1-2. (a) Ngmekera Jehovah a longedecheduch er a rechad? (b) Ngera kede mo mesaod er tia el suobel?

A JEHOVAH a kot el soal mengedecheduch er kid. A uchei, e ngmilengedecheduch lokiu a reprofet me a rechanghel me a Ngelekel el Kristus Jesus, el ouchais a uldesuel er kid. (Amo. 3:7; Gal. 3:19; Och. 1:1) Chelecha el taem, e ngmengedecheduch er kid lokiu a Tekingel el Biblia. Ngmilskid tia el babilengel me bo lsebeched el mesuub el mo medengei a uldesuel me a rolel a loruul a tekoi.

² Sera dirk lengar a chutem a Jesus, e a Jehovah a mlo edei el taem el ngar er a eanged e mengedecheduch. Me bo dosaod a tekoi el lullekoi a Jehovah, e desang el kmo ngera sebeched el suub er a tekingel, e mekerang e kede ngmai a klungioled er a tekoi el ledilung.

3. Sel donguiu er a Markus 1:9-11, e ngera ngdilu Jehovah er sel taem er a lemetecholb a Jesus, e ngera el meklou a ultutelel tekoi a lulterekokl aika el tekingel?

³ A Markus 1:9-11 a llechukl er ngii sel kot el taem el Jehovah a mlara eanged e milengedecheduch. (Monguiu.) Ngdilu el kmo: “Kau a betik er a renguk el Ngelekek, el odeuir a renguk.” Nglocha kmal rirtechii a rengul a Jesus er sera lerengesii a demal lolecholt er a bltkil a rengul e loterekeklii el kmo ngoumerang er ngii! A tekingel a Jehovah a oterekokl a edei el meklou a ultutelel el tekoi el kirel a Jesus. A kot, e a Jesus a Ngelekel el sechal. Ongerung, e a Jehovah a betik a rengul er a Ngelekel. E a ongedei, e a Jehovah a kongei er a Ngelekel. Me chelechang e bo dekerekikl el omtab a derta er aika el tekoi.

4. Ngmilekera Jesus e mlo Ngelekel a Dios lokiu a beches el rolel er sera lemetecholb?

⁴ “Kau a . . . Ngelekek.” Ngokiu aika el tekingel a Jehovah, e  ngulechotii el kmo ngika el betik er a rengul el Ngelekel el Jesus a mla mekur a beches el deleuill er ngii me a Demal. Sel taem er a lengar a eanged a Jesus, e ngdi mla Ngelekel a Dios. Me nguaisei, engdi sel taem er a lemetecholb e ngmlengilt el ulekiu a chedaol reng. Me ngar seikid el taem, e a Dios a ulechotii el kmo a Jesus a mla mo ngellitel el Ngelekel e mocha oba omelatk el lmuut el mora eanged el mo ngellitel el King er a Dios e Ngarbab el Prist. (Lk. 1:31-33; Heb. 1:8, 9; 2:17) Me sera lemetecholb a Jesus, e ngmera el mla er ngii a ungil luchul e a Demal a dilu el kmo: “Kau a . . . Ngelekek.”​—Lk. 3:22.

5. Ngmekera doukerebai er a blekerdelel a Jehovah sel lolecholt er a bltkil a rengul me a kengei er ngii?

⁵ “Kau a betik [er] a renguk.” A blekerdelel a Jehovah sel lolecholt er a bltkil a rengul me a kengei er ngii a omeklatk er kid el mo osiik a bek el techall e melisiich er a rebebil. (Jn. 5:20) Kede mukeroul a lsekum a chad el betik a rengud er ngii a olecholt er a bltkil a rengul el bedulkid e lechat er kid er aike el ungil tekoi el deruul. Me ngdi osisiu, a rudam me a rudos er kid er a ongdibel me a rechedal a telungalek er kid a ousbech er a bltkil a rengud me a omelisiich er kid. Me sel dechat er a rebebil, e kede melisiich er a klaumerang er tir, e ngosuterir el mo blak a rengrir el mesiou er a Jehovah. A ruungalek a ileakl el kmal kirir el melisiich er a rengelekir. A lsekum a ruungalek a mo ungil chemat er a rengelekir e ochotii a ulekerreu el mo er tir, e te ngosuterir a rengelekir el mo mukeroul.

