1-2. (a) Oinsá mak Jeová koʼalia ba ema? (b) Saida mak ita sei aprende iha lisaun neʼe?

JEOVÁ gosta koʼalia ho ema. Iha tempu uluk, nia uza profeta, anju, no ninia Oan-Mane Jesus Kristu atu fó sai ninia hanoin ba ema. (Amós 3:7; Gal 3:19; Apok 1:1) Ohin loron, nia koʼalia ho ita liuhusi ninia Liafuan Bíblia. Nia fó Bíblia ba ita atu ita bele aprende kona-ba ninia hanoin no komprende ninia dalan sira.

² Bainhira Jesus iha rai, Jeová koʼalia husi lalehan iha situasaun tolu. Mai ita koʼalia kona-ba saida mak Jeová fó sai, saida mak ita aprende husi ninia liafuan sira-neʼe, no oinsá mak ita hetan benefísiu husi ninia liafuan.

3. Hanesan ita lee iha Marcos 1:9-11, saida mak Jeová dehan bainhira Jesus hetan batizmu, no liafuan sira-neʼe hatudu sai pontu importante saida?

³ Marcos 1:9-11 konta akontesimentu primeiru neʼebé Jeová koʼalia husi lalehan. (Lee.) Nia dehan: “Ó mak haʼu-nia Oan-Mane neʼebé haʼu hadomi, neʼebé halo haʼu-nia laran kontente.” Ita bele fiar katak bainhira Jesus rona ninia Aman fó sai liafuan sira-neʼe hodi hatudu ninia domin no apoia, neʼe book tebes Jesus nia laran! Jeová nia liafuan fó sai pontu importante tolu kona-ba Jesus. Primeiru, Jesus mak ninia Oan-Mane. Segundu, Jeová hadomi ninia Oan-Mane. Terseiru, Jeová kontente ho ninia Oan-Mane. Mai ita haree didiʼak pontu ida-idak.

4. Jesus hahú relasaun foun saida ho Maromak bainhira nia hetan batizmu?

⁴ “Ó mak haʼu-nia Oan-Mane.” Ho liafuan sira-neʼe, Jeová hatudu katak ninia Oan-Mane Jesus neʼebé nia  hadomi, hahú ona relasaun foun ida ho Nia. Antes Jesus mai iha rai, nia mak Maromak nia Oan-Mane neʼebé Maromak kria ho isin espíritu. Maibé, bainhira nia hetan batizmu, Maromak hili nia liuhusi espíritu santu no sai Maromak nia Oan-Mane iha dalan foun. Agora Maromak fó nia esperansa atu fila fali ba lalehan hodi sai nuʼudar Liurai no Amlulik Boot. (Lc 1:31-33; Ebr 1:8, 9; 2:17) Tan neʼe bainhira Jesus hetan batizmu, ninia Aman iha razaun hodi dehan: “Ó mak haʼu-nia Oan-Mane.”—Lc 3:22.

5. Oinsá mak ita bele banati-tuir Jeová nia ezemplu kona-ba hatudu domin no anima?

⁵ “Ó mak . . . haʼu hadomi”. Jeová nia ezemplu kona-ba fó sai domin no anima, fó-hanoin ita atu buka mós oportunidade atu anima ema seluk. (João 5:20) Ita sai buras hanesan ai ida bainhira ema neʼebé ita hadomi hatudu domin no gaba ita. Nuneʼe mós, ita-nia irmaun-irmán no família presiza domin no anima. Bainhira ita gaba sira, ita hametin sira-nia fiar no ajuda sira atu serbí Jeová ho laran-metin. Importante loos atu inan-aman anima sira-nia oan. Bainhira inan-aman gaba sira-nia oan husi laran no hatudu domin ba sira, neʼe sei ajuda oan atu sai buras hanesan ai ida.

