1, 2. 1) ¿Kenijkatsa Jehová kinkamanaljuijtok maseualmej? 2) ¿Tlake tikitasej ipan ni tlamachtili?

JEHOVÁ tlauel kipaktia technojnotsas. Kiampa kichiua pampa kineki ma tijmatikaj kenijkatsa moiljuia uan tlake kichiua. Yeka, uejkajkia kintekiuik tlajtolpanextianij, iluikaeuanij uan iKone Jesús (Amós 3:7; Gál. 3:19; Apoc. [Rev.] 1:1). Ipan ni tonali Jehová technojnotsa ika Biblia.

² Kema Jesús itstoya ipan Tlaltipaktli, Jehová expa kamanaltik tlen iluikak. Ma tikitakaj tlake kiijtok, tlake techmachtia uan tlake moneki tijchiuasej tlaj tijnekij ma techpaleuia.

3. Kej kiijtoua Marcos 1:9-11, ¿tlake kiijtok Jehová kema Jesús moatsonpoliuiltik, uan tlake kinextik tlen kiijtok?

³ (Xijpoua Marcos 1:9-11). Ipan ni texto nesi kema Jehová achtoui kamanaltik tlen iluikak. Kiijtok: “Ta tinoKone, nimitsiknelia miak uan nijpia miak pakilistli ika tlen tijchiua”. Tlauel kuali kiyolmatki Jesús kema kikajki kenijkatsa Jehová tlauel kiikneliyaya uan motemachiyaya ipan ya. Ma tikitakaj eyi tlamantli tlen tlauel ipati katli Jehová kiijtok: Jesús eli iKone, tlauel kiiknelia uan kuali kiita tlen kichiua.

4. ¿Kenijkatsa Jesús kejuak sampa elki ikone toTeotsij kema moatsonpoliuiltik?

⁴ “Ta tinoKone”. Ika ni tlajtoli, Jehová kinextik iKone Jesús kejuak sampa pejki kuali mouika iuaya. Kema Jesús itstoya iluikak eliyaya se tlen Jehová ikoneuaj, uan kema moatsonpoliuiltik toTeotsij kitlapejpenik ika itonal. Ipan nopa tonali toTeotsij kinextik Jesús eliyaya iKone katli kitlapejpenijtoya uan sampa ueliskia tlakuepilis iluikak uan kitekimakaskia kej Tlanauatijketl uan Sumo Sacerdote (Luc. 1:31-33; Heb. 1:8, 9; 2:17). Yeka, kema Jesús moatsonpoliuiltik, kinamikiyaya Jehová ma kiiljui: “Ta tinoKone” (Luc. 3:22).

5. Sanse kej Jehová, ¿tlake moneki tijchiuasej?

 ⁵ “Ta [...] nimitsiknelia”. Sanse kej Jehová kiiljuik Jesús kiikneliyaya uan kiyolchikajki, tojuantij nojkia moneki tikitasej kema tikinyolchikauasej sekinok (Juan 5:20). Kema se akajya katli tikikneliaj kinextia techiknelia uan techyolchikaua pampa kuali tijchijkej se tlenijki, kichiua tlauel kuali ma tijyolmatikaj. Uan toikniuaj tlen tlanechikoli uan tochampoyouaj nojkia moneki ma tikinyolchikauakaj uan ma kiitakaj tlauel tikinikneliaj. Tlaj tijchiuasej ni, tikinpaleuisej nojua kuali ma tlaneltokakaj uan ma mosentlalikaj amo kema kitlauelkauasej Jehová. Uan tetajmej tlauel moneki ma kinyolchikauakaj ininkoneuaj, ma kiniljuikaj kuali tlen kichiuaj uan ma kinnextilikaj nelia tlauel kinikneliaj. Kiampa kinpaleuisej ma kichiuakaj se tlenijki ika nochi ininyolo.

6. ¿Kenke uelis timotemachisej ipan Jesús?

