CHIIYO 11
Swiilila Jwi lyaJehova
“Ngooyu mwanaangu . . . amuswiilile nguwe.”—MT. 17:5.
LWIIMBO 89 Amuswiilile Akutobela Zyaambwa Kutegwa Mulelekwe
ZITAYIIGWE *
1-2. (a) Jehova wakali kubelesyaanzi kwaambuula abantu? (b) Tulalanga-langaanzi muchiiyo eechi?
JEHOVA ulayanda kwaambuula andiswe. Chiindi, wakali kubelesya basinsimi, bangelo, Mwanaakwe, Kristu Jesu kuti tuzibe mizeezo yakwe. (Am. 3:7; Gal. 3:19; Ciy. 1:1) Mazubaano, waambuula aandiswe kabelesya Jwi lyakwe Bbayibbele. Wakatupa Jwi lyakwe kuti tuzibe mizeezo yakwe amalayilile aakwe.
2 Chiindi Jesu naakali aanyika, Jehova wakaambuulaawe kwaziindi zitatu, kuzwa kujulu. Atulange-lange kuti Jehova wakali kutyeni, nzitwiiya kumajwi ngaakaamba ambuzitugwasya nzyakaamba.
“NDUWE MWANAANGU UUYANDWA”
3. Nitubala majwi aali muli Marko 1:9-11, Jehova wakatyeni chiindi Jesu naakabbabbatizigwa alubo majwi aaya atondeezya twaambo tuli tutatu?
3 Marko 1:9-11, yaambuula atala achiindi chakusaanguna Jehova naakambuula kuzwa kujulu. (Bala.) Wakati: “Nduwe mwanaangu uuyandwa, ndakondwa loko kulinduwe.” Kweelede kuti majwi aaya akamusika aamoyo Jesu naakamvwa jwi lyaWisi litondeezya kuti ulamuyanda akumusungwaazya! Majwi aaJehova akatondeezya twaambo tutatu atala aJesu. Kaambo kakusaanguna, Jesu mwanaakwe. Kachibili, Jehova ulamuyanda Mwanaakwe. Kachitatu, Jehova ulabotelwa aMwanaakwe. Atulangisisye twaambo ootu, kamwi akamwi.
4. Jesu wakaba Mwana waLeza munzila iili mpya naakabbabbatizigwa?
4 “Nduwe mwanaangu.” Mumajwi aaya, Jehova wakatondeezya kuti Mwanaakwe ngwayandisya, Jesu, wakali waba aabweenzinyina bupya aWisi. Kachili kujulu, Jesu wakali mwana waLeza wamuuya. Pesi chiindi naakabbabbatizigwa, wakananikwa amuuya uusalala. Aachiindi eecho, Leza wakatondeezya kuti Jesu wakali waba Mwanaakwe uunanikidwe akuti wakali waba aabulangilizi bwakubweeda kujulu kuti akabe Mwaami uusalidwe aaLeza kali Mupayizi Mupati. (Lk. 1:31-33; Heb. 1:8, 9; 2:17) Nkinkaako, chiindi Jesu naakabbabbatizigwa, kwakali kweelela kuti Wisi aambe kuti: “Nduwe Mwanaangu.”—Lk. 3:22.
Kulumbayizigwa akusungwaazigwa kupa kuti tubotelwe (Langa fuka 5) *
5. Kujana twachitobelezya biyeni chikozyano chaJehova chakutondeezya luyando akusungwaazya bamwi?
5 “Nduwe . . . uuyandwa.” Chikozyano chaJehova chakutondeezya luyando akuti zilamubotezya nzibachita bamwi chituyeezya kuti tweelede kubasungwaazya bamwi. (Joh. 5:20) Tulabotelwa kuti muntu ngutuyanda watondeezya kuti ulatuyanda akutulumba akaambo kazibotu nzituchita. Munzila iikozyenie, bamumbungano abamumpuli bayanda kuti tubatondeezye luyando akubasungwaazya. Kulumba bamwi kusimya lusyomo lwabo alubo kubagwasya kuti bakombe Jehova chakusyomeka. Bazyali beelede kusungwaazya bana babo. Kuti bazyali kabalumbayizya bana babo akubatondeezya luyando, zipa kuti babotelwe.
6. Nkamboonzi nitukonzya kumusyoma Jesu Kristu?
6 “Ndakondwa loko kulinduwe.” Majwi aaya atondeezya kuti Jehova wakali kusyoma kuti Jesu wakali kuyoochita kuyanda kwaWisi. Jehova wakali kusyoma kuti Jesu uyoochita oobo, andiswe tulakonzya kusyoma kuti Jesu uyoozizuzikizya zisyomezyo zyaJehova zyoonse. (2 Kor. 1:20) Kuyeeyesesya atala achikozyano chaJesu, kupa kuti tuyande kwiiya kulinguwe akutobelezya mikondo yakwe. Mbuuli Jehova mbaakali kumusyoma Jesu, uli aalusyomo lwakuti bakombi bakwe kabali kabunga, bayooyinkilila kunembo kwiiya kuMwanaakwe.—1 Pet. 2:21.
