1-2. (a) Xana Yehovha u vulavurisane ni vanhu hi tindlela tihi? (b) I yini leswi hi nga ta swi kambisisa eka xihloko lexi?

YEHOVHA wa swi rhandza ku vulavurisana na hina. Emikarhini ya khale, u tirhise vaprofeta, tintsumi ni N’wana wakwe, Kreste Yesu, leswaku va hundzisela rungula rakwe eka hina. (Amo. 3:7; Gal. 3:19; Nhlav. 1:1) Namuntlha u vulavurisana na hina hi ku tirhisa Rito rakwe, ku nga Bibele. U hi nyike rona leswaku hi dyondza hi miehleketo yakwe ni ku twisisa tindlela takwe.

² Loko Yesu a ha ri laha misaveni, Yehovha u vulavule a ri etilweni eka swiendlakalo swinharhu. A hi kambisiseni leswi Yehovha a swi vuleke, leswi hi nga swi dyondzaka eka marito yakwe ni leswi hi nga vuyeriwaka ha swona eka leswi a swi vuleke.

3. Loko hi ri karhi hi hlaya Marka 1:9-11, i yini leswi Yehovha a swi vuleke loko Yesu a khuvuriwa naswona marito wolawo ma tiyisekise swilo swihi swa nkoka?

³ Marka 1:9-11 yi boxa xiendlakalo xo sungula lexi eka xona Yehovha a vulavuleke a ri etilweni. (Hlaya.) U te: “U N’wana wa mina, la rhandzekaka; ndzi ku amukerile.” Sweswo swi fanele swi n’wi khumbe mbilu Yesu loko a twa Tata wakwe a vula ndlela leyi a n’wi rhandzaka ni ku n’wi tshemba ha yona! Marito ya Yehovha ma tiyisekise swilo swinharhu hi Yesu. Xo sungula, Yesu i N’wana wakwe. Xa vumbirhi, Yehovha u rhandza N’wana wakwe. Naswona xa vunharhu, Yehovha u amukele N’wana wakwe. A hi kambisiseni xiendlakalo ha xin’we hi vukheta.

4. Hi byihi vuxaka lebyintshwa lebyi Yesu a byi sunguleke ni Xikwembu loko a khuvuriwa?

⁴ “U N’wana wa mina.” Hi ku tirhisa marito wolawo, Yehovha u kombise leswaku N’wana wakwe la rhandzekaka, Yesu, u sungule vuxaka lebyintshwa na Yena. Loko Yesu a ha ri etilweni, a  ri n’wana wa Xikwembu wa moya. Hambiswiritano, loko a khuvuriwa u totiwe hi moya lowo kwetsima. Hi nkarhi wolowo, Xikwembu xi kombise leswaku N’wana wa xona la totiweke, Yesu, se a a ri ni ntshembo wo tlhelela etilweni a ya va Hosi leyi hlawuriweke hi Xikwembu tlhelo Muprista Lonkulu. (Luka 1:31-33; Hev. 1:8, 9; 2:17) Swi le rivaleni leswaku hikwalaho ka yini loko Yesu a khuvuriwa Tata wakwe a vule marito lama nge: “U N’wana wa mina.”—Luka 3:22.

5. Hi nga xi tekelela njhani xikombiso xa Yehovha xo kombisa rirhandzu ni ku bumabumela van’wana?

⁵ “U . . . la rhandzekaka.” Xikombiso xa Yehovha xo kombisa rirhandzu ni ku amukela N’wana wakwe xi hi tsundzuxa leswaku hi fanele hi tiyimisela ku khutaza van’wana. (Yoh. 5:20) Ha tsaka loko munhu un’wana loyi hi n’wi rhandzaka a hi kombisa rirhandzu ni ku hi bumabumela loko hi endle swilo leswinene. Hilaha ku fanaka, vamakwerhu evandlheni ni swirho swa mindyangu ya hina va lava ku kombiwa rirhandzu ni ku khutaziwa. Loko hi bumabumela van’wana hi tiyisa ripfumelo ra vona naswona hi tlhela hi va pfuna leswaku va tirhela Yehovha hi ku tshembeka. Swa fanela leswaku vatswari va khutaza vana va vona. Loko vatswari va bumabumela vana va vona swi huma embilwini ni ku va kombisa rirhandzu, va ta kula kahle.

