1-2. (a) Ua faapefea ona fesootaʻi mai Ieova i tagata? (e) O le ā o le a tatou iloiloina i lenei mataupu?

E FIAFIA Ieova e fesootaʻi mai iā i tatou. I aso ua mavae, sa ia faaaogāina perofeta, agelu, ma lona Alo o Iesu Keriso e faailoa mai ai lona finagalo. (Amo. 3:7; Kala. 3:19; Faaa. 1:1) Ae i aso nei, ua fesootaʻi mai Ieova e ala mai i lana Afioga le Tusi Paia, ina ia mafai ai ona tatou iloa ona manatunatuga ma malamalama i ona ala.

² A o iai Iesu i le lalolagi, sa faatolu ona fetalai mai Ieova mai i le lagi. Seʻi o tatou iloiloina na fetalaiga a Ieova, ma vaai po o le ā e tatou te aʻoaʻoina mai ai, faapea aogā e tatou te maua ai.

3. E tusa ai ma le Mareko 1:9-11, o le ā le fetalaiga na faia e Ieova ina ua papatiso Iesu, ma o ā upu moni ua faamautinoa mai ai?

³ Faitau le Mareko 1:9-11. O le taimi muamua lea na fetalai mai ai Ieova iā Iesu mai i le lagi. Na fetalai o ia: “O loʻu Atalii pele oe, ua malie loʻu loto iā te oe.” Maʻeu le pāʻia o le loto o Iesu a o faalogo atu i le siʻufofoga o lona Tamā, o loo faailoa mai lona alofa ma lona maufaatuatuaina o ia! O lenei fetalaiga a Ieova ua faamautinoa mai ai ni upu moni se tolu e faatatau iā Iesu. Muamua, o Iesu o le Alo o le Atua. Lua, e alofa Ieova i lona Alo. Tolu, e finagalo malie Ieova i lona Alo. Seʻi o tatou iloiloina nei upu moni.

4. O le ā se vala fou na faailoa mai e faatatau i le faiā a Ieova ma lona Alo i le taimi o lona papatisoga?

⁴ ʻO loʻu Atalii oe.’ O nei upu ua faailoa mai ai e Ieova se  vala fou e faatatau i la laʻua faiā ma lona Alo pele. A o iai Iesu i le lagi, sa avea o ia ma atalii agaga o Ieova. Peitaʻi, i le taimi o lona papatisoga na faauuina ai o ia i le agaga paia. I lenā taimi, na faailoa mai ai e le Atua ua maua e lona Atalii faauuina o Iesu, le faamoemoe e toe foʻi ai i le lagi e avea ma Tupu tofia ma Ositaulaga Sili a le Atua. (Luka 1:31-33; Epe. 1:8, 9; 2:17) O lea, ua tatou manino la i le māfuaaga na fetalai ai Ieova i le taimi o le papatisoga o Iesu: ʻO loʻu Atalii oe.’​—Luka 3:22.

5. E faapefea ona tatou mulimuli i le faaaʻoaʻoga a Ieova o le faaalia mai o lona alofa ma lona finagalo malie?

⁵ ʻO le Atalii pele oe.’ O le faaaʻoaʻoga a Ieova o le faailoa mai o lona alofa ma lona finagalo malie, ua faamanatu mai ai le tāua o le saʻili o avanoa e faalaeiauina ai isi. (Ioa. 5:20) E faalaeiauina i tatou pe a faaalia mai e se tasi e tatou te manatu mamafa i ai le alofa iā i tatou, ma faamālō mai mo mea lelei e tatou te faia. I se tulaga talitutusa, e manaʻomia foʻi e uso ma tuafāfine i le faapotopotoga ma sui o o tatou aiga lo tatou alofa ma faalaeiauga. Pe a tatou faamālō atu i isi, o le a faamalosia ai lo latou faatuatua ma fesoasoani iā i latou ina ia auauna faamaoni iā Ieova. E matuā tāua i mātua le faalaeiau atu i a latou fanau. Pe a avatu e mātua se faamālō faamaoni ma faaalia le māfana i a latou fanau, o le a mafai ona atiaʻe ai lo latou mautinoa.

