1-2. a) Jehovha a di gu ganeya kharini ni vathu? b) Ginani hi na ganeyago khigyo avba nya ndrima yeyi?

JEHOVHA a ngu gola ngudzu gu ganeya ni ethu. Gale, a di gu thumisa dzingilozi, vaprofeti, ni Gyanana gyaye Kristo Jesu gasi gu tivegisa gugola gwaye. (Amosi 3:7; Gal. 3:19; Gutu. 1:1) Muhuno, a gu ganeya ni ethu khu gu thumisa Lito laye, Bhibhiliya. Hi ningide Bhibhiliya gasi hi tugula gugola gwaye hi bwe hi pwisisa dzindziya dzaye.

² Tepo Jesu a nga ba ari mafuni, Jehovha ganede guraru khu ndzadzini. Hongoleni hi wone esi Jehovha a ganedego, ni esi hi si hevbulago ga malito yaye, ni edzi hi phasegago khidzo khesi a ganedego.

3. Kha nga hi leridego ga Marko 1:9-11, ginani egi Jehovha a ganedego tepo Jesu a nga bhapatiswa, nigu esi a ganedego so yeyedza silo muni nya siraru?

³ Marko 1:9-11 a gu yeyedza tepo nyo pheye eyi Jehovha a ganedego nari khu ndzadzini. (Leri.) A di khuye: “Uwe u Mwamana wangu nya gigodwa ngudzu, monyo wangu wu ngu tangadziswa khuwe.” Nga dundrugeya khedzi Jesu a tsakidego khidzo khu gupwa lito la Papayi waye na gu ganeya khedzi a mu haladzago khidzo ni gu mu tiyisa! Malito ya Jehovha ma yeyedzide silo siraru nya lisima maningano ni Jesu. Nyo pheye, Jesu Gyanana gya Jehovha. Nya wuvili, Jehovha a ngu gi haladza Gyanana gyaye. Nya wuraru, Jehovha a ngu tangadziswa khu Gyanana gyaye. Hongoleni hi si hevbulani khu gimwegyo ni gimwegyo.

4. Hwane nya gubhapatiswe gwaye, wulongo muni nya wuphya wu phedwego khu Jesu ni Nungungulu?

⁴ “Uwe u Mwamana wangu.” Khu malito yaya, Jehovha a di gu yeyedza gu khuye Gyanana gyaye a gi golago, Jesu, gi di gu pheya wulongo nya wuphya Naye. Tepo Jesu a nga ba ari ndzadzini, a diri gyanana nya liphuvbo gya Nungungulu.  Ambari ulolo, tepo a nga bhapatiswa, a di todzwa khu liphuvbo nya guage. Khu tepo yoyo, Nungungulu a di gu yeyedza gu khuye kha nga olu Jesu a nga todzwa kha nga Gyanana Gyaye, a diri ni gutumba nyo bweleye ndzadzini a ya khala Pfhumu yi emisidwego ya Nungungulu ni Muphasi nya Khongolo nya Mhamba. (Luka 1:31-33; Hebh. 1:8, 9; 2:17) Khu kharato, hwane nyo ba Jesu a bhapatisidwe, Papayi waye a diri ni gighelo nyo pwale nyo ganeye khuye: “Uwe u Mwamana wangu.” — Luka 3:22.

5. Hi nga pimedzeya kharini giyeyedzo gya Jehovha nya gu haladze ni gu tiyisa vambe?

⁵ “Nya gigodwa.” Jehovha embede Jesu gu khuye a di gu mu haladza ni gu tsaka khuye. Isoso so hi dundrugisa gu khiso anethu gu vbwetega hi vbwetedzeya dzindziya nyo tiyise vambe. (Joh. 5:20) Hi ngu tsaka ngudzu tepo hi wonago gu khethu muthu nyo khaguri hi mu golago a ngu hi haladza ni gu hi zundza khesi hi girago. Khu ndziya nyo fane, gu vbwetega hi haladza ni gu tiyisa vandriyathu libandlani ni valongo vathu. Tepo hi zundzago vambe, ho tiyisa gukhodwa gwawe hi bwe hi va phasa gu thumeya Jehovha khu gutumbega. Vavelegi ngudzungudzu, gu vbwetega va tiyisa sanana sawe. Va gu si zundza khu monyo watshavbo ni gu si haladza, va na si phasa gu dandra khu liphuvboni.

