkhāsabega ge mā?

⁹ “ǁÎba ǁnâu.” Jehovab ge ge ǃgāsa kai ǁîb ra ǂgao ǃkhaisa î da ǁîb ǀGôab mîde ǃgâ tsî ǁnâuǀnam. Jesuba tae-e ge mî ǃhūbaib aib ge hâ io? ǁÎb ge ǂgui xūna ge mî hîna ge ǂhâǂhâsa îna ǃgâsa. Aiǁgauseb ge ǁîb saosabena ǀnamǀnamsa ǀgaub ǃnâ ge ǁkhāǁkhā matin ǃgâiǂhôasa nî aoǁnâ ǀgausa tsîb ge hoaǁae gere mîba nî în ǂkhaikari hâ. (Mat. 24:42; 28:19, 20) ǁÎnab ge gere ǂkhâǃnâ în ǁkhoaǂgaosib ǀkha aiǃgû tsî mâǀgai. (Lukab 13:24) Jesub ge ǁîb saosabena ge ǂkhâǃnâ în ǀnamgu, ǀguiǃnâxasiba ūhâ tsî ǁîb mîmāde ǃkhōǀgara. (Johaneb 15:10, 12, 13) Jesub ge ǁîb ǁkhāǁkhāsabega a mā ǂkhâǃnâs ge kaise ge khoexaǃnâ i. Nē ǂkhâǃnâs ge nētsēs tsîna sîsenǂuiba ūhâ Jesub tsēdi ǃnâ i ge ī-i khami.

10-11. Mati da nî ǁgau Jesuba da ra ǃgâ ǃkhaisa?

¹⁰ Jesub ge ge mî: “Amaba xu hâ-i hoa-i ge ti domma ra ǁnâu-e.” (Johaneb 18:37) ǁÎb di domma da ra ǁnâu ǃkhaisa da ge ra ǁgau “tanibagu” tsî da ga ra ‘ǀûbagusa’. (Kol. 3:13; Lukab 17:3, 4) Tsî ǁkhoaǂgaoxase da ga aoǁnâ sîsenni ǃnâ ga ra ǁhaos tsîna ‘ǃgom tsî au’ ǁaegu ǃnâ.—2 Tim. 4:2.

¹¹ Jesub ge ge mî: “Ti gūn ge ti domma ra ǁnâu.” (Johaneb 10:27) Xristub saosaben ge ra ǁgau Jesub mîden ra ǁnâusa, ǃgâs ǀguisan ga di tama io xawe ǁnâun ra xūn ǃoa-ain ga sîsen o. ǁÎn ge ‘ǃhūbaib di ǂhansendi’ ǀkha  ǁaeǁaesen tama hâ. (Lukab 21:34) ǁÎn xa i ge Elob mîmāde ǁnâuǀnamsa a ǂhâǂhâsa, nēs ga kaise ǃgom xawe. ǂGui ǃgâsan ge ǃgomsina ra hōǃâ, nēs ge mâǃoahes, ǀgâb tsî ǃhūǂhūbigu tsîna ǃkhōǂgā hâ. Nē xūn hoan ǂam-ain ge ǁîna Jehovab ǃoa-ai ǂgomǂgomsase ra hâ. Jesub ge ǁîna sao ra ǂkhâǃnâsa ra mā: “Ti mîmāde ūhâ, tsî kara ǁîde dī-i ge tita ǀnam hâ-e; tsî tita kara ǀnam-i ge ti Îb xa nîra ǀnamhe-e.”—Johaneb 14:21.

