1-2. (a) Esikhatsini lesendlulile, Jehova abekhuluma njani nebantfu? (b) Sitawucoca ngani kulesihloko?

JEHOVA uyatsandza kukhuluma natsi. Esikhatsini lesendlulile, wasebentisa baphrofethi, tingilosi, kanye naJesu Khristu iNdvodzana yakhe kute endlulisele imicabango yakhe kitsi. (Amo. 3:7; Gal. 3:19; Semb. 1:1) Lamuhla ukhuluma natsi asebentisa liVi lakhe liBhayibheli. Wasiniketa lona kute sifundze indlela lacabanga ngayo kanye netindlela takhe.

² Ngesikhatsi Jesu asemhlabeni, Jehova wakhuluma asezulwini tikhatsi letintsatfu. Ase sicoce ngaloko Jehova lakusho, sibone kutsi yini lesiyifundzako nekutsi kusisita njani.

3. Ngekusho kwemBhalo waMakho 1:9-11, yini Jehova layisho ngesikhatsi Jesu abhajatiswa, futsi kugcizelela maphi emaphuzu labalulekile?

³ EmBhalweni wa-Makho 1:9-11 sifundza ngaloko Jehova lakusho kwekucala nakakhuluma asezulwini. (Fundza.) Watsi: “Wena uyiNdvodzana yami letsandzekako, ngikwemukele.” Kungenteka kwamjabulisa kakhulu Jesu kuva Babe wakhe achaza indlela lamtsandza ngayo nalametsemba ngayo. Ngalamavi, Jehova bekacinisekisa emaphuzu lamatsatfu labalulekile ngaJesu. Lekucala, Jesu uyiNdvodzana yakhe. Lesibili, Jehova uyayitsandza iNdvodzana yakhe. Lesitsatfu, Jehova uyayemukela iNdvodzana yakhe. Ase sihlolisise lamaphuzu lamatsatfu.

4. Ngesikhatsi Jesu abhajatiswa, ngubuphi buhlobo lobukhetsekile laba nabo naJehova?

⁴ “Wena uyiNdvodzana yami.” Ngalamavi, Jehova bekakhombisa  kutsi besekanebuhlobo lobukhetsekile naJesu iNdvodzana yakhe layitsandzako. Ngesikhatsi Jesu asezulwini, bekayindvodzana yaNkulunkulu lesidalwa lesingumoya. Ngesikhatsi abhajatiswa, wagcotjwa ngemoya longcwele. Ngaleso sikhatsi, Nkulunkulu wakhombisa kutsi Jesu loyiNdvodzana yakhe legcotjiwe bekanelitsemba lekubuyela ezulwini kute Nkulunkulu ambeke kutsi abe yiNkhosi kanye nemPhristi Lophakeme. (Luk. 1:31-33; Heb. 1:8, 9; 2:17) Ngako kuyabonakala kutsi kungani Jehova asho lamavi latsi: “Wena uyiNdvodzana yami” ngesikhatsi Jesu abhajatiswa.—Luk. 3:22.

5. Singamlingisa njani Jehova nasikhutsata labanye futsi sikhombisa kutsi siyabatsandza?

⁵ “Wena uyiNdvodzana yami letsandzekako.” Sibonelo saJehova lesihle sekukhutsata labanye futsi sibakhombise kutsi siyabatsandza sisikhumbuta kutsi kufanele sifune ematfuba ekukhutsatana. (Joh. 5:20) Siyajabula nangabe umuntfu losikhatsalelako akhombisa kutsi uyasitsandza futsi asincoma ngetintfo letinhle lesitentako. Ngalokufanako, bazalwane betfu nabodzadze labasebandleni kanye nemalunga emindeni yetfu, badzinga sibakhombise kutsi siyabatsandza siphindze sibakhutsate. Nangabe sibancoma labanye, sicinisa kukholwa kwabo futsi sibasita bakhonte Jehova ngekwetsembeka. Batali ngalokukhetsekile kudzingeka bakhutsate bantfwana babo. Nangabe batali babancoma bantfwana babo, futsi babakhombisa kutsi bayabatsandza, basuke babasita kutsi batfutfuke.

