1, 2. a) Jehová Dios gentecunahuan parlangapaca ¿imatata utilizashca? b) Cai temapica ¿imatata yachajupashun?

JEHOVÁ DIOSCA pai imashina pensajta, imata rurajta yachachunmi munan. Chaimi punda tiempopica profetacunata, angelcunata, paipa churi Jesustapash utilizarca (Amós 3:7; Gál. 3:19; Apoc. 1:1). Cunanbica, Jehová Diosca gentecunahuan parlangapaca Bibliatami utilizan.

² Jesús cai alpapi cajpica Jehová Diosca quimsa viajetami jahua cielomanda parlamurca. Jehová Diosca ¿imatata nirca? Chai nishcacunamandaca ¿imatata yachajupanchi? Chai shimicunaca ¿imashinata ñucanchitaca ayudan? Cai temapimi chai yuyaicunamandaca yachajupashun.

3. a) Marcos 1:9-11​pi nishca shina Jesús bautizarijpica ¿imatata Jehová Diosca nirca? b) Jehová Dios chai shimicunata nishpaca ¿imatata ricuchijurca?

³ (Marcos 1:9-11, liingui). Jehová Dios quimsa viajeta jahua cielomanda parlashcaca caimi punda viaje can. Jehová Diosca nircami: “Canga, ñuca juyashca Churigumi cangui. Canmandami ninanda cushijuni” nishpa. Jesús chai shimicunata uyashpaca, Jehová Dios paita juyashcata, paipi ninanda confiashcatami ricurca. Chaimi paica ninanda cushijushcanga. Jehová Dios shina nishpaca Jesús paipa churi cashcata, paita juyashcata, paimanda ninanda cushijushcatami ricuchijurca. Cai quimsa yuyaicunamanda ashtahuan yachajupashunchi.

4. Jesús bautizarishca jipaca ¿imatata Jehová Diosca paihuan rurarca?

⁴ “Canga, ñuca [...] Churigumi cangui”. Jehová Dios cai shimicunata nishpaca Jesusta ninanda juyashcatami ricuchirca. Jesús jahua cielopi cashpaca shuj espiritumi carca. Chaimandami shuj angelcunashnallata Jehovapa churi carca. Shinapash Jesús cai alpapi bautizarishpaca Jehová Diospa espiritu santohuan agllai tucurca. Shinami Jehová Diospa agllashca churi tucurca. Chai punllamandapachami Jesusca Jahua cielopi Rey, Sumo Sacerdote cangapaj Jehová Diosmanda agllai tucushca carca (Luc.  1:31-33; Heb. 1:8, 9; 2:17). Chaimandami Jesús bautizarijpica Jehová Diosca cashna nirca: “Canga, ñuca [...] Churigumi cangui” nishpa (Luc. 3:22).

5. Jehová Dioshna ¿imatata rurana capanchi?

⁵ “Canga, ñuca juyashca Churigumi cangui”. Jehová Diosca Jesusta cushichirca, paita ninanda juyashcatapashmi ricuchirca. Jehová Dioshnami ñucanchicunapash shujcunata cushichingapaj, paicunata juyashcata ricuchingapaj esforzarina capanchi (Juan 5:20). Shuj juyashca ali amigo o familia imagutapash rurashcamanda felicitajpi, ñucanchita juyashcata ricuchijpica cushillami sintiripanchi. Shinallatami huauquipanicunata, ñucanchi familiatapash cushichina, paicunata juyashcata ricuchina capanchi. Shina rurashpaca paicuna Jehovapi tucui shunguhuan crichun, Jehová Diosta ama saquichunmi ayudashun. Taitamamacunapashmi huahuacunata cushichingapaj, paicunata juyashcata ricuchingapaj esforzarina can. Shinami huahuacuna Jehovata tucui shunguhuan sirvichun ayudanga.

6. ¿Imapita confiana capanchi?

⁶ “Canmandami ninanda cushijuni”. Jehová Dios shina nishpaca paipa munaita Jesús pactachinata seguro cashcatami ricuchijurca. Jehová Diosca Jesuspimi confiarca. Shinallatami, ñucanchicunapash shamuj punllacunapi Jehovapa munaita Jesús pactachinata tucui shunguhuan confiana capanchi (2 Cor. 1:20). Jesús Jehová Diosta tucui shunguhuan sirvishcapi pensarishpami paimanda ashtahuan yachajungapaj, paipa chaquita catingapaj munapanchi. Jehová Diosca paita sirvijcuna Jesusmanda ashtahuan yachajushpa catinataca seguromi can (1 Ped. 2:21).