“AMUSWIILILE NGUWE”
7. Kweendelana amajwi aali muli Matayo 17:1-5, ndiilili Jehova naakambuula kuzwa kujulu alubo wakatyeni?
7 Bala Matayo 17:1-5. Chiindi chachibili Jehova naakambuula kuzwa kujulu, nkuuchiindi Jesu “naakasanduka.” Jesu wakakumbide Petro, Jakkobo aJohane kuti bamusindikile kuchilundu chilamfu. Nibakali kuchilundu, bakabona chilengaano chigambya. Busyu bwaJesu bwakamweka azigogo zyakwe zyakatuba bu. Kwakaboneka bantu babili bakali kwiiminina Musa aEliya, mpawo bakatalisya kwaambuula aJesu atala akufwa akubusigwa kwakwe. Nikuba kuti baapostolo aaba batatu “bakafwidwe ng’onzi,” bakabona chilengaano eechi chigambya nibakasinsimuka. (Lk. 9:29-32) Kuzwa waawo, bakavumbwa aajoba limweka mpawo bakamvwa jwi lyaLeza mujoba eelyo. Mbuuli kuchiindi chakubbabbatizigwa kwaJesu, Jehova wakatondeezya kuti ulabotelwa aMwanaakwe akuti ulamuyanda naakati: “Ngooyu Mwanaangu uuyandwa ngwinkondelwa.” Pesi kuchiindi eechi, Jehova wakayungizya kati: “Amuswiilile nguwe.”
8. Chilengaano chakamugwasya biyeni Jesu abasikwiiya bakwe?
8 Chilengaano eechi chakatondeezya bulemu amanguzu Jesu ngaakali kuyoojana kunembo kali Mwaami waBwaami bwaLeza. Zili aantanganana kuti chilengaano eechi chakamusungwaazya akumusimya Kristu kumapenzi amachise ngaakali kuyooswaana naakali kuyoojayigwa. Alubo chakasimya lusyomo lwabasikwiiya bakwe kumasunko ngibakali kuyooswaana muminyaka yakali kutobela. Nikwakiinda minyaka iili 30, mwaapostolo Petro wakaambuula atala akusanduka ooku, zitondeezya kuti wakachili kukuyeeya.—2 Pet. 1:16-18.
9. Ngaali malayilile aayandikana Jesu ngaakabuzya basikwiiya bakwe?
9 “Amuswiilile nguwe.” Jehova wakatondeezya chaantanganana kuti uyanda kuti tuswiilile majwi aakaambwa aMwanaakwe akwaatobela. Jesu wakatyeni naakali aanyika? Wakaamba makani aayandikana ngitweelede kuswiilila! Muchikozyano, wakayiisya batobeli bakwe mbubeelede kukambawuka makani mabotu alubo wakali kubayeezya mbukuyandikana kukkala kabalindide. (Mt. 24:42; 28:19, 20) Wakababuzya kuti babeleke changuzu akuti kabakakatilide. (Lk. 13:24) Jesu wakabuzya batobeli bakwe mbukuyandikana kutondeezyania luyando, kujatana akutobela milawu yakwe. (Joh. 15:10, 12, 13) Nisimpe, Jesu wakababuzya malayilile aayandikana basikwiiya bakwe! Malayilile aaya achiyandikana asunu mbuuli kuchiindi Jesu naakaawamba.
10-11. Kujana twatondeezya biyeni kuti tulamuswiilila Jesu?
10 Jesu wakati: ‘Boonse batobela kasimpe banoomvwa jwi lyangu.’ (Joh. 18:37) Tutondeezya kuti tulaliswiilila jwi lyakwe kwiinda mukuzumanana ‘kukkazikilana myoyo akulekelelana.’ (Kol. 3:13; Lk. 17:3, 4) Alubo tutondeezya kuti tulaliswiilila jwi lyakwe kwiinda mukukambawuka makani mabotu chabusungu “muciindi ceelede aciteelede.”—2 Tim. 4:2.