12. Mâ ǀgaub ǃnâs tsîna da a ǁgau ǁkhā Jesuba da ge ra ǁnâu di?

¹² Nēb ge ǀnî hâ ǀgaub hîna da a ǁgau ǁkhāba Jesuba da ge ra ǁnâu di: Jesub ge ǁgaumâi aogu ǀkha ǀguiba sîsenǀhaos ǃnâ-ū. (Heb. 13:7, 17) Elob ǀapeǂhomis ge ǃkharu ge kurigu ǃnâ ǀkharaǀkharana ge dī, nēs ge ǀasa sîsen-ū da ra xūn tsî sida aoǁnâ ǀgaub, sida wekheb ǁaegu hâ ǀhaodi ra dīhe ǀgaub tsî sida ǀHû-omga da ra om ǀgaus tsîna ǃkhōǂgā hâ. Kaise da ge nē daoǁgaudi hîna ǀnamǀnamsa ǀgaub ǃnâ ra māhe de ra ǃgôaǃgâ. ǂGomǃgâ da ge ra Jehovab nî ǀkhae da ǃkhaisa sada ǁgūtsâdi ǃgao ǁîb ǀapeǂhomis daoǁgaude saosa.

13. Jesuba ǃgâsa xu da mati a ǀama ǁkhā?

¹³ Jesub ge ǁkhāǁkhā xūn hoana ǃgâs ǃnâ-ū da ge ra ǀama. Jesub ge ǁîb ǁkhāǁkhāsabena ge mîmâiba ǁîb ǁkhāǁkhādi ge nî khoakhoa nî di. “O du ge sadu ǀomde khoakhoasa nî hōba” dib ge ge mî “ti ǃnaob a ǃgâi, tsî ti ǃgommi a supu xuige.” (Mat. 11:28-30) Elobmîs hîna haka ǃGâiǂhôas ǂkhanidi hîna Jesub ûib tsî aoǁnâs tsîn xa hâde ūhâs ge sida khoakhoa tsî gā-aisiba ra mā. (Psa. 19:7; 23:3) Jesub ge ge mî: “Ā, ǃgâiǃōn ge hâ, Elob mîsa ǁnâu tsî ra sâubasena.”—Lukab 11:28.

14-15. (a) Mâ ǃnās aib ge Jehovaba ǀhomma xu ǃhoa Johaneb 12:27, 28 ǃnâ i a xoasa khami? (b) Jehovab mîde tae-i ǃaroma Jesuba ǁkhaeǂgao tsî ge ǀgaiǀgai?

¹⁴ Khomai re Johaneb 12:27, 28. ǃGâiǂhôas Johaneb dis ge ǃnonaǁî ǃnās hînab ge Jehovaba ǀhomma xu a ǃhoas xa hâ. Tsēde ǁîb ǁōb aiǃâb ge Jesuba Jerusalems ǃnâ ge hâ i ǁîb ǀuniga  Pasxaba tsēdīs ǃaroma. ‘Ti ǀoms ge ǁgonǁgonǃnâhe hâ’ dib ge ge mî. Tsîb ge ge ǀgore “Abotse, sa ǀonsa ǂkhaiǂkhai.” ǁÎb ǁGûb ge ǀhomma xu ǃeream tsî ge mî: “ǂKhaiǂkhai si ta go, tsî ta ge ǁkhawa nîra ǂkhaiǂkhai si.”

¹⁵ Jesub ge kaise gere ǂâiǂhansen kai ǃereams hînab ge ūhâ is xa Jehovab ǃoagu ǂgomǂgomsase hâsa. Jesub ge ge ǂan i ǀgaisaseb nî mâǃoahe tsî tsûtsûsa ǁōba nî ǁō ǃkhaisa. (Mat. 26:38) ǁÎb ǁGûb di ǀonsa ǂkhaiǂkhais ge Jesuba kaise ge ǂhâǂhâsaba i. Jesub ge Elob xa ǁgai xūna ra ǃhoa khoeb ase gere mûhe tsî ǁnās ǀkha gere ǂâiǂhansen ǁîb ǁōb Eloba ǁgaise nî mûsen kaisa. Jehovab mîdi ge Jesuba ǀgaisa ǂgomǃgâsiba ge mā. ǁÎb ge ge ǂan i Jehovab ǀons nî ǂkhaiǂkhaihe ǃkhaisa. ǁÎb ǁGûb mîdi ge Jesuba ge ǁkhaeǂgao tsî hānîǁaeb ǃgao ge ǀgaiǀgai. Jesub ǀguib ge ǀnîsi ǁnā ǁaeb ǃnâ ǁîb ǁGûb mîde a ǁnâuǃā xaweb ge Jehovaba ge dī î-i ǁîb mîde sada ǃgaos tsîna xoa-e.—Johaneb 12:29, 30.