⁶ “Nijpia miak pakilistli ika tlen tijchiua”. Kema Jehová kiijtok ni, kinextik motemachiyaya iKone kichiuaskia tlen ya kinauatijtoya. Tlaj ya tlauel motemachiyaya ipan iKone, tojuantij nojkia uelis timotemachisej Jesús kichiuas nochi tlen Jehová techtenkauilijtok (2 Cor. 1:20). Kema timoiljuiaj kenijkatsa Jesús nochipa kitekipanok Jehová ika nochi iyolo, techpaleuia ma timosentlalikaj nojua kuali tikixmatisej uan tijchiuasej tlen ya kichijki. Uan Jehová nojkia motemachia nochi itekipanojkauaj kichiuasej kampeka nojua kuali kiixmatisej iKone (1 Ped. 2:21).

7. Kej kiijtoua Mateo 17:1-5, ¿kema sampa kamanaltik Jehová, uan tlake kiijtok?

⁷ (Xijpoua Mateo 17:1-5). Jehová sampa kamanaltik tlen iluikak kema “Jesús kipatlak  itlachialis”. Ya kiniljuijtoya Pedro, Santiago uan Juan ma yakaj iuaya tepeixko. Nopaya inijuantij kiitakej se tlanextili. Jesús iixayak pejki kauani uan iyoyo pepetlakayaya. Teipa neskej omej tlakamej tlen kinixnextiyayaj Moisés uan Elías uan pejkej kamanaltij iuaya Jesús kenijkatsa ya mikiskia uan moyolkuiskia. Maske nopa eyij apóstoles “tlauel kochmikiyayaj”, kiitakej nopa tlanextili kema kuali isakej (Luc. 9:29-32). Teipa, se mixtli tlen tlauiyaya kintsajki Jesús uan nopa omej tlakamej, uan nopaya kamanaltik toTeotsij. Sanse kej kema Jesús moatsonpoliuiltik, Jehová sampa kinextik kiikneliyaya uan kuali kiitayaya kema kiijtok: “Ya ni noKone tlen nikiknelia. Nijpia miak pakilistli ika tlen kichiua”. Uan nama kiijtok seyok tlamantli: “Xijtlakakilikaj tlen yajaya kiijtoua”.

8. ¿Kenijkatsa nopa tlanextili tlauel kinpaleuik Jesús uan itokilijkauaj?

⁸ Nopa tlanextili kinextik kenijkatsa Jesús kipiaskia miak chikaualistli uan ueyitilistli kema tekichiuaskia ipan toTeotsij iTlanauatijkayo. Uelis timotemachisej tlen panok tlauel kiyolchikajki uan kipaleuik Jesús pampa tlauel tlaijiyouiskia kema kimiktiskiaj. Nojkia, tlauel kinyolchikajki itokilijkauaj pampa inijuantij nojkia kipiaskiaj miak tlaouijkayotl uan monekiskia mosentlalisej kichiuasej nopa tekitl tlen Jesús kinnauatik. Kema panotoya se treinta xiuitl, apóstol Pedro nojua kiilnamiktoya tlen panok, nopa kinextia amo kiilkajtoya (2 Ped. 1:16-18).

9. ¿Tlake kintlajtolmakak Jesús itokilijkauaj?

⁹ “Xijtlakakilikaj tlen yajaya kiijtoua”. Jehová kinextik kineki ma tijtlakakilikaj uan ma tijneltokakaj iKone. Kema itstoya ipan Tlaltipaktli, Jesús kiijtok miak tlamantli tlen tlauel techpaleuia. Ya kinmachtik itokilijkauaj ma kimoyauakaj nopa kuali tlamachtili tlen toTeotsij iTlanauatijkayo uan nochipa kinilnamikilik kuali ma tlachixtokaj (Mat. 24:42; 28:19, 20). Nojkia, kiniljuik nochipa ma kichiuakaj kampeka kitekipanosej toTeotsij uan amo kema ma kitlauelkauakaj (Luc. 13:24). Nojkia, kiniljuik tlauel ipati ma moiknelikaj, ma itstokaj sansejko uan ma kineltokakaj itlanauatiljuaj (Juan 15:10, 12, 13). Tlen kintlajtolmakak tlauel kinpaleuik uan ipan ni tonali nojkia tlauel techpaleuia.

10, 11. ¿Kenijkatsa tijnextiaj tijtlakakiliaj Jesús?

¹⁰ Jesús kiijtok: “Nochi tlen kinekij kimatisej tlen melauak nechtlakakiliaj” (Juan 18:37). Tijnextiaj tijtlakakiliaj kema tijneltokaj tlen techtlajtolmakak: “Xijpiakaj inmoyolo ika tlen inmechchiuiliaj tlen axkuali uan xikintlapojpoljuikaj” (Col. 3:13; Luc. 17:3, 4). Nojkia kiampa tijnextiaj kema titlajtolmoyauaj ika pakilistli maske kemantika eli ouij o amo (2 Tim. 4:2).

