1-2. а) Сар комунициринела сине о Јехова е манушенцар? б) Со ка дикха ки акаја статија?

О ЈЕХОВА бут мангела те комунициринел аменцар. Ко пурано време ов користинела сине пророкија, ангелија хем пле Чхаве, е Исусе, те шај о мануша те џанен со мислинела (Амос 3:7; Гал. 3:19; Отк. 1:1). Авдиве, комунициринела аменцар преку пло Лафи, и Библија. Ов денѓа аменге пло Лафи те шај те сикљова сар размислинела хем те хаљова лескере друмија.

² Кеда сине о Исус ки Пхув, о Јехова трин пути керѓа лафи таро небо. Те дикха со вакерѓа о Јехова, со сикљоваја таро лескере лафија хем сави корист иси амен таро адава.

3. Спрема Марко 1:9-11, со вакерѓа о Јехова кеда крстинѓа пе о Исус, хем кола важна чачипа сикљоваја таро акала лафија?

³ Ко Марко 1:9-11 пишинела баши прво прилика кеда о Јехова керѓа лафи таро небо. (Читин.) Ов вакерѓа: „Ту сиан мло мангло Чхаво! Ту кереа ман бахтало!“ Сигурно бут значинѓа е Исусеске кеда шунѓа пле Дадескоро гласо кова со уверинѓа ле кај мангела ле хем кај иси ле доверба ки лесте. Е Јеховаскере лафија сикавена трин важна чачипа башо Исус. Прво, о Исус тано е Девлескоро чхаво. Дујто, о Јехова мангела пле Чхаве. Хем трито, о Исус керела бахтало е Јехова. Те дикха подетално секова јекх лендар.

4. Ки која смисла о Исус ко јекх нево начин уло е Девлескоро чхаво кеда крстинѓа пе?

⁴ „Ту сиан мло... Чхаво!“ Англедер те авел ки Пхув, о Исус више сине Девлескоро Чхаво. Тегани, соске о Јехова  вакерѓа акала лафија? Акале лафенцар, о Јехова сикавѓа кај о однос лескере мангле Чхавеа, е Исусеа, тано менимо. Ки која смисла? Кеда крстинѓа пе, о Исус сине помазимо свети духоја. Адалеа ов уло Девлескоро Чхаво ко јекх нево начин. Ов тегани добинѓа и надеж кај ка иранел пе ко небо те шај те овел Цари хем Првосвештенико (Лука 1:31-33; Евр. 1:8, 9; 2:17). Адалеске, кеда крстинѓа пе о Исус о Јехова вакерѓа: „Ту сиан мло... Чхаво“ (Лука 3:22).

5. Сар шај те џа пало е Јеховаскоро пример кеда керела пе лафи башо мангипе хем охрабрување?

⁵ „Ту сиан мло мангло Чхаво!“ О Јехова денѓа аменге шукар пример адалеа со сикавѓа пло мангипе е Исусеске хем со фалинѓа ле (Јован 5:20). Амен да ваљани те трудина амен те фалина хем те охрабрина е јаверен. Кеда некој со мангаја ле сикавела аменге мангипе хем фалинела амен, тегани шукар осетинаја амен. Аѓаар, амаре пхраља да хем пхења ко собрание хем сарине ки фамилија осетинена пе шукар кеда сикаваја ленге мангипе хем охрабринаја лен. Кеда фалинаја е јаверен, кераја ленгири вера позорали хем поможинаја ленге верно те служинен е Јеховаске. Посебно о родителија ваљани те охрабринен пумаре чхавен. Кеда о родителија искрено фалинена пумаре чхавен хем сикавена ленге пло мангипе, о чхаве шукар напредујнена.

6. Соске шај те овел амен доверба ко Исус Христос?

⁶ „Ту кереа ман бахтало!“ Акале лафенцар о Јехова сикавѓа кај иси ле доверба кај о Исус верно ка керел лескири волја. Ако е Јехова сине ле доверба ко Исус, амен да ваљани те овел амен целосно доверба кај о Исус ка исполнинел са о ветувања е Јеховаскере (2. Кор. 1:20). Кеда размислинаја башо адава сар о Исус верно керѓа пле  Дадескири волја, сием панда поодлучна те сикљова лестар хем те џа пало лескоро пример. О Јехова тано уверимо кај амен да, сар група, понадари да ка сикљова таро лескоро Чхаво (1. Пет. 2:21).

7. Спрема Матеј 17:1-5, ки која прилика о Јехова керѓа лафи таро небо хем со вакерѓа?

