1, 2. (a) Unfa Jehovah bi ta fan ku libisëmbë? (b) Andi woo luku a di woto aki?

JEHOVAH kë fuu sabi unfa a ta pakisei. A di ten di pasa, a bi tei dee tjabukama fëën, dee ëngëli, ku di Womi Mii fëën, u mbei sëmbë ko sabi unfa a ta pakisei (Amös. 3:7; Gal. 3:19; Ako. 1:1). A di ten aki, a ta fan ku u ku di Wöutu fëën, di Bëibel. Jehovah da u di Bëibel sö taa u sa ko sabi unfa a ta pakisei, söseei fuu ko fusutan di fasi fa a ta du soni.

² Di Jesosi bi dë a goonliba aki, hën Jehovah bi dë a liba ala fan ku sëmbë dii pasi. Boo luku andi Jehovah bi taki, andi u sa lei a dee soni dee a taki, söseei un wini u ta feni a dee soni dee a taki.

3. Andi Jehovah bi taki di Jesosi bi tei dopu te u luku di soni di sikifi a Maikusi 1:9-11, nöö andi dee soni aki ta lei u?

³ Maikusi 1:9-11 ta taki u di fosu pasi di Jehovah seei bi dë a liba ala fan ku sëmbë a goonliba aki. (Lesi ën.) A bi taki taa: „I da mi lobi Womi Mii. Libi fii ta kai ku mi.” Jesosi bi musu u wai di a jei hën Tata ta piki ën taa a lobi ën, söseei taa a ta futoou ën! Dee soni dee Jehovah bi taki ta lei u dii fanöudu soni di nama ku Jesosi. Di fosu soni di u ta lei, hën da Jesosi da di Womi Mii u Gadu. Di u tu soni, hën da Jehovah lobi di Womi Mii fëën, nöö di u dii soni, hën da di fasi fa di Womi Mii fëën bi ta libi bi ta kai ku ën. Boo taki möön fini u dee soni aki.

4. Unfa Jesosi bi ko dë di Womi Mii u Gadu a wan apaiti fasi di a tei dopu?

⁴ „I da mi . . . Womi Mii.” Di soni di Jehovah taki aki bi ta lei taa Jesosi bi kisi wan woto gaandi. Di Jesosi bi dë a liba  ala, nöö a bi dë wan jeje. Ma di a tei dopu, hën Gadu salufu ën ku di santa jeje. A di ten dë, Gadu lei taa Jesosi bi ko dë di Womi Mii fëën di a salufu. Hën da Jesosi bi sa toona go libi a liba ala kuma di sëmbë di Gadu buta ko Könu ku Gaan Mindima (Luk. 1:31-33; Heb. 1:8, 9; 2:17). Fëën mbei di Jesosi bi tei dopu, nöö hën Tata bi abi leti u taki taa: „I da mi . . . Womi Mii.”​—Luk. 3:22.

5. Unfa u sa djeesi Jehovah a di lei di a ta lei taa a lobi wotowan, söseei a di feni di a ta feni de u bunu?

⁵ „I da mi lobi Womi Mii”. Di fasi fa Jehovah ta lei taa a lobi wotowan, söseei di fasi fa a ta lei u taa libi fuu ta kai ku ën, ta heepi u fu useei suku okasi fuu sa da wotowan taanga tu (Joh. 5:20). U ta fii bunu seei te wan sëmbë di u lobi ta lei taa a lobi u tu, söseei te a ta gafa u u dee bunu soni dee u ta du. Dee baaa ku dee sisa u di kemeente, ku dee sëmbë fuu wosudendu kë taa u lei de taa u lobi de, söseei de kë fuu ta da de taanga. Te u ta gafa wotowan, nöö di biibi u de ta ko möön taanga, söseei u ta heepi de u de dini Jehovah ku hii de hati. Mama ku tata musu ta möön da dee mii u de taanga. Te mama ku tata ta gafa dee mii u de ku hii de hati, söseei te de ta lei taa de lobi dee mii u de, nöö dee mii ta fii bunu.

6. Faandi mbei u sa ta futoou Jesosi Keesitu?

⁶ „Libi fii ta kai ku mi.” Di soni aki ta lei taa Jehovah bi abi di futoou taa Jesosi bi o du andi hën Tata kë. Jehovah ta futoou di Womi Mii fëën, nöö fëën mbei useei musu biibi taa di Womi Mii fëën o sa du hii dee soni di Jehovah paamusi u taa a o du da u (2 Kol. 1:20). Te u ta pakisei soni u Jesosi, nöö u ta ko möön dë kabakaba fuu lei soni fëën, söseei fuu djeesi ën a di fasi fa a bi ta libi. Leti kumafa Jehovah bi abi di futoou taa Jesosi o du  soni kumafa a taki, sö nöö a abi di futoou taa dee sëmbë fëën o ta lei soni u di Womi Mii fëën nöömö.​—1 Pet. 2:21.

