1, 2. (1) ¿Imaynatam Jehova Diosqa runakunata rimapayarqa? (2) ¿Imamantam kay yachachikuypi yachachkasunchik?

JEHOVA DIOSQA anchatam munan imayna kasqanta hinaspa ima piensasqanta yachananchikta. Chayta munaspanmi ñawpaq tiempopi runakunata rimapayarqa willakuqninkunawan, angelninkunawan hinaspa churin Jesuswanpas (Amos 3:7; Gal. 3:19; Apoc. 1:1). Kay tiempopiñataqmi rimapayawanchik bibliawan.

² Chaymantapas Jesus kay pachapi kachkaptinmi Jehova Diosqa hanaq pachamanta churinta kimsa kutikama rimapayamurqa. Yachasunyá ima nisqanmanta, chay nisqan ima yachachiwasqanchikmanta hinaspa imatam ruwananchik chaykunawan yanapachikunapaq.

3. Marcos 1:9-11 nisqanman hinaqa, ¿imatam Jehova Diosqa nirqa churinta bautizakuruptin, hinaspa imatataq chaywanqa sutillata qawachichkarqa?

³ (Qaway Marcos 1:9-11). Jehova Dios churinta punta kaq kutipi rimapayaspanmi nirqa: “Qanmi churiy kanki, qamtam kuyayki hinaspam chaskikipas”, nispa. Taytan kuyasqanta yachasqanwanqa maynatachá Jesusqa kusikurqa. Jehova Dios chaykunata nisqanwanmi sutillata qawachichkarqa Jesusqa churin kasqanta, anchata kuyasqanta hinaspa chaskisqantapas. Qatiqninpiyá chaykunamanta yachasun.

4. Jesus bautizakuruptinqa, ¿imapaqmi Jehova Diosqa akllarurqa?

⁴ “Qanmi churiy kanki”. ¿Imanasqataq Jehova Diosqa Jesusta nirqa “qanmi churiy kanki”, nispa? Jesusqa hanaq pachapi kaspanmi Diospa churinña karqa. Kay pachapi bautizakuruspanñataqmi Diospa chuya espiritunwan akllasqa churinña karqa, chaynapi hanaq pachaman kutispa kamachiq hinaspa sacerdotekunapa jefen kananpaq (Luc. 1:31-33; Heb. 1:8, 9; 2:17). Chayraykum Jesus bautizakuruptin taytanqa  nirqa: “Qanmi churiy kanki”, nispa (Luc. 3:22).

5. Jehova Dios hina, ¿imatam ruwananchik?

⁵ “Qamtam kuyayki”. Jehova Diosqa chayna nisqanwanmi qawachirqa Jesus kuyasqanta, hinaspa kallpanchasqanta. Pay hinataqmi ñuqanchikpas hukkunawan kananchik (Juan 5:20). Kuyasqanchik amistadninchikkuna allin ruwasqanchikmanta alabaykuwaptinchikqa kallpanchasqam tarikunchik, ¿aw? Chayna kallpanchasqa kaytam munanku iñiqmasinchikkuna hinaspa ayllunchikkunapas, chaymi paykunataqa kuyananchik hinaspa kallpanchaykunanchik. Chayta ruwaspanchikqa yanapasunmi Jehova Diospi astawan hapipakunankupaq. Tayta-mamakunapas churi-wawankutam kuyasqankuta ninanku hinaspa kallpanchananku, alabaykunankutaqmi allin ruwasqankumanta. Chaynapi sunqumanta astawan Diospaq llamkanankupaq.

6. ¿Imanasqam Jesusmantaqa mana iskayrayanchikchu?

⁶ ‘Qamtam [...] chaskiki’. Kayna nisqanwanmi Jehova Diosqa qawachichkarqa churin Jesus munaynin ruwananmanta mana iskayrayasqanta. Ñuqanchikpas hamuq tiempopi kay pachapaq allin kaqkunata Jesus ruwananmantaqa manam iskayrayanchikchu (2 Cor. 1:20). Jesuspa kasukuq kasqanmanta yachasqanchikmi yanapawasun hinalla paymanta yachaspa qatipakunanchikpaq. Jehova Diosqa runankunamantaqa manam iskayrayanchu, payqa yachanmi Jesusta hinalla qatipakuy munasqanchikta (1 Ped. 2:21).

