1-2. (a) Sar o Jehova vačeri e manušencar? (b) So ka dikha ko akava članko?

O JEHOVA mangela te vačeri e manušencar. Ko purano vreme, ov peklje mislija vačerdža e manušendže prekalo prorokija, anđelija hem prekalo poklo Čhavo, o Isus Hrist (Am. 3:7; Gal. 3:19; Puč. 1:1). Ama, avdije ov amencar vačeri prekalo poklo Lafi, i Biblija. Prekalo late amen šaj te sikljova sar ov razmislini hem šaj te haljova oljese postupkija.

² Dži o Isus hine ki Phuv, o Jehova trin puča vačerdža e manušencar kotar nebo. Ajde te dikha so o Jehova vačerdža, so šaj odoljestar te sikljova hem sar amendže koristini odova so ov phendža.

3. Premalo okova so pisini ko Marko 1:9-11, so o Jehova phendža ked o Isus krstindža pe hem kola buča odoljeja hine potvrdime?

³ I prvo situacija ki koja o Jehova vačerdža kotar nebo pisimi tani ko Marko 1:9-11. (Čitinen.) Ov phendža: „Tu hijan mo manglo Čhavo, tu radujineja man!“ E Isuse sigurno pogodindža ano vilo ked šundža so oljeso Dad mangela lje hem so isi lje poverenje upro oljeste! E Jehovase lafija potvrdindže trin važna buča kotar Isus. Sar prvo, o Isus tano oljeso Čhavo. Sar dujto, o Jehova mangela pe Čhave. Sar trito, o Isus radujindža e Jehova. Akana ka dikha svako kotar akala trin buča.

4. Sar o Isus ked krstindža pe ulo e Devljeso čhavo ko jekh posebno način?

⁴ „Tu hijan mo Čhavo.“ Akalje lafenca, o Jehova mothodža so ov hem oljeso manglo Čhavo, o Isus, kotar odova momenti tane ko jekh posebno odnos. Angljeder so o  Isus alo ki Phuv, ov već hine e Devljeso Čhavo. Ama, ked krstindža pe, ov hine pomazimo e sveto duhoja hem adžahar ulo e Devljeso Čhavo ko jekh posebno način. Tegani o Devel dindža lje nada so ka irini pe ko nebo, kuri ka ovel e Devljeso pomazimo Kraljo hem Prvosvešteniko (Luka 1:31-33; Jevr. 1:8, 9; 2:17). Odoljese ked o Isus krstindža pe, oljeso Dad hine lje šukar razlog te phenel: „Tu hijan mo Čhavo“ (Luka 3:22).

5. Sar šaj hem amen sar o Jehova te ohrabrina hem te mothova mangipe?

⁵ „Tu hijan [...] manglo.“ Ked vačeri pe kotar ohrabrenje hem te mothovi pe mangipe, e Jehovaso primer setinčeri amen kobor tano važno amen te ova asavke premalo avera (Jov. 5:20). Sarinendže amendže avela šukar ked džiko kas amen mangaja mothovi poklo mangipe premalo amende hem pohvalini amen sebepi odova so čeraja. Isto adžahar, amare phraljendže hem phenjendže ki skupština hem amare porodicače valjani amaro mangipe hem ohrabrenje. Ked pohvalinaja averen, amen zorjačeraja oljengi vera hem pomožinaja ljendže te služinen verno e Jehovase. Posebno tano važno o dad hem i daj te hrabrinen pe čhaven. Ked iskreno pohvalinena ljen hem mothovena ljendže po mangipe odova anela šukar rezultatija.

6. Sose šaj te ovel amen poverenje upro Isus Hrist?

⁶ „Tu radujineja man.“ Akala lafija mothovena so o Jehova hine uverimo so o Isus verno ka čerel pe Dadesi volja. Odoljese so o Jehova isi lje asavko poverenje upro po Čhavo, hem amen šaj te ova sigurna so o Isus ka ispunini sa e Jehovase obećanja (2. Kor. 1:20). Ked  razmislinaja kotar e Isuseso primer, pana pobuter hijam odlučna te sikljova oljestar hem te dža palo oljese korakija. Isto adžahar, hem o Jehova tano uverimo so oljeso narodo niked na ka prestajini te sikljol kotar oljeso Čhavo (1. Petr. 2:21).