7. Mateo 17:1-5​pi nishca shinaca ¿ima horata Jehová Diospa rimaica uyarirca? Chaipica ¿imatata Jehová Diosca nirca?

⁷ (Mateo 17:1-5, liingui). Jesús punchapamba tucujpimi Jehová Diosca cutin jahua  cielomanda parlarca. Jesusca, Pedrota, Santiagota, Juandapash urcumanmi pusharca. Chaipimi paicunaca Jesús ñapash punchapamba tucujta muscuipishna ricurca. Jesuspa ñavipash, indishna punchapambami ricurirca. Paipa churajushca ropapash yura yura michagushnami ricurirca. Chaipimi Moisespash, Eliaspash, Jesushuan parlanajurca. Paicunaca Jesús huañunata, huañushpapash cutin causarinatami parlanajurca. Jesuspa quimsa apostolcunaca “ninanda puñuihuan na ushashpa puñunajurca”. Shinapash paicuna rijcharishpami Jesusta punchapamba cajta ricurca (Luc. 9:29-32). Jipamanga punchapamba fuyu pillushpa, paicunataca ñapash quilpamurca. Chai fuyu ucumandaca, Jehovapa rimaimi uyarirca. Jesús bautizarishca punllapishnami Jehová Diosca paita ninanda juyashcata, paimanda ninanda cushijushcata ricuchirca. Chaimi cashna nirca: “Caimi, ñuca juyashca Churigu. Paimandami, ninanda cushijuni” nishpa. Shinallata nircami: “Pai imata yachachishcataca, aliguta uyanguichi” nishpa.

8. Jesús punchapamba tucushcata ricunaca ¿imashinata Jesustapash, paipa catijcunatapash ayudarca?

⁸ Jesús punchapamba ricurishpaca pai Diospa Reinopi mandashpa imatalla rurai ushashcatami ricuchijurca. Chaimi Jesús llaquicunata aguantachun, llaquinaita huañuna cashcatapash aguantachun ayudashcanga. Shinallata chai muscuipishna ricurishcami Jesuspa catijcunatapash ayudarca. Shinami llaquicuna shamujpipash na shaijushpa, tucui shunguhuan Jehová Diosta sirvishpa ñaupaman catichun ayudarca. Apóstol Pedroca 30 huatacuna jipami Jesús punchapamba tucushcata parlarca. Shinami Jesús punchapamba tucushcata yaria causashcata ricuchirca (2 Ped. 1:16-18).

9. Jesusca ¿imatata paita catijcunamanga mandarca?

⁹ “Aliguta uyanguichi”. Jehová Diosca Jesús imata yachachishcata uyashpa cazuchunmi munan. Jesús cai alpapi cashpaca ashtaca alipacha yuyaicunamandami yachachirca. Chai yuyaicunata yachajungapami esforzarina capanchi. Jesusca paita catijcunataca Diospa Reinomanda ali villaigucunata villachichunmi yachachirca. Shinallata ‘rijcharianshnami chapariashpa’ causana canguichi nishpami paicunataca mandarca (Mat. 24:42; 28:19, 20). Ashtahuanbash paita catijcunataca na shaijushpa shinlli tucushpa ñaupaman catichunmi Jesusca mañarca (Luc. 13:24). Shinallata caishujhuan chaishujhuan juyarishpa shujllashna tandanajushca causachun, paipa mandashcacunata cazuchunmi Jesusca mandarca (Juan 15:10, 12, 13). Jesús cushca consejocunaca paita catijcunataca ninandami ayudarca. Cunanbipash shinallatami ayudan.

10, 11. Jesusta catijcunaca ¿imatata rurana capanchi?

