1, 2. a) ¿Jehová Diosca gentecunahuanca ima shinataj parlashca? b) Cai yachaipica ¿imatataj yachashun?

¿IMAMANTATAJ Jehová Diosca ñucanchijhuan parlanacunata munan? Pai imata yuyashcata, imata rurashcata yachachunmi munan. Ñaupa tiempoca Yaya Diosca profetacunata, angelcunata, paipaj Churita cachashpami paita sirvijcunahuan parlanacuj carca (Amós 3:7; Gálatas 3:19; Apocalipsis 1:1). Cunan punllacunapish ñucanchijhuan parlanacungapajca Bibliatami cushca. Bibliata liyishpaca paita uyacushca layami can.

² Jesús cai Allpapi cajpica Jehová Diosca jahua cielomantami quimsa cutin rimarca. ¿Imallatashi nishcanga? ¿Imalla nishcamantaca imatataj yachai tucunchij? ¿Dios nishcacunata yachashpaca imatataj rurashun? Cai tapuicunamantami yachashun.

3. a) Marcos 1:9-11-pi nishca shinaca Jesús bautizarijpica Jehová Diosca ¿imatataj nirca? b) ¿Chai shimicunaca imatataj ricuchirca?

³ (Marcos 1:9-11-ta liyipai). Jehová Diosca jahua pachamantami punta cutin Jesustaca: “Canmi ñuca cꞌuyashca Churi cangui. Canpimi cushicuni” nirca. Jehová Diosca paita cꞌuyashcamanta, paipi confiashcamantami chashna nirca. Chaita uyashpaca Jesusca cushillami sintirishcanga ¿nachu? Ashtahuancarin chai shimicunata nishpaca Jehová Diosca Jesús paipaj Churi cashcata, paita cꞌuyashcata, paipi cushicushcatami ricuchirca. Cunanca cai yuyaicunamanta yachashun.

4. ¿Imamantataj Jehová Diosca Jesustaca “Canmi ñuca cꞌuyashca Churi cangui” nirca?

 ⁴ “Canmi ñuca cꞌuyashca Churi cangui”. ¿Imamantataj Jehová Diosca cai shimicunata nirca? Yuyarishun. Jesús jahua pachapi cashpaca shuj espiritumi carca. Diospaj Churipishmi carca. Pero cai Allpapi Jesús bautizarijpica Diosca paipaj espíritu santohuanmi agllashca Churi cashcata ricuchirca. ¿Imapajtaj agllarca? Pai jahua cieloman tigrajpica Rey, Sumo Sacerdote tucuchunmi agllarca (Lucas 1:31-33; Hebreos 1:8, 9; 2:17). Chaita yachashcamantami Jesús bautizarijpica Jehová Diosca: “Canmi ñuca cꞌuyashca Churi cangui” nirca (Lucas 3:22).

5. ¿Imatataj Jehová Dios shinallataj rurana canchij?

⁵ “Canmi ñuca cꞌuyashca Churi cangui”. Jehová Diosca Jesusta cꞌuyashcamantami animachirca. Ñucanchijpish pai shinallatajmi rurana canchij (Juan 5:20). Por ejemplo, shujtajcuna ñucanchijman cꞌuyaita ricuchijpi, felicitajpica cushillami sintirinchij ¿nachu? Chaimantami ñucanchijpish huauqui panicunata, familiacunata cꞌuyana, animachina canchij. Chaita rurajpimi paicunaca Jehová Diosta sirvishpa catingacuna. Yaya mamacunapish paicunapaj huahuacunataca shungumantami cꞌuyaita ricuchina can. Chaimi paicunaca imatapish cushilla rurangacuna.

6. ¿Imamantataj Jesucristopi tucui shunguhuan crina canchij?