16. Tae-i ǃaroma da ǀnî ǁaegu ai Elob ǀons ra ǃkhāǃkhāhe o, o ra ǂâiǂhansen?

¹⁶ Jesub khami da ge sada tsîna ra ǂâiǂhansen Jehovab ǀonsa ǃkhāǃkhāhesa. Jesub khami da ge sada tsîna ǀnîsi ǃgâi tama ǀgaugu ǃnâ ra hâ-ūhe. Tamas ka io da ge mâǃoa-aon sada xa ra mî ama tama xūn xa ra ǂhansen. Nēs Jehovab  ǀons tsî ǀapeǂhomis ai ra hau ǁgai ǀons xa da ge ra ǂâi. Nē ǁaeb ǃnâ i ge Jehovab mîde kai ǁkhaeǂgaosa ra mā da. Tā da ge kaise nî ǂâiǂhansen. Xawe da ge ǂâis ǃnâ nî ūhâ ‘Elob di ǂkhîb, ǁnâuǃāb hoaba ǃnā hâb ge sida ǂgaogu tsî ǂâidi tsîna Xristub Jesub ǃnâ nî sâu.’ (Fil. 4:6, 7) Jehovab ge hoaǁae ǁîb ǀonsa nî ǂkhaiǂkhai. ǁÎb Gaosib ǃnâ-ūb ge ǁGâuab tsî ǁîb ǃhūbaib tsîn ge ǁgaiǁgai xūn hoana nî ǃgâiǃgâi.—Psa. 94:22, 23; Jes. 65:17.

17. Jesajab 30:21 ǃoagub Jehovaba mati nētsē sida ǀkha ra ǃhoa?

¹⁷ Jehovab ge noxoba nētsē sida ǀkha ra ǃhoa. (Khomai re Jesajab 30:21.) Ama as ge Elob ǀhomma xu sida ǀkha ǃhoa tama hâsa. Xaweb ge Elobmîsa ge mā da hîna ra daoǁgau dasa. Jehovab gagab ge ‘ǂgomǂgomsa tsî gā-ai mûǂamaoga’ ra ǂgae îgu ǁîb ǃoaba-aona ǁîn ǂû-e mā ǀgara. (Lukab 12:42) Kaise ǂgui gagasi ǂûna da ge ǁgâisa ǂkhanin, internets ai hâ māǂuidi, vidiogu tsî ǃgâ-e ǁkhā ǂkhanin ǃnâ-ū ra hō.

18. Jehovab mîde mati sadu ǂgomsa ra omkhâi tsî ǁkhoaǂgaosiba ra mā?

¹⁸ Jehovab ge ǁîb ǀGôab ge ǃhūbaib ai hâ io gere ǃhoa mîde da ge ǂâis ǃnâ nî ūhâ. Elob mîde di ǂgomǃgâsiba mā da re, Jehovab ǁkhāsiba ūhâsa hoa xūna dī-ūnusa tsîb ǁGâuab tsî ǁîb ǃhūbaib tsîn ge ǃaroma tsū xūna nî ūbēsa. Hoaǁae da ge nî mîǁgui Jehovab domma ǃgâsa. Nēsa da ga dī o, o da ge ǃgomsin hîna da nēsi ra hōǃân tsî hānîǁaeb ǃnâ nî hōǃân hoan tsîna ra mâǃoa. Elobmîs ge ra mî: “Taniǀnamxasiba du ǂhâba hâ, Elob ǂâisa dī tsî du nî mîmâisa hōga.”—Heb. 10:36.