6. Ngera me ngsebechel el mo ulterekokl a rengud el kirel a Jesus Kristus?

⁶ “El odeuir a renguk.” Aika el tekingel a ochotii el kmo a Jehovah a mle ulterekokl a rengul el kmo a Jesus a mo blak a rengul el kutmokl a soal a Demal. Ngkmal mle ulterekokl a rengul a Jehovah el bedul a Ngelekel, me kid me ngdirrek el sebechel mo ulterekokl a rengud el kmo a Jesus a mo kutmokl e otaut a rokui el telbilel a Jehovah. (2 Ko. 1:20) Me sel dolatk a kerebil a  Jesus, e ngmengal mo soad el mesuub er ngii e mo oltirakl a kerebai el lullecholt. Me ngdi ua Jehovah el mle ulterekokl a rengul el kirel a Ngelekel, me ngii a ulterekokl a rengul el kirel a remesiungel el mo melemolem el mesuub a kerebai er a Ngelekel.​—1 Pe. 2:21.

7. A doltirakl er a Mateus 17:1-5, e ngoingera el taem e a Jehovah a milengedecheduch el ngar a eanged, e ngera ngdilung?

⁷ Monguiu er a Mateus 17:1-5. A ongeru el taem el Jehovah a mlara eanged e mengedecheduch a sel taem el Jesus a ‘mlengodech.’ A Jesus a ulemekedong er a Petrus me a Jakobus me a Johanes me te ulebengkel el mo ngmasech er a kedidai el rois. Me sera lebong, e te milsa mengasireng el tekoi. A medal a Jesus a mlo medidiich me a bilel a mlo mengeldoech. E mla er ngii a llecherir a reteru el chad el omtechei er a Moses me a Elias, el ulemuchel el mengedecheduch er a Jesus el mesaod el kirel a mereku el kodellel me a okisel. Me alta e tirka el tedei el apostol a kmal “iliit a mederir,” engdi sera lemekar e te milsa tia el mengasireng el ues. (Lk. 9:29-32) Ngar tiaikid el taem e a eabed a mlo er bebrir, e tir a rirengesii a ngor el ngar a eabed el ngii a ngerel a Dios! Me ngdi ua lurruul er sel taem er a lemetecholb a Jesus, a Jehovah a ulechotii el kmo ngkongei er a Ngelekel e betik a rengul er ngii, me ngdilu el kmo: “Ngika betik er a renguk el Ngelekek el odeuir a renguk.” Engdi ngar tiaikid el taem e ngdirrek el dilu el kmo: “Morrenges er ngii!”

8. Ngera ngrirellii er a uldesuel a Jesus me a redisaiplo a ues el mlo er ngii?

⁸ Tia el ues a ulechotii a klebkall me a klisiich el Jesus a mo ngmai sel bo el King er a Rengedel a Dios. Me ngulterekokl a Kristus el mlo mesisiich e milteketek a klaumerang er ngii el kirel a meringel el kodall me a chelebuul el ngii a mochu kirel loutekangel er ngii. Tia el ues a dirrek el millisiich a klaumerang er a redisaiplo er ngii. E ngilsuterir el mo kltmokl el kirel a omelsemai el bo lechelebangel me a meringel lureor el kirir el mo meruul. Me ngar a bekord el 30 el rak er a uriul, e a apostol el Petrus a milsaod el kirel tia el ues er a lemengodech a Jesus, el meketeklii el kmo ngkmal dirk ungil medengelii a tekoi el dilubech.​—2 Pe. 1:16-18.

9. Ngera el klou a ultutelel lulekrael a lebilsterir a redisaiplo er ngii a Jesus?

⁹ “Morrenges er ngii.” A Jehovah a mileketeklii el kmo ngsoal a bo dorrenges e dolengesenges a tekingel a Ngelekel. Me ngera ngdilu Jesus er sera lengar a chutem? Ngdilu betok el tekoi el klou a ultutelel el bo dorrenges! El ua tiang, ngmle ungil losisecheklterir a rultirakl er ngii er a rolel a bo lomerk er a klumech el kirel a ungil chais, e dirrek el mle betok el taem el lomeklatk er tir me lolemolem el di mekar. (Mt. 24:42; 28:19, 20) Ngdirrek el milengelechel er tir el mo blak a rengrir, e millisiich er tir me lak bo lemechitechut a rengrir. (Lk. 13:24) A Jesus a dirrek el millisiich er a klungel a ultutelel tirka el oltirakl er ngii a bo lekaubltikerreng, e lolemolem el ta rengrir, e dirrek el lolemolem el oltirakl a llechul. (Jn. 15:10, 12, 13) Me ngmera el ungil lulekrael a lebilsterir a redisaiplo er ngii a Jesus! E ngii el ulekrael a kmal dirk klou a ultutelel er chelecha el taem el di ua sel taem er a ledelii a Jesus.

10-11. Kede mekera e ochotii el kmo kede orrenges er a Jesus?

