1-2. a) Sar komunicirinela sine o Jehova e manušencar? b) So ka dikha ki akaja statija?

O JEHOVA but mangela te komunicirinel amencar. Ko purano vreme ov koristinela sine prorokija, angelija hem ple Čhave, e Isuse, te šaj o manuša te džanen so mislinela (Amos 3:7; Gal. 3:19; Otk. 1:1). Avdive, komunicirinela amencar preku plo Lafi, i Biblija. Ov dengja amenge plo Lafi te šaj te sikljova sar razmislinela hem te haljova leskere drumija.

² Keda sine o Isus ki Phuv, o Jehova trin puti kergja lafi taro nebo. Te dikha so vakergja o Jehova, so sikljovaja taro leskere lafija hem savi korist isi amen taro adava.

3. Sprema Marko 1:9-11, so vakergja o Jehova keda krstingja pe o Isus, hem kola važna čačipa sikljovaja taro akala lafija?

³ Ko Marko 1:9-11 pišinela baši prvo prilika keda o Jehova kergja lafi taro nebo. (Čitin.) Ov vakergja: „Tu sian mlo manglo Čhavo! Tu kerea man bahtalo!“ Sigurno but značingja e Isuseske keda šungja ple Dadeskoro glaso kova so uveringja le kaj mangela le hem kaj isi le doverba ki leste. E Jehovaskere lafija sikavena trin važna čačipa bašo Isus. Prvo, o Isus tano e Devleskoro čhavo. Dujto, o Jehova mangela ple Čhave. Hem trito, o Isus kerela bahtalo e Jehova. Te dikha podetalno sekova jekh lendar.

4. Ki koja smisla o Isus ko jekh nevo način ulo e Devleskoro čhavo keda krstingja pe?

⁴ „Tu sian mlo... Čhavo!“ Angleder te avel ki Phuv, o Isus više sine Devleskoro Čhavo. Tegani, soske o Jehova  vakergja akala lafija? Akale lafencar, o Jehova sikavgja kaj o odnos leskere mangle Čhavea, e Isusea, tano menimo. Ki koja smisla? Keda krstingja pe, o Isus sine pomazimo sveti duhoja. Adalea ov ulo Devleskoro Čhavo ko jekh nevo način. Ov tegani dobingja i nadež kaj ka iranel pe ko nebo te šaj te ovel Cari hem Prvosvešteniko (Luka 1:31-33; Evr. 1:8, 9; 2:17). Adaleske, keda krstingja pe o Isus o Jehova vakergja: „Tu sian mlo... Čhavo“ (Luka 3:22).

5. Sar šaj te dža palo e Jehovaskoro primer keda kerela pe lafi bašo mangipe hem ohrabruvanje?

⁵ „Tu sian mlo manglo Čhavo!“ O Jehova dengja amenge šukar primer adalea so sikavgja plo mangipe e Isuseske hem so falingja le (Jovan 5:20). Amen da valjani te trudina amen te falina hem te ohrabrina e javeren. Keda nekoj so mangaja le sikavela amenge mangipe hem falinela amen, tegani šukar osetinaja amen. Agjaar, amare phralja da hem phenja ko sobranie hem sarine ki familija osetinena pe šukar keda sikavaja lenge mangipe hem ohrabrinaja len. Keda falinaja e javeren, keraja lengiri vera pozorali hem pomožinaja lenge verno te služinen e Jehovaske. Posebno o roditelija valjani te ohrabrinen pumare čhaven. Keda o roditelija iskreno falinena pumare čhaven hem sikavena lenge plo mangipe, o čhave šukar napredujnena.

6. Soske šaj te ovel amen doverba ko Isus Hristos?

⁶ „Tu kerea man bahtalo!“ Akale lafencar o Jehova sikavgja kaj isi le doverba kaj o Isus verno ka kerel leskiri volja. Ako e Jehova sine le doverba ko Isus, amen da valjani te ovel amen celosno doverba kaj o Isus ka ispolninel sa o vetuvanja e Jehovaskere (2. Kor. 1:20). Keda razmislinaja bašo adava sar o Isus verno kergja ple  Dadeskiri volja, siem panda poodlučna te sikljova lestar hem te dža palo leskoro primer. O Jehova tano uverimo kaj amen da, sar grupa, ponadari da ka sikljova taro leskoro Čhavo (1. Pet. 2:21).