7. Mateo 17:1-5 nisqanman hinaqa, ¿ima karuptinmi Jehova Diosqa hanaq pachamanta kaqmanta rimamurqa, hinaspa imatam nirqa?

⁷ (Qaway Mateo 17:1-5). Jehova Diosqa kaqmantam hanaq pachamanta rimamurqa.  Pedrowan, Santiagowan hinaspa Juanwan urqupi kachkaptinkum Jesuspa uyan inti hinaraq kanchariyta qallaykurqa, pachanpas suma-sumaqllatañam llipipipirqa. Jesuspa qatiqninkunaqa ‘puñuywanmi aysachikuchkarqaku, ichaqa chaypunilla rikchariruspankum Jesuspa kanchariyninta rikururqaku (Luc. 9:29-32). Hina chaypitaqmi musquyninkupi hina qawarqaku Moisestawan Eliasta Jesuswan wañukunanmanta hinaspa kawsarinanmanta rimachkaqta. Chaykunata qawachkaptinkum hatun puyu uraykamurqa, chay puyu ukumantam huk rimay uyarikurqa, Jehova Diosmi karqa. Bautizakusqan punchaw hinam churin kuyasqanta qawachirqa kaynata nispan: “Paymi kuyasqay churiy, paytam kuyani hinaspapas chaskinim”, nispa. Kay kutipim ichaqa nirqaraq: “Uyariychikyá”, nispa.

8. ¿Imaynatam chay qawasqankuqa Jesusta hinaspa qatiqninkunata yanaparqa?

⁸ Chay nisqanwanmi Jehova Diosqa qawachichkarqa Jesus atiyta chaskinanmanta hinaspa hamuq tiempopi Diospa munaychakuyninpipas kamachiq kananmanta. Chaywanqa mayna kusisqachá hinaspa kallpanchasqachá Jesusqa tarikurqa, ñakarispa wañunanta yachachkaspanpas. Qatiqninkunapas chay qawasqankuwanmi kallpanchasqa tarikurqaku. Paykunapas qipa punchawkunapim hinalla Diosman sunqu kanankupaq kallpanchakunanku karqa. Apostol Pedroqa yaqa 30 wata pasaytapas chaykunataqa manam qunqarqachu (2 Ped. 1:16-18).

9. ¿Imatam Jesusqa qatiqninkunaman nirqa?

⁹ “Uyariychikyá”. Jehova Diosqa niwanchikmi churin Jesuspa nisqanta kasukunanchikpaq. Kay pachapi Jesus kachkaspanmi sumaq yachachikuykunata willakurqa. Payqa qatiqninkunatam yachachirqa Diospa munaychakuyninmanta allin willakuykunata willakunankupaq. Nirqataqmi qawan-qawanlla kanankupaq (Mat. 24:42; 28:19, 20). Chaymantapas nirqam anchata kallpanchakunankupaq, chaynapi mana qipaman kutinankupaq (Luc. 13:24). Nirqam kikinkupura kuyanakunankupaq, huk sunqulla kanankupaq hinaspa nisqanta kasukunankupaqpas (Juan 15:10, 12, 13). Arí, Jesuspa lliw nisqankunaqa allinninkupaqmi karqa kunan tiempopipas allinninchikpaqmi.

10, 11. Jesusta uyarisqanchiktaqa, ¿imaynatam qawachinchik?

¹⁰ Jesusmi nirqa: “Chiqap kaqman hina kawsaqqa rimasqaytam uyarin”, nispa (Juan 18:37). Jesustaqa uyarinchik kayna nisqanta kasukuspanchikmi, paymi nirqa: “Piñanakunaykichikpaq razon kaptinpas hinallayá aguantanakuychik hinaspa tukuy sunqumanta pampachanakuychik”, nispa (Col. 3:13; Luc. 17:3, 4). Jesustaqa uyarinchiktaqmi sasachakuykuna kaptinpas Diospa munaychakuyninmanta tukuy sunquwan willakuspanchik (2 Tim. 4:2).