⁷ Читин Матеј 17:1-5. И дујто прилика кеда о Јехова керѓа лафи таро небо сине кеда о Исус преобразинѓа пе. О Исус викинѓа е Петаре, е Јакове хем е Јоване те џан леа ки јекх учи планина. Адари, ола дикхле јекх впечатливо визија. Е Исусескоро муј светинѓа, а лескере шеја уле парне сар светлина. Тегани, појавинѓе пе дуј мануша — јекх лендар претставинела сине е Мојсее, а о јавер е Илија. Ола почминѓе те керен лафи е Исусеа башо лескоро мерибе хем воскресение. Иако о апостолија совена сине, кеда уштиле, ола дикхле адаја впечатливо визија (Лука 9:29-32). Пало адава, јекх облако со светинела учхарѓа лен хем шунѓе гласо таро облако — адава сине е Девлескоро гласо! Акава да пути о Јехова сикавѓа кај тано задоволно таро пло Чхаво хем сикавѓа леске пло мангипе адалеа со вакерѓа: „Акава тано мло мангло Чхаво, кова со керела ман бахтало!“ Ама, ки акаја прилика вакерѓа панда нешто: „Лесте шунен ле!“

8. Сар влијајнѓа и визија упро Исус хем лескере ученикија?

⁸ Акаја визија сикавѓа сави слава хем моќ ка овел е Исусе сар Цари ко е Девлескоро Царство. Сигурно о Исус сине бут охрабримо соске панда хари ваљани сине те овел мучимо хем мудардо. Преку акаја визија, о Јехова керѓа е апостоленгири да вера позорали. Акава поможинѓа ленге те овен спремна башо неволје со ка овен лен хем баши пхари бути која со ваљани сине те керен ла. Околу 30 берш пало адава, о апостол Петар пишинѓа баши акаја визија ко пло писмо, со сикавела кај панда шукар сетинела пе сине ки лате (2. Пет. 1:16-18).

9. Саве корисна советија денѓа о Исус пле учениконге?

⁹ „Лесте шунен ле!“ О Јехова јасно сикавѓа кај мангела те шуна о лафија лескере Чхавескере хем те применина лен. Башо со керѓа лафи о Исус кеда сине ки Пхув? Ов вакерѓа бут важна буќа! На пример, ко бут шукар начин сикавѓа пле следбеникон сар те проповединен о шукар хабери хем секогаш поттикнинела лен сине те ачховен духовно џангавде (Мат. 24:42; 28:19, 20). Исто аѓаар, о Исус поттикнинела лен сине те трудинен пе те керен е Девлескири волја хем те на откажинен пе (Лука 13:24). О Исус истакнинѓа кобор тано важно те манген пе машкар песте лескере следбеникија, те ачховен ко јекхипе хем те икерен лескере заповедија (Јован 15:10, 12, 13). О советија со денѓа о Исус пле учениконге сине бут важна хем корисна. Авдиве да адала советија тане корисна аменге!

10-11. Сар шај те сикава кај шунаја е Исусе?

¹⁰ О Исус вакерѓа: „Секој сој тано тари страна е чачипаскири, шунела мло гласо“ (Јован 18:37). Кеда трпинаја амен јекх јекхеа хем спремно простинаја јекх јекхеске, сикаваја кај шунаја лескоро гласо (Кол. 3:13; Лука 17:3, 4). Исто аѓаар, шунаја лескоро гласо кеда ревно проповединаја о шукар хабери хем ко шукар хем ко пхаро време (2. Тим. 4:2).

¹¹ О Исус вакерѓа: „Мле бакхре шунена мло гласо“ (Јован 10:27). Е Исусескере ученикија сикавена кај шунена лескоро гласо на само кеда шунена лескере лафија, него исто аѓаар кеда постапинена да спрема ленде. Ола на дозволинена о секирацие таро живото те лен ленгоро внимание  (Лука 21:34). Ленге тано бут важно те шунен е Исусе чак кеда аракхљовена ко бут пхаре ситуацие. На пример, несаве таро амаре пхраља издржинена физичка нападија таро противникија, јавера тане бут чороле, а несаве тане погодиме таро природна катастрофе. Иако доживинена са акава, ола ачховена верна е Јеховаске бизи разлика со ка овел. О Исус уверинела лен акале лафенцар: „Кас иси мле заповедија хем икерела лен, ов мангела ман. А кој мангела ман, ле ка мангел ле мло Дад“ (Јован 14:21).

12. Ко саво јавер начин сикаваја кај шунаја е Исусе?

¹² Иси панда јекх начин сар сикаваја кај шунаја е Исусе — аѓаар со соработинаја околенцар со чхивѓа лен те предводинен (Евр. 13:7, 17). Е Јеховаскири организација керѓа бут промене ко последна берша. На пример, сине менимо о состанок со икерела пе ко работна диве, користинаја неве методе проповедибаске, а исто аѓаар иси неве упатствија сар те градинен пе, те реновиринен пе хем те одржинен пе амаре дворане. Бут сием благодарна со о Јехова грижинела пе аменге хем водинела амен ко јекх мудро начин преку пли организација. Шај те ова сигурна кај о Јехова ка наградинел адава со трудинаја амен те шуна о водство тари организација.

