1, 2. а) Йеговӕ рагидзаманти адӕни хӕццӕ куд дзурдта ӕма абони нӕ хӕццӕ куд дзоруй? б) Аци статьяй цӕмӕ ӕркӕсдзиан?

ЙЕГОВӔ уарзуй ӕ адӕни хӕццӕ дзорун. Рагидзаманти ӕ гъудитӕ ӕргом кодта пахампарти, изӕдти ӕма ӕ Фурт Йесо Киристей фӕрци (Амос 3:7; Гал. 3:19; Рарг. 1:1). Абони ба нӕ хӕццӕ дзоруй Библий фӕрци. Йеговӕ нин ӕ Дзурд уой туххӕй равардта, цӕмӕй ӕй зонӕн, куд сагъӕс кӕнуй ӕма куд архайуй, уой.

² Йесо зӕнхӕбӕл ку адтӕй, уӕд Йеговӕ уӕлӕрвтӕй ӕртӕ хатти ӕрдзурдта. Ӕркӕсӕн, Йеговӕ ци дзурдтӕ загъта, етӕ цӕбӕл дзорӕг ӕнцӕ, ӕма нин цӕмӕй пайда хӕссонцӕ, уой туххӕй нӕ ци кӕнун гъӕуй, уомӕ.

3. Марки 1:9–11 стихтӕмӕ гӕсгӕ Йесо донаргъуд ку райста, уӕд Йеговӕ ци загъта? Йегови дзурдтӕй цӕхуӕн ӕртӕ ӕхсидзгӕ гъуддаги ес базонӕн?

³ Марки 1:9–11 финст ӕй, Йеговӕ уӕлӕрвтӕй фиццаг хатт ку ӕрдзурдта, уӕд ци загъта, е. (Ба сӕ кӕсӕ.) Е загъта: «Ду дӕ мӕ уарзон Фурт, арази кӕмӕй дӕн, еци Фурт». Расагъӕс кӕнӕ, Киристейӕн куд ӕхцӕуӕн адтайдӕ, Йеговӕ ’й ке уарзуй ӕма си ӕ зӕрдӕ ке рохс кӕнуй, уой фегъосун. Йегови дзурдтӕй Киристей туххӕй базонӕн ес ӕртӕ ӕхсидзгӕ гъуддаги. Фиццаг: Йесо ӕй ӕ Фурт. Дуккаг: Йеговӕ ӕ Фурти уарзуй. Ӕртиккаг: Йеговӕ ӕ Фуртӕй арази ӕй. Гъӕйдӕ мадта аци ӕртӕ гъуддагебӕл лӕмбунӕгдӕр радзубанди кӕнӕн.

4. Йесо донаргъуд ку райста, уӕд Хуцауи Фурт ӕндӕр хузи куд иссӕй?

⁴ «Ду дӕ мӕ... Фурт». Аци дзурдтӕй Йеговӕ бавдиста, ӕ хъазар Фурт Йесойӕн нӕуӕг гъуддаг ке баихӕс кӕндзӕй. Уӕлӕрвти дӕр Йесо Хуцауи Фурт адтӕй, уомӕн ӕма адтӕй, Хуцау ке исфӕлдиста, еци изӕдтӕй сӕ еу. Фал донаргъуд ку райста, уӕд исӕрст ӕрцудӕй сугъдӕг хъаурӕй. Йесо иссӕй Хуцауи исӕрст Фурт, ӕма Йеговӕ уотемӕй бавдиста,  Йесойӕн нифс ке фӕззиндтӕй фӕстӕмӕ уӕлӕрвтӕмӕ раздӕхунмӕ, цӕмӕй уоми Паддзах ӕма Хестӕр саугин исуа (Лук. 1:31–33; Дзиуит. 1:8, 9; 2:17). Мадта нур лӕдӕрӕн, Йесо донаргъуд ку райста, уӕд Йеговӕ уотӕ цӕмӕн загъта, «ду дӕ мӕ... Фурт», зӕгъгӕ (Лук. 3:22).