6. Aiseā e mafai ai ona tatou maufaatuatuaina Iesu Keriso?

⁶ “Ua malie loʻu loto iā te oe.” O nei upu ua faaalia mai ai sa mautinoa e Ieova e mafai e Iesu ona faamaoni i le faataunuuina o Lona finagalo. Talu ai sa maufaatuatuaina e Ieova lona Alo, e mafai foʻi la ona  tatou mautinoa atoatoa o le a faataunuuina ma le faamaoni e Iesu folafolaga uma a Ieova. (2 Kori. 1:20) O lo tatou mafaufau i le faaaʻoaʻoga a Iesu, o le a uunaʻia atili ai i tatou ina ia aʻoaʻo e faatatau iā te ia ma mulimuli i ona tulaga aao. E pei ona mautinoa Ieova iā Iesu, e faapena foʻi lona mautinoa e mafai e ana auauna uma ona mulimulituʻi i le faaaʻoaʻoga a lona Alo.​—1 Pete. 2:21.

7. E tusa ai ma le Mataio 17:1-5, o le ā le isi taimi na fetalai mai ai Ieova mai i le lagi, ma o le ā lana fetalaiga?

⁷ Faitau le Mataio 17:1-5. O le taimi lona lua na fetalai mai ai Ieova mai i le lagi, o le taimi na “liua” faavavega ai Iesu. Sa valaaulia e Iesu Peteru, Iakopo, ma Ioane ina ia latou ō i luga o se mauga maualuga. A o latou iai i inā, sa latou vaaia ai se faaaliga mataʻina. Na matuā pupula fofoga o Iesu ma ua paʻepaʻemā ona ofu. Na faaali mai ni tamāloloa se toʻalua e foliga e pei o Mose ma Elia, o loo talanoa ma Iesu e faatatau i lona maliu ma lona toetū. E ui sa ʻmomoegase’ nei aposetolo, ae na latou feala ina ua latou vaaia lenei faaaliga mataʻina. (Luka 9:29-32) Na sosoo ai ma le ufitia o i latou i se ao pupula, ma latou faalogoina ai le siʻufofoga o le Atua mai i le ao, ua faapea mai: “O loʻu Atalii pele lenā, o lē ua malie i ai loʻu loto.” Peitaʻi, i lenei taimi ua faapea atili mai Ieova: “Ia faalogo iā te ia.”

8. O le ā le aafiaga iā Iesu ma ona soo o le faaaliga sa latou vaaia?

⁸ O lenā faaaliga ua aumaia ai se faaataga o le mamalu ma le mana o Iesu i le taimi e avea ai o ia ma Tupu o le Malo o le Atua. E mautinoa le matuā faalaeiauina ma le faamalosia ai o Iesu, a o lata i le taimi o ona puapuaga ma lona maliu tigā. O lenā foʻi faaaliga na atiaʻe ma faamalosia ai le faatuatua o soo o Iesu mo tofotofoga o le a latou fesagaʻia, faatasi ai ma le galuega tele o le a latou faia. I le pe ā ma le 30 tausaga mulimuli ane, na toe taʻua ai e le aposetolo o Peteru lenā faaaliga, e iloa ai sa ia manatua pea lenā faaaliga mataʻina.​—2 Pete. 1:16-18.

9. O ā fautuaga aogā na avatu e Iesu i ona soo?

⁹ “Ia faalogo iā te ia.” Na faailoa manino mai e Ieova e finagalo o ia ina ia tatou faalogo i fetalaiga a lona Alo ma usitaʻi i ai. O ā nisi o fetalaiga a Iesu sa faia a o iai i le lalolagi? E tele ana fetalaiga tāua. O se faaaʻoaʻoga, na ia aʻoaʻoina ona soo ina ia talaʻia le tala lelei, ma faamanatu atu pea iā i latou ina ia mataala. (Mata. 24:42; 28:19, 20) Na ia faalaeiauina foʻi i latou ina ia faamalolosi ma finafinau, ma aua le faavaivai. (Luka 13:24) Na faamamafa atu e Iesu i ona soo le manaʻomia ona alofa o le tasi i le isi, ia faatumau le autasi, ma tausia ana poloaʻiga. (Ioa. 15:10, 12, 13) E ese le aogā o fautuaga na avatu e Iesu i ona soo, ma o loo aogā pea i aso nei.

10-11. E faapefea ona iloa o loo tatou faalogo i le siʻufofoga o Iesu?

