1-2. a) Xana Yehovha a vulavulise kuyini ni vhanu? b) I yini leswi hi taka swi kambisisa ka nhloko-mhaka leyi?

YEHOVHA awa swi zrandzra ku vulavula na hine. A nkameni lowu hundzriki, a tizrise vaprofeta, tintsrumi ni N’wanakwe, Yesu Kriste, akuva a hi tivisa ku zrandzra kwakwe. (Am 3:7; Ga 3:19; Mpf 1:1) Namunhla, a vulavula na hine hi ku tizrisa Zritu dzrakwe, ku nga Bibele. A hi nyike dzrone akuva hi kota ku dondzra mimpimiso yakwe ni ku twisisa tindlela takwe.

² Loko Yesu a li la misaveni, Yehovha a vulavule na a li tilweni makhambi mazrazru. A hi kambisiseni leswi Yehovha a swi hlayiki ka makhambi wolawo, leswi hi nga swi dondzraka mazritwini yakwe ni ndlela leyi hi pfunekaka ha yone hi leswi a swi hlayiki.

3. Hi laha hi dondzraka ha kone ka Marka 1:9-11, xana Yehovha a te yini loko Yesu a babatisiwa, nakone hi tini timhaka tizrazru ta lisima leti mazritu wolawo ma ti tiyisiki?

³ Marka 1:9-11 yi hi byela hi ta khambi dzra ku sungula ledzri Yehovha a vulavuliki na a li tilweni. (Dondzra.) A te: ‘U N’wananga, lwe wa ku zrandzriwa, lwe ndzri tsrhavisaka hi wene.’ Handle ka ku ganaganeka, Yesu a khumbiwe mbilu hi ku yingela zritu dzra Tatana wakwe na a mu byela leswaku awa mu zrandzra nakone awa mu dumba! Mazritu ya Yehovha ma tiyise timhaka tizrazru ta lisima mayelanu na Yesu. Ya ku sungula, Yesu i N’wana wa Yehovha. Ya wubidzri, Yehovha a zrandzra N’wanakwe. Ya wuzrazru, Yehovha awa nyonxa hi N’wanakwe. A hi kambisiseni timhaka letizrazru ha hombe.

4. Hi byini wuxaka byimpswha lebyi Yesu a nhingeniki ka byone na Xikwembu Nkulukumba a ku babatisiweni kwakwe?

⁴ ‘U N’wananga.’ Hi mazritu lawa, Yehovha a kombe leswaku N’wanakwe lwa zrandzriwaka, Yesu, a a nhingene ka wuxaka byimpswha na Yene. Loko Yesu a ha li tilweni, a a li mun’we wa vana va moya va Xikwembu Nkulukumba. Nambitanu, a ku babatisiweni kwakwe, a totiwe hi moya wa ku xwenga. Hi nkama  lowo, Xikwembu Nkulukumba a kombise leswaku Yesu, swanga N’wanakwe lwa totiwiki, kutani a a ni dumbo dzra ku tlhelela a tilweni leswaku a va Hosi ni Muprista Lwenkulu lwa bekiwiki ha Xikwembu Nkulukumba. (Lk 1:31-33; Hb 1:8, 9; 2:17) Xileswo, a ku babatisiweni ka Yesu, Tatana wakwe a a ni xivangelo lexi twalaka xa ku hlaya leswi: ‘U N’wananga.’​—Lk 3:22.

5. Xana hi nga xi tekelelisa kuyini xikombiso xa Yehovha a mhakeni ya ku komba van’wana leswaku ha va zrandzra nakone ha nyonxa ha vone?