11 Jesu wakati: ‘Mbelele zyangu zilalimvwa jwi lyangu.’ (Joh. 10:27) Batobeli baKristu batondeezya kuti balamuswiilila Jesu kwiinda mukuswiilila nzyaamba akuzichita. Tabazumini kunyonganisigwa ‘amakataazyo aabuumi.’ (Lk. 21:34) Pesi kuswiilila milawu yaJesu bakubikka mubusena bwakusaanguna mubuumi nikuba muzyiimo ziyumu. Bakwesu abachizi biingi balikulisimya muzyiimo ziyumu ziswaanizya kukazigwa amfulumende, kufwaba amapenzi aalichitikila. Muzyiimo eezi zyoonse, bakkala kabasyomeka kuli Jehova nikuba nibali mumapenzi. Jesu ubasyomezya kuti: “Oyo uujisi milao yangu, akwiibamba nguundiyanda. Awalo undiyanda uyooyandwa Taata, amebo ndiyoomuyanda, ndiyoolitondezya kulinguwe.”—Joh. 14:21.
Mulimu wakukambawuka upa kuti tukkale katuswiilila Leza (Langa fuka 12) *
12. Njiili imwi nzila iitondeezya kuti tulamuswiilila Jesu?
12 Imwi nzila iitondeezya kuti tulamuswiilila Jesu, nkwiinda mukubelekelaamwi abaabo mbasalide kuti batuzulwide. (Heb. 13:7, 17) Muminyaka yayinda, mbunga yaLeza yakachita kuchincha kusiyene-siyene, kuswaanizya kubelesya zibelesyo zipya anzila zipya mukukambawuka, bubambe bwamiswaangano yaakati kamviki anzila zyakuyaka, kubambulula akubamba Maanda aaBwaami. Tulakulumba kuzulwidwa munzila eezi zitondeezya luyando akuti bali aandaba andiswe. Eezi zipa kuti tube aachoonzyo chakuti Jehova uyookulongezya kweezya kwesu kutobela malayilile ngitujana kumbunga yakwe.
13. Kuswiilila Jesu kutugwasya biyeni?
13 Kuswiilila malayilile oonse Jesu ngaakayiisya kulatugwasya. Jesu wakasyomezya basikwiiya bakwe kuti njiisyo zyakwe zyakali kuyoobakatalusya. Wakati: ‘Mulakatalukwa mumyoyo yanu nkaambo jokwe lyangu talimizyi, alubo mukuli wangu muuba.’ (Mt. 11:28-30) Jwi lyaLeza liswaanizya mabbuku aali 4 aaMakani Mabotu, aapandulula buumi amulimu waJesu. Mabbuku aaya alatukatalusya, alatusimya mubukombi akupa kuti tusale chabusongo. (Int. 19:7; 23:3) Jesu wakati: ‘Babotelwa mbaabo baswiilila jwi lyaLeza akuchita nzilyaamba!’—Lk. 11:28.
‘NDIYOOPA KUTI ZINA LYANGU LILEMEKWE’
14-15. (a) Nchiichili chiindi chachitatu chilembedwe muli Johane 12:27, 28 aawo Jehova naakaambuula kuzwa kujulu? (b) Nkamboonzi majwi aaJehova naakamusimya akumusungwaazya Jesu?
14 Bala Johane 12:27, 28. Makani aali mubbuku lyaJohane aamba chiindi chachitatu Jehova naakaambuula kuzwa kujulu. Nikwakasyeede mazuba mache kuti Jesu ajayigwe, wakayinka kuJerusalemu kuti akasekelele pobwe lyaPasika lyamamanino. Wakati, ‘Ndilikataazikene mumoyo.’ Mpawo wakakomba kati: ‘Taata, lemeka zina lyako.’ Kuzwa waawo, Wisi wakamusandula kuzwa kujulu kati: ‘Ndalilemeka kale, ndiyoolilemeka lubo.’
15 Jesu wakali kataazikene akaambo kamulimu mupati wakali kuyanda kuti akkale kasyomeka kuli Jehova. Jesu wakalizi kuti wakali kuyoojayigwa munzila yalunya. (Mt. 26:38) Nikuba boobo, Jesu wakali kuyanda kulemeka zina lyaWisi. Jesu wakapegwa mulandu wakutalemeka Leza alubo wakali kataazikene kuti lufu lwakwe lwakali kuyoopa kuti Leza atalemekwi. Nisimpe kuti majwi aaJehova akamusimya Jesu! Wakaba aachoonzyo chakuti zina lyaJehova liyoolemekwa. Kweelede majwi aaWisi akamuumbulizya akumusimya kumapenzi ngaakali kuyooswaana kunembo. Kulakonzeka kuti Jesu nguwe luzutu wakazimvwisisisya nzyaakaamba Wisi kuchiindi eecho pesi Jehova wakachita mabambe aakuti majwi aayo alembwe kuti tukonzye kwaajana.—Joh. 12:29, 30.
