1-2. (a) Fa Yehovah e taki nanga libisma? (b) San wi o luku na ini na artikel disi?

YEHOVAH lobi taki nanga wi. Na ini a ten di pasa a gebroiki profeiti, engel, nanga en Manpikin Yesus Krestes fu meki wi kon sabi san na a wani fu en (Amos 3:7; Gal. 3:19; Openb. 1:1). Na ini a ten disi a e gebroiki en Wortu Bijbel fu taki nanga wi. A gi wi a Bijbel so taki wi kan kon sabi fa a e denki èn fu san ede a e du son sani.

² Di Yesus ben de na grontapu, Yehovah taki nanga en komoto fu hemel na dri okasi. Meki wi go luku san Yehovah taki, san wi kan leri fu den sani di a taki èn fa wi kan kisi wini fu den wortu dati.

3. Soleki fa wi leisi na Markus 1:9-11, dan san na dri prenspari sani di Yehovah taki fu Yesus di a dopu?

³ A fosi leisi di Yehovah taki komoto fu hemel skrifi na Markus 1:9-11. (Leisi en.) Yehovah ben taki: „Yu na mi Manpikin, a lobiwan. Na yu mi feni bun.” A musu fu de so taki Yesus ben firi bun di a yere fa en Papa ben taki dati a lobi en èn taki a e frutrow en. Yehovah taki dri prenspari sani fu Yesus. A fosi sani na taki Yesus na en Manpikin. A di fu tu sani na taki Yehovah lobi en Manpikin. A di fu dri sani na taki Yehovah feni en Manpikin bun. Meki wi go luku san den dri sani disi wani taki.

4. Fu san ede Yehovah kari Yesus en manpikin di a dopu?

⁴ „Yu na mi Manpikin.” Di Yesus ben de na hemel a ben de wan manpikin fu Gado kaba. Sobun, fu san ede  Yehovah taki a sani disi? A ben wani sori taki Yesus ben kisi wan nyun wroko fu du. Di Yesus ben de na hemel a ben de wan fu den yeye di Gado meki èn dati meki Bijbel e kari en a manpikin fu Gado. Ma di a dopu, Gado salfu en nanga santa yeye èn a tron en salfu Manpikin. Now Yesus ben o man drai go baka na hemel fu tron Kownu nanga Granpriester (Luk. 1:31-33; Hebr. 1:8, 9; 2:17). Disi e yepi wi fu frustan fu san ede en Papa taki den wortu disi: „Yu na mi Manpikin.”​—Luk. 3:22.

5. Fa wi kan teki na eksempre fu Yehovah di e sori lobi èn di e gi wi deki-ati?

⁵ ’Yu na a lobiwan.’ Yehovah ben taki dati a lobi Yesus èn taki a feni en bun. Wi musu teki na eksempre fu en èn wi musu suku okasi fu gi trawan deki-ati (Yoh. 5:20). Wi e firi bun te mati noso famiri fu wi e sori taki den lobi wi èn te den e prèise wi gi den bun sani di wi e du. Na so a de tu taki den brada nanga sisa na ini a gemeente èn wi famiri abi lobi nanga deki-ati fanowdu. Te wi e prèise trawan, dan wi e tranga den bribi èn wi e yepi den fu tan dini Yehovah. A prenspari taki papa nanga mama gi den pikin fu den deki-ati. Te papa nanga mama e prèise den pikin gi den bun sani di den du èn den e sori den taki den lobi den, dan den kan yepi den pikin fu go na fesi na ini na anbegi.

6. Fu san ede wi kan frutrow Yesus Krestes?

⁶ „Na yu mi feni bun.” Den wortu disi e sori taki Yehovah ben abi a frutrow taki Yesus ben o du a wani fu en Papa. A sani disi e meki taki wi srefi kan abi a frutrow taki Yesus o du ala san Yehovah pramisi (2 Kor. 1:20). Te wi e prakseri na  eksempre fu Yesus, dan dati e gi wi a deki-ati fu leri moro fu en èn fu waka na en baka. Yehovah abi a frutrow taki leki grupu, den anbegiman fu en o teki na eksempre fu en Manpikin.​—1 Petr. 2:21.

7. Soleki fa wi leisi na Mateyus 17:1-5, dan na sortu okasi Yehovah taki komoto fu hemel èn san a taki?

⁷ Leisi Mateyus 17:1-5. A di fu tu leisi di Yehovah taki komoto fu hemel na di Yesus ben aksi Petrus, Yakobus nanga Yohanes fu go nanga en na tapu wan hei bergi. Di den ben de drape den si wan aparti fisyun. Na ini a fisyun den si fa Yesus en fesi nanga den krosi fu en ben brenki. Den apostel ben si tu man, Moses nanga Elia, di ben taki nanga Yesus fu a dede fu en èn fu na opobaka di a ben o kisi. Den apostel ben fadon na „sribi” di den go na tapu a bergi nanga Yesus, ma di den wiki den si a fisyun disi (Luk. 9:29-32). Baka dati wan wolku kon na den tapu èn den yere wan sten na ini a wolku. A ben de Gado sten! Yehovah taki dati a lobi en Manpikin èn taki a feni en bun, neleki fa a ben du dati di Yesus dopu. A ben taki: „Disi na mi Manpikin, a lobiwan di mi feni bun.” Ma disi leisi Yehovah ben taki tu: „Un arki en.”