⁵ ‘Wene u. . .lwe wa ku zrandzriwa.’ Xikombiso xa Yehovha a mhakeni ya ku kombisa lizrandzru ni ku nyonxa loku a a li na kone hi N’wanakwe xi hi dzrimuxa leswaku hi fanela ku djula mikhandlu ya ku kutxa van’wana. (Yh 5:20) Ha nyonxa loko mhunu lweyi hi mu bekelaka lisima a hi komba leswaku awa hi zrandzra a tlhela a hi kulungela hi ku yentxa mintxhumu leyinene. Hi ku fanana, vamakwezru vaxinuna ni vaxisati a bandleni ni swizro swa ndangu wezru va djula hi va zrandzra hi tlhela hi va kutxa. Loko hi kulungela van’wana, hi va tiyisa lipfumelo nakone hi va pfuna ku tizrela Yehovha hi ku dumbeka. Ngopfu-ngopfu vapswele ku djuleka va kutxa vanavu. Loko vapswele va kulungela vanavu na swi pfela mbilwini va tlhela va va komba lizrandzru, va va pfuna ku kula ha hombe.

6. I yini lexi hi yentxaka hi mu dumba Yesu Kriste?

⁶ ‘Ndzri tsrhavisa hi wene.’ Mazritu lawa ma komba leswaku Yehovha a a dumba leswaku Yesu a a ta yentxa ku zrandzra ka Tatana wakwe hi ku dumbeka. Yehovha a mu dumba hi ndlela leyo N’wanakwe, kutani na hine hi ku fanana hi nga dumba hi ku helela leswaku Yesu a ta hetisisa swidumbiso swa Yehovha hi ku dumbeka. (2Ko 1:20) Loko hi kambisisa xikombiso xa Yesu, hi kone hi taka navela ku dondzra mahanyela yakwe ni ku mu yetisela. Hi ku fanana, Yehovha awa dumba leswaku, swanga ntlawa, malandzra yakwe ma ta ya mahlweni hi ku dondzra ka N’wanakwe.​—1Pe 2:21.

7. Hi ku ya hi Mattheo 17:1-5, a ve ka khambi dzrini laha Yehovha a vulavuliki na a li tilweni, nakone a te yini?

⁷ Dondzra Mattheo 17:1-5. A khambi dzra wubidzri ledzri Yehovha a vulavuliki na a li tilweni ku ve loko Yesu ‘a ndzrulutiwa’. Yesu a a zrambe va Petro, Yakob na Yohane ku mu heleketa a nhaveni ya ku leha. Loko va tlhasile, va vone xivoniso xa ku hlamalisa. Liso dzra Yesu dzri phatime dzri ku mpaa ni swiyambalo swakwe swi ndzruluke swi ku keti-keti. Vhanu vabidzri, lava yimelaka Moxe na Eliya, va sungule ku khanela na Yesu hi lifu dzrakwe ni ku pfuxiwa kwakwe, leswi a swi li kusuhi ni ku yentxeka. Nambi leswi vapostola vakwe lavazrazru a va ‘bindzriwa hi vuzrongo’, va vone xivoniso lexi xa ku hlamalisa loko va sisimukile. (Lk 9:29-32) Va game va funeketiwa hi tlavi, va va va twa zritu ledzri humaka a tlavini ledzro​—a a li zritu dzra Xikwembu Nkulukumba! Ku fana ni le ku babatisiweni ka Yesu, Yehovha a kombise leswaku a a nyonxa hi N’wanakwe nakone a a mu zrandzra, hi mazritu lawa: ‘Lwe hi n’wananga lwa zrandzriwaka, lweyi ndzri tsrhavaka ha yene.’ Kambe ka khambi ledzri, Yehovha a yengetele a ku: “Mu yingelani.”

8. Xana xivoniso xa ku ndzrulutiwa ka Yesu xi mu khumbise kuyini yene ni vadondzrisiwa vakwe?

⁸ Xivoniso xi nyikele muvono wa ku phatima ka Yesu a nkameni lowu taka ni ntamu wakwe swanga Hosi ya Mfumu wa Xikwembu Nkulukumba. Handle ka ku ganaganeka, Kriste a kutxekile a va a kuma ntamu wa ku tiyisela ka tinxanisa ni lifu dzra ku vavisa leswi a swi mu yimelile. Xivoniso xi tlhele xi tiyisa lipfumelo dzra vadondzrisiwa ni ku va nyika xixixi xa ku tiyisela loko wudumbeki byavu byi dzringiwa, ni ku heta malembe na va tizra hi nkhinkhi. Loko ku khalute kolomu ka 30 wa malembe, mupostola Petro a vulavule hi xivoniso xa ku ndzrulutiwa ka Yesu, ku komba leswaku a a ha xi dzrimuka ha hombe xivoniso lexo.​—2Pe 1:16-18.