⁶ “Canpimi cushicuni”. Jehová Dios chashna nishpaca paipaj munaita Jesucristo pajtachinatami tucui shunguhuan crishcata ricuchirca. Ñucanchijpish Dios imata rurasha nishcata Jesucristo pajtachinatami tucui shunguhuan crina canchij (2 Corintios 1:20). Chaipajca Jesuspaj causaita siempre yuyarishunchij. Chashnami paimanta ashtahuan yachanata munashun, pai laya canatapish munashun. Ashtahuanpish Yayitu Diosca paita  sirvijcuna Jesucristomanta tandalla yachashpa catinatami crin (1 Pedro 2:21).

7. a) Mateo 17:1-5-pi nishca shinaca ¿Jehová Diosca ima horastaj cutin rimarca? b) ¿Jehová Diosca imatataj nirca?

⁷ (Mateo 17:1-5-ta liyipai). ¿Jehová Diosca ima horastaj cutin rimarca? Jesucristoca Pedrohuan, Santiagohuan, Juanhuanmi shuj urcuman rircacuna. Chaipimi quimsa apostolcunaca shuj muscui shinata ricurcacuna. ¿Imataj carca? Jesuspaj ñahuica inti shinami lunyacuj tucurca. Paipaj churanapish luz shina yurajllami tucurca. Jesuspaj ladopica Moisés, Elías shinami ricurirca. Paicunaca Jesushuanmi paipaj huañuimanta, causarinamanta parlanacurca. Chaita ricushpami apostolcunaca “dorminaihuan cashpapish” mancharircacuna (Lucas 9:29-32). Qꞌuipaca achijnicuj pꞌuyu ricurishpami paicunata taparca. Chaipimi Jesús bautizarishca punllapi shinallataj Jehová Diosca paipaj Churita cꞌuyashcata, paipi cushicushcata ricuchisha nirca. Chaimi: “Caimi, ñuca cꞌuyashca Churi. Paipimi cushicuni” nirca. Qꞌuipaca: “Paita uyaichij” nircami.

8. Muscuita ricushpaca Jesucristopish apostolcunapish ¿ima shinataj sintirircacuna?

⁸ Cai muscuica Jesucristo jahua pachapi mandaj tucushpa achca poderta charina cashcatami ricuchirca. Cai muscuita ricushpaca Jesucristopish apostolcunapish ¿ima shinataj sintirircacuna? Jesusca llaquicunata, huañuitapish ahuantangapajmi fuerzasta charirca. Apostolcunapish Jesuspimi ashtahuan crircacuna. Shinallataj qꞌuipa punllacunapi llaquicunata ahuantangapaj, paicunaman mingashca trabajota pajtachingapajmi fuerzasta charircacuna. 30 huatacuna qꞌuipaca apóstol Pedroca cutinmi chai muscuimanta parlarca. Paica imata ricushcata, imata uyashcatapish claritotami yuyarirca (2 Pedro 1:16-18).

9. ¿Jesusca paipaj discipulocunamanca imallatataj nirca?

⁹ “Paita uyaichij”. Chashna nishpaca Jehová Diosca paipaj Churi nishcacunata uyachun, pajtachichun munashcatami ricuchirca. Cai Allpapi cashpaca ¿Jesusca imallatataj nirca? Paipaj discipulocunaman Diospaj Reinomanta ima shina huillana cashcatami yachachirca. Achca cutincunami “chaparacuj” shina causana cashcatapish yachachirca (Mateo 24:42; 28:19, 20). Shinallataj mana shaicurishpa Diospaj munaita pajtachichunmi cutin cutin paicunata animarca (Lucas 13:24). Ashtahuanpish caishuj chaishuj cꞌuyanacushpa, tandalla causana cashcata, paipaj mandashcacunata cazuna cashcatapishmi intindichirca (Juan 15:10, 12, 13). Shinashpaca Jesusca paipaj discipulocunamanca alli consejocunatami curca. Chaimantami cunan punllacunapish chai consejocunata uyana canchij.

10, 11. ¿Jesusta uyacushcata ricuchingapajca imatataj rurana canchij?