6. Khu ginani hi tumbago Jesu Kristo?

⁶ “Monyo wangu wu ngu tangadziswa khuwe.” Malito yoyo mo yeyedza gu khayo Jehovha a di gu tiyisega gu khuye Jesu a di hadzi gira gugola ga Papayi waye khu gutumbega. Kha nga olu Jehovha a gi tumbago ngudzu Gyanana gyaye, anethu hongoleni hi tiyisegani gu khethu Jesu nuye a na tadzisa satshavbo situmbiso sa Jehovha. (2 Kor. 1:20) Tepo hi dundrugeyago khu giyeyedzo gya Jesu, ha gu tiyisa gudziemiseya gwathu nyo hevbule khuye ni gu landreya giyeyedzo  gyaye. Kha nga olu Jehovha a nga ba a tumba Jesu, a ngu tumba gambe gu khuye kha nga tsawa, sithumi saye si na simama gu hevbula khu Gyanana gyaye. — 1 Ped. 2:21.

7. Khu guya khu Matewu 17:1-5, khu yevbi tepo eyi Jehovha a ganedego khu ndzadzini, nigu a di khuye ginani?

⁷ Leri Matewu 17:1-5. Tepo nya wuvili eyi Jehovha a ganedego khu ndzadzini, kheyi Jesu a nga “vbindrugedza giemo.” Jesu a di rana Pedro, Jakobe ni Johane va hongola naye gigomoni nya gulaphe. Na vari iyoyo, va di wona giwoniso nyo samadzise. Khovbe ya Jesu yi di ngangameya, sombo saye si aga kha nga wenengedzo. Gu di wonega vathu vavili va nga ba va emeya Mosi ni Eliya, va pheya gu bhula ni Jesu khu gufa ni guwuswa gwaye. Ambari olu vapostoli vale nya vararu va nga ba va “wongomedwa khu ligovbe,” na va khendzugide, va di wona giwoniso gile nyo samadzise. (Luka 9:29-32) Khu gulandreya, va di fenengedzwa khu lipfhi nya gungangameye, khu vbakari nya lipfhi va dipwa lito — Lito la Nungungulu! Kha nga edzi a giridego khidzo tepo Jesu a nga bhapatiswa, Jehovha a di yeyedza gutangala mwendro gutsaka khu Gyanana gyaye, khu gu khuye: “Oyu khu Mwamana wangu nya gu mu haladze ngudzu, a tsakisago monyo wangu.” Ganiolu ga tepo yeyi Jehovha a di bwe khuye: “Mu yingiseni.”

8. Giwoniso gi khuhide kharini Jesu ni vapizane vaye?

⁸ Giwoniso gegi gi di yeyedza magavbudzo basi nya wudhumo ni tshivba a nga hadzi manega nayo Jesu kha nga Pfhumu nya Mufumo wa Nungungulu. Kha si kanakanisi gu khiso Kristo tiyisidwe ni gu ningwa tshivba nyo timiseye gutshaniseka ni gufa nyo vbise ngudzu gu nga ba gu mu vireya. Giwoniso gi di bwe gi tiyisa gukhodwa ga vapizane. Isoso si va phaside gu dzi dongiseya gu gira thumo nyo garadze va nga hadzi gira ni silingo va nga hadzi tshangana naso. Tanga nya 30 myaga na gi giregide giwoniso gegi, Pedro gi khumbugide gasi gu yeyedza gu khuye gi di ngo vbanya mapimoni gwawe. — 2 Ped. 1:16-18.

9. Wusingalagadzi muni nya lisima owu Jesu a ningidego vapizane vaye?

⁹ “Mu yingiseni.” Jehovha a si vegide guagani gu khuye o vbweta gu khuye hi engisa malito ya Gyanana gyaye. Ginani a ganedego Jesu tepo a nga ba ari mafuni? Ganede silo nya singi si yelago gu si engisa! Khu giyeyedzo, khu ndziya nya lihaladzo hevbudzide valandreyi vaye edzi va yedego gu tshumayela khidzo mahungu nya yadi, a bwe a va kutsa gunganigungani gu khala na va dongide. (Mat. 24:42; 28:19, 20) A di bwe a va kutsa gu simama va dzi garadza, ni gu mba vbeya tshivba. (Luka 13:24) Jesu ganede ngudzu khu lisima nya gu valandreyi vaye va haladzana khu gyawe, va simama gupwanana, va bwe va engisa sileletelo saye. (Joh. 15:10, 12, 13) Wusingalagadzi owu Jesu a ningidego vapizane vaye wu di gu phasa ngudzu. Wusingalagadzi wowo wu ngari ni lisima ngudzu muhuno nga gale.