7. Na un ten Jehovah bi dë a liba ala fan ku sëmbë a goonliba aki te u luku di soni di sikifi a Mateosi 17:1-5, nöö andi a bi taki?

⁷ Lesi Mateosi 17:1-5. Di u tu pasi di Jehovah bi dë a liba ala fan ku sëmbë a goonliba aki, bi dë di Jesosi bi ko „tooka” seei. Jesosi bi kai Petuisi, Jakobosi ku Johanisi u de tjëën go a wan hei kuun liba. Di de bi dë ala, hën de si wan wojolimbo sunjan. A bi dë wan gaan foombo soni seei. Jesosi fesi bi ko ta koti faja kuma sonu, dee koosu nëën sinkii bi ko weti faan te sëmbë wojo an bi sa kai ku de. Tu sëmbë bi ko ta fan ku ën. De bi ko ta taki soni u di dëdë di a bi o dëdë toona weki ko a libi baka. Dee tu sëmbë dë bi dë Mosesi ku Elia. Hii fa „duumi” bi kisi dee dii apösutu, tökuseei di de si di wojolimbo sunjan, hën wojo u de ko limbo gbegedee (Luk. 9:29-32). Baka di dë, hën wan gaan limbo bundji ko tapa de, hën de jei wan töngö ta fan a di bundji dendu. Gadu hën bi ta fan! Leti kumafa Jehovah bi fan ku Jesosi di a bi tei dopu, sö nöö a bi toona piki Jesosi taa libi fëën ta kai ku ën, söseei taa a lobi ën. A bi taki taa: „Un luku di lobi Womi Mii u mi aki. Libi fëën ta kai ku mi.” Ma di pasi aki a bi taki tu taa: „Hën fuun ta haika e.”

8. Unfa di wojolimbo sunjan bi heepi Jesosi ku dee bakama fëën?

⁸ Di wojolimbo sunjan bi ta lei unfa Jesosi bi o abi makiti te a bi o toon Könu u di Könuköndë u Gadu. An dë u taki taa Keesitu bi feni taanga faa bi sa hoi dou te a bi o tja sitaafu, söseei te de bi o kii ën a wan hogihati fasi. Di wojolimbo sunjan aki bi mbei di biibi u dee bakama u Jesosi ko taanga tu. A bi o heepi de u de sa hoi dou te sëmbë bi o du ku de, söseei a bi o heepi de u de bi sa du di wooko u de. Söwan 30 jaa baka di dë, hën apösutu Petuisi bi taki soni u di wojolimbo sunjan aki. Di soni aki ta lei taa an bi fëëkëtë ën.​—2 Pet. 1:16-18.

9. Un lai Jesosi bi da dee bakama fëën?

⁹ „Hën fuun ta haika.” Jehovah bi lei gbelingbelin taa a kë fuu haika dee soni di di Womi Mii fëën ta taki, söseei a kë fuu ta du dee soni dee a taki. Andi Jesosi bi taki di a bi dë a goonliba aki? Wë a bi taki sömëni bumbuu soni! A bi lei dee bakama fëën unfa de musu ta paaja di bunu buka, söseei a bi ta piki de taa de musu dë setiseti ta mëni ën (Mat. 24:42; 28:19, 20). A bi ta da de taanga tu u de du andi Gadu kë, söseei a bi ta da de taanga u de hoi dou (Luk. 13:24). Jesosi bi taki tu unfa a dë fanöudu tjika u dee bakama fëën ta lobi de na de, ta libi fiifii makandi, söseei u de musu ta hoi dee wëti fëën (Joh. 15:10, 12, 13). Di soni di Jesosi bi piki dee bakama fëën bi o tja wini ko da u! Useei musu ta hoi useei a dee soni aki tu.

10, 11. Unfa u sa lei taa u ta haika Jesosi?

