1, 2. 1) ¿La katachuwinanit Jehová latamanin? 2) ¿Tuku nalichuwinanaw kʼuma artículo?

JEHOVÁ lu lakgati kinkatachuwinanan. Chuna tlawa xlakata tlan nakatsiyaw tuku lakpuwan chu tuku tlawa. Wa xlakata, makgasata kilhtamaku kamaklakaskilh xpalakachuwinanin, ángeles chu xKgawasa, Cristo Jesús (Amós 3:7; Gál. 3:19; Rev. 1:1). La uku limaklakaskin Biblia xlakata nakinkatachuwinanan.

² Nachuna, akxni Jesús xlama kKatiyatni, Jehová makgtutu chuwinancha kʼakgapun. Kaʼakxilhwi tuku wa, tuku katsiniyaw xlakata tuku wa chu tuku tlan natlawayaw xlakata nalitamakgtayayaw.

3. Chuna la wan Marcos 1:9-11, ¿tuku wa Jehová akxni Jesús tamunulh chu tuku limasiyalh uma tachuwin?

³ (Kalikgalhtawakga Marcos 1:9-11). Wa uma xapulana akxni Jehová tichuwinancha kʼakgapun. Wa: «Wix xatapaxkin kinKam, wix ti klimakgapaxuwakan». Jesús lu tlan limakgkatsilh akxni kgaxmatli la xakgatlilh xTlat xlakata xlitasiya pi xpaxki chu xlipawan. Kalichuwinaw pulaktutu tuku lu xlakaskinka nema lichuwinalh Jehová: pi Jesús wa xKgawasa, paxki chu tlan akxilha.

4. Akxni Jesús tamunulh, ¿la tlakg tlan tsukulh talalin Jehová?

⁴ «Wix [...] kinKam». Uma tachuwin limasiyalh pi Jehová chu Jesús, tlakg matliwakglhkgolh la xlatalalinkgo. Akxni Jesús chatum espíritu xwanit kʼakgapun, na xlitaxtuya la xkgawasa Dios. Pero akxni tamunulh lilaksakka espíritu  santo. Ama kilhtamaku, Dios limasiyalh pi Jesús xatalaksakni litaxtulh chu xkgalhi takgalhkgalhin pi xʼamapa taspita kʼakgapun, xlakata nalitaxtu la Mapakgsina chu la xaPuxku Sacerdote, nema Dios xlaksaknit (Luc. 1:31-33; Heb. 1:8, 9; 2:17). Wa xlakata akxni Jesús tamunulh, xTlat wa uma tachuwin: «Wix [...] kinKam» (Luc. 3:22).

5. Chuna la Jehová, ¿tuku talakaskin natlawayaw?

⁵ «Wix xatapaxkin». Chuna la Jehová limasiyanilh tapaxkit Jesús chu makgpuwantinilh, akinin nachuna talakaskin naputsayaw la nakamakgtayayaw amakgapitsin (Juan 5:20). Akxni wi tiku tlan talalinaw kinkalimasiyaniyan tapaxkit chu kinkawaniyan lakwan tachuwin akxni wi tuku tlan tlawayaw, tlan limakgkatsiyaw. Natalan xalak congregación chu kifamiliajkan nachuna lakaskinkgo pi nakalimasiyaniyaw tapaxkit chu nakamakgpuwantiniyaw. Komo chuna natlawayaw, nakamakgtayayaw namatliwakglhkgo xtakanajlakan chu ni katimakgxtakgkgolh Jehová. Lu xlakaskinka pi natlatni nakamakgpuwantinikgo, nakawanikgo lakuan tachuwin xkamanankan chu nakalimasiyanikgo tapaxkit. Chuna nakamakgtayakgo tlakg tlan tuku natlawakgo.

6. ¿Tuku xlakata tlan nalipawanaw Jesucristo?