9. Hi xini xilayu lexi pfunaka lexi Yesu a nga xi nyika vadondzrisiwa vakwe?

⁹ “Mu yingelani.” Yehovha a swi beke livaleni leswaku a djula hi yingiseta mazritu ya N’wanakwe hi va hi ma landzra. Xana Yesu a te yini loko a li la misaveni? A hlaye mintxhumu yinyingi leyi hi fanelaka ku yi yingiseta! Hi xikombiso, hi lizrandzru, a dondzrise valandzreli vakwe ndlela ya ku zrezra madzrungula lamanene, a tlhela a va dzrimuxa hi ku phindha-phindha leswaku va hiteka minkama hinkwayu. (Mt 24:42; 28:19, 20) Handle ka leswo, a va tsratsriye akuva va tikazrata hi ntamu swinene, a tlhela a va kutxa akuva va nga kazrali. (Lk 13:24) Yesu a gongondzrele leswaku ku djuleka kuva vadondzrisiwa vakwe va zrandzranana, va hanya hi ku twanana va tlhela va hlayisa swileleto swakwe. (Yh 15:10, 12, 13) Hakunene xilayu lexi Yesu a xi nyikiki vadondzrisiwa vakwe xi pfuna swinene! Xilayu lexo xa ha tizra ni namunhla swanga hi leswi a xi tizrisa xiswone loko Yesu a xi nyike vadondzrisiwa vakwe.

10-11. Xana hi nga kombisa kuyini leswaku ha mu yingiseta Yesu?

¹⁰ Yesu a te: ‘Mani na mani lwa nga wa xihlayelamfuzri a yingiseta zritu dzranga.’ (Yh 18:37) Hi komba leswaku ha dzri yingiseta zritu dzrakwe loko hi ya mahlweni hi ku ‘byatsrhana ni ku dzrivalelana milandzru’. (Kl 3:13; Lk 17:3, 4) Handle ka leswo, hi komba leswaku ha dzri yingiseta zritu dzrakwe hi ku zrezra madzrungula lamanene hi ku hiseka ‘hi nkama lowu fanekeliki ni hi nkama lowu nga fanelikiki’.​—2Tm 4:2.

¹¹ Yesu a te: ‘A tihamba tanga ti yingela zritu dzranga.’ (Yh 10:27) Valandzreli va Kriste va komba leswaku va yingiseta Yesu ku nge ntsena hi ku zreyela mazritu yakwe ndleve kambe  ni hi ku ma yentxa. A va hingeletiwi hi ‘minhlatiyelo ya wutomi’. (Lk 21:34) Ku hambana ni swoswo, a wuton’wini byavu va zrangisa ku yingiseta swileleto swa Yesu, nambi loko va li swiyin’wini swa ku kazrata. Ku tala ka vamakwezru va tiyisela hansi ka mindzringo leyikulu, ku patsra ni ku hlaseliwa hi vakaneti, wusiwana lebyikulu ni timhangu ta ntumbuluku. Va tsrhama na va dumbekile ka Yehovha, nambi ko ba lexi dumaka. Yesu a va nyika xidumbiso lexi liki: ‘Lweyi a nga ni milawu yanga, a mi bekisaka, hi yene lweyi a ndzri zrandzraka; kambe lweyi a ndzri zrandzraka, a ta zrandzriwa hi Tatana.’​—Yh 14:21.

