1-2. (a) Jehofa o ile a bolela bjang le batho nakong e fetilego, gona lehono o diriša’ng? (b) Re tlo ithuta’ng sehlogong se?

JEHOFA o rata go boledišana le rena. Nakong e fetilego o ile a diriša baporofeta, barongwa le Morwa wa gagwe Kriste Jesu go botša batho dikgopolo tša gagwe. (Amose 3:7; Bagal. 3:19; Kut. 1:1) Lehono, o diriša Lentšu la gagwe e lego Beibele go bolela le rena. O re neile yona e le gore re ithute dikgopolo tša gagwe le go kwešiša tsela yeo a dirago dilo ka yona.

² Ge Jesu a be a le mo lefaseng, Jehofa o ile a bolela a le legodimong ka makga a mararo. Anke re kweng seo Jehofa a ilego a se bolela, re kwe le seo re ka ithutago sona mantšung ao a gagwe le kamoo a re holago ka gona.

3. Go Mareka 1:9-11, Jehofa o ile a re’ng ge Jesu a be a kolobetšwa, gona mantšu ao a ile a kgonthišetša dintlha dife tša bohlokwa?

³ Go Mareka 1:9-11 re kwa ka lekga la pele leo ka lona Jehofa a ilego a bolela a le legodimong. (Bala.) O boditše Jesu gore: “O Morwa wa ka, morategi; ke go amogetše.” Jesu o swanetše go ba a ile a kgomega kudu go kwa Tatagwe a bolela le yena ka tsela ye e lerato e bile a bontšha gore o a mmota. Mantšu a a Jehofa a ile a kgonthišetša dilo tše tše tharo tša bohlokwa mabapi le Jesu. Sa pele, gore Jesu ke Morwa wa gagwe. Sa bobedi, gore Jehofa o rata Morwa wa gagwe. Sa boraro, gore Jehofa o amogetše Morwa wa gagwe. Anke re boledišaneng ka dintlha tše ka e tee ka e tee.

4. Ge Jesu a be a kolobetšwa, o ile a ba Morwa wa Modimo ka tsela efe e kgethegilego?

⁴ “O Morwa wa ka.” Ka go bolela mantšu a, Jehofa o be a bontšha gore ga bjale Jesu e be e le Morwa wa gagwe ka tsela e kgethegilego. Pele Jesu a ka tla mo lefaseng, e be e šetše e le  Morwa wa Modimo. Eupša nakong ya ge a be a kolobetšwa, o ile a tlotšwa ka moya o mokgethwa. Ka nako yeo, Modimo o ile a bontšha gore ka ge Jesu e le Morwa wa gagwe yo a tloditšwego, ga bjale o na le kholofelo ya go boela legodimong gore a yo ba Kgoši yeo e kgethilwego ke Modimo le Moperisita yo a Phagamego. (Luka 1:31-33; Baheb. 1:8, 9; 2:17) Ka gona ge Jesu a be a kolobetšwa, Tatagwe o be a na le lebaka le le kwagalago la go bolela gore: “O Morwa wa ka.”—Luka 3:22.

5. Re ka ekiša Jehofa bjang ka go bontšha ba bangwe lerato le go ba kgothatša?

⁵ “O . . . morategi.” Ge Jehofa a be a bolela mantšu a, o be a bontšha gore o rata Jesu e bile o mo amogetše. Re ithuta’ng go seo? Re ithuta gore re swanetše go dula re nyaka ditsela tšeo re ka kgothatšago ba bangwe. (Joh. 5:20) Re a kgothatšega ge motho yo re nago le taba le yena a re bontšha lerato e bile a re reta ge re dira dilo tše dibotse. Ka mo go swanago, re swanetše go rata le go kgothatša bana babo rena le dikgaetšedi ka phuthegong gotee le ditho tša malapa a gabo rena. Ge re reta ba bangwe, re matlafatša tumelo ya bona e bile re ba thuša go hlankela Jehofa ka go botega. Batswadi ba swanetše go kgothatša bana ba bona. Ge batswadi ba reta bana ba bona go tšwa pelong e bile ba ba bontšha lerato, seo se thuša bana go gola gabotse.

6. Ke ka baka la’ng re ka kgodišega gore Jesu Kriste o tlo phethagatša dilo ka moka tšeo Jehofa a re holofeditšego tšona?