¹⁰ Jesusca nircami: “Na llullashpa villajujta cazujcunaca, tucuillami ñuca imata villajujtapash aliguta uyanajun” nishpa (Juan 18:37). ‘Caishujmanda chaishujmanda aguantarishpa catina, tucui shunguhuan randimandami perdonarina capanguichi’ nishca consejota cazushpami Jesusta uyajushcata ricuchinchi (Col. 3:13, NM; Luc. 17:3, 4). Shinallata llaquicunahuan cashpa o na cashpapash, cushijushpa ali villaigucunata villachishpami Jesusta cazunajushcata ricuchinchi (2 Tim. 4:2).

¹¹ Shinallata Jesusca paipa llamagucuna o paita catijcuna paipa shimita uyaj cashcatami nirca (Juan 10:27). Jesusta catijcunaca, Jesuspa nishcacunata uyashpallaca na quedanchichu. Ashtahuangarin paipa nishcacunata ñucanchi causaipi pactachishpami cazunchi. Cai mundopi “imatapash ninandapacha rurashpa charijyangapaca” na mascapanchichu (Luc. 21:34). Chaipa randica, ima llaquicunata charishpapash Jesuspa nishca consejocunata ñucanchi causaipi pactachingapami esforzarinchi. Cunanbica ashtaca huauquipanicunaca pobrella causanajun, acapanacuna, alpa chujchuicuna llaquichijpi o contracuna llaquichijpimi causanajun. Shina llaquicunahuan causashpapash  Jehovata tucui shunguhuan ali sirvinataca na saquishcachu. Jesusca cai llaquicunata apaj huauquipanicunamanga cashna nishpami cushichin: “Ñuca mandashca shimicunata chasquishpa pactachishpa causajllami, ñucataca juyahuan. Paitaca, ñuca Taitapash juyangami” nishpa (Juan 14:21).

12. Jesusta cazujushcata ricuchingapaca ¿imatata ashtahuan rurana capanchi?

¹² Congregacionbi ñaupaman pushaj huauquicunata respetashpa, cazushpami Jesusta cazujushcataca ricuchipanchi (Heb. 13:7, 17). Cai ultimo huatacunapica Jehová Diospa organizacionbica ashtaca cambiocunami tiashca. Por ejemplo, imashina villachinata, imacunahuanlla villachinatapashmi cushca. Shinallata chaupi semana tandanajuipipashmi mushuj cambiocuna tiashca. Ashtahuanbash Tandanajui Huasicunata imashina shayachigapaj o arreglangapapashmi mushuj cambiocuna tiashca. Shina aliguta yachachijushcamandaca ¿nachu agradicipanchi? Jehovapa organizacionbi cambiocunata cazungapaj esforzarinajushcamandaca Jehová Diosllatami bendicianga.

13. Jesuspa nishcacunata uyashpa cazunaca ¿imapita ayudan?

¹³ Jesuspa tucui yachachishcacunata uyashpa cazunaca ñucanchipallatami ali capan. ¿Imamandata shina nipanchi? Jesuspa yachachishcacunami paita catijcunataca shinlli tucuchun ninanda ayudarca. Chaimandami Jesusca cashna nirca: “Ñucamandami cangunapaj almaca [o causaica], samanata taringa. Ñucapaj yugoca fangallagumi, aparijpipash na llashachingachu” nishpa (Mat. 11:28-30). Jehová Diospa Shimimi ñucanchitaca ninanda ayudan. Jesuspa causaimanda parlajuj Mateo, Marcos, Lucas, Juan librocunapashmi espiritualmente shinlli tucushpa ñaupaman catichun, ali desiciongunatapash ali ali agllachun ayudan (Sal. 19:7; 23:3). Jesusca cashnami nirca: “Taita Diospaj Shimita yachachijpi uyashpa pactachijcunaca, ashtahuan ninandami cushijun” nishpa (Luc. 11:28).

14, 15. a) Juan 12:27, 28​pi nishcashnaca ¿Jehová Diosca imatata nirca? b) Jehová Diospa nishca shimicunaca ¿imashinata Jesustaca ayudarca?

¹⁴ (Juan 12:27, 28 *, liingui). Juan libropica Jehová Dios jahua cielomanda parlashcaca ña quimsa viaje uyarishcatami nin. Jesús huañungapaj huaquin punllacuna faltajpimi ultimo pascuata yaringapaj Jerusalenbi carca. Jesús  llaquirishca caimandami Jehová Diostaca cashna nishpa mañarca: “Canba shutiguta jatunyachipayari ñuca Taitalla” nishpa. Jesús shina mañajpimi, jahua cielomandaca cashna nij uyarirca: “Ñami jatunyachircani. Cutimbashmi jatunyachisha” nishpa.