¹⁰ A Jesus a dilu el kmo: “Tirkel chedal ngii el klemerang orrenges er ngak.” (Jn. 18:37) Me kid a ochotii el kmo kede orrenges er ngii sel ‘lulserechakl a rengud, e bo dekausubes a mlo mekngit er a delongeled.’ (Kol. 3:13; Lk. 17:3, 4) Kede lmuut el meketeklii el kmo kede orrenges er ngii sel leblak a rengud lomerk er a klumech el kirel a ungil chais “a lungil a blsechel ma le mekngit.”​—2 Ti. 4:2, BT.

¹¹ A Jesus a dilu el kmo: “A sib er ngak orrenges er a ngerek.” (Jn. 10:27) A rultirakl er a Kristus a ochotii el kmo te orrenges er a Jesus el diak di lokiu sel lorrenges a tekingel, e ngdirrek el lokiu sel loltaut ngii el tekingel. Ngdiak lebechei a “sebekreng er a klengar” me longesang a uldesuir. (Lk.  21:34, NW) Te bai nguu a blekongesenges er tir el mora llechul a Jesus el mo kot el ngaruchei er a klengar er tir, el mo lmuut er a taem el bo lemeringel er tir el meruul uaisei. A rebetok el rudam er kid a outekangel a meringel lomelsemai el uldimukl er a odelecheklir a rumtok, me a chelebuul, me a meklou el telemellel a beluu. Ngar a chelsel a chouaika el ringel, e te melemolem el blak a rengrir el mora Jehovah, alta e ngkmal mo meringel er tir. A Jesus a milsterir a ongelaod el mo olterekokl a rengrir er a ledu el kmo: “Ngikel ngma llechuk e otirakl, ngikei a betik a rengul er ngak. A Demak a mo betik a rengul er ngii e mo ochotak er ngii.”​—Jn. 14:21.

12. Ngera ta er a rolel e ngsebeched lochotii el kmo kede orrenges er a Jesus?

¹² Tiakid a kuk ta er a rolel e ngsebeched lochotii el kmo kede orrenges er a Jesus. Ngokiu sel dekengei loltirakl a ulekrael el mei lokiu tirke el mla mukngerachel el mo omekrael er kid. (Heb. 13:7, 17) A cheldebechelel a Dios a mla mesmechokl a betok el tekoi er a chelsel aika el mereko el rak, el uldimukl er a beches el dongu me a rolel a doruul er a omesiunged, me a rolel aike el miting er kid er a Ongeua el Ureor, me a rolel a doleketek e domtechei e dongetmokl a Blil a Ongdibel er kid. Kede kmal oba klou el omereng el saul el kirel aika el kmal ungil kltmokl el ulekrael! E ngulterekokl a rengud el kmo a Jehovah a mo omekngeltengat er kid sel leblak a rengud loltirakl aika el kmal ungil a temel el ulekrael el mei lokiu a cheldebechelel.

13. Ngera klungiolel a bo dorrenges er a Jesus?

¹³ Ngmo uchul a klungioled sel dolengesenges aike el rokui el osisecheklel a Jesus. A Jesus a ulelterekokl a rengrir a redisaiplo er ngii el kmo a osisecheklel a mo melisiich er tir. Ngdilu el kmo: “Kom mo metik er a ulengelliu. Sel ongelungel el bo kumeskemiu a beot.” (Mt. 11:28-30) A Tekingel a Dios luldimukl er aike el eua el Ebangkelio el kirel a klengar er a Jesus me a omesiungel a mengelaod e melisiich er kid, e ngosukid el mo ungil melilt a tekoi. (Psa. 19:7; 23:3) A Jesus a dilu el kmo: “Ngdmeu a rengrir tirke el rongesii a tekingel a Dios e mo olab!”​—Lk. 11:28.

14-15. (a) Ngoingerang a ongedei el taem el Jehovah a mlara eanged e mengedecheduch el medung er a Johanes 12:27, 28? (b) Ngera me a tekingel a Jehovah a milengelaod e millisiich er a Jesus?

¹⁴ Monguiu er a Johanes 12:27, 28. A Ebangkelio er a Johanes a llechukl er ngii a ongedei el taem el Jehovah a mlara eanged e mengedecheduch. A sesei el klebesei er a uchei er a kodellel, e a Jesus a mlara Jerusalem el milengedaol er a Baskua, e dilu el kmo: “Ng ouedikel a renguk.” E sola e milluluuch el kmo: “Chedam, mkebkellii a ngklem!” E rirengesii a ngerel a Demal el ngar a  eanged e melekoi el kmo: “Ak mla kobkellii e lmuut el mo kobkellii.”