⁶ “Ke go amogetše.” Mantšu a a bontšha gore Jehofa o be a kgodišegile gore Jesu o be a tla dira thato ya Gagwe ka potego. Ka gona, le rena re ka kgodišega gore Jesu o tla phethagatša dilo ka moka tšeo Jehofa a re holofeditšego tšona. (2 Bakor. 1:20) Ge re naganišiša ka mohlala wa Jesu, seo se dira gore re tloge re nyaka go ithuta ka yena le go latela mohlala wa gagwe. Go etša ge Jehofa a be a kgodišegile  gore Jesu o tla dira thato ya gagwe, le lehono o kgodišegile gore bahlanka ba gagwe ba tla tšwela pele ba ithuta go Morwa wa gagwe.—1 Pet. 2:21.

7. Go ya ka Mateo 17:1-5, ke nakong efe moo Jehofa a ilego a bolela a le legodimong, gona o ile a re’ng?

⁷ Bala Mateo 17:1-5. Lekga la bobedi leo Jehofa a ilego a bolela a le legodimong ke nakong ya ge Jesu a be “a fetoga ponagalo.” Jesu o be a biditše Petro, Jakobo le Johane gore ba ye le yena thabeng e telele. Ge ba be ba le moo, ba ile ba bona pono yeo e sa tlwaelegago. Sefahlego sa gagwe se ile sa taga gomme diaparo tša gagwe tša phadima. Banna ba babedi bao ba bego ba swantšhetša Moshe le Eliya, ba ile ba thoma go boledišana le Jesu mabapi le lehu la gagwe le tsogo ya gagwe. Gaešita le ge baapostola ba ba bararo ba be ba “imetšwe ke boroko,” ba ile ba bona pono ye yeo e makatšago ge ba be ba phafogile. (Luka 9:29-32) Ka morago ga moo, leru le le phadimago le ile la ba aparetša gomme ba kwa lentšu le etšwa lerung leo. E be e le lentšu la Modimo! Ge Jesu a be a kolobetšwa, Jehofa o ile a bontšha gore o mo amogetše le gore o a mo rata. Le lekgeng le, o ile a dira bjalo ka go bolela gore: “Yo ke Morwa wa ka yo a rategago, yo ke kgahlwago ke yena.” Eupša mo lekgeng le, Jehofa o ile a oketša ka gore: “Le mo theetšeng.”

8. Pono ya ge Jesu a fetoga ponagalo e ile ya kgoma bjang Jesu le barutiwa ba gagwe?

⁸ Ge Jesu a be a fetoga ponagalo, seo se ile sa bontšha e sa le pele letago leo a bego a tla ba le lona ge e le Kgoši e matla ya Mmušo wa Modimo. Ga go pelaelo gore Kriste o ile a kgothatšega le go matlafala ka ge a be a le kgauswi le go tlo tlaišwa le go hwa lehu le sehlogo. Le gona pono ye e ile ya tiiša tumelo ya barutiwa bao le go ba matlafatša ka ge ba be ba tlo lebeletšana le diteko le mošomo o thata. Go bontšha gore moapostola Petro o be a sa gopola gabotse pono ye ya ge Jesu a be a fetoga ponagalo, o ile a bolela ka yona ka morago ga mengwaga e ka bago e 30.—2 Pet. 1:16-18.

9. Ke keletšo efe e botse yeo Jesu a ilego a e nea barutiwa ba gagwe?

⁹ “Le mo theetšeng.” Jehofa o ile a bolela ka mo go kwagalago gore o nyaka gore re theetše Morwa wa gagwe le go dira seo a re laelago sona. Jesu o ile a re’ng ge a be a le mo lefaseng? O ile a bolela dilo tše dintši tšeo go lego bohlokwa gore re di theetše. Ka mohlala, ka lerato o ile a ruta balatedi ba gagwe go bolela ditaba tše dibotse, le gona o ile a ba gopotša ka makga a mmalwa gore ba dule ba phakgame. (Mat. 24:42; 28:19, 20) Le gona o ile a ba kgothaletša gore ba katane ka matla le gore ba se ke ba felelwa ke matla. (Luka 13:24) Jesu o ile a eletša balatedi ba gagwe gore go bohlokwa kudu gore ba ratane, ba dule ba na le botee le gore ba kwe ditaelo tša gagwe. (Joh. 15:10, 12, 13) Ruri Jesu o neile balatedi ba gagwe keletšo e botse kudu! Keletšo yeo e sa le bohlokwa le lehono go etša ge e be e le bohlokwa ge Jesu a be a e nea barutiwa ba gagwe.