7. Sprema Matej 17:1-5, ki koja prilika o Jehova kergja lafi taro nebo hem so vakergja?

⁷ Čitin Matej 17:1-5. I dujto prilika keda o Jehova kergja lafi taro nebo sine keda o Isus preobrazingja pe. O Isus vikingja e Petare, e Jakove hem e Jovane te džan lea ki jekh uči planina. Adari, ola dikhle jekh vpečatlivo vizija. E Isuseskoro muj svetingja, a leskere šeja ule parne sar svetlina. Tegani, pojavingje pe duj manuša — jekh lendar pretstavinela sine e Mojsee, a o javer e Ilija. Ola počmingje te keren lafi e Isusea bašo leskoro meribe hem voskresenie. Iako o apostolija sovena sine, keda uštile, ola dikhle adaja vpečatlivo vizija (Luka 9:29-32). Palo adava, jekh oblako so svetinela učhargja len hem šungje glaso taro oblako — adava sine e Devleskoro glaso! Akava da puti o Jehova sikavgja kaj tano zadovolno taro plo Čhavo hem sikavgja leske plo mangipe adalea so vakergja: „Akava tano mlo manglo Čhavo, kova so kerela man bahtalo!“ Ama, ki akaja prilika vakergja panda nešto: „Leste šunen le!“

8. Sar vlijajngja i vizija upro Isus hem leskere učenikija?

⁸ Akaja vizija sikavgja savi slava hem mokj ka ovel e Isuse sar Cari ko e Devleskoro Carstvo. Sigurno o Isus sine but ohrabrimo soske panda hari valjani sine te ovel mučimo hem mudardo. Preku akaja vizija, o Jehova kergja e apostolengiri da vera pozorali. Akava pomožingja lenge te oven spremna bašo nevolje so ka oven len hem baši phari buti koja so valjani sine te keren la. Okolu 30 berš palo adava, o apostol Petar pišingja baši akaja vizija ko plo pismo, so sikavela kaj panda šukar setinela pe sine ki late (2. Pet. 1:16-18).

9. Save korisna sovetija dengja o Isus ple učenikonge?

⁹ „Leste šunen le!“ O Jehova jasno sikavgja kaj mangela te šuna o lafija leskere Čhaveskere hem te primenina len. Bašo so kergja lafi o Isus keda sine ki Phuv? Ov vakergja but važna bukja! Na primer, ko but šukar način sikavgja ple sledbenikon sar te propovedinen o šukar haberi hem sekogaš pottikninela len sine te ačhoven duhovno džangavde (Mat. 24:42; 28:19, 20). Isto agjaar, o Isus pottikninela len sine te trudinen pe te keren e Devleskiri volja hem te na otkažinen pe (Luka 13:24). O Isus istakningja kobor tano važno te mangen pe maškar peste leskere sledbenikija, te ačhoven ko jekhipe hem te ikeren leskere zapovedija (Jovan 15:10, 12, 13). O sovetija so dengja o Isus ple učenikonge sine but važna hem korisna. Avdive da adala sovetija tane korisna amenge!

10-11. Sar šaj te sikava kaj šunaja e Isuse?

¹⁰ O Isus vakergja: „Sekoj soj tano tari strana e čačipaskiri, šunela mlo glaso“ (Jovan 18:37). Keda trpinaja amen jekh jekhea hem spremno prostinaja jekh jekheske, sikavaja kaj šunaja leskoro glaso (Kol. 3:13; Luka 17:3, 4). Isto agjaar, šunaja leskoro glaso keda revno propovedinaja o šukar haberi hem ko šukar hem ko pharo vreme (2. Tim. 4:2).

¹¹ O Isus vakergja: „Mle bakhre šunena mlo glaso“ (Jovan 10:27). E Isuseskere učenikija sikavena kaj šunena leskoro glaso na samo keda šunena leskere lafija, nego isto agjaar keda postapinena da sprema lende. Ola na dozvolinena o sekiracie taro životo te len lengoro vnimanie  (Luka 21:34). Lenge tano but važno te šunen e Isuse čak keda arakhljovena ko but phare situacie. Na primer, nesave taro amare phralja izdržinena fizička napadija taro protivnikija, javera tane but čorole, a nesave tane pogodime taro prirodna katastrofe. Iako doživinena sa akava, ola ačhovena verna e Jehovaske bizi razlika so ka ovel. O Isus uverinela len akale lafencar: „Kas isi mle zapovedija hem ikerela len, ov mangela man. A koj mangela man, le ka mangel le mlo Dad“ (Jovan 14:21).

12. Ko savo javer način sikavaja kaj šunaja e Isuse?

¹² Isi panda jekh način sar sikavaja kaj šunaja e Isuse — agjaar so sorabotinaja okolencar so čhivgja len te predvodinen (Evr. 13:7, 17). E Jehovaskiri organizacija kergja but promene ko posledna berša. Na primer, sine menimo o sostanok so ikerela pe ko rabotna dive, koristinaja neve metode propovedibaske, a isto agjaar isi neve upatstvija sar te gradinen pe, te renovirinen pe hem te održinen pe amare dvorane. But siem blagodarna so o Jehova grižinela pe amenge hem vodinela amen ko jekh mudro način preku pli organizacija. Šaj te ova sigurna kaj o Jehova ka nagradinel adava so trudinaja amen te šuna o vodstvo tari organizacija.