6. Kungani kufanele simetsembe Jesu Khristu?

⁶ “Ngikwemukele.” Lamavi akhombisa kutsi Jehova beketsemba kutsi Jesu utawuyenta ngekwetsembeka intsandvo yakhe.  Ngenca yekutsi Jehova uyetsemba kakhulu iNdvodzana yakhe natsi kufanele setsembe ngalokuphelele kutsi itatifeza ngekwetsembeka tonkhe tetsembiso taJehova. (2 Khor. 1:20) Kucabanga ngesibonelo saJesu, kutasenta sitimisele kakhulu kufundza ngaye siphindze silingise sibonelo sakhe. Njengobe Jehova bekametsemba Jesu, natsi uyasetsemba kutsi sitawuchubeka silingisa sibonelo seNdvodzana yakhe.—1 Phet. 2:21.

7. Ngekusho kwaMatewu 17:1-5 kunini lapho khona Jehova akhuluma asezulwini, futsi watsini?

⁷ Fundza Matewu 17:1-5. Jehova waphindze wakhuluma kwesibili asezulwini ngesikhatsi Jesu ‘ashintja.’ Jesu bekacele Phetro, Jakobe naJohane kutsi bahambe naye nakaya entsabeni lephakeme. Ngesikhatsi balapho, babona umbono lomangalisako. Buso baJesu bakhanya njengelilanga, netimphahla takhe takhanya kakhulu. Baphostoli bakhe babona emadvodza lamabili lamelela boMosi na-Elija futsi acala kukhuluma naJesu mayelana nekufa kanye nekuvuswa kwakhe lebekuseta. Ngisho nobe labaphostoli labatsatfu “bebetela,” baphaphama base babona lombono lomangalisako. (Luk. 9:29-32) Lifu lelikhanyako labasibekela, babese beva livi liphuma kulelifu futsi bekulivi laNkulunkulu. Njengobe kwenteka nakubhajatiswa Jesu, Jehova waphindze wakhombisa kutsi uyayemukela futsi uyayitsandza iNdvodzana yakhe. Watsi: “Lena yiNdvodzana yami letsandzekako nalengiyemukele.” Jehova waphindze watsi: “Yilaleleni.”

8. Lombono waba namuphi umphumela kuJesu kanye nakubaphostoli bakhe?

⁸ Lombono bewukhombisa kutsi esikhatsini lesitako, Jesu utawukhatinyuliswa futsi abe nemandla njengobe ayiNkhosi yeMbuso waNkulunkulu. Asingabati kutsi Khristu wakhutsateka futsi waciniswa kute akhone kubeketelela kuhlushwa kanye nekubulawa kabuhlungu. Lombono wakucinisa kukholwa kwebafundzi, waphindze wabasita kutsi balungele kuvivinywa kanye nemsebenti lebekufanele bawente. Ngemuva kweminyaka lengu-30, umphostoli Phetro wakhuluma ngalombono futsi loko kwakhombisa kutsi bekasolo awukhumbula ngalokucacile.—2 Phet. 1:16-18.

9. Ngusiphi seluleko lesilusito Jesu lasiniketa balandzeli bakhe?

⁹ “Yilaleleni.” Jehova wakwenta kwacaca kutsi ufuna siyilalele iNdvodzana yakhe futsi sikwente loko lekushoko. Yini Jesu layisho ngesikhatsi asemhlabeni? Washo tintfo letinyenti letibaluleke kakhulu lokufanele sitilalele. Nasi sibonelo, ngelutsandvo wafundzisa balandzeli bakhe kutsi kufanele bawente njani umsebenti wekushumayela tindzaba letimnandzi, waphindze wabakhumbuta tikhatsi letinyenti kutsi kufanele bahlale balindzile. (Mat. 24:42; 28:19, 20) Waphindze wabakhutsata kutsi batimisele kakhulu futsi bangaphelelwa ngemandla. (Luk. 13:24) Jesu wabatjela kutsi kubalulekile kutsi batsandzane, bahlale banebunye baphindze balalele imiyalo yakhe. (Joh. 15:10, 12, 13) Jesu waniketa balandzeli bakhe seluleko lesilusito futsi leseluleko sisasebenta nasesikhatsini salamuhla.