6. Tanbasá mak ita bele iha konfiansa ba Jesus?

⁶ “Ó . . . halo haʼu-nia laran kontente.” Liafuan sira-neʼe hatudu Jeová nia konfiansa katak Jesus sei kumpre ninia Aman nia hakarak. Tan neʼe ita mós bele iha konfiansa katak Jesus sei kumpre Jeová nia promesa hotu. (2 Kor 1:20) Bainhira ita hanoin kona-ba Jesus nia ezemplu, ita sei hametin ita-nia hakarak atu aprende husi nia no laʼo tuir  ninia ain-fatin. Jeová mós iha konfiansa katak ninia atan sira nuʼudar grupu sei kontinua aprende husi ninia Oan-Mane.—1 Ped 2:21.

7. Tuir Mateus 17:1-5, iha situasaun saida mak Jeová koʼalia husi lalehan, no nia dehan saida?

⁷ Lee Mateus 17:1-5. Dala segundu neʼebé Jeová koʼalia husi lalehan mak bainhira “Jesus nakfila an”. Iha momentu neʼe, Jesus konvida ona Pedro, Tiago, no João atu akompaña nia ba foho aas ida. Iha neʼebá, sira haree vizaun furak ida. Jesus nia oin sai naroman no ninia roupa sai nabilan loos. Iha ema naʼin-rua, neʼebé reprezenta Moisés no Elias, komesa koʼalia ba Jesus kona-ba ninia mate no moris-hiʼas. Maski apóstolu naʼin-tolu neʼe “matan-dukur loos”, maibé sira matan-moos ona bainhira sira haree vizaun kmanek neʼe. (Lc 9:29-32) Tuirmai, kalohan nabilan ida taka sira, no sira rona Maromak nia lian husi kalohan! Hanesan bainhira Jesus hetan batizmu, Jeová mós fó sai katak nia simu no hadomi ninia Oan-Mane. Nia dehan: “Neʼe mak haʼu-nia Oan-Mane neʼebé haʼu hadomi, neʼebé halo haʼu-nia laran kontente.” Maibé iha momentu neʼe, Jeová hatutan tan: “Rona nia bá.”

8. Oinsá mak vizaun neʼe book Jesus no mós ninia dixípulu sira?

⁸ Vizaun neʼe fó sai nanis kona-ba glória no kbiit neʼebé Jesus sei simu iha futuru nuʼudar Liurai ba Maromak nia Ukun. Ita bele fiar katak vizaun neʼe anima no hametin Kristu atu sai prontu hodi tahan susar no mate. Vizaun neʼe mós hametin dixípulu sira-nia fiar atu bele tahan hasoru susar no halo serbisu barak. Maizumenus tinan 30 depois neʼe, apóstolu Pedro temi vizaun kona-ba Jesus nakfila an, neʼe hatudu katak nia sei hanoin-hetan vizaun neʼe.—2 Ped 1:16-18.

9. Konsellu diʼak saida mak Jesus fó ba ninia dixípulu sira?

⁹ “Rona nia bá.” Jeová hatudu ho klaru katak nia hakarak ita atu rona ba ninia Oan-Mane no halo tuir. Saida mak Jesus dehan bainhira nia iha rai? Nia fó sai buat barak neʼebé importante! Porezemplu, nia hanorin ninia dixípulu sira oinsá atu haklaken liafuan diʼak, no nia fó-hanoin sira beibeik atu matan-moris nafatin. (Mt 24:42; 28:19, 20) Nia mós anima sira atu hakaʼas an makaʼas no la rende an. (Lc 13:24) Jesus dehan katak ninia dixípulu sira presiza hatudu domin ba malu, iha unidade, no halo tuir ninia mandamentu sira. (João 15:10, 12, 13) Konsellu neʼebé Jesus fó ba ninia dixípulu sira mak diʼak duni! Konsellu neʼe mós diʼak ba ita ohin loron.

10-11. Oinsá mak ita bele hatudu katak ita rona ba Jesus?