13. Save bereketija isi amen keda šunaja e Isuse?

¹³ Ako šunaja sa o pouke so sikavgja amen o Isus, ka oven amen but bereketija. O Isus vetingja ple učenikonge kaj leskere sikljojba ka den lenge sila. Ov vakergja: „Ka ovel tumen nevi sila. Soske, mlo jarem tano lokho te phiravel pe hem šaj te phiraven adava so rodava tumendar“ (Mat. 11:28-30). E Devleskoro Lafi, kote soj vklučime o štar evangelija bašo e Isuseskoro životo hem služba, dela amenge sila hem kerela amen mudra (Ps. 19:7; 23:3). O Isus vakergja: „Bahtale tane okola so šunena e Devleskoro lafi hem ikerena le“ (Luka 11:28).

14-15. a) Sprema Jovan 12:27, 28, koja sine i trito prilika keda o Jehova kergja lafi taro nebo? b) Soske e Jehovaskere lafija utešingje e Isuse hem dengje le sila?

¹⁴ Čitin Jovan 12:27, 28. Ko e Jovaneskoro evangelie tani pišimi i trito prilika kote so kergja lafi o Jehova taro nebo. Nekobor dive angleder te merel, o Isus sine ko Erusalim te slavinel i Pasha. Ki adaja prilika ov vakergja: „Voznemirimo sium“, palo adava ki molitva vakergja:  „Mo Dad, proslavin tlo anav!“ O Jehova odgovoringja leske taro nebo: „Proslavingjum mlo anav hem palem ka proslavinav le!“

¹⁵ O Isus sine voznemirimo soske angli leste sine bari odgovornost — te ačhovel verno e Jehovaske. O Isus džanela sine kaj ka ovel surovo kamšikujmo hem mudardo (Mat. 26:38). Ama, leske sine najvažno te proslavinel ple Dadeskoro anav. O Isus sine obvinimo kaj kerela lafi protiv o Devel hem but sine sekirimo kaj leskoro meribe ka anel ladž e Jehovaske. Ama, o Jehova uveringja le kaj ka proslavinel plo anav. Akava sigurno but utešingja e Isuse hem dengja leske sila te izdržinel o muke so ka oven le. Iako, ki akaja prilika verojatno samo o Isus halilo o lafija so vakergja leskoro Dad, o Jehova manglja akala lafija te oven pišime ki Biblija (Jovan 12:29, 30).

16. Soske ponekogaš šaj siem sekirime kaj ka anel pe ladž e Jehovaskere anaveske?

¹⁶ Isto sar o Isus, amen da šaj sekirinaja amen kaj ka ana ladž e Jehovaskere anaveske. Šaj trpinaja nepravda ili siem voznemirime taro hovavne haberija so širinena len o protivnikija baši amende. Šaj sekirinaja amen kaj asavke haberija ka kaljaren e Jehovaskoro anav hem leskere organizacijakoro. Ko asavke momentija, amen da šaj but te utešinen amen o lafija so vakergja len o Jehova e Isuseske. Na valjani preterano te sekirina amen. Šaj te ova sigurna kaj „o mir taro Devel, kova soj upreder sekoja misla, ka arakhel [amare] vile hem  [amare] misle preku o Isus Hristos“ (Fil. 4:6, 7). O Jehova ka proslavinel plo anav. Preku e Devleskoro Carstvo, ka popravinel sekoja šteta koja so o Satana hem akava sveto kergje la leskere slugenge (Ps. 94:22, 23; Isa. 65:17).

17. Sprema Isaija 30:21, sar kerela amencar lafi o Jehova avdive?

¹⁷ O Jehova panda komunicirinela ple slugencar. (Čitin Isaija 30:21.) Točno, na šunaja leskoro glaso direktno taro nebo. Ama, ov dengja plo Lafi, i Biblija, hem preku late sikavela amen. Isto agjaar, e Jehovaskoro duho pomožinela e verno hem razborito upravitele te del amenge duhovno hrana (Luka 12:42). Razmislin kobor but duhovno hrana dobinaja avdive — publikacie, statie ki amari internet-stranica, videoklipija hem audiosnimke taro amare publikacie.

18. Sar e Devleskoro lafi kerela pozorali tli vera hem dela tut hrabrost?

¹⁸ Nikogaš te na bistra o lafija so vakergja len o Jehova ple Čhaveske džikote sine ki Phuv. E Devleskoro Lafi uverinela amen kaj e Devle isi le kontrola upro bukja hem kaj ov ka popravinel sekoja šteta koja so o Satana hem akava sveto kergje la leskere slugenge. Adaleske, te ova odlučna šukar te šuna e Jehovaskoro glaso. Agjaar uspešno ka istrajna ko problemija so isi amen avdive hem ka ova spremna bašo adava so adžikerela amen ki idnina. I Biblija uverinela amen: „Valjani tumenge istrajnost, te šaj otkeda ka keren e Devleskiri volja, te dobinen adava soj vetimo“ (Evr. 10:36).