¹¹ Jesús nojkia kiijtok itokilijkauaj kitlakakiliaj (Juan 10:27). Tijnextiaj tijtlakakiliaj kema tijchiuaj tlen technauatik uan amo san kema tijkakij tlen kiijtok. Amo tijkauaj ma techtsakuili tlamantli tlen onka ipan ni Tlaltipaktli (Luc. 21:34). Uan nochipa tijnekij tijneltokasej Jesús maske kemantika tikixnamikij tlaouijkayotl. Miakej toikniuaj kiampa kinpano pampa kiixnamikij uejueyi kuesoli, kej kema kintlatsakuiltiaj katli techkualankaitaj, pampa elij tlauel teikneltsitsij uan kema se tlamantli kintlasojsoljuilia. Maske kinpano nochi ni tlamantli, inijuantij amo kitlauelkauaj Jehová. Jesús kiniljuia nochi inijuantij: “Tlakamej tlen kimatij notlanauatil uan nelia kichiuaj, inijuantij tlen nelia nechikneliaj. Uan noTata kiniknelis tlen nechikneliaj” (Juan 14:21).

12. ¿Ipan tlake sekinok tlamantli tijnextiaj tijtlakakiliaj Jesús?

 ¹² Nojkia uelis tijnextisej tijtlakakiliaj Jesús kema tikinneltokaj katli kintekimakatok ma techyakanakaj (Heb. 13:7, 17). Ipan xiuitl tlen panotiualajtok, ipan Jehová itlanechikol mopatlatok miak tlamantli. Ma timoiljuikaj kenijkatsa techmachtijtokej kuali ma titlajtolmoyauakaj uan kenijkatsa uelis tijtekiuisej sekinok tlamantli ipan tlajtolmoyaualistli. Nojkia mopatlatok kej mochiuayaya nopa tlanechikoli ipan semana. Uan nojkia kej mochijchiuayaya, moyankuiliyaya uan mokualchijchiuayaya nopa kali kampa timosentiliaj. Tlauel tiyolpakij pampa toikniuaj katli kintekimakatokej kuali moiljuiaj tlake kichiuasej uan pampa techyakanaj ika tlaiknelili. Uelis timotemachisej Jehová techteochiuas pampa tijkauaj ma techyakana itlanechikol.

13. ¿Kenijkatsa techpaleuia kema tijtlakakiliaj Jesús?

¹³ ¿Kenijkatsa techpaleuis tlaj tijtlakakilisej nochi tlen Jesús tlamachtik? Jesús kiniljuik itokilijkauaj tlen ya tlamachtiyaya kinyolchikauaskia. Kiniljuik: “Inkipantisej tlen kitemoua inmoalma para ma moseuis uan mosiyajkauas. Axouij nopa tekitl tlen niinmechmakas. Eltok keja se tlamamali tlen axetik” (Mat. 11:28-30). ToTeotsij iTlajtol, tlen eli nopa naui amochtli kampa kiijtoua tlen kichijki uan kenijkatsa tlajtolmoyajki Jesús, techpaleuia kuali ma titlaneltokakaj uan ma tijpiakaj tlalnamikilistli (Sal. 19:7; 23:3). Jesús kiijtok: “Más kuali kipantiaj [o yolpakij] nopa tlakamej tlen kikakij itlajtol toTeko uan kineltokiliaj” (Luc. 11:28).

14, 15. 1) Kej kiijtoua Juan 12:27, 28, ¿kema ika expa kamanaltik Jehová? 2) ¿Kenke kiyolchikajki uan kipaleuik Jesús tlen kiiljuik iTata?

¹⁴ (Xijpoua Juan 12:27, 28). Ipan amochtli Juan kiijtoua kema Jehová kamanaltik ika expa. Kema nechka mikiskia, Jesús itstoya ipan Jerusalén pampa kichiuaskiaj nopa Pascua. Jesús kiijtok tlauel mokuesouayaya, teipa momaijtok uan kitlajtlanik toTeotsij: “Papá, xijchiua para nochi tlakamej ma mitsueyitlalikaj”. Uan Jehová kinankilik: “Ya nijchijtok para ma nechueyitlalikaj uan sampa nijchiuas”.