10-11. Hi nga yeyedza kharini gu khethu hi ngu engisa Jesu?

¹⁰ Jesu a di khuye: “Uye a gu wa lisine a ngupwa lito langu.” (Joh. 18:37) Tepo hi simamago hi ‘phasedzana ni gu tsetselelana khu gyathu’, ha gu yeyedza gu khethu hi ngu engisa lito laye. (Kol. 3:13; Luka 17:3, 4) Ha gu yeyedza gambe gu khethu hi ngu engisa lito laye khu gu tshumayela khu sighingi mahungu nya yadi teponi ‘nya gugaradze niyo nya guvbevbuge.’ — 2 Thim. 4:2.

¹¹ Jesu a di khuye: “Dzinvuta dzangu dzi ngu yingisa lito langu.” (Joh. 10:27) Valandreyi va Kristo vo yeyedza gu khavo va ngu engisa Jesu nasiri basi khu gupwa malito  yaye, ganiolu khu gu ma thumisa gambe guvbanyani. Avo kha va vbedzwi tshivba khu “sigaradzo nya guvbanye.” (Luka 21:34) Vbavbandze nya isoso, va gu thangisa gu engisa sileletelo sa Jesu guvbanyani gwawe, ambari dzo ba dzi wuya gu gira isoso. Vandriyathu nya vangi va ngu timiseya silingo nyo garadze, nya nga guwugedwa khu vawugeyi, wusiwana, ni dzimhango nya tumbunugo. Ambari ulolo, vo simama gu tumbega ga Jehovha ambari so garadza kharini. Jesu a gu tiyisa vathu vovo khu gu khuye: “Oyu atigo milayo yangu, a gu yi vegedza, khuye a nyi golago. Gasi oyu a nyi golago, a ngu godwa khu Babe wangu.” — Joh 14:21.

12. Khu yevbini yimbe ndziya hi nga yeyedzago khiyo gu khethu hi ngu engisa Jesu?

¹² Yimbe ndziya hi kodzago gu yeyedza khiyo gu khethu hi ngu engisa Jesu, khu gu hi thumisana gwadi ni ava va emisidwego gu hi thangeya. (Hebh. 13:7, 17) Myagani yeyi, hengeledzano ya Nungungulu yi ngu vbindrugedza silo nya singi, nya nga mathumiselo nya dziferameta nya dziphya ni matshumayelelo nya maphya, magirelo nya tshangano wathu wa vbakari nya semana, ni mavbahelo nya dziSalawu nya Mufumo, guvbahedza ni gu dzi lungisalungisa. Hi ngu bonga ngudzu khu wuthangeyi wowu nya wadi! Hongoleni hi tiyisegani gu khethu Jehovha a na kategisa gudzigaradza gwathu nyo landreye sileletelo hi ningwago khu hengeledzano.

13. Ha gu phasega kharini khu gu engisa Jesu?

¹³ Hi ngu phasega khu gu engisa satshavbo esi Jesu a hi hevbudzidego. Jesu tumbiside vapizane vaye gu khuye sihevbudzo saye si di hadzi gu va tangadzisa. A di khuye: ‘Mu na mana gutangaIa nya mihefemulo yanu. Kholu siIeIetelo sangu kha si garadzi.’ (Mat. 11:28-30) Lito la Nungungulu, li patago dziIvhangeli dzina nya matimo nya guvbanya ni thumo wa Jesu, li ngu hi tiyisa ni gu hi gengedza. (Ndzi. 19:7; 23:3) Jesu a di khuye: “Va kategide avo va pwago magana ya Nungungulu, va ma landrisa.” — Luka 11:28.

14-15. a) Khu yevbini tepo nya wuraru khu guya khu Johane 12:27, 28 eyi Jehovha a ganedego khu ndzadzini? b) Khu ginani malito ya Jehovha ma nga hadzi gu tiyisa ni gu thaveleya Jesu?

¹⁴ Leri Johane 12:27, 28. Ivhangeli ya Johane yo ganeya khu tepo nya wuraru eyi Jehovha a ganedego khu ndzadzini. Na gu tshade matshigwana gasi afa, Jesu a di hongola Jerusalema gasi guya gira Phasika yaye nyo hegise. Uye a di khuye: “Hefemulo wangu  womo gutshanisekani.” Khavbovbo a di gombeya, khuye: “Baba, dhumisa lina Iago.” Khu gulandreya, Papayi waye a di ganeya khu ndzadzini, khuye: “Gale na nyi li dhumiside, gambe nyi nga na gu li dhumisa.”