10-11. Re ka bontšha bjang gore re theetša Jesu?

¹⁰ Jesu o itše: “Yo mongwe le yo mongwe yo a emago le therešo o theetša lentšu la ka.” (Joh. 18:37) Re bontšha gore re theetša lentšu la gagwe ge re ‘tšwela pele re kgotlelelana gomme re lebalelana ka bolokologi.’ (Bakol. 3:13; Luka 17:3, 4) Le gona re bontšha gore re theetša lentšu la gagwe ge re bolela ditaba tše dibotse ka mafolofolo “ka dinako tše di loketšego le ka dinako tša mathata.”—2 Tim. 4:2.

¹¹ Jesu o itše: “Dinku tša ka di theetša lentšu la ka.” (Joh. 10:27) Balatedi ba Kriste ba bontšha gore ba theetša mantšu a gagwe e sego  feela ka go no kwa eupša le ka go latela seo a se bolelago. Ga ba šitišwe ke “dipelaelo tša bophelo.” (Luka 21:34) Go e na le moo, go kwa Jesu go tla pele maphelong a bona, gaešita le ge go le thata go dira seo. Bana babo rena ba bantši ba kgotleletše diteko tše thata kudu, go akaretša go hlaselwa ke baganetši, go diila kudu le go welwa ke dikotsi tša tlhago. Go sa šetšwe dilo tše ka moka, bana babo rena ba ba dula ba botegela Jehofa. Jesu o ba kgothatša ka mantšu a ao a rego: “Yo a nago le ditaelo tša ka gomme a di boloka, yena yoo ke yo a nthatago. Le gona yo a nthatago o tla ratwa ke Tate.”—Joh. 14:21.

12. Tsela e nngwe yeo re ka bontšhago ka yona gore re theetša Jesu ke efe?

¹² Tsela e nngwe yeo re ka bontšhago gore re theetša Jesu ke ka go dirišana le bao a ba kgethilego go re etelela pele. (Baheb. 13:7, 17) Mengwageng ya morago bjale mokgatlo o dirile diphetogo tše dintši kudu. Diphetogo tšeo di akaretša dilo tše difsa tšeo re di dirišago tšhemong, tsela yeo seboka sa gare ga beke se swarwago ka yona le tsela yeo re agago Diholo tša Mmušo, go di lokiša le go di hlokomela. Ruri re leboga tlhahlo ye e lerato le yeo e naganišišitšwego gabotse! Re ka kgodišega gore Jehofa o tla šegofatša maiteko a rena ge re latela tlhahlo yeo re e newago ke mokgatlo wa gagwe.

13. Re holega bjang ge re theetša Jesu?

¹³ Re a holega ge re theetša dilo ka moka tšeo Jesu a di rutilego. Jesu o ile a holofetša barutiwa ba gagwe gore dithuto tša gagwe di be di tla ba lapološa. O itše: “Le tla hweletša meoya ya lena tapologo. Gobane joko ya ka e botho, morwalo wa ka o bohwefo.” (Mat. 11:28-30) Lentšu la Modimo leo le akaretšago Diebangedi tše nne tša mabapi le bophelo bja Jesu le bodiredi bja gagwe, di a re lapološa, di re matlafatša moyeng e bile di dira gore re be bohlale. (Ps. 19:7; 23:3) Jesu o itše: “Go thaba bao ba kwago lentšu la Modimo gomme ba le boloka!”—Luka 11:28.

14-15. (a) Go ya ka Johane 12:27, 28, ke nakong efe moo Jehofa a ilego a bolela a le legodimong? (b) Ke ka baka la’ng mantšu a Jehofa a ka ba a ile a kgothatša Jesu le go mo matlafatša?

¹⁴ Bala Johane 12:27, 28. Ebangeding ya Johane re kwa ka lekga la boraro moo Jehofa a ilego a bolela a le legodimong. Jesu o be a le Jerusalema matšatši a sego kae pele a ka bolawa. O be a le moo go yo keteka Paseka ya gagwe ya mafelelo. O ile a re: “Moya wa ka o tshwenyegile.” Ka morago ga moo a rapela a  re: “Tate tagafatša leina la gago.” Ke moka Tatagwe o ile a bolela a le legodimong a re: “Ke le tagafaditše gomme ke tla buša ke le tagafatša.”