10-11. Singakhombisa njani kutsi siyamlalela Jesu?

¹⁰ Jesu watsi: “Wonkhe umuntfu lophila ngeliciniso, uyalilalela livi lami.” (Joh. 18:37) Sikhombisa kutsi siyamlalela nangabe ‘sichubeka sibeketelelana futsi sitsetselelana ngekukhululeka.’ (Khol. 3:13; Luk. 17:3, 4) Siphindze sikhombise kutsi siyamlalela nangabe sishumayela tindzaba letimnandzi ngekutimisela “ngetikhatsi letivumako naletimatima.”—2 Thim. 4:2.

 ¹¹ Jesu watsi: “Timvu tami tiyalilalela livi lami.” (Joh. 10:27) Balandzeli baKhristu bakhombisa kutsi bayamlalela ngekutsi bangagcini ngekunaka emavi akhe, kodvwa baphindze bekwente loko lakushoko. Abaphatanyiswa “tinkhatsato tekuphila.” (Luk. 21:34) Kunaloko, kulalela imiyalo yaJesu kuta kucala ekuphileni kwabo ngisho nobe kumatima kwenta njalo. Bazalwane betfu labanyenti babeketelela tinkinga letimatima, letifaka ekhatsi kuhlaselwa baphikisi, buphuya kanye netehlakalo temvelo. Bahlale betsembekile kuJehova ngisho nobe bahlangabetana natiphi tinkinga. Jesu ubaniketa lesicinisekiso: “Loyo lowati imiyalo yami futsi ayigcine, nguye longitsandzako. Naloyo longitsandzako utawutsandvwa nguBabe, nami ngitamtsandza bese ngitiveta ngalokucacile kuye.”—Joh. 14:21.

12. Yini lenye lesingayenta kute sikhombise kutsi siyamlalela Jesu?

¹² Lenye indlela lesingakhombisa ngayo kutsi siyamlalela Jesu kutsi sibalalele labo lababeke kutsi basihole. (Heb. 13:7, 17) Inhlangano yaJehova yente tingucuko kuleminyaka leyengcile. Letingucuko tifaka ekhatsi emathuluzi lamasha lesiwasebentisa nasishumayela, indlela yekuchuba imihlangano yasekhatsi neliviki kanye nendlela lesakha ngayo, silungise siphindze sinakekele ngayo emaHholwa eMbuso. Sibonga kakhulu ngaleticondziso letikhombisa kutsi Jehova uyasitsandza. Singaciniseka kutsi Jehova utasibusisa nasilandzela ticondziso lesititfola enhlanganweni yakhe.

13. Kusisita ngani kulalela timfundziso taJesu?

¹³ Kutasisita kulalela tonkhe tintfo Jesu lasifundzisa tona. Jesu wetsembisa balandzeli bakhe kutsi timfundziso takhe betitawubenta bacabuleke. Watsi: “Nitawutfolela imiphefumulo yenu kuphumula. Ngobe lijoka lami lilula, kantsi nemtfwalo wami awusindzi.” (Mat. 11:28-30) Kufundza liVi laNkulunkulu lokufaka ekhatsi emaVangeli lamane lakhuluma ngekuphila kwaJesu kanye nemsebenti wakhe kusenta sicabuleke futsi sihlakaniphe. (Hla. 19:7; 23:3) Jesu watsi: “Bayajabula labo labeva livi laNkulunkulu futsi baligcine!”—Luk. 11:28.

14-15. (a) Ngekusho kwemBhalo waJohane 12:27, 28, yini leyenteka ngesikhatsi Jehova akhuluma kwesitsatfu asezulwini? (b) Kungani emavi aJehova amcinisa futsi amdvudvuta Jesu?

¹⁴ Fundza Johane 12:27, 28. LiVangeli laJohane likhuluma ngalokwenteka  ngesikhatsi Jehova akhuluma kwesitsatfu asezulwini. Nakusesele emalanga lambalwa ngaphambi kwekutsi afe, Jesu waya eJerusalema kute agubhe umkhosi weliphasika kwekugcina. Watsi: “Umphefumulo wami ucindzeteleke kakhulu.” Wabese uthantaza utsi: “Babe, khatimulisa libito lakho.” Babe wakhe waphendvula asezulwini watsi: “Ngilikhatimulisile, futsi ngitawuphindze ngilikhatimulise.”