Jehova uyoolilemeka zina lyakwe alubo uyoobafutula bantu bakwe (Langa fuka 16) *
16. Nkamboonzi chimwi chiindi nitukonzya kukataazikana atala akutalemekwa kwazina lyaLeza?
16 Mbuuli Jesu, andiswe tulakonzya kukataazikana akaambo kakutalemekwa kwazina lyaJehova. Amwi mbuuli Jesu, tulikujatwa munzila iitali kabotu. Amwi kulakonzeka kuti tulikukataazikana akaambo katwaambo twakubeja ntubatutamikizya batukazya. Tulakonzya kuyeeya twaambo twabo mbutukonzya kupa kuti zina lyaJehova ambunga yakwe zitalemekwi. Muzyiimo zili boobo, majwi aaJehova alatuumbulizya. Tatweelede kukataazikana zyiindilide pe. Nkaambo tuli aachoonzyo chakuti ‘luumuno lwaLeza lwiinda miyeeyo yoonse yabantu luyooyaminina myoyo yesu amiyeeyo yesu muli Kristu Jesu.’ (Flp. 4:6, 7) Jehova takakachilwi pe kupa kuti zina lyakwe lilemekwe. Kabelesya Bwaami bwakwe, uyoogwisya zintu zyoonse Saatani abantu bali kubbazu lyakwe nzibalikuchitila bakombi baLeza basyomeka.—Int. 94:22, 23; Is. 65:17.
GWASIGWA KWIINDA MUKUSWIILIA JWI LYAJEHOVA MAZUBAANO
17. Kweendelana amajwi aali Isaya 30:21, Jehova waambuula biyeni andiswe mazubaano?
17 Jehova uchaambuula aandiswe mazubaano. (Bala Isaya 30:21.) Nisimpe kuti tatukonzyi kumvwa jwi lyaLeza kuzwa kujulu. Nikuba boobo, utupede Jwi lyakwe Bbayibbele oomo mwatubuzya malayilile aakwe. Alubo, muuya waJehova ugwasya “mubaanzi uusyomekede” kuti abambile bakombi baLeza chakulya chamubukombi. (Lk. 12:42) Nisimpe kuti tujana chakulya chamubukombi chiingi chiswaanizya mabbuku, zintu zisiyene-siyene zijanika aaIntaneti, mavidiyo azyakuswiilila zyakalekkoodwa.
18. Majwi aaJehova alusimya biyeni lusyomo lwako alubo akugwasya biyeni kuti ube aachibindi?
18 Atukkale katwaayeeya majwi Jehova ngaakaamba Mwanaakwe kachili aanyika. Mbuuli mbukwaambidwe muBbayibbele, majwi aaLeza aatugwasye kusyoma kuti zintu zyoonse zili mumaboko aaJehova akuti zintu zyoonse zibi zilikuchitwa aaSaatani abantu bali kubbazu lyakwe, uyoozibambulula. Alubo, atupeekezye kukkala katuswiilila jwi lyaJehova. Kuchita oobo, kuyootugwasya kuti tulisimye kumapenzi ngituswaana lino angituyooswaana kunembo. Bbayibbele lituyeezya kuti: ‘Muyandikana kulisimya, kuti mwamaninsya kuchita kuyanda kwaLeza, mukatambule zintu eezyo zyakasyomezegwa.’—Heb. 10:36.
Lwiimbo 4 “Jehova Mweembezi Wangu”
^ par 5 Chiindi Jesu naakali aanyika, Jehova wakaambuulaawe kuzwa kujulu, kwaziindi zitatu. Aachiindi chimwi muziindi eezyo, Jehova wakabuzya basikwiiya baKristu kuti baswiilile Mwanaakwe. Mazubaano, Jehova waambuula aandiswe kabelesya Jwi lyakwe Bbayibbele liswaanizya njiisyo zyaJesu ambunga yakwe. Muchiiyo eechi, tulalanga-langa mbukutugwasya kuswiilila Jehova aJesu.
^ par 52 BUPANDULUZI BWAZIFANIKISYO: Mwaalu wabona mubelesi uubelekela nalikugwasilizya mukusalazya Ng’anda yaBwaami anali aakatebbulu kamabbuku. Mwaalu wamulumbayizya.
^ par 54 BUPANDULUZI BWAZIFANIKISYO: Mukwesu amukayintu wakwe bakuSierra Leone balikupa sikuzuba nswi kapepa kakutamba.
^ par 56 BUPANDULUZI BWAZIFANIKISYO: Bakamboni bakkala kuzisi ooko mulimu wesu nkuukasigwa balikuchita miswaangano mung’anda. Bazweete munzila nguba kuchitila kuti bantu batazibi nzibalikuchita.
