1-2. (a) Yihowa mannu ooso hasaawisannohu hiittoonniiti? (b) Konni birxichira maa ronseemmo?

 YIHOWA soqqamaasinesi hasaawisa baxanno. Isi hundi yannara, hedosi kulate masaalaano, sokkaasinenna Beettosi Yesuusi Kiristoosa horoonsiꞌrino. (Amo. 3:7; Gal. 3:19; Aju. 1:1) Xaa yannara Qaalisi Qullaawu Maxaafi widoonni hasaawisannonke. Isi Qullaawa Maxaafa uyinonkehu hedosinna doogosi ronseemmo gedeeti.

² Yesuusi uullate aana noo yannara, Yihowa iima heeꞌre sase hige coyiꞌrino. Hanni Yihowa tenne yannara mayinoro, isi coyiꞌrinorinni maa ronseemmoronna coyiꞌrinori ninke kaaꞌlannonkehu hiittoonniitiro laꞌno.

3. Maarqoosi 1:9-11 kultanno garinni, Yesuusi cuuami yannara Yihowa mayyee coyiꞌrino? Yihowa coyiꞌrinori hiikkonne halaale huwanteemmo gede assannonke?

³ Maarqoosi 1:9-11 Yihowa iima heeꞌre coyiꞌrinote umi yannare kultanno. (Qummeeshsha nabbawi.) Isi, “Hagiirsiisattoehu baxeemmo Beettiꞌya ateeti” yiino. Yesuusi Annisi baxannositanna ammanannosita kulisi woyite mageeshshi geeshsha hagiidhinoro heda dandaatto! Yihowa coyiꞌrinori Yesuusi daafira sase halaale huwanteemmo gede assannonke. Umihunni, Yesuusi Maganu Beettooti. Layinkihunni, Yihowa Beettosi baxanno. Sayikkihunni, Yihowa Beettisi hagiirsiisannosita coyiꞌrino. Hanni xa konne sasenka coye seekkine xiinxallino.

4. Yesuusi cuuami yannara Maganu ledo hiikkonne haaro jaalooma kalaqiꞌrino?

⁴ “Beettiꞌya ateeti.” Yihowa togo yee coyiꞌrasi, muxxe Beettisi Yesuusi Isi ledo haaro jaalooma kalaqiꞌrinota leellishshanno.  Yesuusi iima noo yannara, Maganunniho ayyaanaamo beettooti. Cuuami yannara kayinni qullaawu ayyaaninni buuramino. Hatte yannara Yihowa, Yesuusi galagale iimira haꞌre Maganu Mangiste Mootenna Kakkalaanote Biilo ikkate hexxo noosita buuxisino. (Luq. 1:31-33; Ibi. 1:8, 9; 2:17) Konni daafira, Yesuusi cuuami yannara Annisi, “Beettiꞌya ateeti” yaasi garankolla.—Luq. 3:22.

5. Mannaho baxille leellishatenna jawaachishate Yihowa lawishsha harunsa dandiineemmohu hiittoonniiti?

⁵ “Baxeemmo beettiꞌya.” Yihowa Beettosi baxannotanna isi hagiirsiisinosita coyiꞌrasi, ninkeno woloota jawaachinsheemmo faro hasiꞌneemmo gede assitannonke. (Yoh. 5:20) Mittu ayirrinseemmo manchi baxille leellishannonkenna assinoommohu danchu coyiꞌra galatannonke woyite tashshi yaannonke. Hatteente gede, songote noo roduuwinkera baxille leellishanna insa jawaachisha hasiissannonke. Woloota galatanke, ammanansa kaajjitannonna Yihowara ammanante soqqantanno gede kaaꞌlitannonsa. Roorenkanni annuwunna amuuwu oosonsa jawaachisha hasiissannonsa. Annuwunna amuuwu oosonsa godowinta galatansanna baxille leellishansa oosonsa lattanno gede assitanno.