¹⁵ Jesu bekakhatsatekile ngenca yekutsi bekufanele ahlale atsembekile kuJehova. Jesu bekati kutsi utawufa kabuhlungu. (Mat. 26:38) Intfo lebeyibaluleke kakhulu kuJesu bekukutsi akhatimulise libito laBabe wakhe. Jesu bekabekwe licala lekuhlambalata, ngako bekakhatsateke kakhulu ngekutsi kufa kwakhe kutalingcolisa libito laNkulunkulu. Siyaciniseka kutsi emavi aJehova enta Jesu waba nesibindzi. Besekaciniseka kutsi ligama laJehova litawukhatinyuliswa. Emavi aBabe wakhe amdvudvuta kakhulu futsi amniketa emandla ekubeketelela kuhlupheka labetawubhekana nako. Ngisho nobe kungenteka kwaba nguJesu kuphela lowacondza emavi aBabe wakhe, Jehova wenta kutsi emavi akhe abhalwe eBhayibhelini kute natsi sizuze kuwo.—Joh 12:29, 30.

16. Kungani ngaletinye tikhatsi singahle sikhatsateke ngekungcoliswa kweligama laJehova?

¹⁶ NjengaJesu, natsi singahle sikhatsateke nangabe ligama laJehova lingcoliswa. Kungenteka natsi siphatfwa kabi njengobe  kwenteka nakuJesu. Noma kungenteka siviswe buhlungu tindzaba letingemanga letikhulunywa bantfu labasiphikisako. Singahle sicabange ngekutsi letindzaba tiyalingcolisa ligama laJehova kanye nenhlangano yakhe. Emavi aJehova atasidvudvuta kakhulu nakwenteka loko. Akudzingeki kutsi sikhatsateke kakhulu. Singaciniseka kutsi “kuthula kwaNkulunkulu lokwendlula konkhe kucondza kutawulondza tinhlitiyo netingcondvo [tetfu] ngaKhristu Jesu.” (Fil. 4:6, 7) Jehova akayuze ehluleke kukhatimulisa libito lakhe. Utawusebentisa uMbuso wakhe kute alungise umonakalo lowentiwe nguSathane kanye nebantfu balelive kubantfu baJehova labetsembekile.—Hla. 94:22, 23; Isa. 65:17.

17. Ngekusho kwa-Isaya 30:21, Jehova ukhuluma njani natsi?

¹⁷ Jehova solo usakhuluma natsi nalamuhla. (Fundza Isaya 30:21.) Kuliciniso kutsi asiliva livi laJehova lelivela ezulwini. Nobe kunjalo, Jehova usinikete liVi lakhe liBhayibheli kute asicondzise. Ngetulu kwaloko, umoya waJehova ukhutsata “sisebenti lesitsembekile” kutsi sinikete tinceku takhe imfundvo levela kuye. (Luk. 12:42) Tinyenti kakhulu tincwadzi letishicilelwe naletitfolakala ku-website yetfu, ema-video, kanye netincwadzi letitsetjuliwe letisisita sibe nekukholwa lokucinile.

18. Emavi aJehova akusita njani kutsi ube nesibindzi futsi ube nekukholwa lokucinile?

¹⁸ Shengatsi singahlale siwakhumbula emavi Jehova lawatjela iNdvodzana yakhe ngesikhatsi isemhlabeni. Emavi aJehova laseBhayibhelini kufanele asicinisekise kutsi Jehova unemandla futsi utawulungisa umonakalo lobangelwe nguSathane kanye nebantfu balelive lelibi. Shengatsi singatimisela kuhlale sililalela liVi laJehova. Nasenta njalo, sitawukhona kubeketelela noma ngutiphi tinkinga lesinato kanye naleto lesitawubhekana nato esikhatsini lesitako. Naku liBhayibheli lelisikhumbuta kona: “Kudzingeka nicinisele khona kutewutsi nasenente intsandvo yaNkulunkulu, nitfole kugcwaliseka kwesetsembiso.”—Heb. 10:36.