1-2. (1) Mmukhalelo taani Yehova aalonceiye ni achu? (2) Tiheeni nnahaalaahu othokororya mmwaha yoola?

YEHOVA onnasiveliwa oloca ni hiyo. Khalai, owo aahaapharihela alipa a miririmu, ankeelo, ni Mwanawe, Kristu Yesu, wi enisuwelihe muupuwelo awe. (Amo. 3:7; Gal. 3:19; Wup. 1:1) Olelo, owo onaloca ni hiyo, moorweela wa Masu awe Piipiliya. Owo oonivaha Piipiliya wi nihuserye muupuwelo awe nave niiwexexe iphiro sawe.

² Vaavaa Yesu aareiye veelaponi yavathi, Yehova aahiloca orweela wirimu mu ikwaha raru. Hankooni nthokororye yeeyo Yehova aalonceiye, echu nnahuseryaahu moorweela wa masu awe, nave mukhalelo nnaphuraahu orweela wa yeeyo aalonceiye.

3. Hiiha ntoko naalakhanyaahu mu Marko 1:9-11, tiheeni Yehova aalonceiye Yesu amanle opatisiwa, nave iparipari taani soochuneya masu awo yoonihenryaaya?

³ Mu Marko 1:9-11 annaphwanyeyamo masu yaawo Yehova aalonceiye mu ekwaha yoopacerya orweela wirimu. (Mwaalakhanye.) Owo aahiloca: “Weyo wa mwanaka mmoharu kinamukhwelaaka, yoowo kinahakalalaakano.” Yesu aahitannyeya murima vaava iiwaleiye nsu na Tiithi awe nooniheryaka osivela navetho nimulipihaka! Masu a Yehova yaahooniherya iparipari raru vooloca sa Yesu. Yoopacerya, Yesu ti Mwanawe. Yanawiili, Yehova onnamusivela Mwanawe. Nave yaneeraru, Yehova onnamweemererya Mwanawe. Hankooni nthokororye emoha ti emoha raru.

4. Waataana taani ovyaani Yesu aareiyeno ni Muluku mu opatiso awe?

⁴ “Weyo wa mwanaka.” Ni masu yaala, Yehova aahooniherya wi Mwanawe ookhweleya, Yesu, aahivolowa mu onthamwene muvyaani ni Yoowo. Elukuluku Yesu aareiye wirimu, owo aari mwaana oomunepani a Muluku. Mwawiihiiha, mu opatiso awe, owo aahithanliwa ni munepa waweela. Mu elukuluku  yeele, Muluku aahooniherya wi Yesu ntoko Mwanawe oothanliwa, vano aahikhalano ewehereryo ya okookela wirimu wi akhale Mwene oothanliwa ni Muluku ni Mutokweene a Anamukucho. (Luka 1:31-33; Ahe. 1:8, 9; 2:17) Mwawiihiiha, mu opatiso wa Yesu, Tiithi awe aahikhalano nthowa na phaama na oloca: “Weyo wa mwanaka.”—Luka 3:22.

5. Nni ncharihe hai yootakiherya ya Yehova ya wooniherya osivela ni nlipiho?

⁵ “Weyo wa mwanaka . . . kinamukhwelaaka.” Yootakiherya ya Yehova ya wooniherya osivela ni weemererya ennanuupuserya waavya ikari wi naalipihe akina. (Yoh. 5:20) Ninneeliwa murima elukuluku muchu nnamuthokororyaahu onooniheryeiye osivela ntakhara hiyo ni onithamalela ntakhara ichu saphaama seiyo nipankaahu. Mmukhalelo woolikana, anna ni arokora ahu mmuloko ni achu a veemusini vahu, annachuna nsivelo ni nlipiho nahu. Vaavaa nnaathamalelaahu akina, ninnalipiha nroromelo naya ni waakhaviherya omurumeela Yehova moororomeleya. Xaxaxa alipa ooyara anaphwanela waalipiha anaaya. Elukuluku awo anaathamalelaaya anaaya ni owooniherya nsivelo, annaakhaviherya anaaya wiithipeerya.