5. Йеговӕ ӕ Фурти ке уарзуй ӕма ин ке аргъ кӕнуй, уой ин ке загъта, уомӕй ӕй нӕ бон куд ӕй фӕнзун?

⁵ «Ду дӕ мӕ уарзон Фурт». Йеговӕ ӕ Фурти ке уарзуй ӕма ин аргъ ке кӕнуй, уой ин ке загъта, е нӕ разӕнгард кӕнуй, цӕмӕй мах дӕр иннети федар кӕнунмӕ фадуӕттӕ агорӕн (Иоан. 5:20). Хъазар нин ка ӕй, етӕ нӕ сӕ уарзтӕй ку барӕвдаунцӕ ӕма нӕ естӕй туххӕй ку растаунцӕ, уӕд нӕбӕл базуртӕ базайуй. Ӕма нӕхуӕдтӕ дӕр не ’мбурди хуӕртӕ ӕма ӕнсувӕрти, удта нӕ бийнонти нӕ уарзтӕй гъӕуама тавӕн ӕма син сӕ нифс федар кӕнӕн. Иннети ку растауӕн, уӕд се ’ууӕндундзийнадӕ бафедар уй, удта син уотемӕй банхус кӕнӕн, цӕмӕй идарддӕр дӕр Йеговӕн еузӕрдонӕй лӕггадӕ кӕнонцӕ. Уӕлдай ӕхсидзгӕ ба ӕй, цӕмӕй ниййергутӕ сӕ сувӕллӕнтти нифс федар кӕнонцӕ. Сӕ сувӕллӕнтти зӕрдиагӕй ку фестаунцӕ, ӕма сӕ сӕ уарзтӕй ку фӕррӕвдаунцӕ, уӕд сувӕллӕнттӕ дӕр дидингути хузӕн дзӕгӕрӕг ракӕнунцӕ.

6. Киристебӕл цӕмӕннӕ гъӕуама гурусхӕ кӕнӕн?

⁶ «Арази кӕмӕй дӕн, еци Фурт». Аци дзурдтӕй бӕрӕг ӕй, Йеговӕ ке нӕ гурусхӕ кодта, ӕ Фурт ин ӕ фӕндон кӕронмӕ ке исӕнхӕст кӕндзӕй, уобӕл. Ӕма ибӕл кӕд Йеговӕ уотӕ ӕууӕндтӕй, уӕд гъӕуама мах дӕр ма гурусхӕ кӕнӕн, Йесо Йегови зӕрдӕвӕрдтӕ ӕгасейдӕр ке исӕнхӕст кӕндзӕй, уобӕл (2 Кор. 1:20). Киристе ӕ Фиди фӕндон куд еузӕрдонӕй ӕнхӕст кодта, уобӕл ку сагъӕс кӕнӕн, уӕд нӕ никки хъӕбӕрдӕр  фӕнддзӕй Киристейӕй ахур кӕнун ӕма ӕ къахвӕдтӕбӕл цӕун. Йеговӕ ӕ Фуртбӕл куд ӕууӕндуй, уотӕ ӕууӕндуй махбӕл дӕр – зонуй ӕй, ӕ лӕггадгӕнгутӕй сӕ фулдӕр ӕ Фурти къахвӕдтӕбӕл ке цӕудзӕнцӕ (1 Пет. 2:21).

7. Матфеййи 17:1–5 стихтӕмӕ гӕсгӕ, Йеговӕ уӕлӕрвтӕй кӕд ӕрдзурдта ӕма ци загъта?

