1-2. (a) Yehova atwire naahurizana ata n’abantu? (b) Nituza kugaaniira ahari ki omu kicweka eki?

YEHOVA naakunda kuhurizana naitwe. Ira akaba naakoresa baanabi, baamaraika, n’Omwana we, Kristo Yesu, kutumanyisa ebiteekateeko bye. (Amo. 3:7; Gal. 3:19; Kush. 1:1) Obunaku obu, naahurizana naitwe kurabira omu Kigambo kye Baibuli. Akagituha kugira ngu twegye emiteekateekyere ye n’emitindo ye.

² Obu Yesu yaabaire ari omu nsi, Yehova akagambira omu iguru emirundi eshatu aha mazooba gatarikushushana. Ka tushwijume ebi Yehova yaagambire, eki turikwegyera aha bigambo bye, n’oku birikutugasira.

3. Nk’oku turikushoma omuri Mako 1:9-11, Yehova akamugambira ki Yesu yaaheza kubatizibwa, kandi ebigambo bye bikahamya mazima ki?

³ Omuri Mako 1:9-11 harimu ebigambo ebi Yehova yaagambiire omu iguru omurundi gw’okubanza. (Kishome.) Akagira ati: “Niiwe Mwana wangye ou nkunda, kandi ou nshemerererwa munonga.” Eki ka kishemereire kuba kyakwatsire ahari Yesu kuhurira eiraka rya Ishe arikumuhamiza ngu naamukunda! Ebigambo bya Yehova bikahamya enshonga ishatu nkuru ezirikukwata ahari Yesu. Ey’okubanza, Yesu n’Omwana we. Eya kabiri, Yehova naakunda Omwana we. Eya kashatu, Yehova naasiima ebi Omwana we arikukora. Ka tushwijume buri emwe.

4. Yesu aha kubatizibwa kwe akagira mukago ki omusya na Ruhanga?

⁴ “Niiwe Mwana wangye.” Yehova okukoresa ebigambo  ebi, kikooreka ngu Omwana we omukundwa, Yesu, atandikire omukago gw’omutaano nawe. Obu Yesu yaabaire ari omu iguru, akaba ari Omwana wa Ruhanga ow’omwoyo. Kwonka aha kubatizibwa kwe, akashukwaho omwoyo ogurikwera. Omu bwire obwo, Ruhanga akooreka ngu Yesu n’Omwana we oshukirweho amajuta, kandi ngu aine n’amatsiko g’okugaruka omu iguru kuba Omugabe kandi Omunyamurwa Omukuru. (Luk. 1:31-33; Heb. 1:8, 9; 2:17) N’ahabw’ekyo nikyeyoreka gye ahabw’enki aha kubatizibwa kwe, Ishe yaagizire ati: “Niiwe Mwana wangye.”​—Luk. 3:22.

5. Nitubaasa kutooreza tuta Yehova omu kugirira abandi rukundo n’okubasiima?

⁵ ‘Ou ndikukunda.’ Yehova okworeka ngu naakunda abandi kandi naabasiima nikitwijutsya ngu twine kusherura oburyo bw’okworeka ngu nitukunda abandi. (Yoh. 5:20) Nitwehurira gye munywani waitu yaayoreka ngu naatukunda kandi naasiima ebirungi ebi turikukora. Nikyo kimwe, Abakristaayo bagyenzi baitu n’ab’omu maka gaitu nibenda ngu tubakunde kandi tubagumye. Twasiima abandi, nituhamya okwikiriza kwabo, kandi nitubahwera kugumizamu nibaheereza Yehova. Okukira munonga abazaire baine kugumya abaana baabo. Abazaire baayebaza abaana baabo baihire aha mutima, kandi bakooreka ngu nibabakunda, nibabahwera kwehurira gye.