6. Ntakhara heeni ninnaphwanela omuroromela Yesu Kristu?

⁶ “Yoowo kinahakalalaakano.” Masu ala annooniherya wi Yehova aahiroromela wi Yesu aahaala opaka yookhwela ya Tiithi awe. Woona wi Yehova aahimuroromela Mwanawe, hiyotho nnaphwanela ororomela wi Yesu moororomeleya onahaala waakhwaniherya soororomeliha soothene sa Yehova. (2 Kor. 1:20) Vaavaa nnathokororyaahu yootakiherya ya Yesu, ninnakhala oolakelela ohuserya orweela wa yoowo ni ochariha inaani sawe. Hiiha ntoko Yehova aamuroromenleiye Yesu,  Owotho onnaroromela wi, ntoko nikhuuru, akapuro awe anahaala otitelela ohuserya orweela wa Mwanawe.—1 Ped. 2:21.

7. Mwawiiwanana ni Mateu 17:1-5, ekwaha taani Yehova aalonceiye orweela wirimu, nave tiheeni aalonceiye?

⁷ Mwaalakhanye Mateu 17:1-5. Ekwaha yanaawiili Yehova aalonceiye ni Yesu orweela wirimu waari vaavaa ‘aatatusiweiye.’ Yesu aahinwopa Petro, Yakopo, ni Yohani wi emuhoole omwaako mutokweene. Eri weiwo, awo yaahikhalano yawoona yootikhiniha. Ethoi ya Yesu vamoha ni soowara sawe saanaarya. Iruku piili, saamweemelela Mose ni Eliya, saahipacerya oloca ni Yesu vooloca sa okhwa ni oviihiwa wawe mookhwani. Naamwi arummwa araru ale “yaanatuthela ikhove,” awo yoonne yootikhiniha ela elukuluku yaaryaaya oovinya ene. (Luka 9:29-32) Voocharela, neeku nawaarya naahaahuruwela yaawo, nave yaahiiwa nsu nikhumaka mu neeku—nsu na Muluku! Ntoko Yehova enreiye elukuluku Yesu aapatisiweiye, Yehova aahooniherya omweemererya ni omusivela wawe Mwanawe, alocaka: “Ola ti mwanaka mmoharu kinamukhwelaaka, yoowo kinahakalalaakano.” Nyenya mu elukuluku yeela, Yehova aahaaceererya ariki: “Mum’wiriyaneke.”

8. Yawoona yamvolowenle hai Yesu ni arummwa?

⁸ Yawoona yaahivaha yawooniherya ya ncicimiho ni owerya yoowo Yesu aahaaleiye waakhela muhoolo ntoko Mwene a Omwene wa Muluku. Moohikhwa minikwa, Kristu aahilipiheya ni oceenyeryeya ntakhara ohooseya ni okhwa wawiicela yoowo aahaaleiye ovilelano. Yaawoona tho yaahilipiha nroromelo na arummwa. Eyo yaahaakhaviherya okhala oreheryeya ntakhara saweeha yaahaalaaya ohoolela ni muteko mutokweene yaahaalaaya opaka. Mu iyaakha makhumi mararu ohoolo waya, murummwa Petro aahiloca yawoona ya otatusiwa, yooniheryaka wi nlelo Petro aanuupuwela yaweereya eyo.—2 Ped. 1:16-18.

9. Ekano taani yoophara muteko Yesu aavanheiye amuhuserya awe?

⁹ “Mum’wiriyaneke.” Yehova aahihiya vanlakani wi owo onachuna wi niwiriyaneke nave niiweleleke masu a Mwanawe. Tiheeni Yesu aalonceiye elukuluku aareiye veelaponi yavathi? Owo aahiloca ichu sincipale soophwanelela owiriyana! Ntoko yootakiherya, moosivela owo aahaahusiha oomuchara awe mukhalelo wa olaleerya michaka saphaama, nave mwawuuluulela owo aahiwuupuserya otitelela okhala awiilipelela. (Mat. 24:42; 28:19, 20) Owotho aahaaceenyerya wi yiilipiserye mwakuru, nave aahaalipiha wi ehivelavele. (Luka 13:24) Yesu aahiloca wa oomuchara awe ochuneya waya osivelana mukina ni mukhwaawe, otitelele okhala awiiwanana, ni ochariha malamulo awe. (Yoh. 15:10, 12, 13) Ekano yeeyo Yesu aavanheiye amuhuserya awe yaari yoophara muteko chiryene! Ekano eyo ti yoochuneya wa hiyo olelo hiiha ntoko elukuluku Yesu aavanheiye.

10-11. Nni nooniherye hai wi ninnanwiriyana Yesu?