12. Hi yini ndlela yin’wana leyi hi nga kombaka ha yone leswaku ha mu yingiseta Yesu?

¹² Ndlela yin’wana leyi hi nga kombaka ha yone leswaku ha mu yingiseta Yesu i ku tizrisana ha hombe ni lava a va bekiki kuva va hi zrangela. (Hb 13:7, 17) Ku ni mintxhumu yinyingi leyi nhlengeletanu ya Xikwembu Nkulukumba yi nga yi lulamisa ka malembe lawa ma ha ka ku khaluta. Yin’wana ya kone i switizro swimpswha ni tindlela timpswha ta ku zrezra, xivumbeko xa ntlhanganu wezru wa xikazri ka vhiki ni mayakela yezru ya Tiyindlu ta Mfumu ni ndlela ya ku ti pfuxeta ni ku ti hlayisa. Hakunene ha wu tlangela nkongomiso lowunene ni lowu kombisaka lizrandzru! Hi nga tiyiseka leswaku Yehovha a ta tovokisa minzamu yezru ya ku landzra nkongomiso wa nhlengeletanu lowu tlhasaka hi nkama lowunene.

13. Hi wani mabindzru ya ku yingiseta Yesu?

¹³ Ha pfuneka hi ku yingiseta tindondzro hinkwatu ta Yesu. Yesu a dumbise vadondzrisiwa vakwe leswaku tindondzro takwe a ti ta va pepisa. A te: ‘Mi ta kuma ku wisa a mimoyeni yenu; hikusa a mpinga wanga wa byatsrheka, na wo ntsrhwalu wanga wa vevuka!’ (Mt 11:28-30) Zritu dzra Xikwembu Nkulukumba, ledzri patsraka mune wa Mabuku ya Evhangeli lama dzrungulaka ta wutomi ni wutizreli bya Yesu, dzra hi pepisa, dzri pfuxeta ntamu wezru wa moya nakone dzra hi tlhazrihisa. (Ps 19:7; 23:3) Yesu a te: ‘Va ni ndjombo lava yingelaka zritu dzra Xikwembu Nkulukumba, va va va dzri bekisa.’​—Lk 11:28.

14-15. a) Hi ku ya hi Yohan 12:27, 28, hi dzrini khambi dzra wugamu ledzri Yehovha a vulavuliki na a li tilweni? b) Ha yini mazritu ya Yehovha ma mu mbuwetelile Yesu ma va ma mu nyika ntamu?

¹⁴ Dondzra Yohan 12:27, 28. A Evhangeli dzra Yohane dzri hi dzrungulela ta khambi dzra wuzrazru ledzri Yehovha a vulavuliki na a li tilweni. Na ku sale masikunyana akuva a dlawa, Yesu a ye a Yerusalema akuva a ya gamisa ku tlangela Paska. A te: ‘Moya wanga wa  txhuka-txhuka.’ A game a ku: ‘Tatana, twalisa vito dzraku!’ Ku twale nhlamulo ya Tatana wakwe, lwa nga vulavula na a li tilweni a ku: ‘Ndzri dzri twalisile, ndzri ta tlhela ndzri dzri twalisa.’

¹⁵ Yesu a a kazratekile hi mhaka ya ntsrhwalu lowukulu wa mfanelo lowu a a li na wone wa ku tsrhama na a dumbekile ka Yehovha. Yesu a a swi tiva leswaku a a ta kumana ni ku bukuteliwa ni ku dlawa hi ndlela ya tihanyi. (Mt 26:38) A henhla ka hinkwaswu, Yesu a a djula ku twalisa vito dzra Tatana wakwe. Yesu va mu zrwexe nandzru wa leswaku a a sandzre Xikwembu Nkulukumba, kutani a a txhava leswaku lifu dzrakwe a dzri ta zrukisa Xikwembu Nkulukumba. Xileswo, vona ndlela leyi Yesu a tiyisiwiki ha yone hi mazritu ya Yehovha! A zrulisiwe mbilu hi ku tiva leswaku vito dzra Yehovha a dzri ta twalisiwa. Mazritu ya Tatana wakwe nakunene ma mu mbuwetele ngopfu Yesu ma va ma mu nyika ntamu wa ku lavisana ni tinxanisa leti a ti mu yimelile. Nambi leswi Yesu a nga ha vaka a li yene ntsena lweyi a twisisiki mazritu ya Tatana wakwe a xikazri ka xitsrhungu hi nkama wolowo, Yehovha a yentxe hinkwaswu leswaku mazritu Yakwe ma tsraliwa akuva ma pfuna hine hinkwezru.​—Yh 12:29, 30.