8. Fa a fisyun gi Yesus nanga den disipel fu en deki-ati?

⁸ A fisyun ben sori sortu glori nanga makti Yesus ben o abi leki Kownu fu Gado Kownukondre. A no de fu taki dati Yesus kisi a deki-ati di a ben abi fanowdu fu di a ben o pina èn a ben o dede wan hati dede. A fisyun tranga a bribi tu fu den disipel èn a sreka den gi den tesi di den ben o kisi èn gi a tranga wroko di den ben o abi fu du. Sowan 30 yari baka dati, na apostel Petrus ben taki fu a fisyun disi. Disi e sori taki a no ben frigiti san a ben si na ini a fisyun.​—2 Petr. 1:16-18.

9. Sortu bun rai Yesus gi den disipel fu en?

⁹ „Un arki en.” Yehovah sori krin taki a wani taki wi arki en Manpikin èn taki wi du san a taki. San Yesus taki di a ben de na grontapu? A taki furu prenspari sani! Fu eksempre, na wan lobi-ati fasi a leri den bakaman fu en fa fu preiki a bun nyunsu èn ibri tron baka a ben e memre den fu tan na ai (Mat. 24:42; 28:19, 20). A gi den deki-ati tu fu meki tranga muiti fu pasa a smara doro go na inisei èn fu no gi abra (Luk. 13:24). Yesus sori den bakaman fu en tu o prenspari a de fu lobi makandra, fu tan abi wánfasi èn fu gi yesi na den komando fu en (Yoh. 15:10, 12, 13). A no de fu taki dati Yesus gi den disipel fu en bun rai! Den rai fu Yesus prenspari gi wi tu na ini a ten disi!

10-11. Fa wi kan sori taki wi e arki Yesus?

¹⁰ Yesus taki: „Ibri sma di e gi yesi na san tru, e arki mi sten” (Yoh. 18:37). Wi e sori taki wi e arki en sten te wi e ’tan frudrage makandra èn te wi e gi makandra pardon nanga wi heri ati’ (Kol. 3:13; Luk. 17:3, 4). Wan tra fasi fa wi kan sori taki wi e arki en sten, na te wi e preiki a bun nyunsu fayafaya „na ini bun ten èn na ini muilek ten”.​—2 Tim. 4:2.

¹¹ Yesus taki: „Mi skapu e arki mi sten” (Yoh. 10:27). Den bakaman fu Krestes no e arki nomo san Yesus e taki, ma den e du tu san a taki. Den no e meki den ’broko-ede fu na aladei libi’ puru den prakseri (Luk. 21:34). Ma den e si en leki wan prenspari sani fu gi yesi na den komando  fu Yesus awinsi a muilek gi den. Furu fu den brada nanga sisa fu wi e kisi hebi tesi, sma e frufolgu den, den pôti srefisrefi noso den e kisi fu du nanga rampu. Toku den e tan krosibei na Yehovah awinsi san e pasa. Yesus e pramisi den brada nanga sisa disi: „Efu wan sma sabi den komando fu mi èn a e du san den e taki, dan a sma disi lobi mi. Sosrefi, mi Tata o lobi a sma di lobi mi.”​—Yoh. 14:21.

12. San na wan tra fasi fa wi kan sori taki wi e arki Yesus?

¹² Wan tra fasi fa wi kan sori taki wi e arki Yesus, na te wi e wroko makandra nanga den wan di Yehovah poti fu teki fesi (Hebr. 13:7, 17). Na organisâsi fu Gado tyari furu kenki kon na ini den yari di pasa. Wi kisi nyun sani di wi kan gebroiki na ini a preikiwroko, a mindriwiki konmakandra kenki èn den kenki a fasi fa wi e bow Kownukondre zaal èn fa wi e sorgu gi den. Den kenki disi e tyari furu wini kon gi wi èn den e sori taki Gado organisâsi lobi wi. Wi kan de seiker taki Yehovah o blesi wi te wi e gi yesi na den rai di wi e kisi fu en organisâsi.

13. Sortu wini wi e kisi te wi e gi yesi na Yesus?

¹³ Wi e kisi wini te wi e gi yesi na ala den sani di Yesus leri wi. Yesus pramisi den disipel fu en taki den leri fu en ben o gi den krakti baka. A taki: „Unu o kisi krakti baka. Bika a tyatyari fu mi switi fu tyari èn mi lai lekti” (Mat. 11:28-30). Gado Wortu, sosrefi den fo Evangelietori di e taki fu a libi nanga a diniwroko fu Yesus, e gi wi krakti baka èn den e meki wi kon moro koni (Ps. 19:7; 23:3). Yesus ben taki: „Koloku fu den sma di e yere a wortu fu Gado èn di e du san a wortu e taki!”​—Luk. 11:28.