¹⁰ Yesu aahiloca: “Oothene yaawo ari eeparipari, anniiwa nsu naka.” (Yoh. 18:37) Ninnooniherya wi ninnawiriyana nsu nawe vaavaa nnacharihaahu ekano ela: “Muvilelaneke mukina ni mukhwaawe nave mukhurumuwelaneke.” (Kol. 3:13; Luka 17:3, 4) Ninnawiriyanatho nsu nawe moorweela wa olaleerya mwamvai michaka saphaama “mu elukuluku yaweemereryeya naari yooheemereryeya.”—2 Tim. 4:2.

¹¹ Yesu aahiloca: “Ipucepuche saka sinniiwa nsu naka.” (Yoh. 10:27) Oomuchara a Kristu annooniherya wi annamuwiriyana Yesu ohiya pahi moorweela wa owiriyana masu awe nyenyatho moorweela wa opharihela muteko.  Awo hanuukhuwa ni “sooweiha sa okumi.” (Luka 21:34) Ohiya yeeyo, wa yaawo wiiwelela malamulo a Yesu ti yookhweleyaxa, ophiyerya mu elukuluku onakhalaaya woovila weerano yeeyo. Ancipale a annihu annavilela saweeha sincipale, ophitaanyerya ohipheliwa ni achu awaakaaha, ohaawa woovirelela, ni ipahu sa maphacuwelo. Mwa soothene seiha, awo annatitelela okhala oororomeleya wa Yehova, moohipwacha yeeyo enaahoosa. Wa yaawo Yesu ohaavaha nlipiho nla: “Muchu aakhenle malamulo aka anachariha, owo tonakikhwela miyo; nave yoowo onakikhwela, onarwa akhweliwa ti Atiithi aka.”—Yoh. 14:21.

12. Tuuvi ori mukhalelo mukina nnooniheryaahu wi ninnamwiiwelela Yesu?

¹² Wookhalavo mukhalelo mukina nneeraahu nooniherye wi ninnamuwiriyana Yesu: moorweela wa wiiwanana ni yaale owo aathanlileiye wi ehooleleke veeri vahu. (Ahe. 13:7, 17) Marehereryo a Muluku aapaka matorokelo mancipale mu iyaakha sahiihaanoru, ophitaanyerya opharihela ikaruma ni mikhalelo mivyaani mmuteko woolaleerya, meerelo a mithukumano sahu sa veeri va esumana, ni mukhalelo wa oteka, orehererya, naari oteka wanaawiili Ipa sahu sa Omwene. Ninnatepa othamalela ohoolela yoola woosivela ni woopwacha! Ninnaroromela wi Yehova onahaala oreeliha wiilipiserya wahu ochariha ohoolela wa marehereryo.

13. Mphurelo taani orivovo mu onwiriyana Yesu?

¹³ Ninnaphura orweela wa owiriyana ichu soothene Yesu ohusinheiye. Yesu aahaaroromeliha amuhuserya awe wi mahusiheryo awe yaahaala owiichuuwiha yaawo. Owo ooloca: “Munamphwanya wiichuwa wa okumi anyu. Ntakhara nipisi naka hannalimela ni murici aka ori wooveya.” (Mat. 11:28-30) Masu a Muluku, yaawo anaphitaanyerya aliivuru asese a Muchaka yaawo analoca sa okumi wa Yesu ni muteko awe, annaniichuuwiha omunepani, nave annaneeriha okhala amiruku. (Sal. 19:7; 23:3) Yesu ooloca: “Ooreriwasha [naari oohakalala] ti yaawo aniiwa masu a Muluku enachariha.”—Luka 11:28.

14-15. (1) Teevi yaari elukuluku yaneeraru, elociwe mu Yohani 12:27, 28 vaavaa Yehova aalonceiye orweela wirimu? (2) Ntakhara heeni masu a Yehova yaamuhakararya ni omulipiha Yesu?

¹⁴ Mwaalakhanye Yohani 12:27, 28, NN. Muchaka wa Yohani onnaloca ekwaha yaneeraru vaavaa Yehova aalonceiye orweela wirimu. Mahiku vakhaani ahaakumve okhwa, Yesu aari o Yerusalemu wi amulye Paskha  awe ookuchula. Owo aaloca ariki: “Okumi aka onnuukhuwa.” Voocharela aahivekela: “Atiithi chichimihani nsina nanyu.” Mu naakhulo, owo aahiwa nsu na Tiithi awe nlocaka ovinyerya wirimu: “Kochichimiha, nave kinarwa-kichichimiha’tho.”