¹⁰ Na fetalai Iesu: “O i latou uma e fiafia i le upu moni e faalogo i loʻu leo.” (Ioa. 18:37) E iloa o loo tatou faalogo i le siʻufofoga o Iesu pe a “faaauau ona onosaʻi le tasi i le isi, ma ia fefaamagaloaʻi ma le lotoatoa.” (Kolo. 3:13; Luka 17:3, 4) E iloa foʻi o loo tatou faalogo i le leo o Iesu, e ala i le maelega i le talaʻia o le tala lelei “i taimi e sologa lelei ai, ma taimi e lē sologa lelei ai.”​—2 Timo. 4:2.

¹¹ Na fetalai Iesu: “E faalogo aʻu mamoe i loʻu leo.” (Ioa. 10:27) E iloa le faalogo o soo o Iesu i lona siʻufofoga, e ala i le uaʻi atu  i ana fetalaiga ma taumafai e faatatau. E latou te lē tosina ese ona o le “popole i mea o le olaga nei.” (Luka 21:34) Nai lo o lea, e faamuamua i o latou olaga le usitaʻia o faatonuga a Iesu, e ui lava i tulaga faigatā. O le toʻatele o o tatou uso o loo feagai ma tofotofoga ogaoga e pei o osofaʻiga mai i tagata tetee, o le matuā matitiva, ma mala faalenatura. E ui i lea, o loo latou faamaoni pea iā Ieova. O le faamautinoaga lenei a Iesu mo i latou: “O lē ua iai aʻu poloaʻiga ma tausi i ai, o ia lea e alofa mai iā te aʻu. O lē e alofa mai iā te aʻu, e alofa foʻi loʻu Tamā iā te ia.”​—Ioa. 14:21.

12. O le ā se isi auala e iloa ai o loo tatou faalogo i le siʻufofoga o Iesu?

¹² O se isi auala lenei e iloa ai o loo tatou faalogo iā Iesu: O le galulue soosootauʻau ma ē ua tofia e taʻimua iā i tatou. (Epe. 13:7, 17) Ua aumaia e le faalapotopotoga a le Atua le tele o suiga i tausaga talu ai nei, e pei o meafaigaluega ma metotia fou mo le faiva, le auala e faia ai sauniga amata o le vaiaso, ma le auala e fausia, faafou, ma faatumauina ai le lelei o Maota mo Sauniga. Maʻeu lo tatou talisapaia o nei taʻitaʻiga alofa ma lava saunia! E mautinoa e faamanuia Ieova i a tatou taumafaiga, pe a tatou mulimuli i nei taʻiala mai i le faalapotopotoga ua aumaia i le taimi tatau.

13. O ā aogā o le faalogo i le siʻufofoga o Iesu?

¹³ E tatou te maua aogā mai i le faalogo atu i mea uma ua aʻoaʻoina ai i tatou e Iesu. Na faamautinoa atu e Iesu i ona soo e faafouina i latou i ana aʻoaʻoga, e ala i le fetalai atu: ʻOna faafouina ai lea o outou. Auā e avegofie laʻu amo, ma e māmā foʻi laʻu avega.’ (Mata. 11:28-30) O le Afioga a le Atua e aofia ai tala i Evagelia e fā e faatatau i le soifuaga ma le faiva a Iesu, e mafai ona faafouina ma faamalosia ai i tatou faaleagaga, ma tatou atamamai ai. (Sala. 19:7; 23:3) Na fetalai Iesu: “Amuia i latou e faalogo i le afioga a le Atua ma tausi i ai!”​—Luka 11:28.

14-15. (a) E pei ona faamatalaina i le Ioane 12:27, 28, o le ā le taimi lona tolu na fetalai ai Ieova mai i le lagi? (e) Na faapefea ona faamalosia ma faalaeiauina Iesu i le fetalaiga a Ieova?

¹⁴ Faitau le Ioane 12:27, 28. O loo taʻua i le Evagelia a Ioane le taimi lona tolu na fetalai ai Ieova mai i le lagi. A o toe o ni nai aso maliu Iesu, sa iai o ia i Ierusalema ina ia faamanatu le Paseka. Na ia fetalai, “ua  popole tele loʻu loto,” ona tatalo lea: “Loʻu Tamā e, ia faamamaluina lou suafa.” Na tali mai lona Tamā mai i le lagi e faapea: “Ua ou faamamaluina loʻu igoa, ma ou toe faamamaluina ai.”

