1-2. (a) Woo rät Jehova to de Menschen? (b) Waut woa wie en disen Artikjel seenen?

JEHOVA jleicht daut, sikj met ons to unjahoolen. Ieeschtemma brukt hee siene Profeeten, de Enjel un sienen Sän, Jesus Christus, om ons siene Jedanken weeten to loten (Amos 3:7; Gal. 3:19; Opb. 1:1). Vondoag dän Dach rät Jehova met ons derch sien Wuat, de Bibel. Hee jeef ons dee, daut wie siene Jedanken un siene Wäaj lieren un vestonen kjennen.

² Aus Jesus oppe Ieed wia, räd Jehova dreemol vom Himmel. Well wie mol seenen, waut Jehova doa säd un waut wie von siene Wieed lieren kjennen un waut fa eenen Nutzen wie doavon haben.

3. (a) No Markus 1:9-11 no, waut säd Jehova, aus Jesus sikj deepen leet? (b) Waut weesen dee Wieed?

³ En Markus 1:9-11 es daut oppjeschräwen, aus Jehova daut ieeschte Mol vom Himmel räd (läs). Hee säd: “Du best mien leewa Sän, met die sie ekj sea tofräd.” Daut mott Jesus sennen sea to Hoaten jegonen, daut to hieren, daut sien Voda am leewd un opp am vetrud. Jehova siene Wieed wiesen dree wichtje Sachen äwa Jesus. Ieeschtens: Jesus es sien Sän. Tweedens: Jehova leeft sienen Sän. Un dreddens: Jehova es sea tofräd met sienen Sän. Well wie dise dree Sachen mol deepa unjasieekjen.

4. Woo wort Jesus bie siene Doop opp eene niee Wajch Gott sien Sän?

⁴ “Du best mien . . . Sän”. Wuarom säd Jehova dise Wieed? Ea Jesus no de Ieed kjeem, wia hee aul Gott sien  Sän. Oba bie siene Doop wort hee met dän heiljen Jeist jesaulft. To dee Tiet wees Jehova, daut Jesus aus sien jesaulwda Sän nu de Hopninj haud, trigj nom Himmel to komen un doa Kjennich un Huaga Priesta to woaren (Luk. 1:31-33; Heb. 1:8-9; 2:17). Doawäajen es daut to vestonen, wuarom Jehova bie Jesus siene Doop säd: “Du best mien . . . Sän” (Luk. 3:22).

5. Woo kjenn wie soo aus Jehova Leew un Tofrädenheit wiesen?

⁵ “Du best mien leewa Sän”. Jehova sien Biespel, woo hee Leew un Tofrädenheit wees, halpt ons doaraun denkjen, daut wie uk sellen no Jeläajenheiten sieekjen toom aundre oppmuntren (Joh. 5:20). Wie sent schaftich, wan soone, waut wie väl räakjnen, ons Leew wiesen un ons fa daut goode lowen, waut wie doonen. Un krakjt soo fält onse Breeda un Sestren en de Vesaumlunk un uk onse Famielje daut aun onse Leew un daut wie dee oppmuntren. Wan wie aundre lowen, stoakj wie dee äaren Gloowen un halpen dee, Jehova tru to deenen. Elren sellen besonda äare Kjinja oppmuntren. Dee halpen äare Kjinja Freid to haben, wan see dee opprechtich lowen un Leew bewiesen.

6. Wuarom kjenn wie opp Jesus Christus vetruen?

⁶ “Met die sie ekj sea tofräd”. Dise Wieed wiesen, daut Jehova doaropp vetrud, daut Jesus tru wudd sienen Wellen derchfieren. Wan Jehova soon Vetruen opp sienen Sän haft, dan kjenn wie uk gaunz doaropp vetruen, daut Jesus tru woat Jehova siene Vespräakjungen derchfieren (2. Kor. 1:20). Wan wie äwa Jesus sien Biespel nodenkjen, sent wie ons noch eenja, von am to lieren un en siene Footspoaren to gonen. Jehova haft uk Vetruen,  daut sien Volkj wieda von sienen Sän lieren woat (1. Pet. 2:21).

7. (a) Wanea räd Jehova vom Himmel, soo aus Matäus 17:1-5 sajcht? (b) Waut säd Jehova?

⁷ Läs Matäus 17:1-5. Daut tweede Mol, aus Jehova vom Himmel räd, wia dan, aus Jesus “vewaundelt” wort. Jesus haud Petrus, Jakobus un Johanes met oppem huagen Boajch jenomen. Aus see doa wieren, sagen see eene besondre Vision. Jesus sien Jesecht deed kloa schienen un siene Kjleeda worden dach. De Apostel sach daut soo, daut twee Mana, waut Moses un Elia väastalden, aunfungen met Jesus äwa sienen komenden Doot un oppstonen to räden. De dree Apostel wieren “sea schleeprich”, oba aus see dise Vision sagen, wieren see gaunz waka (Luk. 9:29-32). Dan kjeem eene dache Wolkj äwa an, un see hieeden Gott siene Stemm von ut de Wolkj. Krakjt soo aus bie Jesus siene Doop wees Jehova, daut hee sea tofräd met am wia un daut hee am leewd. Hee säd: “Dit es mien leewa Sän, met däm ekj sea tofräd sie.” Oba ditmol säd Jehova noch: “Horcht no am!”