⁷ Бакӕсӕ Матфеййи 17:1–5. Дуккаг хатт Йеговӕ уӕлӕрвтӕй ӕрдзурдта, Йесо «ӕ хузӕ ку раййивта», уӕд. Йесо ӕ хӕццӕ райста Петур, Иаков ӕма е ’нсувӕр Иоанни, ӕма сӕ хӕццӕ бӕрзонд хонхмӕ исцудӕй. Уоми фӕууидтонцӕ дессаги цӕстӕбӕлуайӕн. Киристейӕн ӕ цӕсгон хори хузӕн ниррохс ӕй, ӕ уӕледарӕс ба ӕрттивтитӕ калун райдӕдта. Ӕ рази равзурдӕнцӕ «Моисей ӕма Илийа», ӕма ӕ хӕццӕ дзорун райдӕдтонцӕ ӕ мӕлӕт ӕма ӕ райгасдзийнади туххӕй. Апостолтӕ ба уӕд фунӕй адтӕнцӕ, фал ку райгъал ӕнцӕ, уӕд еци дессаги цӕстӕбӕлуайӕн фӕууидтонцӕ (Лук. 9:29–32). Фӕстӕдӕр сӕ уорс мегъӕ ӕрӕмбарзта ӕма мегъӕй райгъустӕнцӕ Хуцауи дзурдтӕ. Йесо донаргъуд ку райста, уӕд Йеговӕ ци дзурдтӕ загъта, аци хатт дӕр еци дзурдтӕ загъта, зӕгъгӕ, «айӕ ӕй мӕ уарзон Фурт, арази кӕмӕй дӕн, еци Фурт». Фал ма аци хатт ӕ дзурдтӕбӕл бафтудта: «Игъосетӕ имӕ».

8. Йесо ӕма ӕ ахуркӕнуйнӕгтӕ ци цӕстӕбӕлуайӕн фӕууидтонцӕ, е син ци пайда ӕрхаста?

⁸ Еци цӕстӕбӕлуайӕн ӕргом кодта, федӕни Хуцауи Паддзахади Паддзахӕн ци устур кадӕ уодзӕй ӕма ин ци устур бартӕ лӕвӕрд ӕрцӕудзӕнцӕ, уой. Киристемӕ гъезӕмайраг мӕлӕт ке ӕнгъӕлмӕ кастӕй, уомӕ гӕсгӕ ’й еци цӕстӕбӕлуайӕн хъӕбӕр бафедар кодта. Удта ма уой фӕрци ӕ ахуркӕнуйнӕгти ӕууӕндундзийнадӕ дӕр бафедар ӕй, ӕма цӕттӕ адтӕнцӕ, ци фӕлварӕнтӕ ӕма сӕмӕ ци устур куст ӕнгъӕлмӕ кастӕй, уонӕмӕ. Еци цӕстӕбӕлуайӕн Петур уотӕ дзӕбӕх нигъгъуди кодта, ӕма ма еу 30 анзей фӕсте дӕр ӕ финстӕги уой кой ракодта (2 Пет. 1:16–18).

9. Йесо ӕ фӕдбӕлдзӕугутӕн цӕхуӕн унаффитӕ равардта?

⁹ «Игъосетӕ имӕ». Йеговӕ ’й хуарз балӕдӕрун кодта, уотӕ ’й ке фӕндуй, цӕмӕй ин ӕ Фуртмӕ игъосӕн. Йесо зӕнхӕбӕл ку адтӕй, уӕд ӕ фӕдбӕлдзӕугутӕн берӕ цидӕртӕ амудта. Зӕгъӕн, ахур сӕ кодта, хуарз хабар куд гъӕуама игъосун кодтайуонцӕ, уобӕл, удта сӕ арӕх фӕдзахста, цӕмӕй ма бафунӕй адтайуонцӕ (Матф. 24:42; 28:19, 20). Йесо ма никкидӕр разӕнгард кодта, цӕмӕй се ’гас хъауритӕй архайдтайуонцӕ Хуцауи фӕндон ӕнхӕст кӕнунбӕл ӕма сӕ къохтӕ макӕд ӕруагътайуонцӕ (Лук. 13:24). Се ’ргом син раздахидӕ, кӕрӕдзей ке гъӕуама уарзонцӕ, сӕ астӕу еудзийнадӕ ке гъӕуама уа ӕма ин ӕ фӕдзӕхститӕ ке гъӕуама ӕнхӕст кӕнонцӕ, уомӕ (Иоан. 15:10, 12, 13). Еци унаффитӕ ӕ ахуркӕнуйнӕгтӕн устур ӕнхус адтӕнцӕ. Ӕма абони махӕн дӕр устур ӕнхус ӕнцӕ.