7. Premalo okova so pisini ko Matej 17:1-5, ki koja situacija o Jehova vačerdža kotar nebo hem so phendža?

⁷ Čitinen Matej 17:1-5. I dujto situacija ki koja šundilo e Jehovaso glaso kotar nebo, hine ked o Isus menindža poklo izgled anglo peklje učenikija. O Isus vičindža e Petare, e Jakove hem e Jovane te džan oljeja ki jekh bari gora. Odothe dikhlje jekh neobično vizija. E Isuseso muj „sjajindža sar kham“, a oljese šeja ulje tane sjajna sar i svetlost. Duj manuša, kola predstavindže e Mojsije hem e Ilija, vačerdže e Isuseja ando odova so valjani te merel hem paljem te irini pe ko dživdipe. Iako akalje trine apostolendže but suča pe, on hine tane potpuno džangavde dži hine odija vizija anglo oljenge jačha (Luka 9:29-32). Palo odova, „učhardža ljen jekh svetlo oblako“ hem „šundilo glaso ando oblako“. Odova hine e Devljeso glaso! Isto sar ked krstindža pe o Isus, o Jehova hem akana phendža so isi lje poverenje upro po čhavo hem so mangela lje: „Akava tano mo manglo Čhavo, kova radujini man!“ Ama, akava puti phendža pana diso: „Šunen olje!“

8. Sar i vizija utičindža upro Isus hem upro oljese učenikija?

⁸ Akija vizija manglja te mothovi e Isusesi slava hem moć, koja ka ovel lje sar kralj ko e Devljeso Kraljevstvo. E Isuse odova sigurno ohrabrindža hem dindža lje snaga te izdržini o muke hem o pharo meribe. Isto adžahar, i vizija zorjačerdža oljese učenikon hem pripremindža ljen odoljese so oljengi vera ka ovel ispitimi hem so adžičeri ljen bari buti. Koro 30 berš palo odova, o apostol Petar vačerdža kotar akija vizija, so mothovi so odija vizija pana hine ljese ki godi (2. Petr. 1:16-18).

9. Kola korisna savetija o Isus dindža pe učenikondže?

⁹ „Šunen olje.“ O Jehova jasno mothodža kobor tano oljese važno te šuna odova so oljeso Čhavo vačeri hem te čera odova. Sostar o Isus vačerdža dži hine ki Phuv? O Isus vačerdža kotar but buča kola rodena amari pažnja. Na primer, mangipaja sikadža peklje učenikon sar te vačeren o šukar haberi hem uvek podsetindža ljen ko odova te oven džangavde (Mat. 24:42; 28:19, 20). Isto adžahar, podstaknindža ljen te oven samopožrtvovana hem niked te na odustajinen (Luka 13:24). O Isus istaknindža kobor tano važno oljese učenikija te mangen jekh jekhe, te složinen pe jekh jekheja hem te ičeren pe ko oljese zapovestija (Jov. 15:10, 12, 13). O savetija kola dindža pe učenikondže čače hine korisna! Odola savetija hem avdije tane but važna.

10-11. Sar šaj te mothova so šunaja e Isuse?

¹⁰ O Isus phendža: „Svako koj tano ki strana ando čačipe šunela moklo glaso“ (Jov. 18:37). Amen mothovaja so šunaja oljeso glaso ked podnosinaja jekh jekhe hem ked spremno oprostinaja jekh jekhese (Kol. 3:13; Luka 17:3, 4). Isto adžahar, amen mothovaja so šunaja oljeso glaso ked revno vačeraja o šukar haberi „ko šukar vreme hem ko lošno vreme“ (2. Tim. 4:2).

¹¹ O Isus phendža: „Meklje bakre šunena mo glaso“ (Jov. 10:27). E Hristese učenikija mothovena so šunena e Isuseso  glaso na samo adžahar so obratinena pažnja ko odova so ov phenela, nego hem adžahar so čerena odova so ov vačeri. Na mukhena oljenge brige but te opteretinen ljen (Luka 21:34). Oljendže tano but važno te šunen e Isusese zapovestija, čak hem ked isi ljen bare problemija. But amare phralja isi ljen bare pharipa, sar soj tane te napadinen ljen o protivnikija, baro čororipe hem o prirodna katastrofe. Iako isi ljen sa odola pharipa, on tane verna e Jehovase hem spremna tane te čeren bilo savi žrtva. Oljendže o Isus dindža po lafi: „Ko isi lje meklje zapovestija hem ičeri ljen, ov mangela man. A ko mangela man, olje ka mangel mo Dad“ (Jov. 14:21).

12. Sar šaj pana te mothova so šunaja e Isuse?

¹² Isi pana jekh način sar te mothova so šunaja e Isuse – te sarađujina okoljencar koljen ov čhidža te predvodinen maškaro amende (Jevr. 13:7, 17). Ko palune nekobor berša e Devljesi organizacija andža razna promene, sar soj tane o neve alatija hem metode ki služba, sar te izgledini amaro sastanko ko radno dive hem o način ko kova gradinaja, renovirinaja ja održinaja amare Dvorane. Sigurno but ceninaja sa odola uputstvija kola tane but šukar čerde hem dinde ko pravo vreme. Amen šaj te ova sigurna so o Jehova ka blagoslovini odova so daja sa amendar te šuna odola uputstvija.