8. Waut deed de Vision aun Jesus un siene Jinja?

⁸ De Vision wees Jesus siene Harlichkjeit un Krauft, waut hee lota wudd haben aus Kjennich von Gott sien Kjennichrikj. Onen Twiewel stoakjt Jesus daut un jeef am Moot fa daut Lieden un dän grausomen Doot, waut hee wudd derch motten. Dise Vision stoakjt uk de Jinja äaren Gloowen un muak dee reed fa de Schwierichkjeiten un de schwoare Oabeit, waut see lota wudden doonen motten. Soo bie 30 Joa lota räd de Apostel Petrus von dise Vision. Daut wees, daut hee dee noch kloa em Denkj haud (2. Pet. 1:16-18).

9. Waut fa eenen gooden Rot jeef Jesus siene Jinja?

⁹ “Horcht no am”. Jehova muak daut kloa, daut hee wull, daut wie no sienen Sän siene Wieed horchten un dee nokjeemen. Waut säd Jesus, aus hee oppe Ieed wia? Hee säd väl, waut sikj goot loont, no to horchen. Biejlikj lieed hee siene Nofolja leeftolich, woo see de goode Norecht prädjen sullen, un holp an emma wada denkjen, daut see waka bliewen sullen (Mat. 24:42; 28:19-20). Hee säd uk, daut see sikj sea aunstrenjen sullen, derch daut enje Puat to gonen, un hee spruak an Moot too nich opptojäwen (Luk. 13:24). Jesus lieed uk, woo needich daut wia, daut siene Nofolja sikj unjarenaunda leewden un daut dee veeent bleewen un daut dee siene Jebooten hilden (Joh. 15:10, 12-13). Waut fa een gooda Rot daut nich wia, waut Jesus siene Jinja jeef! Dee Rot es vondoag dän Dach krakjt soo jeltich aus don, aus Jesus dän jeef.

10-11. Woo kjenn wie wiesen, daut wie no Jesus horchen?

¹⁰ Jesus säd: “Wäa daut met de Woarheit helt, horcht no mie” (Joh. 18:37). Wie wiesen, daut wie no am horchen, wan wie dän Rot nokomen: “Vedroacht eena dän aundren, un vejäft junt unjarenaunda” (Kol. 3:13; Luk. 17:3-4). Wie wiesen uk, daut wie no am horchen, wan wie flietich de goode Norecht prädjen, endoont aus “de Tiet rajcht es ooda nich” (2. Tim. 4:2).

¹¹ Jesus säd: “Miene Schop hieren miene Stemm” (Joh. 10:27). Christus siene Nofolja wiesen, daut see Jesus jehorchen, wan see daut uk doonen, waut hee sajcht. Dee loten sikj nich auflenkjen von de “Sorjen äwa dit Läwen” (Luk. 21:34). Enne Städ daut es daut sea wichtich fa an, Jesus siene Jebooten to jehorchen, mau rajcht dan,  wan daut uk schwoa es. Väl von onse Breeda un Sestren hoolen ut, wan dee uk väl Schwierichkjeiten haben, biejlikj wan dee von Jäajna vefolcht woaren ooda sea oam sent ooda Owwadasch beläwen. Dee bliewen derch aul daut tru, endoont waut dee daut kost. Jesus sajcht to dee: “Wäa miene Jebooten haft un helt, bewiest doamet, daut hee mie goot es. Un wäa mie goot es, dän woat mien Voda goot sennen” (Joh. 14:21).

12. Opp waut vonne Wajch kjenn wie noch wiesen, daut wie no Jesus horchen?

¹² Noch eene Wajch, woo wie wiesen kjennen, daut wie no Jesus horchen, es, wan wie met dee toopschaufen, waut hee aunjestalt haft toom ons leiden (Heb. 13:7, 17). Gott siene Organisazion haft en de latste Joaren väl Endrungen jemoakt. Biejlikj hab wie nu niee Mäajlichkjeiten un Jereetschoft toom prädjen un de Toopkomes enne Wäakj haben sikj uk veendat. Un woo wie de Vesaumlungshiesa buen un oppfreschen un unjahoolen es nu uk aundasch. Dise Aunwiesungen sent fa ons toom gooden un wiesen de Leew, waut Gott siene Organisazion haft. Doa sent wie sea dankboa fäa! Wie kjennen ons secha sennen, daut Jehova ons säajnen woat, wan wie de Aunwiesungen nokomen, waut de Organisazion ons jeft.