6. Yesuusi Kiristoosa addaxxa dandiineemmohu mayiraati?

⁶ “Hagiirsiisattoe.” Yihowa hatto yaasi, Yesuusi ammaname Annisi fajjo wonshannota ammanannota leellishshanno. Yihowa Beettosi ammanino; ninkeno Yesuusi Yihowa eino qaale woꞌmunni woꞌma ammaname wonshannota addaxxa dandiineemmo. (2 Qor. 1:20) Yesuusi lawishsha hendeemmo woyite, albinni roore isiwiinni rosatenna faalesi haꞌrate murciꞌneemmo. Yihowa Yesuusa  ammanannonte gede, soqqamaasinesino gaamote deerrinni Beettisiwiinni rosa agurtannokkita ammananno.—1 Phe. 2:21.

7. Maatewoosi 17:1-5 kultanno garinni, Yihowa iima heeꞌre coyiꞌrinohu hiitte yannaraati? Hatte yannara isi mayyiino?

⁷ Maatewoosi 17:1-5 nabbawi. Yihowa iima heeꞌre layinkimeeshsho coyiꞌrinohu, Yesuusira “danisi wole ikki” yannaraati. Yesuusi, Pheexiroosi, Yaiqoobinna Yohaannisi ledo mitto jawa ilaala haꞌrino. Hakkiicho, insa mitte dhagge ikkitanno ajuuja laꞌino. Yesuusi albi arrishshote gede ikke xawino, hattono uddanosi waajjo qoffe ikkite caabbichimma xabbino. Musenna Eeliyaasi riqiwannohu lamu manni, Yesuusi reyannotanna reyotenni kaꞌꞌannota coyiꞌra hanaffino. Hakka woyite, sasenti soqqamaasine goxxe nooha ikkirono, goxichunni baqqi yitu yannara tenne dhagge ikkitanno ajuuja laꞌino. (Luq. 9:29-32) Hakkiinni waraꞌa yee xawanno gomichi golinonsa, hattono gomichu giddonni Maganu huuro macciishshitino! Yihowa Yesuusi cuuami yannara assinonte gede, xaano Beettosi baxannotanna isi hagiirsiisinosita xawisino; Yihowa “Hagiirsiisannoehu baxeemmo Beettiꞌya konneeti” yiino. Tenne yannara kayinni Yihowa “Isi [Yesuusi] yaannota macciishshe” yiino.

8. Ajuuja Yesuusanna rosaanosi kaaꞌlitinonsahu hiittoonniiti?

⁸ Tini ajuuja Yesuusi Maganu Mangiste Moote ikkanno woyite afiꞌranno ayirrinyenna wolqa leellishshannote. Tini, Yesuusi qarranna shetto adhanno woyitira jawaantenna wolqa ikkitinositi dihuluullissannote. Qoleno tini ajuuja, Yesuusi rosaanora ammanansa kaajjishshino; hattono ammanamansa fonqolannoriranna albillitte loossannohu lowo loosira jawaante ikkitinonsa. Mitu 30 diri gedensaanni, soqqamaasinchu Pheexiroosi Yesuusi dani soorramino yannare coyiꞌrino; tini isi hatte ajuuja hawinokkita leellishshanno.—2 Phe. 1:16-18.

9. Yesuusi harunsaanosira hiittenne kaajja amaale uyino?

⁹ “Isi yaannota macciishshe.” Yihowa Beettisi rosiisinore macciishshinammoranna isira hajajammammora hasiꞌrannota xawisino. Yesuusi uullate aana noo yannara maa rosiisino? Yesuusi ninke harunsa hasiissannonkeha lowo roso rosiisino! Lawishshaho, isi rosaanosira dancha duduwo dudubbanno gara rosiisinonsa; hattono baqqi yite agadhitanno gede duucha hige qaagiissinonsa. (Mat. 24:42; 28:19, 20) Qoleno hegere heeshsho afiꞌrate sharrantannonna hexxo mudhitannokki gede jawaachishinonsa. (Luq. 13:24) Yesuusi, harunsaanosi insa insanaawa baxantanno gede, mittimmansa agadhite heedhanno gedenna hajajosi harunsitanno gede luphi asse kulinonsa. (Yoh. 15:10, 12, 13) Addanko, Yesuusi uyino amaale kaajjate! Tini amaale hunda heeꞌrino mannano ikko xaa yannara noo manna kaaꞌlitannote.

10-11. Yesuusi rosiisinore macciishshinanni heeꞌnoommota leellisha dandiineemmohu hiittoonniiti?