14-15. (a) San na a di fu dri okasi pe Yehovah taki komoto fu hemel, soleki fa skrifi na Yohanes 12:27, 28? (b) Fa den wortu fu Yehovah trowstu Yesus èn fa den gi en deki-ati?

¹⁴ Leisi Yohanes 12:27, 28. Na Evangelietori fu Yohanes e taki fu a di fu dri okasi pe Yehovah taki komoto fu hemel. Wan tu dei fosi Yesus dede, a ben de na ini Yerusalem fu hori a Paskafesa fu a lasti leisi. A ben taki: „A hebi gi mi trutru.” Baka dati a begi: „Mi Tata, gi yu nen glori.” Ne a yere en Papa e taki komoto fu  hemel: „Mi ben gi mi nen glori kaba èn mi o du en baka.”

¹⁵ Yesus ben e broko en ede fu di a ben abi a bigi frantwortu fu tan gi yesi na Yehovah te na a kaba. A ben sabi taki a ben o pina èn taki a ben o dede na wan ogri-ati fasi (Mat. 26:38). A moro prenspari sani gi Yesus na taki a ben wani gi glori na a nen fu en Papa. Sma ben taki dati Yesus ben taki ogri fu Gado èn dati meki a ben e broko en ede taki a dede fu en ben o meki Gado kisi porinen. A no de fu taki dati den sani di Yehovah ben taki gi Yesus deki-ati! A ben kan de seiker taki a nen fu Yehovah ben o kisi glori. A musu de so taki den wortu fu en Papa trowstu en èn den gi en krakti fu pasa den tesi. Kande na Yesus wawan ben e frustan san en Papa taki na a momenti dati. Ma Yehovah sorgu taki sma skrifi den wortu fu en na ini Bijbel so taki wi alamala kan leisi den.​—Yoh. 12:29, 30.

16. Fu san ede wi e broko wi ede son leisi taki Yehovah kan kisi porinen?

¹⁶ Kande wi e broko wi ede tu taki Yehovah e kisi porinen. A kan taki sma e du hati sani nanga wi. Noso kande gensman e fruteri lei fu wi. Kande wi e prakseri fa den tori disi e gi Yehovah nanga en organisâsi porinen. Na den momenti dati a sani di Yehovah taki na Yohanes 12:27, 28 kan trowstu wi. Wi no musu broko  wi ede tumusi. Wi kan de seiker taki ’a freide fu Gado di bigi moro iniwan sani di libisma man frustan, o kibri wi ati nanga wi frustan nanga yepi fu Krestes Yesus’ (Fil. 4:6, 7). Ala ten Yehovah o gi en nen glori. Awinsi sortu ogri Satan nanga en grontapu e du nanga wi, Yehovah o meki ala sani kon bun baka nanga yepi fu en Kownukondre.​—Ps. 94:22, 23; Yes. 65:17.

17. Yesaya 30:21 e sori taki Yehovah e taki nanga wi. Fa a e du dati na ini a ten disi?

¹⁷ Te nanga now Yehovah e taki nanga wi. (Leisi Yesaya 30:21.) A tru taki Gado no e taki nanga wi komoto fu hemel. Ma a gi wi en Wortu Bijbel pe wi kan leisi san a e aksi fu wi. Boiti dati, a santa yeye fu Yehovah e yepi „a futuboi di de fu frutrow” fu tan gi wi leri (Luk. 12:42). Wi e kisi furu sani di e yepi wi fu tan abi wan tranga bribi. Wi e kisi furu buku, wi abi den website fu wi, wi e kisi furu felem nanga tra sani di wi kan arki.

18. Fa den wortu fu Yehovah e tranga yu bribi èn fa den e gi yu deki-ati?

¹⁸ Meki wi hori na prakseri san Yehovah taki di en Manpikin ben de na grontapu! Meki a de so taki den wortu fu Yehovah di skrifi na ini Bijbel, gi wi deki-ati. Wi kan de seiker taki Yehovah o meki ala sani waka bun te fu kaba. Awinsi sortu ogri Satan nanga en grontapu e du nanga wi, Yehovah o meki ala sani kon bun baka. Meki wi tan du muiti fu arki bun san Yehovah e taigi wi. Efu wi e du dati, dan wi o man pasa iniwan problema di wi e kisi now èn iniwan tesi di wi kan kisi na ini a ten di e kon. Bijbel e memre wi: „A de fanowdu taki unu horidoro, so taki baka te unu du a wani fu Gado, unu kan kisi san a ben pramisi unu.”​—Hebr. 10:36.