¹⁰ Jesus hatete: “Ema hotu neʼebé halo tuir lia-loos rona haʼu-nia lian.” (João 18:37) Ita hatudu ita rona ba ninia lian bainhira ita “kontinua hatudu pasiénsia ba malu no prontu atu fó perdua ba malu ho laran tomak”. (Kol 3:13; Lc 17:3, 4) Ita mós hatudu ita rona ba ninia lian bainhira ita haklaken liafuan diʼak ho laran-manas “iha tempu neʼebé diʼak no iha tempu neʼebé susar”.—2 Tim 4:2.

¹¹ Jesus hatete: “Haʼu-nia bibi sira rona haʼu-nia lian.” (João 10:27) Kristu nia dixípulu sira hatudu katak sira rona Jesus hodi tau atensaun ba ninia liafuan no mós halo tuir. Sira la husik “hanoin resin kona-ba moris neʼe” dada sira-nia  atensaun. (Lc 21:34) Sira sente katak importante tebes atu halo tuir Jesus nia mandamentu maski hasoru susar. Ita-nia irmaun-irmán barak hasoru susar boot, inklui ema haterus, kiak tebes, no dezastre naturais. Maski hasoru susar sira-neʼe hotu, sira nafatin laran-metin ba Jeová. Jesus promete ba sira: “Ema neʼebé hatene haʼu-nia ukun-fuan no halo tuir, ema neʼe mak hadomi haʼu. No ema neʼebé hadomi haʼu, haʼu-nia Aman mós sei hadomi nia.”—João 14:21.

12. Saida mak dalan seluk neʼebé ita bele hatudu katak ita rona ba Jesus?

¹² Dalan seluk tan oinsá ita rona ba Jesus mak hodi apoia sira neʼebé nia hili atu dirije ita. (Ebr 13:7, 17) Foin lalais neʼe Maromak nia organizasaun halo ona mudansa barak, inklui uza ekipamentu no métodu foun iha serbisu haklaken, dalan foun atu halaʼo reuniaun loron baileet, dalan foun atu harii, hadiʼa, no tau matan ba Reuniaun-Fatin. Ita agradese tebes ba matadalan neʼebé sira fó ba ita ho domin! Ita bele fiar katak Jeová sei haraik bensaun ba ita-nia hakaʼas an hodi halo tuir matadalan husi ninia organizasaun.

13. Ita hetan benefísiu saida hodi rona ba Jesus?

¹³ Ita hetan benefísiu hodi rona ba Jesus nia hanorin hotu. Jesus promete ba ninia dixípulu sira katak ninia hanorin sei halo sira sente kmaan. Nia dehan: “Imi sei sente kmaan. Tanba haʼu-nia ai-leba fasil atu lori, no haʼu-nia naha kmaan.” (Mt 11:28-30) Maromak nia Liafuan, neʼebé inklui mós Evanjellu haat neʼebé konta kona-ba Jesus nia moris no haklaken, sei halo ita sente kmaan, hametin ita-nia relasaun ho Maromak, no halo ita sai matenek. (Sal 19:7; 23:3) Jesus hatete: “Ksolok ba sira neʼebé rona Maromak nia liafuan no halo tuir!”—Lc 11:28.

14-15. (a) Tuir João 12:27, 28, saida mak situasaun terseiru neʼebé Jeová koʼalia husi lalehan? (b) Tanbasá mak Jeová nia liafuan fó kmaan no hametin Jesus?

¹⁴ Lee João 12:27, 28. Evanjellu João hakerek kona-ba situasaun terseiru neʼebé Jeová koʼalia husi lalehan. Loron balu antes Jesus mate, nia toʼo iha Jeruzalein atu selebra ninia Páskua ikus. Nia dehan:  “Haʼu sente laran-susar tebes.” Tuirmai nia halo orasaun: “Aman, fó glória ba Ita-nia naran.” Ninia Aman hatán husi lalehan dehan: “Haʼu fó glória tiha ona no haʼu sei fó glória tan.”