¹⁰ Yesuusi togo yiino: “Halaalu widoonni uurrinohu qaaleꞌya macciishshanno.” (Yoh. 18:37) “Kiꞌne kiꞌneneewa koffi yitinoonni coye baala cincatenni agurre” yitanno amaale harunsineemmoha ikkiro, Yesuusi huuro macciishshinanni heeꞌnoommo. (Qol. 3:13; Luq. 17:3, 4) Qoleno ‘injiinkerono injaa hooginkerono’ dancha duduwo diinaggaambe dudumbeemmoha ikkiro, Yesuusi yaannore macciishshinanni heeꞌnoommo.—2 Xim. 4:2.

¹¹ Yesuusi, “Geꞌreewiꞌya huuroꞌya macciishshanno” yiino. (Yoh. 10:27) Yesuusi harunsaano isi huuro macciishshitannohu isi rosiisinore wodanaho wodhite calla ikkikkinni  isi rosiisinore harunsiteeti. Isi harunsaano ‘tenne alame heeshshora yaaddanni’ hedonsa billaallitanno gede diassidhanno. (Luq. 21:34) Hatteentenni, insa qarru iillannonsa yannara nafa, heeshshonsa giddo Yesuusi hajajo balaxisiissanno. Batinyu roduuwinkera buutote qarri iillanni noonsa; insa giddo mitoota gibbannonkeri xiibbannonsa, angate anje amaddinonsa, hattono kalaqamu dano iillitannonsa. Iillannonsa fonqoli ikki geeshshiha ikkirono, insa Yihowara ammanantino. Yesuusi insa togo yee sheshifachishino: “Hajajoꞌya adhannohunna wonshannohu baxannoeho; ane baxannoha Anniꞌyano baxannosi.”—Yoh. 14:21.

12. Yesuusa macciishshinanni heeꞌnoommota leellisha dandiineemmoti wole doogo hiittenneeti?

¹² Yesuusa macciishsha dandiineemmoti wole doogo, Maganu manni mereero albisa ikkite soqqantanno gede shoommoonni roduuwi ledo buusame loosate. (Ibi. 13:7, 17) Maganu dirijjite muli diri kawa lowo coye woyyeessitino; lawishshaho, soqqanshote horoonsiꞌneemmo hayyonna uduunnicho, lamalate gambooshshe, Gambooshshu Addaraashuwa minnanninna gatamarranni gara woyyeessinoonni. Yihowa dirijjite baxillunninna seekkite hedde uyitannonke biddishsha lowo geeshsha naandeemmo! Yihowa dirijjitesi uyitannonke biddishsha harunsate sharrammeemmo sharro maassiꞌrannota dihuluullammeemmo.

13. Yesuusa macciishsha kaaꞌlitannonkehu hiittoonniiti?

¹³ Yesuusi rosiisinore baalare macciishshanke kaaꞌlitannonke. Yesuusi harunsaanosira, rosiisanno rosi jawaachishannoha ikkinota buuxisinonsa. Isi togo yiino: “Lubboꞌnera fooliishsho afidhinanni. Qambariꞌya diayirranno; duhiꞌyano shotaho.” (Mat. 11:28-30) Yesuusi heeshshonna soqqanshore kultannoti shoole Wongeeluwano ikko woꞌmu Maganu Qaali sheshifachishannonke, ayyaanaamittenke jawaachishanno, hattono hayyoota ikkineemmo gede assannonke. (Far. 19:7; 23:3) Yesuusi, “Maassantinori Maganu qaale macciishshite hajajantannoreeti” yiino.—Luq. 11:28.

14-15. (a) Yohaannisi 12:27, 28 kultanno garinni, Yihowa iima heeꞌre sayikkimeeshsho coyiꞌrinohu hiitte yannaraati? (b) Yihowa coyiꞌrinori Yesuusira jawaantenna wolqa ikkinosi yineemmohu mayiraati?

¹⁴ Yohaannisi 12:27, 28 nabbawi. Yohaannisi Wongeeli Yihowa sayikkimeeshsho iima  heeꞌre coyiꞌrino yannare kulanno. Yesuusi reyara boodu barri albaanni Faasika ayirrisate Yerusaalame haꞌrino. Isi, “Lubboꞌya shettino” yiino. Hakkiinni isi “Annaꞌya, suꞌmakki ayirrisi!” yee huucciꞌrino. Annisi iima heeꞌre, “Suꞌmaꞌya ayirrisoommo; ledeno ayirriseemmo” yee qolino.