⁶ «Wix ti klimakgapaxuwakan». Akxni Jehová chuna wa, limasiyalh pi liwana xkatsi pi Jesús xʼama tlawa xtalakaskin xTlat. Komo xla lu xlipawan xKgawasa, akinin nachuna tlan nalipawanaw pi Jesús namakgantaxti tuku malaknunit Jehová (2 Cor. 1:20). Akxni lilakpuwanaw xliʼakxilhtit Jesús xlakata ni makgxtakgnan, tlakg lhuwa tuku katsiputunaw xpalakata chu stalaniputunaw xliʼakxilhtit. Chu Jehová nachuna kalipawan  xlakskujnin pi chuntiya nakatsinikgo xlakata xKgawasa (1 Ped. 2:21).

7. Chuna la wan Mateo 17:1-5, ¿tuku kilhtamaku chuwinampa Jehová kʼakgapun chu tuku wa?

⁷ (Kalikgalhtawakga Mateo 17:1-5). Xlimakgtiy akxni Jehová chuwinancha kʼakgapun wa akxni talakgpalilh o snapapa wa xlhakgat Jesús. Xkawaninit Pedro, Santiago chu Juan pi kstalanikgolh kʼakgtum xatalhman sipi. Anta wi tuku kaj xalan akxilhkgolh nema kaks kamalakawanilh. Xlakan Jesús tsukulh skgoy chu nachuna xlhakgat. Alistalh kxpaxtun Jesús tasiyakgolh chatiy latamanin tiku xlitaxtukgo Moisés chu Elías, chu tsukukgolh tachuwinankgo Jesús xlakata xlinin chu xtalakastakwanat. Maski uma kgalhtutu xʼapóstoles lu klhtataputunkgo, akxni lakastakwanankgolh akxilhkgolh tuku xlama (Luc. 9:29-32). Alistalh, akgtum puklhni nema kskgo kamatsekgli, chu alistalh chuwinalh Dios. Chuna la tlawalh akxni Jesús tamunulh, Jehová limasiyalh pi xpaxki chu tlan x’akxilha xKgawasa akxni wa: «Wa yuma nkinKam nti lu kpaxkiy, wanti klimakgapaxuwakan». Pero uma kilhtamaku nachuna wa: «Kakgaxpatnitit».

8. ¿La kamakgtayalh Jesús chu xʼapóstoles tuku kamaʼakxilhnika?

⁸ Tuku kamaʼakxilhnika limasiyalh xtatlankit chu xlitliwakga Jesús nema xʼama kgalhi akxni mapakgsina xlitaxtulh kxTamapakgsin Dios. Xlikana pi uma makgpuwantinilh chu matliwakglhi Cristo xlakata tapatin chu linin nema xʼama titaxtu. Nachuna kamatliwakglhli xtakanajlakan kstalaninanin chu kamaxkilh litliwakga xlakata taputsan nema xʼama kalakgchin chu xlakata xtayanikgolh taskujut nema xʼamakgolh tlawakgo. Xtitaxtunita 30 kata akxni apóstol Pedro lichuwinalh uma tuku xʼakxilhnit, uma litasiya pi liwana xlakapastaka (2 Ped. 1:16-18).

9. ¿Tuku lu tlan tastakyaw kamaxkilh Jesús kstalaninanin?

⁹ «Kakgaxpatnitit». Jehová liwana limasiyalh pi lakaskin nakgaxmatniyaw chu nakgalhakgaxmataw xtachuwin xKgawasa. Akxni Jesús xlama kKatiyatni, lhuwa tuku lichuwinalh nema xlakaskinka kuenta natlawayaw. Akgtum liʼakxilhtit, kamasiyanilh kstalaninanin nalichuwinankgo xalakwan tamakatsinin xla Tamapakgsin chu makglhuwa kawanilh pi skgalalh xtawilakgolh (Mat. 24:42; 28:19, 20). Nachuna ankgalhin kawanilh pi tliwakglh xtawilakgolh chu nikxni xtaxlajwanikgolh (Luc. 13:24). Nachuna kawanilh pi xtalakaskin nalapaxkikgo, makxtum xtawilakgolh chu xkgalhakgaxmatkgolh xlimapakgsin (Juan 15:10, 12, 13). Xlikana pi tastakyaw nema kamaxkika lu tlan xwanit ama kilhtamaku chu nachuna asta la uku.

10, 11. ¿La limasiyayaw pi kgaxmatniyaw Jesús?