¹¹ Jesusqa nirqataqmi ovejankunaqa econta uyarisqanta (Juan 10:27). Jesustaqa uyarinchik manam ima niwasqanchikta yachaspallachu, aswanqa niwasqanchikta ruwayman churaspam. Chaymi ñuqanchikqa mana ‘tukuy imamantaqa afanakunchikchu’ (Luc. 21:34). Aswanqa Jesuspa kamachiwasqanchiktam imamantapas puntapi churanchik, chaytam ruwanchik sasachakuypi tarikuspapas. Achka iñiqmasinchikkunam Diospi iñisqankurayku ñakarichkanku hinaspa sasachakuypi kachkanku, wakinkum wakcha kasqankurayku, wakinkuñataqmi llumpay wayrawan, terremotokunawan utaq huk sasachakuykunawanpas. Chayna tarikuspankupas hinallam Diosman sunqu kachkanku. Chaymi  Jesusqa llapallanchikta kaynata niwanchik: “Kamachisqaykunata yachaspan kasukuqqa kuyawaqniymi. Kuyawaqniytaqa taytaypas kuyanqataqmi, ñuqapas paytaqa kuyasaqmi hinaspam sumaqta riqsichikusaq”, nispa (Juan 14:21).

12. ¿Imata ruwasparaqtaq qawachichwan Jesus uyarisqanchikta?

¹² Jesustaqa uyarinchiktaqmi Diospa llaqtanpi punta apaqkunapa nisqankuta kasukuspanchik (Heb. 13:7, 17). Kay pasaq watakunallapim, Diospa llaqtanpi punta apaqkunaqa Diosmanta willakunapaq musuq yanapakuykunata quwarqanchik. Chaymantapas niwarqanchikmi huñunakuyninchikkunata imaynataña ruwanapaq, yupaychana wasikunata imaynata ruwanapaq utaq imaynata allichanapaqpas. ¿Manachu chay ruwasqankuwanqa qawachiwanchik ancha kuyawasqanchikta? Jehova Diosqa bendeciwasunmi llaqtanpi punta apaqkunata kasukunapaq kallpanchakuptinchikqa.

13. ¿Imaynatam yanapawanchik Jesusta uyariyqa?

¹³ Jesuspa nisqanta kasukuyqa allinninchikpaqmi. ¿Imanasqa? Qatiqninkunatam nirqa yachachisqankunata kasukuyninkuqa yanapananmanta. Hinaspam nirqa: ‘Chaynata ruwaspaqa hawkayaytam tarinkichik. Yuguyqa mana llasaqmi qipiypas sampallataqmi’, nispa (Mat. 11:28-30). Diospa palabranpi Jesuspa ruwasqanmanta rimaq hinaspa wakin qillqakunapas allintam yanapawanchik hinalla Jehova Diosta kuyananchikpaq. Yanapawanchiktaqmi yachayta tarinanchikpaqpas (Sal. 19:7; 23:3). Jesusmi nirqa: “¡Kusisqaqa kanku Diospa palabranta uyarispa kasukuqkunam!”, nispa (Luc. 11:28).

14, 15. (1) Juan 12: 27, 28 nisqanman hinaqa, ¿Jesus imayna tarikuchkaptintaq Jehova Diosqa rimapayamurqa? (2) ¿Imanasqataq uyarisqanwanqa Jesusqa kallpata hapirqa hinaspa sunqunpas tiyaykurqa?

¹⁴ (Qaway Juan 12:27, 28). Jesusmanta qillqaq Juanpas, willawanchikmi huk punchawllaña wañukunanpaq kachkaptin kaqmanta Jehova Dios churinta rimapayamusqanmanta. Jesusqa Jerusalenmanmi rirqa pascua fiestata ruwananpaq. Llumpay hukmanyasqa tarikuspanmi, taytanta mañakuspan nirqa: “Taytalláy, sutikita hatunchay”, nispa. Taytanñataqmi hanaq pachamanta nimurqa: “Hatuncharuniñam, chaywanpas huktawanraqmi hatunchasaq”, nispa.