¹⁵ Jesu a di gu garadzega ngudzu kholu a di yede gu tumbega ga Jehovha kala gufani gwaye. A di gu dziti gambe gu khuye a di hadzi tshaniswa ni gu songwa khu ndziya nya litsoro. (Mat. 26:38) Ganiolu ga satshavbo soso, Jesu a di gu vbweta gu dhumisa lina la Papayi waye. Jesu a di singedzwa gu pwani mwalo githawo khu Nungungulu, nigu a di gu garadzega khu gu nyenyeziswa nya lina la Nungungulu. Kha si kanakanisi gu khiso malito ya Jehovha ma mu tiyiside ngudzu! A di gu tiyisega gu khuye lina la Jehovha li na dhumiswa. Malito ya Papayi waye ma mu thavelede ni gu mu tiyisa gasi gu emisana ni esi si nga ba sita. Ambari olu vbakari nya vathu vatshavbo va nga ba va romo a gu Jesu enga a nga pwisisa esi Papayi waye a nga ganeya, Jehovha giride gu malito Yaye ma lovwa gasi gu hatshavbo hi phasega khayo. — Joh. 12:29, 30.

16. Khu ginani dzimbe dzitepo hi nga garadzegago khu gu nyenyeziswa nya lina la Nungungulu?

¹⁶ Kha nga Jesu, anethu adzina hi ngu garadzega khu gu nyenyeziswa nya lina la Jehovha. Adzina hi ngu tshaniswa nga Jesu. Mwendro gu garadzega khu malipha ma swayedwago khu vawugeyi vathu. Adzina hi nga garadzega khedzi malipha yoyo ma nyenyezisago khidzo lina la Jehovha ni hengeledzano yaye. Sigaradzoni soso, malito ya Jehovha  ma nga hi tiyisa ngudzu. Hi nga garadzegi ngudzu khu gu nyenyeziswa nya lina la Jehovha ni hengeledzano yaye. Hongoleni hi tiyisegani gu khethu ‘gurula ga Nungungulu gu dzi kodzago gu vboha ni omu hi si gu alakanyigo, gu na sayisa myonyo ni mapimo yathu khu ga Kristo Jesu.’ (Filp. 4:6, 7) Jehovha gima kha na nga tandrega gu dhumisa lina laye. Khu gu thumisa Mufumo waye, a na dusa satshavbo sigaradzo esi Sathane ni litigo laye va reseyago sithumi Saye nyo tumbege. — Ndzi. 94:22, 23; Isa. 65:17.

17. Khu guya khu Isaya 30:21, Jehovha o ganeya ni ethu muhuno khu ndziya muni?

¹⁷ Jehovha a nga gu ganeya ni ethu muhuno. (Leri Isaya 30:21.) Lisine gu kha hi mupwi Nungungulu na gu ganeya ni ethu khu ndzadzini. Ambari ulolo, hi ningide Lito laye, Bhibhiliya, a li thumisago gasi gu hi thangeya. Gimbe gambe khu gu, liphuvbo la Jehovha lo thumisa ‘githumi nya gutumbege’ gasi gu simama gu ninga guhodza nya liphuvbo sithumi Saye. (Luka 12:42) Hi na ni mabhuku nya mangi nyo ghandlwe ni omu nya sayiti, dzivhidhiyu nya dzingi, ni mabhuku nya dziawudhiyu gasi gu hi phasa gu tiyisa gukhodwa gwathu!

18. Malito ya Jehovha ma nga tiyisa kharini gukhodwa gwago ni hwambo wago?

¹⁸ Hongoleni hi dundrugeya khu malito aya Jehovha a embedego Gyanana gyaye tepo gi nga ba giri mafuni! Malito ya Nungungulu ma gomogo omu nya Bhibhiliya, ma ngu hi tiyisegisa gu khayo Jehovha a ngu si wona satshavbo si hi dugeleyago nigu a na vbedza sigaradzo satshavo esi Sathane ni litigo laye nyo vivbe va hi reseyago. Nigu hongoleni hi dzi emiseya gu engiseya gwadi lito la Jehovha. Ha gu gira isoso, hi na si kodza gu timiseya ni gevbini gigaradzo olu, ambari ni sigaradzo si nga gu tago. Bhibhiliya ya gu hi dundrugisa gu khiyo: “Timiselani gasi mu gira guhaladza ga Nungungulu, mu mane guya hakha esi a mi tumbisago.” — Hebh. 10:36.