¹⁵ Jesusca llaquinaita macai tucushpa, huañuchi tucuna cashcata yachashpapash Jehová Diosta tucui shunguhuan sirvinatami ashtahuanbacha preocuparishca carca (Mat. 26:38). Jesusca Jehová Diospa shutiguta jatunyachingapami munarca. Jesustaca Taita Diosmanda nalicachishpa rimarca nishpami gentecunaca juchachirca. Jesusca paipa culpamanda gentecuna Jehová Diosta nalicachishpa rimanatapashmi manllajurca. Shinapash jahua cielomanda Jehová Dios parlamujta Jesús uyashpami, Jehová Diosllata paipa shutiguta jatunyachinataca seguro cashcanga. Chaita uyanami llaquicunata aguantachun, tranquilo sintirichun Jesustaca ayudashcanga. Jehová nishcataca Jesusllami intindishcanga. Shinapash Jehová Diosca Jesusman nishca shimicunata ñucanchicuna yachajuchunmi Bibliapi escribichishpa saquirca (Juan 12:29, 30).

16. ¿Imamandata huaquinbica preocuparinchi?

¹⁶ Jesushnami ñucanchicunapash Jehovata nalipi quedachinata manllanchipashchari. Jesushnami ñucanchicunapash ashtaca llaquicunata tal vez charishcanchi. Huaquimbica contracuna ñucanchimanda llullacunata nin. Chaimi Jehovatapash, paipa organizaciondapash nalipi quedachinga yashpa preocuparinchi. Shinapash na yapata preocuparinachu capanchi. Shina pasajujpica  Jehová Dios Jesusman imata nishcatami yarina capanchi. Jehová Diosca paipa shutita jatunyachingami. Diablo, cai nali mundopash Jehovata sirvijcunata llaquichijcunata tucuchingapami Jehová Diosca paipa Reinota utilizanga (Sal. 94:22, 23; Is. 65:17). Bibliapica ninmi: “Casilla ali causaitaca, Taita Diosmi caramunga. Chashna aliguta causanataca, pipash na yachajui ushanalla cajpimi, cangunapaj shungutapash, yuyaicunatapash, Cristo Jesushuan shujlla tucushcamanda huacaichijunga” nishpa (Filip. 4:6, 7). Cai shimicuna pactarinataca tucui shunguhuanmi cripanchi.

17. Isaías 30:21​pi nishcashnaca ¿imashinata Jehová Diostaca uyai ushapanchi?

¹⁷ Cunanbica ¿imashinata Jehová Diostaca uyai ushapanchi? (Isaías 30:21, liingui). Jahuan cielomanda Jehová Dios parlajtaca na uyapanchichu. Shinapash Jehová Diosca Bibliahuanmi ñucanchitaca yachachin. Shinallata Jehovapa espiritu santo ayudajpimi ‘aliguta cazushpa mayordomoca’ publicaciongunahuan, uyangapaj grabashcacunahuan, internetpi videocunahuanmi ñucanchitaca yachachin (Luc. 12:42). Bibliamanda yachajungapaca ¿nachu ashtacata ayudacunata charipanchi?

18. Jehová Dios nishca shimicunaca ¿imashinata ñucanchicunataca ayudan?

¹⁸ Jesús cai alpapi cashpa Jehová Dios paita ima nishcataca na cunganachu capanchi. Chai shimicunaca Bibliapimi escribishca can. Chai shimicunami Diablopash, cai nali mundopash ñucanchita llaquichijpipash Jehová Dios chai llaquicunata ñalla tucuchinapi confiachun ayudan. Shinaca Jehová Diosta uyangapaj esforzaripashunchi. Shina rurashpaca cunanbipash, shamuj punllacunapipash llaquicunata aguantai ushashun. Bibliapica ninmi: “Na ñapash fiñarishpa Taita Dios munashcatalla rurashpami, ali shunguhuambacha causana canguichi. Chashna causashpami, pai carashami nishcataca japigringuichi” nishpa (Heb. 10:36).