6. Hikwalaho ka yini hi fanele hi tshemba Yesu Kreste?

⁶ “Ndzi ku amukerile.” Marito lawa ma kombisa leswaku Yehovha a a tiyiseka leswaku Yesu a a ta endla ku rhandza ka Tata wakwe hi ku tshembeka. Leswi Yehovha a a n’wi tshemba N’wana wakwe, hilaha ku fanaka hi nga tiyiseka leswaku Yesu u ta swi hetisisa hi ku tshembeka switshembiso hinkwaswo swa Yehovha. (2 Kor. 1:20) Loko hi anakanyisisa hi xikombiso xa Yesu, hi ta tiyimisela ku dyondza eka yena  ni ku landzela xikombiso xakwe. Yehovha wa tiyiseka leswaku tanihi ntlawa, malandza yakwe ma ta ya emahlweni ma dyondza eka N’wana wakwe.—1 Pet. 2:21.

7. Hi ku ya hi Matewu 17:1-5, hi le ka xiendlakalo xihi laha Yehovha a vulavuleke a ri etilweni naswona u te yini?

⁷ Hlaya Matewu 17:1-5. Xiendlakalo xa vumbirhi lexi Yehovha a vulavuleke a ri etilweni a ku ri loko Yesu “a hundzuriwa.” Yesu u rhambe Petro, Yakobo na Yohane leswaku va ya na yena ehenhla ka ntshava. Loko va ri kwalaho, va vone xivono lexi hlamarisaka. Va vone xikandza xa Yesu ni tinguvu takwe swi vangama. Vavanuna vambirhi, lava yimelaka Muxe na Eliya, va sungule ku vulavula na Yesu mayelana ni ku fa ni ku pfuxiwa kakwe. Hambileswi vaapostola vanharhu a va “tshikeleriwa hi vurhongo,” a va xalamukile hi ku helela loko va vona xivono xexo lexi hlamarisaka. (Luka 9:29-32) Endzhaku, papa leri vangamaka ri va funengetile kutani va twa rito ra Xikwembu ri huma epapeni! Hilaha Yehovha a endleke hakona loko Yesu a khuvuriwa, U kombise leswaku u amukela ni ku rhandza N’wana wakwe hi ku vula a ku: “Loyi i N’wananga, la rhandzekaka, loyi ndzi n’wi amukeleke.” Kambe sweswi Yehovha u engetela a ku: “N’wi yingiseni.”

8. Xivono xexo xi n’wi pfune njhani Yesu ni vadyondzisiwa vakwe?

⁸ Xivono xexo a xi kombisa ku vangama ni matimba leswi Yesu a nga ta va na swona loko a va Hosi ya Mfumo wa Xikwembu. A swi kanakanisi leswaku Kreste u chavelelekile ni ku tiyisiwa leswaku a ta kota ku langutana ni maxangu ni rifu ro vava leswi a swi ta n’wi humelela. Xivono xexo xi tlhele xi tiyisa ripfumelo ra vadyondzisiwa. Sweswo swi va pfunile leswaku va lunghekela miringo leyi a va ta langutana na yona ni ntirho wo tika lowu a va ta wu endla. Kwalomu ka malembe ya 30 endzhaku ka sweswo, muapostola Petro u vulavule hi xivono xa ku hundzuriwa, leswi kombisaka leswaku a ha xi tsundzuka kahle xivono xexo.—2 Pet. 1:16-18.

9. Hi swihi switsundzuxo leswi tirhaka leswi Yesu a swi nyikeke vadyondzisiwa vakwe?

⁹ “N’wi yingiseni.” Yehovha u swi veke erivaleni leswaku u lava hi yingisela ni ku endla leswi N’wana wakwe a hi byelaka swona. I yini leswi Yesu a swi vuleke loko a ri laha misaveni? U vule swilo swo tala leswi a swi ri swa nkoka swinene ku swi yingisela! Hi xikombiso, hi rirhandzu u dyondzise valandzeri vakwe ndlela yo chumayela mahungu lamanene a tlhela a va tsundzuxa leswaku va tshama va rindzile. (Mat. 24:42; 28:19, 20) U tlhele a va khutaza leswaku va tirha hi matimba naswona va nga karhali. (Luka 13:24) Yesu u kandziyise xilaveko xo va valandzeri vakwe va rhandzana, va va ni vun’we ni ku yingisa swileriso swakwe. (Yoh. 15:10, 12, 13) Hakunene Yesu u nyike vadyondzisiwa vakwe switsundzuxo leswi tirhaka! Switsundzuxo sweswo swa ha ri swa nkoka ninamuntlha ku fana ni loko Yesu a ha ku swi vula.

10-11. Hi nga swi kombisa njhani leswaku hi yingisa Yesu?