10, 11. Киристемӕ ке игъосӕн, уой нӕ бон куд ӕй ӕвдесун?

¹⁰ Киристе загъта: «Рӕстдзийнади фарс ка ӕй, е мӕмӕ игъосуй» (Иоан. 18:37). Киристемӕ ке игъосӕн, уой нӕ бон куд ӕй бавдесун? Ка нӕ бафхуӕруй, уонӕн гъӕуама «зӕрдӕй хатир кӕнӕн» (Кол. 3:13; Лук. 17:3, 4). Уомӕй уӕлдай ма гъӕуама зингзӕрдӕй игъосун кӕнӕн, «ӕнцон ку уа, уӕд дӕр ӕма, зин ку уа, уӕд дӕр» (2 Тим. 4:2).

¹¹ Киристе ма загъта: «Мӕ фустӕ игъосунцӕ мӕ гъӕлӕсмӕ» (Иоан. 10:27). Ӕ фӕдбӕлдзӕугутӕ ин ӕ дзурдтӕ айдагъ игъосгӕ нӕ кӕнунцӕ, фал ма ин сӕ ӕнхӕст дӕр кӕнунцӕ. Етӕ нӕ уадзунцӕ, цӕмӕй «царди сагъӕстӕбӕл» исуонцӕ (Лук. 21:34). Царди  син тӕккӕ сӕйрагдӕр ӕй Киристемӕ игъосун, ӕма цийфӕнди зин уавӕрти ма уонцӕ, уӕддӕр имӕ фегъосунцӕ. Нӕ хуӕртӕ ӕма не ’нсувӕртӕй беретӕ уӕззау фӕлварӕнтӕбӕл ӕмбӕлунцӕ, зӕгъӕн, ӕфхуӕрд ӕййафунцӕ кенӕ фур мӕгур цард кӕнунцӕ, кӕбӕлдӕр ба ӕрдзон бӕллӕх ӕрцӕуй. Фал уӕддӕр Йеговӕн еузӕрдонӕй лӕггадӕ кӕнунцӕ. Йесо уӕхӕн киристӕнттӕн зӕрдӕ ӕвӕруй: «Мӕ фӕдзӕхститӕ мин ӕ зӕрдӕмӕ ка есуй ӕма сӕ ка ӕнхӕст кӕнуй, е мӕ уарзуй. Мӕн ка уарзуй, уой ба мӕ Фидӕ дӕр уарздзӕй» (Иоан. 14:21).

12. Киристемӕ ке игъосӕн, уой ма нӕ бон куд ӕй ӕвдесун?

¹² Киристемӕ ке игъосӕн, уой ма нӕ бон куд ӕй ӕвдесун? Ӕмбурди разамунд дӕттунмӕ ке исӕвардта, уони хӕццӕ гъӕуама ӕмгуст кӕнӕн (Дзиуит. 13:7, 17). Фӕстаг ӕнзти Хуцауи организаций берӕ ӕййивддзийнӕдтӕ ӕрцудӕй. Зӕгъӕн, игъосун кӕнунмӕ фӕззиндтӕй нӕуӕг косӕндзаумӕуттӕ ӕма мадзӕлттӕ, удта къуӕрей астӕу ци фембӕлд фӕууй, уоми дӕр берӕ цидӕртӕ раййивта. Уомӕй уӕлдай ма ӕййивддзийнӕдтӕ ӕрцудӕй, нӕ залтӕ кӕнун ӕма сӕмӕ зелун куд гъӕуй, еци гъуддаги дӕр. Ӕнсувӕртӕ нин ци разамунд дӕттунцӕ, е фӕууй ӕфойнадӕбӕл, ӕма сӕ уарзондзийнадӕбӕл дзорӕг ӕй. Ӕма си мах уой туххӕй хъӕбӕр боз ан! Еци разамундмӕ гӕсгӕ зӕрдиагӕй ку архайӕн, уӕд нин Йеговӕ ӕнӕмӕнгӕй райарфӕ кӕндзӕй.

13. Киристемӕ ку игъосӕн, уӕд нин е ци пайда хӕсдзӕй?