 ¹⁵ Jesusqa ñakarichispa wañuchinankutaqa yacharqam, chaywanpas taytanman sunqu kananpaqmi kallpanchakunan karqa taytanpa sutin pinqaypi mana qipananpaq (Mat. 26:38). Jesusqa munarqam taytanpa sutin hatunchasqa kananta, chaymi hukmanyasqa tarikurqa yanqakunamanta tumpaptinku taytanpa sutin pinqaypi qiparunanmanta. Taytan sutinta hatunchasqanmanta uyarisqanwanqa maynatachá Jesuspa sunqunqa tiyaykurqa, chayqa kallpancharqataqchá ima sasachakuykunatapas atipananpaq. Chay tiempopiqa ichapas Jesuslla Jehova Diospa nisqankunataqa allinta yacharqa, ichaqa Jehova Diosmi qillqachirqa kunan tiempo ñuqanchiktapas yanapawananchikpaq (Juan 12:29, 30).

16. ¿Imanasqataq wakinpiqa hukmanyaruchwan Jehova Diospa sutin pinqayman churasqa kasqanta piensaspanchik?

¹⁶ Ñuqanchikpas Diospa sutinta pinqayman churaruyta mana munasqanchikraykum Jesus hina hukmanyaruchwan, mana allinkunamanta ñuqanchiktapas tumpawasqanchikrayku. Hukmanyasqaqa tarikuchwantaqmi Diospa llaqtanmanta llullakunata rimaptinku. Chaykunata uyarispaqa Jehova Diospa sutinta hinaspa llaqtantapas yanqachasqankutam piensachwan. Chaykunawanqa manam hukmanyananchikchu, aswanqa yuyarinanchikmi Jehova Diospa churinman nisqanta, nirqam sutinta hatunchananmanta. Munaychakuynintaqmi satanastawan ñakariykunata  chinkachinqa (Sal. 94:22, 23; Is. 65:17). Chaymi mana iskayrayananchikchu bibliapa kayna nisqan cumplikunanmantaqa, ninmi: “Diospa hawkayayninmi sunquykichiktawan yuyaynikichikta Cristo Jesusnintakama waqaychanqa, chay hawkayayqa runapa mana entiendey atinanmi”, nispa (Filip. 4:6, 7).

17. Isaias 30:21 nisqanman hinaqa, ¿imaynatam Jehova Diosqa kunan rimapayawanchik?

¹⁷ Jehova Diosqa hinallam kunankamapas rimapayawanchik (qaway Isaias 30:21). Manamá kikin Dioschu kunanqa rimapayawanchik, Payqa rimapayawanchik bibliantakamam, hinaspapas chuya espirituntam quykun ‘allin ruwaq yuyayniyuq sirvienteman’ allinta yachachiwananchikpaq. Paykunaqa achka yanapakuykunatam quwanchik papelpi utaq internetpi ñawinchananchikpaq. Quwanchiktaqmi uyarinapaq hinaspa qawananpaq sumaq yachachikuykunatapas (Luc. 12:42). ¿Manachu Diosmanta achka yachachikuykunata chaskinchik?

18. ¿Imanasqataq Diospa nisqankunaqa yanapawanchik?

¹⁸ Jehova Diospa churinman nisqantam sapa kuti yuyarinanchik. Chay nisqantaqa bibliapim qillqachirqa ñuqanchikpas yanapachikunanchikpaq, hinaspa hamuq tiempopi satanaspa mana allin ruwasqankuna chinkachinanpaq makillanpi kasqanta yachananchikpaqpas. Chaymi hinalla Jehova Diospa nisqanta uyarinanchik. Chayta ruwaspaqa ima sasachakuykunatapas atipasunmi kunan, hinaspa hamuq tiempokunapipas. Diospa palabranmi niwanchik: “Qamkunaqa hinallam ñakariykunata aguantanaykichik, chaynapi Diospa munasqanta ruwaruspaykichik paypa prometesqankunata chaskinaykichikpaq”, nispa (Heb. 10:36).