¹⁰ Yesu u te: “Un’wana ni un’wana loyi a nga etlhelweni ra ntiyiso u yingisa rito ra mina.” (Yoh. 18:37) Hi kombisa leswaku hi yingisa rito rakwe loko hi “[hambeta hi] lehiselana mbilu ni ku rivalelana hi ku ntshunxeka.” (Kol. 3:13; Luka 17:3, 4) Nakambe hi kombisa leswaku hi yingisa rito rakwe loko hi chumayela mahungu lamanene hi ku hiseka “hi nguva leyinene [ni] hi nguva ya ku karhateka.”—2 Tim. 4:2.

¹¹ Yesu u te: “Tinyimpfu ta mina ti yingisa rito ra mina.” (Yoh. 10:27) Valandzeri va Kreste va kombisa leswaku va yingisa Yesu hi ku yingisela rito rakwe ni ku endla leswi a va byelaka swona. A va kavanyetiwi hi “ku vilela hi vutomi.” (Luka 21:34) Ematshan’weni ya sweswo, va teka ku yingisa swileriso swa Yesu swi ri swa nkoka  swinene evuton’wini hambiloko va ri ehansi ka swiyimo swo tika. Vamakwerhu vo tala va tiyisela miringo leyi tsemaka nhlana leyi katsaka ku hlaseriwa hi vakaneti, ku dlayiwa hi ndlala ni timhangu ta ntumbuluko. Eswiyin’weni sweswo hinkwaswo, va tshama va tshembekile eka Yehovha ku nga khathariseki maxangu lama nga va welaka. Yesu u va tiyisekise a ku: “Loyi a nga ni swileriso swa mina a tlhela a swi hlayisa, hi yena loyi a ndzi rhandzaka. Hi ku fanana loyi a ndzi rhandzaka u ta rhandziwa hi Tatana.”—Yoh. 14:21.

12. Hi yihi ndlela yin’wana leyi hi nga kombisaka ha yona leswaku hi yingisa Yesu?

¹² Ndlela yin’wana yo kombisa leswaku hi yingisa Yesu i ku tirhisana ni lava a va hlawuleke leswaku va hi rhangela. (Hev. 13:7, 17) Emalembeni ya sweswinyana, nhlengeletano ya Yehovha yi endle ku cinca ko tala, ku katsa ku tirhisa switirhisiwa leswintshwa ni tindlela letintshwa to chumayela, ku cinca ka xiyimiso xa mihlangano ya le xikarhi ka vhiki, ndlela leyi hi akaka, hi lunghisaka ni ku khathalela Tiholo ta hina ta Mfumo ha yona. Hi wu tlangela swinene nkongomiso wonghasi wa rirhandzu! Hi nga tiyiseka leswaku Yehovha u ta hi katekisa loko hi tikarhatela ku landzela nkongomiso lowu humaka eka nhlengeletano.

13. Hi ta vuyeriwa njhani loko hi yingisa Yesu?

¹³ Ha vuyeriwa loko hi yingisa swilo hinkwaswo leswi Yesu a swi dyondziseke. Yesu u tshembise vadyondzisiwa vakwe leswaku tidyondzo takwe a ti ta va phyuphyisa. U te: “Mi ta kumela mimoya-xiviri ya n’wina ku phyuphya. Hikuva joko ra mina ra olova ni ndzhwalo wa mina wa vevuka.” (Mat. 11:28-30) Rito ra Xikwembu, leri katsaka Tievhangeli ta mune leti vulavulaka hi vutomi ni vutirheli bya Yesu, ra hi phyuphyisa ni ku hi tlharihisa. (Ps. 19:7; 23:3) Yesu u te: “Va tsaka lava twaka rito ra Xikwembu va tlhela va ri hlayisa!”—Luka 11:28.

14-15. (a) Hi xihi xiendlakalo xa vunharhu, lexi boxiweke eka Yohane 12:27, 28, lexi eka xona Yehovha a vulavuleke a ri etilweni? (b) Ha yini marito ya Yehovha ma chavelele ni ku tiyisa Yesu?

¹⁴ Hlaya Yohane 12:27, 28. Evhangeli ya Yohane yi boxa xiendlakalo xa vunharhu lexi eka xona Yehovha a vulavuleke a ri etilweni. Loko ka ha sale masiku ma nga ri mangani a nga si dlayiwa, Yesu a a ri eYerusalema ku ya tlangela nkhuvo wa Paseka ro hetelela. U te: “Moya-xiviri wa mina wu karhatekile.” Kutani u khongele a ku: “Tatana, vangamisa vito ra wena.” Tata wakwe u vulavule a ri etilweni a ku: “Ndzi ri vangamisile naswona ndzi ta tlhela ndzi ri vangamisa.”