6. Ahabw’enki turikubaasa kugira obwesigye omuri Yesu Kristo?

⁶ “Ou nshemerererwa” nari ou ndikusiima munonga. Ebigambo ebi nibyoreka ngu Yehova akaba aine obwesigye omuri Yesu ngu naija kuhikiiriza gye ebi arikukunda. Obu Yehova aine obwesigye nk’obwo omu Mwana we, naitwe tushemereire kwesigira  kimwe Yesu ngu naija kuhikiiriza ebigyendererwa bya Yehova. (2 Kor. 1:20) Twateekateeka aha ky’okureeberaho kya Yesu, nitwongyera kumariirira kumwegyeraho n’okumutooreza. Na Yehova aine obwesigye ngu abaheereza be boona nk’ekibiina, nibaija kugumizamu nibeegyera aha Mwana we.​—1 Pet. 2:21.

7. Kurugiirira ahari Matayo 17:1-5, ni ryari obu Yehova yaagambira omu iguru, kandi akagamba ki?

⁷ Shoma Matayo 17:1-5. Omurundi gwa kabiri obu Yehova yaagambira omu iguru, n’obu Yesu ‘yaahindurwa.’ Yesu akaba ayetsire Petero, Yakobo, na Yohaana kugyenda nawe aha rushozi. Ku baabaire bari aha rushozi, bakatunga okworekwa kw’omutaano. Yesu akamurinkana aha maisho n’ebijwaro bye byayengyengyeta. Bakoorekwa abantu babiri, omwe arikujwekyera Musa kandi ondiijo arikujwekyera Eliya. Bakatandika kugaaniira na Yesu aha kufa kwe n’okuzooka kwe. N’obu entumwa bashatu baraabe baabaire “baine oturo nibahungira,” ku baasiimukire bakareeba okworekwa oku okurikutangaaza. (Luk. 9:29-32) Ekyakuratsireho, ekicu kirikwengyengyeta kikabasaangira, reero baahurira eiraka rya Ruhanga nirigambira omu kicu! Nk’oku Yehova yaabaire yaakozire aha kubatizibwa kwa Yesu, akagaruka yaayoreka ngu naasiima Yesu kandi ngu naamukunda, arikugira ati: “Ogu n’omwana wangye ou nkunda.” Kwonka hati Yehova akoongyeraho ati: “Mumuhurire.”

8. Okuhindurwa kwa Yesu kukamukwataho kuta hamwe n’abeegi be?

⁸ Bakoorekwa aha biro bya Yesu eby’omumaisho yaaba naategyekyera omu kitiinisa omu Bukama bwa Ruhanga. Buzima, eki kikahwera Kristo kugira amaani g’okugumisiriza okubonabona n’okufa kw’obusaasi bwingi. Kandi okworekwa oku kukahamya okwikiriza kw’abeegi ba Yesu kwabatebeekanisiza n’okugyezibwa oku baabaire nibaija kurabamu omu biro by’omumaisho. Emyaka nka 30 bwanyima, entumwa Petero akagamba aha kuhindurwa kwa Yesu kworeka ngu akaba naakikwijuka gye.​—2 Pet. 1:16-18.

9. Ni buhabuzi ki oburikukora obu Yesu yaahaire abeegi be?

⁹ “Mumuhurire.” Yehova akakyoreka gye ngu naayenda tuhurire ebigambo by’Omwana we kandi tubyorobere. Yesu akagamba ki obu yaabaire ari omu nsi? Akagamba ebintu bingi bikuru ebiine kworoberwa! Nk’eky’okureeberaho, omu muringo gwa rukundo akeegyesa abakuratsi be kubuurira amakuru marungi, kandi akaguma naabaijutsya kuguma nibareeba. (Mat. 24:42; 28:19, 20) Kandi akabahiga kuba abeeziriki, yaabahiga n’okutaruha kureka bagume bari abeeziriki. (Luk. 13:24) Yesu akooreka ngu abakuratsi be baine kukundana, bagume baine obumwe, kandi boorobere ebiragiro bye. (Yoh. 15:10, 12, 13) Obuhabuzi obu Yesu yaahaire abeegi be ka bwabaire nibukora! Na hati, obuhabuzi obwo nibukikora nk’obu Yesu yaabuha.

10-11. Nitubaasa kworeka tuta ngu nituhurikiza Yesu?