¹⁵ Na popole tele Iesu ona sa ia iloa e tatau ona ia tumau faamaoni iā Ieova. Na ia silafia o le a sasa faamoʻamoʻa o ia ma iʻu ai i se maliu tigā. (Mata. 26:38) Ae o le mea sa sili ona tāua iā Iesu, o le faamamaluina o le suafa o lona Tamā. Sa molia Iesu o sē e fai upuleaga i le Atua, ma na popole o ia neʻi avea lona maliu ma itu e taʻuleagaina ai le suafa o le Atua. Maʻeu la le faamalosia ma le faalaeiauina o ia ina ua fetalai mai lona Tamā! Na mafai ona mautinoa ai e Iesu, o le a faamamaluina lava le suafa o Ieova. E mautinoa o le fetalaiga foʻi a lona Tamā na mafai ona matuā faamāfanafanaina ma faamalosia ai Iesu mo mea o le a tutupu. E ui e foliga mai e na o Iesu sa malamalama i le fetalaiga a lona Tamā i lenā taimi, ae na faamautinoa e Ieova e faamauina lana fetalaiga mo i tatou.​—Ioa. 12:29, 30.

16. O ā ni mea e ono faalumaina ai le suafa o Ieova e tatou te popole ai i nisi taimi?

¹⁶ E pei o Iesu, atonu e tatou te popole neʻi faalumaina le suafa o Ieova. Atonu e tatou te aafia foʻi ona o ni faiga lē tonu, po ua faasalalau e tagata tetee ni faamatalaga sesē e faatatau iā i tatou. Atonu e tatou te manatu o na lipoti o le a taʻuleagaina ai le  suafa o Ieova ma lana faalapotopotoga. I taimi faapena, e mafai ona avea le fetalaiga a Ieova ma faamāfanafanaga iā i tatou. E lē manaʻomia ona tatou soona atuatuvale i na tulaga. Ae ia tatou mautinoa ʻe leoleoina o tatou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.’ (Fili. 4:6, 7) O le a faamamaluina lava e Ieova lona suafa. O le a ia faaaogāina lona Malo e aveesea mea leaga uma na faia e Satani ma lana lalolagi i Ana auauna faamaoni.​—Sala. 94:22, 23; Isa. 65:17.

17. E tusa ai ma le Isaia 30:21, o ā auala ua fetalai mai ai Ieova iā i tatou i aso nei?

¹⁷ O loo fetalai mai lava Ieova i aso nei iā i tatou. (Faitau le Isaia 30:21.) E moni e tatou te lē o faalogoina lona siʻufofoga mai i le lagi. Ae ua ia saunia mai taʻiala e ala mai i lana Afioga tusia le Tusi Paia. E lē gata i lea, ua uunaʻia e le agaga paia o Ieova ʻle auauna pule faamaoni’ e faaauau ona saunia mai meaʻai faaleagaga mo ana auauna. (Luka 12:42) Maʻeu le fau ma soloi o meaʻai faaleagaga ua tatou maua e ala mai i lomiga ma mataupu i le Upega tafaʻilagi, vitiō, ma lomiga ua māeʻa ona puʻeina!

18. E faapefea i fetalaiga a Ieova ona aumaia ai le lototele ma faamalosia ai lo tatou faatuatua?

¹⁸ Ia faaauau ona tāmau i o tatou mafaufau fetalaiga a Ieova i lona Alo a o iai i le lalolagi. O fetalaiga a le Atua o loo faamauina i le Tusi Paia, e tatau ona faamautinoa mai ai iā i tatou o loo faatonutonuina e Ieova tulaga o mea, ma o le a ia aveesea mea leaga uma na faia e Satani ma lana lalolagi iā i tatou. Seʻi faaauau foʻi ona tatou faalogologo totoʻa atu i le siʻufofoga o Ieova. O le faia faapea, o le a mafai ai ona tatou tumau e tusa po o ā faafitauli o loo tatou fesagaʻia i le taimi lenei, po o ni luʻi o le a tulaʻi mai i le lumanaʻi. Ua faamanatu mai e le Tusi Paia iā i tatou: “E tatau ona outou tumau, ina ia outou maua ai le faataunuuga o le folafolaga, pe a uma ona outou faia le finagalo o le Atua.”​—Epe. 10:36.