¹⁵ Jesus sente laran-susar tanba responsabilidade boot neʼebé nia tenke lori hodi laran-metin nafatin ba Jeová. Jesus hatene katak nia sei hetan terus makaʼas no sei mate iha dalan neʼebé aat. (Mt 26:38) Buat neʼebé importante liu ba Jesus mak atu fó glória ba ninia Aman nia naran. Ema duun Jesus koʼalia aat Maromak, no nia hanoin barak katak ninia mate bele hafoʼer Maromak nia naran. Tuir loloos, Jeová nia liafuan fó duni konfiansa ba Jesus katak Jeová nia naran sei hetan glória. Ninia Aman nia liafuan fó kmaan no hametin nia atu tahan buat neʼebé sei mosu. Karik Jesus mesak mak komprende ninia Aman nia liafuan iha tempu neʼebá, maibé Jeová haruka ema atu hakerek liafuan sira-neʼe atu ita hotu bele hatene.—João 12:29, 30.

16. Tanbasá mak dala ruma ita hanoin barak kona-ba ema neʼebé hafoʼer Maromak nia naran?

¹⁶ Hanesan Jesus, karik ita mós hanoin barak kona-ba ema neʼebé hafoʼer Jeová nia naran. Karik ita sai vítima ba hahalok la justisa hanesan Jesus. Ka karik ita sai laran-susar tanba istória falsu neʼebé ita-nia inimigu habelar. Karik ita hanoin  kona-ba oinsá istória sira-neʼe hafoʼer Jeová nia naran no ninia organizasaun. Iha situasaun hanesan neʼe, Jeová nia liafuan mak fó kmaan duni ba ita. Ita la presiza sai estrese demais. Ita bele fiar katak “Maromak nia dame neʼebé aas liu ema nia hanoin hotu sei proteje [ita-nia] laran no [ita-nia] kbiit atu hanoin liuhusi Kristu Jesus”. (Flp 4:6, 7) Jeová sei kontinua fó glória ba ninia naran. Liuhusi ninia Ukun, nia sei hadiʼa buat aat hotu neʼebé Satanás no mundu neʼe halo ba Maromak nia atan sira neʼebé laran-metin.—Sal 94:22, 23; Isa 65:17.

17. Hodi tuir Isaias 30:21, oinsá mak Jeová koʼalia ba ita ohin loron?

¹⁷ Jeová sei kontinua koʼalia ba ita ohin loron. (Lee Isaias 30:21.) Tuir loloos, ita la rona Maromak koʼalia ba ita husi lalehan. Maibé, nia fó matadalan ba ita liuhusi ninia Liafuan Bíblia. Liután neʼe, Jeová nia espíritu book “atan neʼebé laran-metin no matenek” atu kontinua fó ai-han ba Ninia povu. (Lc 12:42) Ita simu ai-han espirituál barak hanesan livru sira no informasaun online, vídeo barak, no mós gravasaun sira ba ita-nia livru.

18. Oinsá mak Jeová nia liafuan hametin ita-nia fiar no fó ita aten-brani?

¹⁸ Mai ita hanoin nafatin liafuan neʼebé Jeová koʼalia bainhira ninia Oan-Mane iha rai! Maromak nia liafuan sira neʼebé hakerek iha Bíblia, bele fó ita konfiansa katak Jeová kontrola buat hotu no nia sei hadiʼa buat aat hotu neʼebé Satanás no mundu aat neʼe halo ba ita. Mai ita hakaʼas an atu rona didiʼak ba Jeová nia lian. Se ita halo nuneʼe, ita sei hetan susesu hodi tahan problema hotu neʼebé ita hasoru agora no iha futuru. Bíblia fó-hanoin ita katak ‘ita presiza tahan, atu nuneʼe, bainhira ita halo tiha Maromak nia hakarak, ita bele simu buat neʼebé nia promete ona’.—Ebr 10:36.