13. Sose tano amare šukaripase te šuna e Isuse?

¹³ Amare šukaripase tano te šuna e Isusese lafija. O Isus uverindža pe učenikon so oljese lafija ka den ljen nevi snaga. Ov phendža: „Ka ovel tumen nevi snaga. Sose moklo jaram tano lokho te akhari pe hem odova so rodava tumendar nane pharo“ (Mat. 11:28-30). E Devljeso Lafi, ko kova tane hem o štar jevanđelja kotar e Isuseso dživdipe hem i služba, duhovno zorjačeri amen hem dela amen mudrost (Ps. 19:7; 23:3). O Isus phendža: „Bahtalje tane okola so šunena e Devljeso lafi hem ičerena lje!“ (Luka 11:28).

14-15. (a) Premalo Jovan 12:27, 28, koja hine i trito situacija ki koja šundilo e Jehovaso glaso kotar nebo? (b) Sar e Jehovase lafija utešindže hem zorjačerdže e Isuse?

¹⁴ Čitinen Jovan 12:27, 28. Ko Jovaneso jevanđelje tani pisimi i trito situacija ki koja šundilo e Jehovaso glaso. Nekobor dive angljeder te merel, o Isus  hine ko Jerusalim te proslavini piklji paluni Pasha. Tegani ov phendža: „Akana tani mi duša uznemirimi [...] Mo Dad, proslavin toklo nav.“ O Jehova odgovorindža ljese: „Proslavindžum lje hem palje ka proslavinav lje.“

¹⁵ O Isus hine uznemirimo odoljese so hine svesno kobor bari odgovornost hine lje – valjandža te ačhol verno e Jehovase. Ov džandža so but ka maren lje hem so oljeso meribe ka ovel but pharo (Mat. 26:38). Oljese hine najvažno te proslavini pe Dadeso nav. Hine optužimo so vačeri protiv e Devljesi sila hem darandilo so oljeso meribe ka ladžačeri e Devljeso nav. E Jehovase lafija sigurno dindže e Isusese snaga! Uverindže lje so e Jehovaso nav ka ovel proslavimo. Odova so oljeso Dad phendža but utešindža e Isuse hem pripremindža lje odoljese so adžičeri lje. Iako jedino ov šaj haljilo so značinena odola lafija, o Jehova dindža te pisini pe odova so ov vačerdža sebepi amaro (Jov. 12:29, 30).

16. Ko kola situacije šaj te brinina amen so e Devljeso nav ka ladžačeri pe?

¹⁶ Sar o Isus, hem amen šaj te brinina amen odoljese so ladžačeri pe e Jehovaso nav. Šaj amen hijam žrtve kotar nepravde. Ja šaj hijam uznemirime sebepi o hovajbe kova o protivnikija širinena amendar. Šaj razmislinaja odoljestar sar odova mothovi e Jehova hem oljese organizacija. E Jehovase lafija šaj tegani te  utešinen amen. Na valjani but te brinina amen. Amen šaj te ova sigurna ko odova so pisini ki Biblija: „E Devljeso mir, kova tano upreder i svako misao, ka arakhi tumare vilje hem tumare mislija prekalo o Isus Hrist“ (Fil. 4:6, 7). O Jehova ka čerel oljeso nav uvek te ovel proslavimo. Prekalo poklo Kraljevstvo, ov ka popravini sa i šteta koja o Beng hem oljeso sveto čerdže oljese verno slugendže (Ps. 94:22, 23; Isa. 65:17).

17. Premalo Isaija 30:21, sar o Jehova avdije vačeri amencar?

¹⁷ O Jehova hem avdije vačeri e manušencar. (Čitinen Isaija 30:21.) Čače, amen avdije na ka šuna e Devljeso glaso kotar nebo. Ama ov dindža amen po Lafi, i Biblija, kuri tane pisime oljese uputstvija. Uzo odova, o Jehova prekalo po duho brinini pe o „verno [...] nastojniko“ te del oljese slugendže duhovno hrana (Luka 12:42). Čače isi amen but duhovno hrana, sar soj tane štampime hem elektronska publikacije hem filmija!

18. Sar e Jehovase lafija hrabrinena hem zorjačerena amari vera?

¹⁸ Ajde te ičera ki godi sa odova so o Jehova phendža dži oljeso Čhavo hine ki Phuv. E Devljese lafija, kola tane pisime ki Biblija, uverinena amen so o Jehova sa kontrolišini hem so ka popravini i šteta koja o Beng hem oljeso sveto čerdže. Ajde hem amen te ova odlučna te šuna pažljivo e Jehovaso glaso. Odova ka pomožini amen te ikljova ko krajo e problemencar ko amaro dživdipe. I Biblija setinčeri amen: „Valjani tumendže i istrajnost, te šaj, ked ka čeren e Devljesi volja, te ljen odova soj tano tumendže obećimo“ (Jevr. 10:36).