¹⁰ Jesosi bi taki taa: „Hibiwan sëmbë di kë jei tuutuu soni, nöö a o haika andi mi ta fan” (Joh. 18:37). U ta lei taa u ta haika andi Jesosi ta taki te u ta ’hoi pasensi da useei ta da useei paadon ku hii u hati’ (Kol. 3:13, NW; Luk. 17:3, 4). U ta lei tu taa u ta haikëën te u ta paaja di bunu buka ee ’u a’ peesa u kondëën, ee wa a’ peesa seei, ee sëmbë kë jei ën, ee de an kë jei’.​—2 Tim. 4:2.

¹¹ Jesosi bi taki taa: „Fa dee sikafu u mi sai dë nöö de sabi mi töngö e” (Joh. 10:27). Dee bakama u Jesosi ta lei taa de ta haikëën u di de ta du dee soni dee a ta taki tu. De an ta mbei dee „sölugu u di goonliba aki” puu de pakisei a dee soni dee Jesosi bi taki (Luk. 21:34). Ma de ta si di piki di de musu ta piki  Jesosi buka kuma di möön fanöudu soni a de libi, aluwasi soni ta taanga da de. Sömëni baaa ku sisa ta hoi dou, hii fa sömëni gaangaan fuka ta miti de. Sëmbë ta du ku so u de, so u de ta pena gaanfa, nasö gaan wata nasö gaan ventu ta ko booko di kamian ka de ta libi. Hii fa dee soni aki ta miti de, tökuseei de ta hoi deseei a Jehovah, aluwasi andi ta pasa. Fëën mbei Jesosi ta piki de di soni aki: „Di sëmbë di sabi andi ku andi mi mandëën faa du nöö a ta piki mi buka, nöö di sëmbë dë, hën lobi mi e. Nöö ee wan sëmbë i lobi mi sö, nöö söseei mi Tata o lobi i tu.”​—Joh. 14:21.

12. Andi da wan woto fasi fa u ta lei taa u ta haika Jesosi?

¹² Wan woto fasi fa u sa lei taa u ta haika Jesosi, hën da te u ta wooko makandi ku dee baaa dee ta tei fesi a di ölganisaasi u Jehovah (Heb. 13:7, 17). Di ölganisaasi u Jehovah tooka sömëni soni a dee jaa dee pasa aki. U ko abi njunjun soni u du di peleikiwooko, u ko ta du di peleikiwooko woto fasi, di fasi fa u ta hoi di mindi wiki komakandi seei ko tooka. U ko abi njunjun fasi fa u ta mbei dee Könuköndë zali fuu, fa u ta seeka de, söseei fa u ta hoi de u de an booko kaba a sösö. U ta wai seei ku di fasi fa di ölganisaasi u Jehovah ta tii u, söseei u ta wai ku di fasi fa dee baaa ta lei taa de lobi u! U sa dë seiki taa Jehovah o heepi u fuu du dee soni di di ölganisaasi fëën ta piki u fuu du.

13. Andi da dee wini dee u ta feni te u haika Jesosi?

¹³ U ta feni wini te u ta du dee soni di Jesosi ta lei u. Jesosi bi paamusi dee bakama fëën taa dee soni dee a lei de, o mbei de feni kaakiti baka. A bi piki de taa: „Ee wan sëmbë i ko a mi nöö joo feni böö te dou a i hati. Biga di tii u mi an taanga e, nöö dee lai dee mi o da unu fuun tjai, de dë fukëfukë” (Mat. 11:28-30). Dee fö buku u Bëibel dee ta taki soni u di libi u Jesosi di a bi dë a goonliba aki, ta mbei u feni kaakiti baka, söseei de ta mbei u ko köni (Ps. 19:7; 23:3). Jesosi bi taki taa: „Dee sëmbë dee ta jei di Wöutu u Masa Gadu ta piki ën buka, de ta dë waiwai!”​—Luk. 11:28.

14, 15. (a) Na un ten bi dë di u dii pasi di Jehovah bi dë a liba ala fan ku sëmbë a goonliba aki, te u luku Johanisi 12:27, 28? (b) Faandi mbei u sa taki taa dee soni di Jehovah taki da Jesosi, bi musu u dëën taanga?

¹⁴ Lesi Johanisi 12:27, 28. Di buku Johanisi ta taki u di u dii pasi di Jehovah bi dë a liba ala fan ku sëmbë a goonliba aki. Wantu daka ufö Jesosi dëdë, a bi go a Jelusalen faa hoi di  Pasika Piizii u di lasiti pasi. Hën a taki taa: „Dee sëmbë, hati u mi nöö dë ku fuka sö.” Baka di dë, hën a begi ën Tata taa: „Taata o, be sëmbë si di hei ku di kaakiti di i abi e, be di në fii bai.” Hën fa a fan dë, hën wan töngö piki kumutu a liba ala wante taa: „Mi feni në a i liba kaa e, nöö mi o toona feni në a i möön eti.”