¹⁵ Jesu o be a tshwenyegile ka baka la boikarabelo bjo bogolo bjo a bego a na le bjona bja gore a dule a botegela Jehofa. Jesu o be a tseba gore o be a tlo tlaišwa o šoro gomme mafelelong a hwa lehu le sehlogo. (Mat. 26:38) Selo se bohlokwa kudu go Jesu e be e le gore a tagafatše leina la Tatagwe. Jesu o ile a bewa molato wa gore ke morogaki, le gona o be a tshwenyegile ka gore lehu la gagwe le be le tla goboša leina la Tatagwe. Ruri mantšu a Jehofa a ile a mo kgothatša kudu! Jesu o be a ka kgodišega gore leina la Jehofa le be le tlo tagafatšwa. Mantšu ao a Jehofa a swanetše go ba a ile a kgothatša Jesu kudu le go mo matlafatša gore a tle a kgone go lebeletšana le seo se bego se tlo mo diragalela. Gaešita le ge Jesu e ka ba e le yena feela yo a ilego a kwešiša seo Tatagwe a ilego a mmotša sona ka nako yeo, Jehofa o ile a kgonthišetša gore mantšu ao a a boletšego a ngwalwa ka Beibeleng gore a tle a re hole.—Joh. 12:29, 30.

16. Ke’ng seo se ka dirago gore ka dinako tše dingwe re tshwenyege ka gore leina la Jehofa le a gobošwa?

¹⁶ Go swana le Jesu, le rena re ka tshwenyega ka gore leina la Jehofa le a gobošwa. Mohlomongwe re swarwa ka go hloka toka go swana le Jesu. Goba mohlomongwe re ka tshwenyega ge re ekwa ditori tša maaka tšeo baganetši ba rena ba di bolelago ka rena. Re ka nagana ka tsela yeo ditori tšeo di senyago  leina la Jehofa le mokgatlo wa gagwe. Dinakong tše bjalo, mantšu a Jehofa ao a lego go Johane 12:27, 28 a re kgothatša kudu. Ka gona ga se ra swanela go tshwenyega ka tsela e feteletšego. Re ka kgodišega gore “khutšo ya Modimo yeo e fetago kwešišo yohle ya batho e tla diša dipelo tša [rena] le matla a [rena] a monagano ka Kriste Jesu.” (Bafil. 4:6, 7) Jehofa a ka se tsoge a paletšwe ke go tagafatša leina la gagwe. O tla diriša Mmušo wa gagwe go rarolla mathata ka moka ao Sathane le lefase la gagwe ba a a tlišeditšego bahlanka ba gagwe bao ba botegago.—Ps. 94:22, 23; Jes. 65:17.

17. Go ya ka Jesaya 30:21, Jehofa o bolela le rena bjang lehono?

¹⁷ Jehofa o sa bolela le rena lehono. (Bala Jesaya 30:21.) Ke therešo gore Modimo ga a bolele le rena ka go lebanya. Lega go le bjalo, o re neile Lentšu la gagwe e lego Beibele gore re kgone go hwetša tlhahlo go lona. Go oketša moo, moya wa Jehofa o thuša “molaki yo a botegago” gore a tšwele pele a nea bahlanka ba Gagwe dijo. (Luka 12:42) Re hwetša dijo tše dintši tša moya tšeo di gatišitšwego le tšeo di lego Inthaneteng, e bile re hwetša le dibidio tše dintši le mananeo a go theetšwa.

18. Mantšu a Jehofa a aga tumelo ya gago bjang e bile a go nea sebete bjang?

¹⁸ Anke re se ke ra lebala mantšu ao Jehofa a ilego a a bolela ge Morwa wa gagwe a be a le mo lefaseng. Eka mantšu a Modimo ao a lego ka Beibeleng a ka re kgodiša gore o kgona go laola dilo ka moka, le gore o tla rarolla mathata ka moka ao a tlišitšwego ke Sathane le lefase la gagwe le lebe. Le gona anke re ikemišetšeng go theetša lentšu la Jehofa ka kelohloko. Ge re ka dira bjalo, re tla kgona go fenya mathata le ge e le afe ao re nago le wona gona bjale le ditlhohlo le ge e le dife tšeo re tlago go lebeletšana le tšona nakong e tlago. Beibele e re gopotša gore: “Go nyakega gore le kgotlelele, e le gore ka morago ga ge le dirile thato ya Modimo, le amogele seo a se holofeditšego.”—Baheb. 10:36.