 ¹⁵ Yesu a karhatekile hikuva a ri ni vutihlamuleri lebyikulu byo tshama a tshembekile eka Yehovha. Yesu a swi tiva leswaku a ta xanisiwa hi ndlela leyi khomisaka tingana a tlhela a dlayiwa hi ndlela ya tihanyi. (Mat. 26:38) Ku tlula hinkwaswo, Yesu a a lava ku vangamisa vito ra Tata wakwe. Yesu a hehliwa hi ku va musandzi naswona a karhatiwa hi leswi rifu rakwe a ri ta tisa xisandzu evitweni ra Xikwembu. Hakunene marito ya Yehovha ma fanele ma n’wi tiyisile Yesu! A a tiyiseka leswaku vito ra Yehovha a ri ta vangamisiwa. Marito ya Tata wakwe ma fanele ma n’wi chavelerile Yesu ni ku n’wi tiyisa leswaku a ta kota ku tiyisela maxangu lawa a ma ta n’wi humelela. Hambileswi swi nga ha endlekaka leswaku i Yesu ntsena loyi a a twisisa leswi Tata wakwe a swi vula hi nkarhi wolowo, Yehovha u endle leswaku marito Yakwe ma tsariwa.—Yoh. 12:29, 30.

16. Hikwalaho ka yini mikarhi yin’wana hi vilerisiwa hi xisandzu lexi nga tisiwaka evitweni ra Xikwembu?

¹⁶ Ku fana na Yesu, swi nga endleka leswaku na hina hi vilerisiwa hi xisandzu lexi tisiweke evitweni ra Yehovha. Kumbexana ku fana na Yesu, hi khomiwa hi ndlela yo biha. Kumbe hi vilerisiwa hi timhaka ta mavunwa leti vakaneti va ti hangalasaka hi hina. Hi nga ha ehleketa hi xisandzu lexi swiviko leswi swi xi tisaka evitweni ra Yehovha ni nhlengeletano yakwe. Emikarhini yo tano, marito ya Yehovha ma nga hi chavelela swinene. A hi fanelanga hi karhateka ngopfu hi swona. Hi nga tiyiseka leswaku “ku rhula ka Xikwembu loku tlulaka miehleketo hinkwayo  ku ta rindza timbilu ta [hina] ni matimba ya [hina] ya mianakanyo ha Kreste Yesu.” (Filp. 4:6, 7) Mikarhi hinkwayo Yehovha u ta vangamisa vito rakwe. Hi ku tirhisa Mfumo, u ta horisa timbanga hinkwato leti malandza Yakwe yo tshembeka ma vangeriweke tona hi Sathana swin’we ni misava leyi.—Ps. 94:22, 23; Esa. 65:17.

17. Hi ku pfumelelana na Esaya 30:21, xana Yehovha u vulavula njhani na hina namuntlha?

¹⁷ Ninamuntlha, Yehovha u vulavula na hina. (Hlaya Esaya 30:21.) I ntiyiso leswaku a hi nge twi Xikwembu xi vulavula na hina xi ri etilweni. Hambiswiritano, xi hi nyike Rito ra xona leri tsariweke, ku nga Bibele, leswaku ri hi kongomisa. Ku engetela kwalaho, moya wa Yehovha wu susumeta “mulanguteri wo tshembeka” leswaku a hambeta a nyika malandza Yakwe yo tshembeka swakudya. (Luka 12:42) Hi ni mikandziyiso yo tala leyi kandziyisiweke ni leyi kumekaka eka Inthanete, swin’we ni tivhidiyo to tala ni mikandziyiso leyi ngo yingiseriwa kunene leswi hi pfunaka ku tiyisa ripfumelo ra hina!

18. Xana marito ya Yehovha ma tiyisa ripfumelo ra wena ni ku ku nyika xivindzi hi ndlela yihi?

¹⁸ A hi tshameni hi ri karhi hi tsundzuka marito lama Yehovha a ma vuleke loko N’wana wakwe a ha ri laha misaveni! Onge rito ra Xikwembu leri tsariweke eBibeleni ri nga hi tiyisekisa leswaku Yehovha wa swi vona hinkwaswo leswi endlekaka naswona u ta horisa timbanga hinkwato leti hi vangeriweke tona hi Sathana ni misava yakwe yo homboloka. Nakambe onge hi nga tiyimisela ku yingisela rito ra Yehovha. Loko hi endla tano, hi ta swi kota ku tiyisela swiphiqo swihi na swihi leswi hi nga na swona swin’we ni miringo hinkwayo leyi hi nga ta hlangana na yona enkarhini lowu taka. Bibele yi hi tsundzuxa yi ku: “Ku laveka leswaku mi tiyisela, leswaku, loko mi endle ku rhandza ka Xikwembu, mi ta amukela ku hetiseka ka xitshembiso.”—Hev. 10:36.