¹³ Киристе цӕбӕл ахур кодта, уомӕ гӕсгӕ ку архайӕн, уӕд нин е пайда хӕсдзӕй. Йесо ӕ ахуркӕнуйнӕгтӕн зӕрдӕ байвардта, цӕбӕл сӕ ахур кӕнуй, е син уодӕнцойнӕ ке хӕсдзӕй. Е загъта: «Уодӕнцойнӕ иссердзиайтӕ. Уомӕн ӕма ме ’фсойнӕ ӕй ӕнцонхӕссӕн, мӕ уаргъ ба – рӕуӕг» (Матф. 11:28–30). Хуцауи Дзурд, уой хӕццӕ ба ма Киристей царди ӕма лӕггади хабӕрттӕ кӕми финст ӕнцӕ, еци цуппар Евангелий ку фӕккӕсӕн, уӕд уодӕнцойнӕ иссерӕн, удта исахур уӕн зундӕй архайун (Пс. 19:7; 23:3). Йесо загъта: «Амондгун етӕ ’нцӕ, Хуцауи дзурд ка игъосуй ӕма ’й ка ӕнхӕст кӕнуй!» (Лук. 11:28).

14, 15. а) Иоанни 12:27, 28 стихтӕмӕ гӕсгӕ Йеговӕ уӕлӕрвтӕй ӕртиккаг хатт кӕд ӕрдзурдта? б) Цӕмӕн ес зӕгъӕн, ӕма Йегови дзурдтӕ Йесой бафедар кодтонцӕ?

¹⁴ Бакӕсӕ Иоанни 12:27, 28. Иоанн ӕ Евангелий ниффинста, Йеговӕ уӕлӕрвтӕй  ӕртиккаг хатт куд ӕрдзурдта, еци хабар. Киристе ӕ мӕлӕтӕй цалдӕр бони раздӕр ӕрцудӕй Йерусалиммӕ, цӕмӕй уоми фӕстаг хатт Комуадзӕн исбӕрӕг кодтайдӕ. Киристе загъта: «Мӕ уод катай кӕнуй». Уой фӕсте ба Хуцаумӕ искувта: «Мӕ Фидӕ, искадгин кӕнӕ дӕ ном». Уӕд ӕ Фидӕ уӕлӕрвтӕй ӕрдзурдта: «Искадгин ӕй кодтон, ӕма ’й никкидӕр искадгин кӕндзӕн».

¹⁵ Киристе уотӕ уомӕн тухстӕй, ӕма ибӕл адтӕй устур ихӕс – гъӕуама Йеговӕбӕл кӕронмӕ дӕр еузӕрдонӕй байзадайдӕ. Е ӕй зудта, ехсӕй ӕй ке нӕмдзӕнцӕ ӕма ’й фудмард ке ракӕндзӕнцӕ (Матф. 26:38). Никки ӕхсидзгӕдӕр ба Йесойӕн адтӕй ӕ Фиди ном искадгин кӕнун. Ӕма ’й Хуцауи фауӕг ку исхудтонцӕ, уӕд тухстӕй, ӕ мӕлӕтӕй ӕ Фиди ном ке фегадӕ кӕндзӕй, уобӕл. Мадта ин Йегови дзурдтӕ ӕ нифс кунӕг нӕ бафедар кодтонцӕ! Нур ӕй федарӕй зудта, Йегови ном ке искадгин уодзӕй. Ӕ Фиди дзурдтӕ ’й уотӕ бафедар кодтонцӕ, ӕма гъезӕмӕрттӕ бавзарунмӕ дӕр цӕттӕ адтӕй. Ӕвӕдзи, уоми ка адтӕй, уонӕй Йегови дзурдтӕ ӕрмӕстдӕр Йесо балӕдӕрдтӕй. Фал уӕддӕр Йеговӕ батухстӕй, цӕмӕй ӕ дзурдтӕ мах туххӕй финст ӕрцудайуонцӕ (Иоан. 12:29, 30).