¹⁰ Yesu akagira ati: “Omuntu weena ow’amazima ahurira eiraka ryangye.” (Yoh. 18:37) Nitworeka ngu nituhurira eiraka rye twagumizamu ‘nitugumisiririzana kandi nitusaasirana’ tutataireho bushonshorekye. (Kol. 3:13; Luk. 17:3, 4) Kandi nitworeka ngu nituhurira eiraka rye turikubuurira amakuru marungi g’Obukama omu bwire burungi n’obutari burungi.​—2 Tim. 4:2.

¹¹ Yesu akagira ati: “Entaama zangye zihurira eiraka ryangye.” (Yoh. 10:27) Abakuratsi ba Yesu nibamuhurira barikuta omutima  aha bigambo bye kandi bakabigyenderaho. Tibarikuhugibwa ‘amaganya g’amagara aga.’ (Luk. 21:34) Omu mwanya gw’ekyo, nibeebembeza okworobera ebiragiro bya Yesu n’obu embeera zirikuba zitoorobi. Ab’eishe-emwe baingi nibagumira okugyezibwa, otwariiremu okutaahirirwa abarikuhakanisa, obworo, n’ebihikiirizi by’obuhangwa. Kwonka, nibaguma bari abeesigwa ahari Yehova, n’obu baakubonabona bata. Yesu naabahamiza ati: ‘Oine ebiragiro byangye akabyorobera niwe arikunkunda, kandi orikunkunda naija kukundwa Tata.’​—Yoh. 14:21.

12. Ni muringo ki ogundi ogu turikubaasa kworeka ngu nituhurikiza Yesu?

¹² Okukwatanisa n’abu Yesu ahaire obujunaanizibwa omu kibiina n’omuringo ogundi ogu turikuhurikizamu Yesu. (Heb. 13:7, 17) Ekibiina kya Ruhanga kikozire empindahinduka nyingi omu myaka ehingwire, otwariiremu ebikoreso bisya n’emiringo misya omu kubuurira, oku enteerane z’aha gati ya saabiiti zitebeekanisiibwe, oku turikwombeka, oku turikuhuunduza Ebyombeko by’Obukama, n’oku turikubireeberera. Nitusiima obuhabuzi obu obwa rukundo, kandi obutebeekanisiibwe n’obwegyendesereza! Nitubaasa kuhamya ngu Yehova naija kutuha omugisha twateeraho kukuratira obuhabuzi bw’ekibiina obwo.

13. Okuhurikiza Yesu nikurugamu birungi ki?

¹³ Nitugasirwa twahurikiza ebintu byona ebi Yesu yaayegyeise. Akahamiza abeegi be ngu ebi yaayegyeise nibiija kubaruhuura. Akabagira ati: ‘Nimwija kutunga okuhuumura omu mitima yaanyu, ahakuba omugamba gwangye tigurikuremeera.’ (Mat. 11:28-30) Ekigambo kya Ruhanga ekirikutwariramu ebitabo bina eby’Engiri ebirikukwata aha buheereza bwa Yesu n’entwaza ye, nikituruhuura, kituha amaani omu by’omwoyo, kandi kituhindura abanyabwengye. (Zab. 19:7; 23:3) Yesu akagira ngu abaine okushemererwa n’abarikuhurira “ekigambo kya Ruhanga bakakyorobera.”​—Luk. 11:28.

14-15. (a) Nk’oku kirikworekwa omuri Yohaana 12:27, 28, ni ryari obu Yehova yaagambira omu iguru omurundi gwa kashatu? (b) Ahabw’enki ebigambo bya Yehova biine kuba byagumize Yesu?

¹⁴ Shoma Yohaana 12:27, 28. Omu Ngiri ya Yohaana harimu omurundi gwa kashatu obu Yehova yaagambira omu iguru. Yesu akaba ari omuri Yerusaalemu arikuza  kukuza Okuhingurwaho, ebiro bikye atakaitsirwe. Akagira ati: “Omutima gwangye gwine obusaasi.” Ku yaaherize yaashaba ati: “Taata, himbisa eiziina ryawe.” Reero Ishe yaamugarukamu kuruga omu iguru ati: ‘Naarihimbisa, kandi ninyija kugaruka ndihimbise.’