13. Саве берекетија иси амен кеда шунаја е Исусе?

¹³ Ако шунаја са о поуке со сикавѓа амен о Исус, ка овен амен бут берекетија. О Исус ветинѓа пле учениконге кај лескере сикљојба ка ден ленге сила. Ов вакерѓа: „Ка овел тумен неви сила. Соске, мло јарем тано локхо те пхиравел пе хем шај те пхиравен адава со родава тумендар“ (Мат. 11:28-30). Е Девлескоро Лафи, коте сој вклучиме о штар евангелија башо е Исусескоро живото хем служба, дела аменге сила хем керела амен мудра (Пс. 19:7; 23:3). О Исус вакерѓа: „Бахтале тане окола со шунена е Девлескоро лафи хем икерена ле“ (Лука 11:28).

14-15. а) Спрема Јован 12:27, 28, која сине и трито прилика кеда о Јехова керѓа лафи таро небо? б) Соске е Јеховаскере лафија утешинѓе е Исусе хем денѓе ле сила?

¹⁴ Читин Јован 12:27, 28. Ко е Јованескоро евангелие тани пишими и трито прилика коте со керѓа лафи о Јехова таро небо. Некобор диве англедер те мерел, о Исус сине ко Ерусалим те славинел и Пасха. Ки адаја прилика ов вакерѓа: „Вознемиримо сиум“, пало адава ки молитва вакерѓа:  „Мо Дад, прославин тло анав!“ О Јехова одговоринѓа леске таро небо: „Прославинѓум мло анав хем палем ка прославинав ле!“

¹⁵ О Исус сине вознемиримо соске англи лесте сине бари одговорност — те ачховел верно е Јеховаске. О Исус џанела сине кај ка овел сурово камшикујмо хем мудардо (Мат. 26:38). Ама, леске сине најважно те прославинел пле Дадескоро анав. О Исус сине обвинимо кај керела лафи против о Девел хем бут сине секиримо кај лескоро мерибе ка анел лаџ е Јеховаске. Ама, о Јехова уверинѓа ле кај ка прославинел пло анав. Акава сигурно бут утешинѓа е Исусе хем денѓа леске сила те издржинел о муке со ка овен ле. Иако, ки акаја прилика веројатно само о Исус халило о лафија со вакерѓа лескоро Дад, о Јехова мангља акала лафија те овен пишиме ки Библија (Јован 12:29, 30).

16. Соске понекогаш шај сием секириме кај ка анел пе лаџ е Јеховаскере анавеске?

¹⁶ Исто сар о Исус, амен да шај секиринаја амен кај ка ана лаџ е Јеховаскере анавеске. Шај трпинаја неправда или сием вознемириме таро ховавне хаберија со ширинена лен о противникија баши аменде. Шај секиринаја амен кај асавке хаберија ка каљарен е Јеховаскоро анав хем лескере организацијакоро. Ко асавке моментија, амен да шај бут те утешинен амен о лафија со вакерѓа лен о Јехова е Исусеске. На ваљани претерано те секирина амен. Шај те ова сигурна кај „о мир таро Девел, кова сој упредер секоја мисла, ка аракхел [амаре] виле хем  [амаре] мисле преку о Исус Христос“ (Фил. 4:6, 7). О Јехова ка прославинел пло анав. Преку е Девлескоро Царство, ка поправинел секоја штета која со о Сатана хем акава свето керѓе ла лескере слугенге (Пс. 94:22, 23; Иса. 65:17).

17. Спрема Исаија 30:21, сар керела аменцар лафи о Јехова авдиве?

¹⁷ О Јехова панда комунициринела пле слугенцар. (Читин Исаија 30:21.) Точно, на шунаја лескоро гласо директно таро небо. Ама, ов денѓа пло Лафи, и Библија, хем преку лате сикавела амен. Исто аѓаар, е Јеховаскоро духо поможинела е верно хем разборито управителе те дел аменге духовно храна (Лука 12:42). Размислин кобор бут духовно храна добинаја авдиве — публикацие, статие ки амари интернет-страница, видеоклипија хем аудиоснимке таро амаре публикацие.

18. Сар е Девлескоро лафи керела позорали тли вера хем дела тут храброст?

¹⁸ Никогаш те на бистра о лафија со вакерѓа лен о Јехова пле Чхавеске џикоте сине ки Пхув. Е Девлескоро Лафи уверинела амен кај е Девле иси ле контрола упро буќа хем кај ов ка поправинел секоја штета која со о Сатана хем акава свето керѓе ла лескере слугенге. Адалеске, те ова одлучна шукар те шуна е Јеховаскоро гласо. Аѓаар успешно ка истрајна ко проблемија со иси амен авдиве хем ка ова спремна башо адава со аџикерела амен ки иднина. И Библија уверинела амен: „Ваљани туменге истрајност, те шај откеда ка керен е Девлескири волја, те добинен адава сој ветимо“ (Евр. 10:36).