¹⁰ Jesús wa: «Xlipaks wanti yuma mpaxkiy ntalulokgtat, kgaxmata nkintachuwin» (Juan 18:37). Limasiyayaw pi kgaxmataw xtachuwin akxni kgalhakgaxmataw uma tastakyaw: «Kalapaxuwanalipinitit, chu na nalamatsankgananiyatit chatunu amakgapitsin» (Col. 3:13; Luc. 17:3, 4). Nachuna limasiyayaw akxni xatapaxuwan lichuwinanaw tamakatsinin akxni tawila tlan o nitlan kilhtamaku (2 Tim. 4:2).

¹¹ Jesús wa pi kstalaninanin kgaxmatkgo xtachuwin (Juan 10:27). Limasiyayaw pi kgaxmatniyaw akxni tlawayaw tuku kinkawaniyan. Ni kamastaw talakaskin nakinkalaktlawayan «taʼakglhuwit nema titaxtukan  klatamat» (Luc. 21:34). Wata xlakaskinka li’akxilhaw nakgalhakgaxmataw xlimapakgsin Jesús, asta maski tuwa tuku titaxtuyaw. Lhuwa natalan tayanimakgo laklanka taʼakglhuwit, la komo taputsastalanit, talimaxkget chu akxni la tuku masputunan. Pero ni makgxtakgkgo Jehová maski nitlan tuku titaxtukgo. Jesús kawani umakgolh tachuwin: «Wanti nkgalhiy nkilimapakgsin, na tlaway ntu wan, wa yuma wa nti lu[...] kimpaxkiy, chu wa nti nkimpaxkiy, na napaxkiy nkinTlat» (Juan 14:21).

12. ¿La tlan atanu nalimasiyayaw pi kgaxmatniyaw Jesús?

¹² Atanu la limasiyayaw pi kgaxmatniyaw Jesús wa nakamakgtayayaw tiku kawanikanit nakinkapulalinkgoyan (Heb. 13:7, 17). Kxaʼawatiya kata nema titaxtukgonit xkachikin Jehová lhuwa talakgpalit tlawakgonit. Akgtum li’akxilhtit, kinkamaxkikanitan xalaksasti tuku namaklakaskinaw xlakata nalichuwinanaw Dios. Nachuna lakgpalikanit la tlawakan tamakxtumit xla itat semana chu la tlawakan, kaxtlawakan chu kuentajtlawakan Pukgalhtawakga. ¿Nixlikana pi lu paxtikatsiniyaw pi liwana kinkapulalinkanan? Tlan liwana nakatsiyaw pi Jehová nasikulunatlawa kintaskujutkan xlakata kgalhakgaxmataw xtapulalit nema kinkamaxkiyan xkachikin.

13. ¿La kinkamakgtayayan nakgaxmatniyaw Jesús?

¹³ Nakgaxmataw putum tuku masiyalh Jesús lu kinkamakgtayayan. ¿La natlawayaw? Akgtum li’akxilhtit, xla kamalaknunilh kstalaninanin pi xtamasiy lu x’ama kamatliwakglha. Wa: «Na natakgsniyatit ntajaxni milistaknakan. Sampi wa nkimukiwi, lu ni tuwa liyankan, chu wa nkintakuka, skapaka» (Mat. 11:28-30). Wa xTachuwin Dios, chu nachuna xlakata maktati libro nema lichuwinankgo xlatamat Jesús, kinkamakgtayayan xlakata namatliwakglhaw kintakanajlakan chu skgalala kinkatlawayan (Sal. 19:7; 23:3). Jesús lichuwinalh: «¡Paxuwakgo tiku kgaxmatkgo xtachuwin Dios chu kgalhakgaxmatkgo!» (Luc. 11:28).

14, 15. 1) Chuna la wan Juan 12:27, 28, ¿tuku kilhtamaku chuwinampa Jehová k’akgapun? 2) ¿Tuku xlakata makgtsiyajli chu matliwakglhi Jesús xtachuwin Jehová?

¹⁴ (Kalikgalhtawakga Juan 12:27, 28). Evangelio xla Juan lichuwinan xlimakgtutu  akxni Jehová chuwinancha k’akgapun. Akxni nialh lhuwa kilhtamaku xtsankga namakgnikan, Jesús xwi kJerusalén xlakata natlawa xa’awatiya Pascua. Alistalh akxni wa pi lu nitlan xmakgkatsi, wanilh Dios k’akgtum oración: «[Tlati], kaj kamatlanki mintukuwani». Chu Jehová kgalhticha k’akgapun: «Kmatlankinita, na nakmatlankipara amakgtum».