¹⁵ Yesu aari awuukhuwa ntakhara murici mutokweene aareiyeno wa otitelela okhala oororomeleya wa Yehova. Yesu aahisuwela wi aahaala ohooseya ni owasuliwa ni okhwa mmukhalelo woonanara. (Mat. 26:38) Opwaha soothene, Yesu aachuna ocicimiha nsina na Tiithi awe. Yesu aahootheriwa munyemu, nave owo aahisuwela wi okhwa wawe waahaala omunyemuliha Muluku. Mweeparipari, masu a Muluku yaahimvaha Yesu nroromelo noolipa! Owo aahiroromela wi nsina na Yehova naahaala ocicimihiwa. Masu a Tiithi awe yaahimuhakararya vatokovene Yesu nave yaahimulipiha ovilela ni ohooseya yoowo aahaaleiye ohoolela. Naamwi Yesu aari mmoharu yoowo iiwexexa yeeyo Tiithi awe aaloceiye mu elukuluku yeele, Yehova aaheeriha wi Masu awe arempwe ntakhara hiyo.—Yoh. 12:29, 30.

16. Ntakhara heeni ilukuluku ikina ninnuukhuwa vooloca sa onyemuliwa nsina na Muluku?

¹⁶ Moolikana ni Yesu, hiyotho nnamukhala awuukhuwa ntakhara munyemu yoowo oneereliwa nsina na Yehova. Akhweya moolikana ni Yesu, hiyo nnakhalihiwa moonanara. Naari akhweya nnamukhala awuukhuwa nthowa na miyaha sawootha seiyo alipa awaakaaha anamwaramwaxaaya vooloca sa hiyo.  Nnaphwanela wuupuwela vooloca sa munyemu miyaha iho sinaruuhelaaya nsina na Yehova ni marehereryo awe. Mu ilukuluku ntoko seiyo, Masu a Yehova anakhala nihakararyo ntokweene wa hiyo. Hannaphwanela okhala awuukhuwaxa vooloca sa munyemu vyakala oneereliwa nsina na Yehova ni marehereryo awe. Nnaphwanela ororomela wi “murecele wa Muluku, opwanhe wuupuwela wahu woothene, onarwa waakiha murima [ahu] ni muupuwelo [ahu] mwa Yesu ori Kristu.” (Fil. 4:6, 7) Ilukuluku soothene Yehova onahaala ocicimiha nsina nawe. Moorweela wa Omwene, Yehova onahaala omaliha makacamiho oothene Satana ni elapo ela enaaruhelaaya akapuro Awe oororomeleya.—Sal. 94:22, 23; Isa. 65:17.

17. Mwawiiwanana ni Isaiya 30:21, Yehova onaloca hai ni hiyo olelo?

¹⁷ Nlelo Yehova onnaloca ni hiyo olelo. (Mwaalakhanye Isaiya 30:21.) Mweeparipari, hannamwiiwa Yehova alocaka ni hiyo orweela wirimu. Ohiya yeeyo, owo oovahererya masu awe oorempwa, Piipiliya, mummo onanivaheiyemo mahusiheryo. Mwawaaceererya, munepa waweela onnamweeriha “namuteko oororomeleya” otitelela waavaha akapuro Awe yoolya yeeyo awo anachunaaya. (Luka 12:42) Yookhalavo yoolya yincipale nnaakhelaahu mmukhalelo wa wimprimiiriwa, mu site, ixilema, ni soolaleeryiwa sookravaariwa seiyo sinanikhaviherya otitelela okhalano nroromelo noolipa!

18. Masu a Yehova anoolipihaani nave anoovahaani hai nroromelo ni olipa murima?

¹⁸ Hankooni nikhapelele mmuupuweloni masu yaawo Yehova aalonceiye elukuluku Mwanawe aareiye veelaponi yavathi! Masu a Muluku, ntoko arempwaaya Mpiipiliyani, annanivaha nroromelo nawi Yehova onnavareryela echu eri yoothene nave wi onamviihavo yoonanara eri yoothene yeeyo Satana ni elapo awe yoonanara enanruuhelaaya. Nave nnaphwanela olakelela owiriyana moomalela nsu na Yehova. Wakhala wi ninneerano yeeyo, nnahaala okhumelela phaama mu ovilela makacamiho vyakala yaawo nneeraahu nihoolele hiihaano ni muhoolo. Piipiliya onnanuupuserya: “Nyuwo munaphwanela okhala a nthiti, wi, mweeraka okhwela wa Muluku, mwaakhele yeeyo oororomenheiyeni.”—Ahe. 10:36.