16. Ha yini minkama yin’wana hi txhava leswaku vito dzra Xikwembu Nkulukumba dzri nga zrukisiwa?

¹⁶ Ku fana na Yesu, na hine hi nga ha va na hi txhava ku zrukisa vito dzra Yehovha. Kumbexana, ku fana na Yesu, hi yentxeliwa wubihi. Kumbe hi nga ha va na hi txhukisiwe hi timhaka ta mandzrendzre leti vakaneti va fambaka va ti hangalasa mayelanu na hine. Hi nga ha yanakanya hi xizruko lexi mandzrendzre wolawo ma xi tisaka ka vito dzra Yehovha ni nhlengeletanu  yakwe. Ka minkama ya ku fana ni leyo, mazritu ya Yehovha ma hi txhavelela ngopfu. A swi djuli kuva hi hlatiyela ku tlula mpimu. Hi nga tiyiseka leswaku ‘a ku zrula ka Xikwembu Nkulukumba, loku tlulaka ku yanakanya hinkwaku, ku ta bekisa timbilu tezru ni miyanakanyu yezru ku Kriste Yesu.’ (Flp 4:6, 7) Yehovha a nga na ku tsrandzreka ku twalisa vito dzrakwe. Hi kola ka Mfumu wakwe, a ta lungisa hinkwaswu leswi Sathana ni misava yakwe yi swi honeliki malandzra ya ku dumbeka ya Yehovha.​—Ps 94:22, 23; Eza 65:17.

17. Hi ku twanana na Ezaya 30:21, xana Yehovha a vulavulisa kuyini na hine namunhla?

¹⁷ Yehovha a ha vulavula na hine ni namunhla. (Dondzra Ezaya 30:21.) Hi swone leswaku a hi mu yingeli Xikwembu Nkulukumba a vulavula na a li tilweni. Nambitanu, a hi lulamisele Zritu dzrakwe ledzri tsraliwiki, ku nga Bibele, ledzri a hi nyikaka nkongomiso wakwe ha dzrone. Ku yengetela kolanu, moya wa Yehovha wu susumetela ‘mulaviseli wa yindlu lwe wa ku dumbeka’ ku ya mahlweni a phamela malandzra yakwe swakuda. (Lk 12:42) Vona ku tala ka swakuda swa moya leswi hi swi yamukelaka hi switizro swa ku gandlisiwa ni swa internet, ma-vídeo ni ma-áudio!

18. Xana mazritu ya Yehovha ma tiyisa lipfumelo dzraku ma va ma ku kutxa hi ndlela yini?

¹⁸ A hi dzrimukeni mazritu lawa Yehovha a ma hlayiki loko N’wanakwe a li la misaveni! Ingiki mazritu ya Xikwembu Nkulukumba hi ntshima, lama tsraliwiki a Bibeleni, ma nga hi nyika ku dumba ka leswaku Yehovha a ni ntamu henhla ka hinkwaswu ni leswaku a ta lungisa ntxhumu wini na wini lowu honiwiki hi Sathana ni misava yakwe ya ku biha. Nakone ingiki hi nga tiyimisela ku yingiseta ha hombe Zritu dzra Yehovha. Loko hi yentxa tanu, hi ta kota ku tiyiselela swizralanganya swini na swini leswi hi tlhanganaka na swone swoswi ni leswi swa ha buyaka. Bibele dzri hi dzrimuxa leswi: ‘Swa djuleka n’wi va ni ku tiyisela, akuva, ku ta ku loko n’wi yentxi ku zrandzra ka Xikwembu Nkulukumba, n’wi kuma leswi n’wi dumbisiwiki swone.’​—Hb 10:36.