¹⁵ Di gaan faantiwöutu di Jesosi bi abi, nasö di hoi di a bi musu hoi hënseei a Jehovah u te a dëdë, bi mbei a dë ku fuka a hati. Jesosi bi sabi taa de bi o kii ën a wan hogihati fasi (Mat. 26:38). Di hei di Jesosi bi kë hei hën Tata në, bi dë di möön fanöudu soni nëën libi. De bi feni taa Jesosi bi kosi Gadu, nöö Jesosi an bi kë u di dëdë fëën tja poi në ko da Gadu. A musu u dë sö taa dee soni dee Jehovah bi taki da Jesosi, bi dëën taanga seei! Fëën mbei Jesosi bi abi di futoou taa di në u Jehovah o feni gafa. Di soni di hën Tata bi taki bi musu u da Jesosi kötöhati, söseei a bi musu u dëën taanga faa hoi dou. Hii fa kandë Jesosi wanwan bi fusutan dee soni di hën Tata bi taki, tökuseei Jehovah bi seeka soni u de sikifi di soni aki buta a di Wöutu fëën da hii u tuu.​—Joh. 12:29, 30.

16. Faandi mbei so juu u sa ta booko u hedi ku di poi di sëmbë ta poi Jehovah në?

¹⁶ Useei sa ta booko u hedi ku di poi di sëmbë ta poi Jehovah në, leti kumafa Jesosi bi ta booko hën hedi ku di soni dë. Kandë sëmbë an ta libi bunu ku u, leti kumafa de an bi ta  libi bunu ku Jesosi. Kandë di mindi di sëmbë ta mindi soni da u sa ta hati u. Kandë u ta pakisei unfa di soni aki sa tja poi në ko da Jehovah ku di ölganisaasi fëën. Dee soni di Jehovah taki a Johanisi 12:27, 28, ta da u kötöhati te dee soni aki ta miti u. An dë fuu ta booko u hedi tumisi te sëmbë ta taki hogi fuu. U sa dë seiki taa ’di kötöhati u Gadu di bigi pasa hii sëmbë fusutan o tjubi u hati ku u fusutan tuu a Jesosi Keesitu liba’ (Fil. 4:6, 7). Hii juu Jehovah o ta hei di në fëën. Jehovah o mbei di Könuköndë fëën puu hii dee hogi soni di Saatan ku di goonliba fëën ta tja ko da dee dinima fëën.​—Ps. 94:22, 23; Jes. 65:17.

17. Unfa Jehovah ta fan ku u a di ten aki, te u luku Jesaaja 30:21?

¹⁷ Jehovah ta fan ku u a di ten aki jeti. (Lesi Jesaaja 30:21.) A dë sö tuu taa wa ta jei Gadu töngö a di ten aki. A mbei sëmbë sikifi di Wöutu fëën da u, nöö a ta lei u soni ku ën. Boiti di dë, di santa jeje ta mbei „di köni saafu di dë u futoou”, ta lei dee dinima fëën soni (Luk. 12:42, NW). U abi sömëni buku ku sömëni soni a Internet di dee baaa seeka da u. U abi fëlön, söseei u abi soni u haika di sa heepi u u di biibi fuu ko möön taanga!

18. Unfa dee soni dee Jehovah ta taki, ta mbei di biibi fii ko möön taanga, söseei unfa de ta da i degihati tjika?

¹⁸ Be wa fëëkëtë dee soni dee Jehovah bi taki di di Womi Mii fëën bi dë a goonliba aki! Be di Wöutu u Gadu mbei u ko abi di futoou taa hii soni dë a Jehovah maun, nöö a o seeka hii dee hogi soni di Saatan ku di goonliba fëën tja ko da libisëmbë. Boo dë kabakaba fuu ta haika ku hii u pakisei andi Jehovah ta piki u. Ee u du sö, nöö woo sa hoi dou aluwasi un fuka ta miti u, söseei woo sa pasa hiniwan tesi di dë a u fesi ta ko. Di Bëibel ta mëni u taa: „Wan musu lasi hati e, ma be un tai hati go dou. Be un ta du kumafa Masa Gadu kë fuun ta du nöömö, nöö woon kisi dee soni dee a bi paamusi unu.”​—Heb. 10:36.