¹⁵ A Jesus a mlo ouedikel a rengul el kirel a klou el ngerechelel el kirel melemolem el blak a rengul el mora Jehovah. Ngmle ungil medengei el kmo ngkmal mo chuarm e mo mad er a mekngit el kodall. (Mt. 26:38) Me nguaisei, engdi sel mle klou a ultutelel el tekoi er a rengul a Jesus a soal kobkellii a ngklel a Demal. A Jesus a mlotelechakl el kmo ngoltuub, e dirrek el mle meringel er ngii sel lodengei el kmo a kodellel a mo uchul a otuub el mora Dios. Me ngulterekokl a tekingel a Jehovah el kmal millisiich er a rengul a Jesus! Ngmlo ulterekokl a rengul el kmo a ngklel a Jehovah a mo mukebkall. A tekingel a Demal a ulterekokl el kmal milengelaod er a Jesus e silsichii a rengul me ngmlo kltmokl el kirel a ringel el ngii a kmedu el mo chormii. Alta e a Jesus a di mle ngii el tang el mla er isei el mlo medengei a tekingel a Demal er sel taem, engdi a Jehovah a kiltmokl aika el tekingel me ngsebeched el rokui el mo medengei.​—Jn. 12:29, 30.

16. Ngera me a lebebil er a taem e kede bekikl el kirel a otuub el mora ngklel a Dios?

¹⁶ Kid a locha di ua uldesuel a Jesus el chetid a lemotuub a ngklel a Jehovah. Kede locha di uai ngii el chuarm er a chelebirukel el omeruul. Me a lechub e ngmekngit a rengud e le rumtok a melekoi a klsuul tekoi el kired. Me kede locha mo melatk el kirel a otuub el mora ngklel a Jehovah me a cheldebechelel el ikaikid el klsuul tekoi a uchul. Me ngar aika el taem, e aike el tekingel a Jehovah a kmal mengelaod er kid. Me ngdiak el kired el  kmal mo bekikl el kirel a ngii di el otuub el mora ngklel me a cheldebechelel a Jehovah. Ngsebechel mo ulterekokl a rengud el kmo a “budech er a Dios, el diak el sebechel a chad el mo cherrungel el medengelii, a mo mtebechel a [rengud] ma [uldesued] el oltirakl er a Kristus Jesus.” (Fil. 4:6, 7). A Jehovah a kmal di mo blechoel el mengebkall er a ngklel. Ngokiu a Rengedel, e ngmo sumechokl a rokui el tellemall el Satan me tia el beluulechad er ngii a uchul me te chuarm a reblak a rengrir el mesiungel ngii el Jehovah.​—Psa. 94:22, 23; Isa. 65:17.

17. A doltirakl er a Isaia 30:21, e ngmekera longedecheduch er kid a Jehovah er chelecha el taem?

¹⁷ A Jehovah a dirk mengedecheduch er kid er chelechang. (Monguiu er a Isaia 30:21.) Ngmera el tekoi, ngdiak lsebeched el rongesii a Dios el ngar a eanged e mengedecheduch er kid. Me nguaisei, engdi ngmla meskid a Tekingel el Biblia, el ngar ngii a ulekrael er ngii. Me a lmuut el tang, a chedaol reng er a Jehovah a omekrael er a blak a “rengul e mellomes a rengul el mesiou” me ngmelemolem el omesterir a Remesiungel a kelir el mechii a blsechel. (Lk. 12:42) Ngkmal imis el betok aika el kall er a klereng el dengai lokiu a babier me a ngar a Internet, me a video, me a audio el sebechel ngosukid me ngmelemolem el mesisiich a klaumerang er kid!

18. Ngmekera tekingel a Jehovah e smisichii a klaumerang er kau e meskau a blekeurreng?

¹⁸ Me lak dobes a tekingel a Jehovah el ledilung er sel taem el Ngelekel a dirk mla er tia el chutem! Bo lsebechel a tekingel a Dios el llechukl er a Biblia el loterekokl a rengud el kmo a Jehovah a mengetmokl a rokui el tekoi e ngii a mo sumechokl a rokui el tellemall el Satan me tia el mekngit el beluulechad er ngii a uchul. Dirrek el bo doterekokl a rengud el mo melemolem lorrenges er a ngerel a Jehovah. Sel doruul uaisei, e ngmo sebeched loutekangel e mo mesisiich er a ngii di el mondai el dechelebangel er chelechang me a ngii di lomelsemai el dirk merael mei. A Biblia a omeklatk er kid el kmo: “Ng kirel mo meduch a rengmiu, me ng mo sebechiu el meruul a soal a Dios me kom mo ngmai a ikel le dilu er a telbilel.”​—Heb. 10:36.