¹⁵ Yesu akagira obusaasi ahabw’obujunaanizibwa bw’amaani obu yaabaire aine obw’okuguma ari omwesigwa ahari Yehova. Yesu akaba naamanya ngu naija kuteerwa kandi aitwe kubi munonga. (Mat. 26:38) Okukira ekindi kintu kyona, Yesu akaba naayenda kuhimbisa eiziina rya Ishe. Yesu akateebwaho orubanja rw’okurogota, kandi akaba ayerarikiriire ngu okwitwa kwe nikwija kujumisa Yehova. Ebigambo bya Yehova ka biine kuba byahamiize Yesu! Akaba naabaasa kuhamya ngu eiziina rya Ishe, Yehova, niriija kuhimbisibwa. Ebigambo bya Ishe bishemereire kuba byakozire kihango kumugumya ahabw’ebyabaire nibiza kumuhikaho. N’obu Yesu araabe niwe wenka owaayetegyereize ebi Yehova yaagambire obwire obwo, Yehova akahamya ngu ebigambo bye byahandiikirwa itwe twena.​—Yoh. 12:29, 30.

16. Ahabw’enki obumwe turikubaasa kwerarikirira?

¹⁶ Nka Yesu, naitwe nitubaasa kuba nitwerarikirira ngu eiziina rya Ruhanga Yehova nirijumwa. Obundi nka Yesu, naitwe nitutwarizibwa kubi. Nari obundi nituteganisibwa ebitebyo bitahikire ebi abarikuhakanisa  barikujanjaaza. Nitubaasa kuteekateeka aha bitebyo ebi ebirikushiisha eiziina rya Yehova n’ekibiina kye. Omu bwire nk’obwo, ebigambo bya Yehova nibitugumya munonga. Titwine kwerarikirira ekirenga. Nitubaasa kugira obuhame ngu ‘obusingye bwa Ruhanga oburengire okwetegyereza kw’omuntu weena, nibwija kuguma burinde emitima yaitu n’obwengye bwaitu omuri Kristo Yesu.’ (Fil. 4:6, 7) Yehova butoosha naija kuguma naahimbisa eiziina rye. Kurabira omu Bukama, naija kwihaho akabi koona aku Sitaane n’abantu b’ensi bareetsire aha baheereza be abeesigwa.​—Zab. 94:22, 23; Isa. 65:17.

17. Kuhikaana n’ebiri omuri Isaaya 30:21, Yehova naagamba naitwe ata obunaku obu?

¹⁷ Yehova n’obunaku obu naagamba naitwe. (Shoma Isaaya 30:21.) N’amazima, titurikuhurira eiraka rye omu iguru. Kwonka atuhaire Ekigambo kye Baibuli, eki arikukoresa kutuha obuhabuzi. Kandi omwoyo gwa Yehova ogurikwera niguhiga “omubiiki orikwesigwa” kugumizamu naatuha eby’okurya eby’omwoyo. (Luk. 12:42) Ka nitutunga eby’okurya bingi eby’omwoyo kurabira omu bitabo ebitairwe n’ebiri aha mukura, vidiyo nyingi, n’ebikwatsirwe eby’okuhurikiza!

18. Ebigambo bya Yehova nibyombeka bita okwikiriza kwawe bikakuha n’obumanzi?

¹⁸ Ka tugume nitwijuka ebigambo ebi Yehova yaagambire obu Omwana we yaabaire ari omu nsi! Ebigambo bya Yehova ebiri omu Baibuli, nibituhamiza ngu buri kimwe kiri omu bushoboorozi bwe, kandi ngu naija kwihaho akabi koona aku Sitaane n’abantu b’ensi ye mbi batureetsireho. Kandi ka tumariirire kuhurikiza gye Yehova. Twakora tutyo, nitwija kusingura omu kugumisiriza oburemeezi bwona obu turikubaasa kutunga hati n’oburaabeho nyentsya. Baibuli neetwijutsya eti: ‘Nimwetenga kugumisiriza, ku muraaheze kukora ebi Ruhanga arikukunda, mubone kuheebwa ebyaraganisiibwe.’​—Heb. 10:36.