16. Хуцауи ном ке фегадӕ уодзӕй, уобӕл цӕмӕн фӕммӕтӕ кӕнӕн?

¹⁶ Ка ’й зонуй, мах дӕр Киристей хузӕн ӕнӕфудӕй ӕфхуӕрд ӕййафӕн. Кенӕ ба нӕбӕл, ка ’й зонуй, не знӕгтӕ алцитӕ имисунцӕ. Ӕма мах дӕр, ка ’й зонуй, мӕтӕ кӕнӕн,  Йегови ном ӕма ӕ организаций ном ку фегадӕ уонцӕ, уобӕл. Фал ни уӕхӕн уавӕрти Йегови дзурдтӕ нифс бауадзунцӕ. Мадта нӕ уобӕл ӕгӕр тухсун нӕ гъӕуй. Нӕ бон ӕй федарӕй ӕууӕндун аци дзурдтӕбӕл: «Хуцауи фарнӕ, зунд кӕбӕл нӕ хъӕртуй, еци фарнӕ, Йесо Киристей фӕрци багъӕуай кӕндзӕй уӕ зӕрдитӕ ӕма уӕ зунд» (Фил. 4:6, 7). Йеговӕ ӕ ном ӕнӕмӕнгӕй искадгин кӕндзӕй. Ӕма Сайтан, удта ӕ дуйне абони Хуцауи еузӕрдон лӕггадгӕнгутӕн ци зиан хӕссунцӕ, уой ӕ Паддзахади фӕрци исраст кӕндзӕй (Пс. 94:22, 23; Ис. 65:17).

17. Исаййи 30:21 стихмӕ гӕсгӕ Йеговӕ абони нӕ хӕццӕ куд дзоруй?

¹⁷ Йеговӕ абони мах хӕццӕ дӕр дзоруй. (Бакӕсӕ Исаййи 30:21.) Ке зӕгъун ӕй гъӕуй, Хуцау махмӕ уӕлӕрвтӕй не ’рдзоруй. Фал нӕ ӕ Дзурд Библий фӕрци ахур кӕнуй. Уомӕй уӕлдай ма Хуцауи сугъдӕг хъаури разамундӕй «ӕууӕнкгун... хӕдзаргӕс» Йегови лӕггадгӕнгутӕн ӕууӕндундзийнадӕ федаргӕнӕн хуӕруйнаг алкӕддӕр дӕттуй (Лук. 12:42). Уӕхӕн хуӕруйнаг нӕмӕ ес фӕндон, зӕгъӕн, мухургонд публикацитӕ, нӕ сайти ци ӕрмӕг ес, е, удта видеороликтӕ ӕма нӕ публикацити аудиоӕрмӕг.

18. Йегови дзурдтӕ нин не ’ууӕндундзийнадӕ ӕма нӕ нифс куд федар кӕнунцӕ?

¹⁸ Гъӕйдӕ мадта алкӕддӕр нӕ зӕрдӕбӕл дарӕн, Йесо зӕнхӕбӕл ку адтӕй, уӕд Йеговӕ ци дзурдтӕ загъта, уони. Йеговӕ Библий цидӕриддӕр ниффинсун кодта, е нин нифс дӕттуй, ӕ барӕ алцӕбӕлдӕр ке цӕуй, ӕма нин Сайтан ӕма ӕ фуддуйне цийфӕнди зиан ма ӕрхӕссонцӕ, уӕддӕр ӕй ке исраст кӕндзӕй. Мадта нӕхецӕн федарӕй зӕгъӕн, Йеговӕ нин цидӕриддӕр дзоруй, уомӕ ке игъосдзиан. Ӕма уой фӕрци абони дӕр ӕма федӕни дӕр цийфӕнди фӕлварӕнти дӕр федар фӕллӕудзиан. Библи нин нӕ зӕрдӕбӕл лӕуун кӕнуй: «Сумах гъӕуй федардзийнадӕ, цӕмӕй, Хуцауи фӕндон ку исӕнхӕст кӕнайтӕ, уӕд райсайтӕ, зӕрдӕ уин цӕмӕй байвардта, уой» (Дзиуит. 10:36).