¹⁵ Yesuusi Yihowara ammaname heeꞌra hasiissannosita wodanchino daafira, lowo geeshsha yaadino. Yesuusi gannannisitanna qarrinse shinannisita afino. (Mat. 26:38) Baalunkunni roore, Yesuusi Annisi suꞌmi ayirranno gede assa hasiꞌrino. Yesuusi Magano xonino yine kassansoonnisi daafira, reyosi Yihowa suꞌmi mishamanno gede assitanno yee yaadino. Konni daafira, Yihowa coyiꞌrinori Yesuusa sheshifatanno gede assinositi egennantinote! Isi Yihowa suꞌmi ayirrannota huwatino. Yihowa coyiꞌrinori, Yesuusa jawaachishinosi, hattono iillannosi qarra qeele saꞌꞌanno gede wolqa ikkinosi. Hatte yannara Yihowa coyiꞌrinore huwatinohu Yesuusa calla ikkara dandaanno; ikkollana, Yihowa tini hedo ninkerano kaaꞌlitannonketa afino daafira, Qullaawu Maxaafi giddo borreessinanni gede assino.—Yoh. 12:29, 30.

16. Mite yannara Maganu suꞌmi mishamanno yine yaandammora dandiineemmohu mayiraati?

¹⁶ Ninkeno Yesuusinte gede, Yihowa suꞌmi mishamara dandaanno yine yaandeemmoha ikkara dandaanno. Yesuusi gede ninkerano taashsho xeꞌinori iillanni noonkeha ikkara  dandaanno. Woy gibbannonkeri ninke daafira kapho coyidhanno woyite, lowo geeshsha dadillinammora dandiineemmo. Insa coyidhanno kaphi, Yihowanna dirijjitesi mishantanno gede assanno yine hendeemmoha ikkara dandaanno. Tenne yannara, Yihowa Yesuusira coyiꞌrinori lowo geeshsha sheshifachishannonke. Konnira quwa saꞌne yaada dihasiissannonke. “Mannu hedora aleenni ikkinohu Maganu keeri, Kiristoosi Yesuusinni wodanaꞌnenna hedoꞌne” agarannota huluullantinoonte. (Fil. 4:6, 7) Yihowa suꞌmisi ayirranno gede assanno. Isi Mangistesi widoonni Sheexaanunna alamesi Maganu soqqamaasinera iillishshanno qarra baala hunanno.—Far. 94:22, 23; Isa. 65:17.

17. Isayaasi 30:21 kultanno garinni, Yihowa xaa yannara hasaawisannonkehu hiittoonniiti?

¹⁷ Yannankerano Yihowa hasaawisanni noonke. (Isayaasi 30:21 nabbawi.) Yihowa iima heeꞌre coyishiishannonke yine dihendeemmo. Ikkollana isi Qaalisi Qullaawu Maxaafi widoonni biddishsha aannonke. Qoleno Yihowa ayyaani “ammanamino soqqamaanchi” Maganu mannira sagale qixxeessanno gede kakkayisannosi. (Luq. 12:42) Yihowa dirijjite attammoonnita, viidiyotenninna huurotenni qaddaꞌnoonnita hattono webisayitete widoonni falakkinota ayyaanaamittete sagale shiqishshannonke.

18. Yihowa coyiꞌrinori, ammanakki kaajjisharanna worba ikkatto gede kaaꞌlahera dandaannohu hiittoonniiti?

¹⁸ Yihowa Beettisi uullate aana heeꞌreenna coyiꞌrinore qaango! Qullaawu Maxaafi giddo borreessinoonniti Yihowa coyiꞌrino qaalla, isi wolqara aleenni ikkinori nookkitanna Sheexaanunna busha alamesi abbitino qarra baala feye hunannota addaxxineemmo gede assitannonke. Qoleno woꞌmante yannara Yihowa huuro macciishshate murciꞌno! Hatto assinummoro, xaano ikko albillitte iillannonkeha aye geeshshi fonqolo qeela dandiineemmo. Qullaawu Maxaafi togo yee jawaachishannonke: “Maganu hedinore wonshitine aaꞌnera hexxo uyinoꞌne coye afiꞌrate, cincitine agadha hasiissannoꞌne.”—Ibi. 10:36.