13. Waut fa eenen Nutzen hab wie, wan wie no Jesus horchen?

¹³ Wie haben uk eenen Nutzen, wan wie no aul daut horchen, waut Jesus lieed. Jesus säd to siene Jinja, daut siene Lia an oppfreschen wudd. Hee säd: “Mien Joch drekjt nich, un miene Laust es leicht” (Mat. 11:28-30). Gott sien Wuat, wua uk de vea Evangelien von Jesus sien Läwen un Deenst bennen sent, frescht ons opp un moakt ons weis (Psa. 19:8; 23:3). Jesus säd: “Jesäajent sent dee, dee Gott sien Wuat hieren, un doonen, waut daut sajcht” (Luk. 11:28).

14-15. (a) Woont wia no Johanes 12:27-28 no daut dredde Mol, aus Jehova vom Himmel räd? (b) Wuarom treesten un stoakjten Jehova siene Wieed Jesus?

¹⁴ Läs Johanes 12:27-28. Johanes sien Evangelium schrift von een dreddet Mol, wua Jehova vom Himmel räd. Een poa Doag ver sienen Doot wia Jesus en Jerusalem toom sien latstet Passafast fieren. Hee  säd: “Miene Seel [es] bedrekjt” un dan bäd hee: “Voda, veharlich dienen Nomen”. Dan hieed hee sienen Voda siene Stemm vom Himmel sajen: “Ekj hab dän aul veharlicht un woa dän wada veharlichen.”

¹⁵ Jesus wia bedrekjt wäajen de groote Veauntwuatunk, waut hee haud, Jehova tru to bliewen. Jesus wist, daut hee wudd sea vepitscht woaren un eenen grausomen Doot haben (Mat. 26:38). Daut wichtichste fa am wia, daut hee sienen Voda sienen Nomen veharlichen wull. Jesus wort beschulcht, daut hee jelastat haud. Doawäajen haud hee daut schwoa, daut sien Doot wudd Schaund opp Jehova brinjen. Jehova siene Wieed jeewen Jesus secha grootet Vetruen! Hee kunn sikj secha sennen, daut Jehova sien Nomen wudd veharlicht woaren. Sienen Voda siene Wieed motten am sea jetreest un jestoakjt haben fa aul daut, waut noch komen wudd. Wan Jesus veleicht uk de eensja wia, waut daut vestunt, waut sien Voda doa säd, muak Jehova sikj secha, daut siene Wieed fa ons oppjeschräwen worden (Joh. 12:29-30).

16. Wuarom sorj wie ons veleicht eenjemol doaräwa, daut opp Gott sienen Nomen woat Schaund jebrocht?

¹⁶ Soo aus Jesus sorj wie ons veleicht uk, daut Schaund opp Gott sienen Nomen jebrocht woat. Veleicht woa wie uk orrajcht behaundelt ooda Jäajna vebreeden äwa ons soont, waut nich soo es. Dan denkj wie veleicht uk doaräwa, woo daut kunn  Schaund opp Jehova sienen Nomen un siene Organisazion brinjen. En soone Tieden sent Jehova siene Wieed een groota Troost fa ons. Wie brucken nich äwamotich Angst haben, wiels wie kjennen ons doaropp veloten, daut “Gott sien Fräd, dee wiet äwa aules jeit waut Menschen vestonen kjennen, woat . . . [onse] Hoaten un Jedanken en Christus Jesus bewoaren” (Filip. 4:6-7). Jehova woat emma sienen Nomen veharlichen. Derch daut Kjennichrikj woat hee aul dän Schoden, waut de Soton un uk dise Welt opp siene true Deena jebrocht haben, wada gootmoaken (Psa. 94:22-23; Jes. 65:17).

17. Woo rät Jehova no Jesaja 30:21 no vondoag dän Dach to ons?

¹⁷ Jehova rät vondoag dän Dach noch to ons (läs Jesaja 30:21). Wie hieren siene Stemm nich vom Himmel, oba hee haft ons sien oppjeschräwnet Wuat, de Bibel, jejäft un doabennen jeft hee ons Aunwiesungen. Un derch Jehova sienen Jeist jeft “de trua un kluaka Kjnajcht” siene Deena daut jeistelje Äten (Luk. 12:42). Wie kjrieen sea väl jeisteljet Äten derch jedrekjte Bieekja, em Internet, Videos un oppjeschnaktet.

18. Woo kjennen Jehova siene Wieed onsen Gloowen stoakjen un ons Moot jäwen?

¹⁸ Well wie de Wieed em Denkj hoolen, waut Jehova to Jesus säd, aus hee oppe Ieed wia. Gott siene Wieed, waut en de Schreft oppjeschräwen sent, kjennen ons Vetruen jäwen, daut Jehova aules unja Kontroll haft un daut hee aul dän Schoden, waut de Soton un siene beese Welt opp ons jebrocht haben, wada gootmoaken woat. Well wie ons gaunz eenich sennen, krakjt no Jehova siene Stemm to horchen. Wan wie daut doonen, dan woa wie met aul de Trubbels kjennen foadich woaren, waut wie nu haben un waut veleicht noch komen woaren. De Schreft sajcht: “Jie motten jeduldich doabie bliewen, un soo Gott sien Wellen doonen un daut kjrieen, waut junt vesproaken es” (Heb. 10:36).