¹⁰ Jesusca: “Ñuca huillashcataca mana llullapaj cajcunallami uyancuna” nircami (Juan 18:37). ‘Caishuj chaishuj ahuantanacushpa, perdonanacushpami’ Jesusta uyacushcata ricuchinchij (Colosenses 3:13; Lucas 17:3, 4). Shinallataj alli punllacuna cajpipish llaqui punllacuna cajpipish cushilla predicashpami paita uyacushcata ricuchinchij (2 Timoteo 4:2).

¹¹ Jesusca: ‘Ñuca ovejacunaca ñuca rimaitaca uyanmi’ nircami (Juan 10:27). Jesusta uyacushcata ricuchingapajca pai nishcacunatami pajtachina canchij. Alli causanallapi mana ñucanchij shunguta churanachu canchij (Lucas 21:34). Tucuimanta yallica Jesustami cazuna canchij. Achca huauqui panicunaca jatun problemacunata charishpapish chaitami rurashcacuna. Por ejemplo, huaquincunataca Diosta sirvishcamantami llaquichincuna. Shujtajcunaca yallitaj pobremi can. Cutin  shujtajcunapaj llajtacunapica allpa chujchuicuna, acapanacunami tiyashca. Pero ñucanchij huauqui panicunaca ima laya tucushpapish Diosta cazushpami caticuncuna. Paicunataca Jesusca: “Maijanpish ñuca mandashcacunata yachashpa chaitataj rurajmi ñucata cꞌuyajca. Ñucata cꞌuyajtaca, ñuca Yayapish cꞌuyangami” ninmi (Juan 14:21).

12. ¿Jesusta uyangapajca imatataj ashtahuan rurana canchij?

¹² Shinallataj Jesusta uyangapajca pai agllashca pushaj huauquicunatami apoyana canchij (Hebreos 13:7, 17). Cai último huatacunapica Diosta sirvijcunata pushajcunaca huaquin cosascunatami cambiashca. Por ejemplo, shujtaj laya huillanatami yachachishca. Huillangapaj mushuj publicacioncunata, videocunatapishmi cushca. Chaupi semanacunatapish shujtaj laya tandanacuita charichunmi rurashcacuna. Shinallataj Tandanacuna Huasicunata ima laya rurana, ima laya allichina cashcatami yachachishcacuna. Cai pushaj huauquicuna cꞌuyaihuan, alli yachachishcamantaca ¿manachu paicunata agradicisha ninchij? Paicuna ima nishcata shungumanta cazujpica Yayitu Diosca bendiciangami.

13. ¿Jesusta uyashpaca ima shinataj causashun?

¹³ Jesús yachachishcacunata uyanaca ñucanchijpajllatajmi alli can. ¿Imamantataj shina ninchij? Jesusca pai yachachishcacuna discipulocunata samachina cashcatami huillarca. Chaimi paicunamanca: ‘Cancunapaj alma samarinatami japinguichij. Ñuca yugoca pꞌanguillami, ñuca apachinapish mana llashajchu’ nirca (Mateo 11:28-30). Ñucanchijpish Mateo, Marcos, Lucas, Juan librocunata, Bibliapi tiyaj shujtaj librocunata liyishpaca Diosta sirvishpa catingapajmi fuerzasta japishun. Yachaisapacunapishmi tucushun (Salmo 19:7; 23:3). Jesús nishca shinaca “Diospaj Shimita uyashpa cazujcunami”, ashtahuan cushilla causanchij (Lucas 11:28).

14, 15. a) Juan 12:27, 28-pi nishca shinaca ¿ima horastaj Jehová Diosca jahua pachamanta quimsa cutin rimarca? b)  ¿Imamantataj Jesusca Jehová nishcata uyashpaca tranquilo sintirirca?

¹⁴ (Juan 12:27, 28-ta liyipai *). Juan libropica Jehová Diosca jahua cielomanta ña quimsa cutin rimashcatami parlan. ¿Chaitaca ima shinataj yachanchij? Huañungapaj huaquin  punllacuna illajpirajmi Jesusca Jerusalenpi último pascuata rurarca. Chaipimi paica ñucaca llaquihuan huañucunimari nishpa Diosta mañarca. Qꞌuipaca: “Yayitu, cambaj shutica alli nishca cachun ricuchiyari” nircami. Chaimi Jehová Diosca: “Ñami ñuca shutita alli cashcata ricuchircani. Cutinpish ricuchisharajmi” nishpa cutichirca.