¹⁵ Jesús mokuesouayaya pampa kimatiyaya monekiyaya kinextis amo kitlauelkajtoya toTeotsij. Kimatiyaya kiuijuitekiskiaj uan  kimiktiskiaj (Mat. 26:38). Ya tlauel kinekiyaya kiuejkapantlalis iTata itoka. Ika imikilis, Jesús amo kinekiyaya kisokiuis toTeotsij itoka pampa kiiljuijkej kitlaijiljuijtoya toTeotsij. Uan tlen iTata kinankilik kipaleuik ma kikuamachili Jehová kiuejkapantlaliskia itoka. Nopa kiyolchikajki uan kipaleuik ma kiijiyoui nochi tlaijiyouilistli tlen kiixnamikiskia. Maske uelis san Jesús kikuamachilik ni tlamantli, Jehová kichijki ma moijkuilo ipan Biblia uan kiampa nochi tojuantij nojkia ueliskia techpaleuis (Juan 12:29, 30).

16. ¿Kenke timokuesouaj kema kisokiuiaj Jehová itoka?

¹⁶ Sanse kej Jesús, tojuantij nojkia amo tijnekij ma kisokiuikaj Jehová itoka. Uelis nojkia techchiuilisej tlen amo xitlauak, kej Jesús kipanok. Nojkia, uelis timokuesouaj kema tijkakij kenijkatsa tlauel techistlakauiaj katli techkualankaitaj. Uelis timoiljuiaj kenijkatsa nochi nopa istlakatili kichiua maseualmej ayokmo kuali ma kiitakaj Jehová uan itlanechikol. Ni tlamantli amo kinamiki techkuesos. Kema kiampa pano, tlauel techyolchikaua kema tikilnamikij tlen Jehová kiiljuik Jesús. Jehová nochipa kiuejkapantlalis itoka uan ika iTlanauatijkayo kisenkauas nochi tlen Satanás uan maseualmej kinchiuilijtokej itekipanojkauaj (Sal. 94:22, 23; Is. 65:17). Timotemachiaj nelia moaxitis ni tlajtoli: “ToTeko inmechmakas tlaseuilistli ipan inmoyolo tlen tlakamej axuelis kimachilisej.  Uan nopa tlaseuilistli kiyaualtsakuas inmoyolo uan inmotlalnamikilis toTeko pampa inmechtlatskiltijtok ipan Cristo” (Filip. 4:6, 7).

17. Kej kiijtoua Isaías 30:21, ¿kenijkatsa Jehová techkamanaljuia ipan ni tonali?

¹⁷ Ipan ni tonali Jehová nojua techkamanaljuia (xijpoua Isaías 30:21). Maske tojuantij amo tijkakij Jehová kamanalti tlen iluikak, ipan Biblia techiljuia tlake kineki ma tijchiuakaj. Nojkia, toTeotsij itonal kipaleuia nopa “tlayakankatekipanojketl tlen temachtli” ma nojua techmaka tlamachtili, kej amatlajkuiloli, tlen kitlaliaj ipan Internet, videos uan grabaciones (Luc. 12:42). ¡Nelia tijseliaj miak tlamachtili!

18. ¿Kenke tlen Jehová kiijtok kichiua kuali ma titlaneltokakaj uan amo ma timajmauikaj?

¹⁸ Amo kema ma tikilkauakaj tlen Jehová kiijtok kema Jesús itstoya ipan Tlaltipaktli pampa tlen Jehová kiijtok, techpaleuia ma timotemachikaj ya kimati kenijkatsa kisenkauas nochi tlen Satanás uan maseualmej techchiuilijtokej. Ma timosentlalikaj nochipa tijtlakakilisej Jehová. Tlaj kiampa tijchiuasej, uelis tikijiyouisej tlen ueli tlaouijkayotl tlen tijpiasej nama o teipa. Biblia kiijtoua: “Moneki xijpiakaj inmoyolo uan xikijiyouikaj nochi tlen inmechpanotiuala, uan kema ya inkichijtosej nochi ipakilis toTeko, yajaya temachtli inmechmakas nochi tlen inmechtenkauilijtok” (Heb. 10:36).