¹⁵ Jesús lu xlilakgaputsa tuku xlakgaya xlakata ni xmakgxtakgli Jehová. Xkatsi pi x’amaka wilinikan chu x’amaka makgnikan (Mat. 26:38). Pero tuku tlakg xlakaskinka x’akxilha wa namaxki kakni xtukuwani xTlat. Xlilakgaputsa pi xlinin xmaxkajwilh xtukuwani xTlat xlakata xlimawakakanit takgsanin. Pero xtachuwin xTlat liwana limasiyanilh pi xtukuwani Jehová x’amaka matlankikan. Xlikana pi uma lu tlan limakgkatsilh chu matliwakglhi xlakata natayani tuku nitlan x’ama titaxtu. Xlikana pi maski kaj x’akstu chuna xmakgkatsi, Jehová matsokgninalh kBiblia xlakata putum akinin nalitamakgtayayaw (Juan 12:29, 30).

16. ¿Tuku xlakata lilakgaputsayaw pi nataxkajwi xtukuwani Jehová?

¹⁶ Chuna la Jesús, max akinin nachuna lilakgaputsayaw pi xtukuwani Jehová nataxkajwi. Max nitlan kinkalikatsinikanan, chuna la titaxtulh Jesús. O max nalilakgaputsayaw takgsanin nema wankgo kimpalakatakan tiku ni kinka’akxilhputunkgoyan.  Max nalilakpuwanaw la maxkajwi xtukuwani Jehová chu xkachikin. Akxni chuna titaxtuyaw lu tlan limakgkatsiyaw tuku Jehová wanilh Jesús. Jehová ankgalhin malanki xtukuwani. Nakamakgtaya xlakskujnin akxni namaklakaskin xTamapakgsin xlakata nalakkaxtlawa tuku nitlan tlawa Satanás chu uma kakilhtamaku (Sal. 94:22, 23; Is. 65:17). Liwana katsiyaw pi uma tachuwin nakgantaxtu: «Xtakaksni Dios nema nila akgatekgskgo latamanin nakuentajtlawa minakujkan chu mintalakapastaknikan xpalakata Cristo Jesús» (Filip. 4:6, 7).

17. Chuna la wan Isaías 30:21, ¿la kinkaxakgatliyan Jehová la uku?

¹⁷ Jehová chuntiya kinkaxakgatliyan la uku (kalikgalhtawakga Isaías 30:21). Xlikana, ni kgaxmataw xtachuwin Jehová k’akgapun. Pero kinkamaxkiyan tastakyaw kxTachuwin, kBiblia. Nachuna espíritu santo makgpuwantini «skujni xatalipaw» xlakata chuntiya nakinkamaxkiyan tuku maklakaskin kintakanajlakan, la komo likgalhtawakga, likgalhtawakga k’Internet, kvideo chu k’audio (Luc. 12:42). ¿Nixlikana pi lhuwa taway xaʼespiritual makglhtinanaw?

18. ¿Tuku xlakata xtachuwin Jehová tlawa pi natatliwakglha kintakanajlakan chu ni napekuanaw?

¹⁸ Ankgalhin nalakapastakaw tuku wa Jehová akxni xKgawasa xlama kKatiyatni. Pi xtachuwin nema talhkatawilanit kBiblia tlan nalipawanaw pi xla ankgalhin nakinkamakgtayayan chu xla nalakkaxtlawa tuku nitlan nakinkatlawaniyan Satanás chu xkakilhtamaku. Kuenta katlawaw nakgaxmataw xtachuwin Jehová. Komo chuna natlawayaw, tlan natayaniyaw taʼakglhuwit nema kgalhiyaw o nema aku mima. Biblia kinkamalakapastakayan: «Wa mintapaxuwanaliyankan, lu[...] xlakaskinka, lakimpi wa lantla natlawayatit xtalakaskin Dios nalikgalhiyatit ntamalaknun» (Heb. 10:36).