¹⁵ Jesusca paita azotishpa huañuchina cashcatami yacharca. Shinapish huañungacama Diosta tucuipi cazushcatami ricuchina carca. Chaita yachashcamantami sustarishca carca (Mateo 26:38). Shinallataj Jesustaca llullajmi can nishpami juchachishpa huañuchigrircacuna. Pero paipajca Diosta jatunyachinami ashtahuan importante carca. Chaimantami huañushpa Diospaj shutita mana allipi saquichinata mancharca. Shinapish paipaj Yaya ima nishcata uyashpaca Yayapaj shuti jatunyarina cashcatami crirca. Chaimi llaquicunata ahuantanata yachashpapish tranquilo sintirirca. Paipaj Yaya ima nishcata Jesusllami intindishcanga. Pero Jehová Diosca tucuicunaman yachachingapajmi chaitaca Bibliapi quillcachirca (Juan 12:29, 30).

16. ¿Huaquinpica imamantataj Diospaj shuti mana allipi saquirinata sustarinchij?

¹⁶ Jesús shinallatajmi Diospaj shutita allipi saquichinata munanchij. Chaimantami shujtajcuna ñucanchijta deganamanta llaquichijpi o llullacunata nijpi Diospaj shutica ¿ima shinashi saquiricun? nishpa sustarinchij. ¿Diospaj organizacionpish allichu saquiricun? nishpa sustarinchij.  Shinapish mana yalli sustarinachu canchij. Ashtahuanpish chai ratoca Jehová Dios Jesusman ima nishcatami yuyarina canchij. Millai Diablo, millai gentecunaca Diosta sirvijcunata tucui layami llaquichishca. Pero Yaya Diosca paipaj Gobiernohuanmi tucui llaquicunata tucuchinga. Chashnami Diosca paipaj shutitaca jatunyachinga (Salmo 94:22, 23; Isaías 65:17). Shinallataj: “Pipish mana yachaipaj Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichinga” nishca shimicunaca pajtaringatajmi (Filipenses 4:6, 7).

17. Isaías 30:21-pi nishca shinaca ¿Diosca ima shinataj ñucanchijhuan riman?

¹⁷ Cunancamami Jehová Diosca ñucanchijhuan riman (Isaías 30:21-ta liyipai). ¿Ima shinataj riman? Paica mana jahua pachamantachu riman. Ashtahuanpish paipaj Shimita cushpami ñucanchijhuan rimacuj shina can. Chaimantami paipaj Shimipi imalla mandashcacunata yachana canchij. Shinallataj Diosca “alli cazuj alli yuyaiyuj” sirvij huauquicunata cushpami ñucanchijhuan rimacuj shina can. Paicunaca espíritu santota chasquishcamantami revistacunahuan, videocunahuan, uyanacunahuan ñucanchijman yachachin (Lucas 12:42, QC, 1989). Shinaca ¿manachu achca yachaicunata charinchij?

18. ¿Imamantataj Dios nishcacunata mana nunca cungarina canchij?

¹⁸ Jesús cai Allpapi cajpi, Jehová Dios imalla nishcata ama nunca cungarishunchij. Dios nishcacunaca Bibliapimi tiyacun. ¿Bibliata liyishpaca imatataj rurashun? Diablo, paipaj parte gentecuna llaquichijpipish Dios chai llaquicunata tucuchinatami tucui shunguhuan crishun. Shinashpaca, Dios nishcacunata alli uyashunchij. Chaimi cunanpish shamuj punllapish llaquicunata ahuantashun. Bibliapica: “Diospaj munaita ruraj cangapajca, mana pꞌiñarijmi cana. Chashna cashpami Dios cusha nishcataca japinguichij” ninmi (Hebreos 10:36).