1-2. (a) Yahwe akozeseze miringo ki kubaza n’abantu? (b) Kiki ekiturukugenda kubazaaho omu kicweka kinu?

YAHWE agonza kubaza naitwe. Omu busumi bwa kara, yakozesaaga banabbi, bamaraika, hamu n’Omwana we Yesu Kristo kugambira abantu entekereza ye. (Am 3:7; Bag. 3:19; Kus. 1:1) Biro binu akozesa Ekigambo kye Baibuli kubaza hamu naitwe. Akakituha nukwo tumanye entekereza ye kandi tumanye emiringo ye.

² Yesu obwakaba ali omu nsi, Yahwe akabaliza omu iguru iraka lye lyahulirwa omu nsi ha mirundi esatu erukwahukana. Katurole Yahwe ebiyabalizeeho iraka lye obulyahuliirwe omu nsi, turole ekitusobora kwegera ha bigambo bye, n’omulingo bisobora kutugasira.

3. Kusigikirra ha Marako 1:9-11, Yahwe akabaza ki Yesu obuyabatiziibwe, kandi ebigambo binu bikagumya nsonga ki isatu?

³ Marako 1:9-11 ebazaaho omurundi ogw’okubanza iraka lya Yahwe obulyahuliirwe kuruga omu iguru. (Soma.) Akagamba ati: “[Niiwe] Mwana wange oungonza, nkukyanganukiire muno.” Yesu aine kuba yakwasirweho muno obuyahuliire Ise nagamba ngu namugonza kandi obuyamwolekere ngu namwesiga. Ebigambo bya Yahwe bikagumya ensonga isatu ezirukukwata hali Yesu. Ensonga ey’okubanza, Yesu Mwana wa Yahwe. Eyakabiri, Yahwe agonza Omwana we. Kandi ensonga eyakasatu, Yahwe nakyanganukira Omwana we. Leka tubazeeho ensonga zinu.

4. Yesu obuyabatiziibwe, akafooka ata Mwana wa Ruhanga omu mulingo omuhyaka?

⁴ “[Niiwe] Mwana wange.” Yahwe obuyagambire ebigambo binu, akaba nayoleka ngu Yesu atungire enkoragana endi  empyaka hamu na Yahwe. Yesu n’obwakaba akyali omu iguru, akaba ali mwana wa Ruhanga. Baitu obuyamazire kubatizibwa, akafooka mwana wa Ruhanga omu mulingo omuhyaka. Akaseswaho amagita kandi yatunga omugisa gw’okugaruka omu iguru nk’Omukama ou Yahwe akaba akomere kandi Nyakatagara Omukuru. (Luk. 1:31-33; Baheb. 1:8, 9; 2:17) Nahabweki niturora ensonga habwaki hanyuma y’okubatizibwa, Yahwe akagamba ngu: “[Niiwe] Mwana wange.”​—Luk. 3:22.

5. Nitusobora tuta kukopa ekyokurorraho kya Yahwe eky’okusiima n’okwoleka okugonza?

⁵ “[Niiwe] . . . oungonza.” Ekyokurorraho kya Yahwe eky’okwoleka okugonza n’okusiima nikitwoleka ngu tusemeriire kuserra omulingo gw’okugarramu abandi amaani. (Yoh. 5:20) Tweyongera kugarukwamu amaani omuntu obwatwoleka okugonza n’obwatusiima habw’ekintu ekirungi ekitukozere. Nikyo kimu n’Abakristaayo bagenzi baitu omu kitebe hamu n’ab’omu maka gaitu, nibetaga tuboleke okugonza kandi tubagarremu amaani. Obutusiima abandi, okwikiriza kwabo kweyongera kuguma kandi tubakonyera kweyongera kuheereza Yahwe n’obwesigwa. Kukira muno abazaire, basemeriire kugarramu abaana babo amaani. Abazaire obubasiima abaana babo kuruga ha mutima kandi obubabooleka okugonza, kikonyera abaana babo kukurakurana.

6. Habwaki tusemeriire kuta obwesige bwaitu omu Yesu Kristo?

⁶ “Nkukyanganukiire muno.” Ebigambo binu nibyoleka ngu Yahwe akaba nakigumya ngu Yesu naija kukora byona ebyakaba amutumire kukora. Yahwe naikiririza muno omu Mwana we, nahabweki naitwe twine kwesigira kimu ngu Yesu naija kuhikiriza emirago  yoona ei Yahwe aturaganiize. (2 Kol. 1:20) Kwecumitiriza ha kyokurorraho kya Yesu nikiija kutuletera kugonza kumwegeraho n’okuhondera ekyokurorraho kye. Yahwe nakigumiza kimu ngu itwena hamu nk’abaheereza be, nitwija kwikara nitwegera ha kyokuroraho ky’Omwana we.​—1 Pet. 2:21.

7. Kusigikirra ha Matayo 17:1-5, nidi Yahwe obuyabaliize omu iguru, kandi akagamba ki?

⁷ Soma Matayo 17:1-5. Omurundi ogwakabiri iraka lya Yahwe obulyahuliirwe kuruga omwiguru nuko akasumi nambere Yesu ‘yahindwirwe.’ Yesu akatwara Petero, Yakobo, na Yohana bagenda hamu haiguru ha rusozi oruraihire. Obubahikireyo, bakatunga okwolekwa okw’embaganiza. Obuso bwa Yesu bukamulikana muno n’engoye ze zatandika kwangasana muno. Hakaija ebisisani by’abantu babiri, ekimu kikaba kya Musa kandi ekindi kya Eriya, kandi batandika kubaza na Yesu ha kufa kwe n’okuhumbuuka kwe. N’obukiraaba ngu abakwenda banu basatu bakaba “bakwasirwe oturo,” nambere okwolekwa kunu kwaberireho bakaba basisimukire ira. (Luk. 9:29-32) Ekyahondireho, ekicu kikaija kyabaswekerra kandi bahurra iraka kuruga omu kicu, kandi iraka linu likaba lya Ruhanga! Nk’oku kyabaire ha kubatizibwa kwa Yesu, Yahwe akasoborra nk’oku arukusiima kandi arukugonza Omwana we obuyagambire ati: “Onu nuwe Mwana wange, omukome wange.” Baitu omurundi gunu Yahwe akongeraho ebigambo binu: “Mumuhurre.”

8. Okwolekwa kukakwataho kuta Yesu n’abegeswa be?

⁸ Okwolekwa kunu kukaha abakwenda ekisisani ekirukwoleka ekitiinisa n’obusobozi Yesu akaba nagenda kutunga nk’Omukama w’Obukama bwa Ruhanga. Hataroho kugurukyagurukya, ekintu kinu kikakonyera Yesu kweyongera kuguma n’okwetekaniriza okubonabona n’okufa eby’akaba nagenda kurabamu. Kandi okwolekwa kunu kukombeka okwikiriza kw’abakwenda kwabatekaniza habw’omulimo omukooto n’okulengwa okubakaba nibagenda kurabamu omu bwire obw’omu maiso. Hanyuma y’emyaka nka 30, omukwenda Petero akabazaaho okwolekwa okw’okuhindurwa kandi kinu kikooleka ngu akaba nakyaijuka ebyabaireho.​—2 Pet. 1:16-18.

9. Yesu akaha abegeswa be buhabuzi ki obw’omugaso?

⁹ “Mumuhurre.” Yahwe akakyolekera kimu ngu nagonza tuhuliirize ebigambo by’Omwana we kandi tubihondere. Yesu akagamba ki obwakaba ali omu nsi? Akabaza ebintu bingi ebikuru ebisemeriire kuhulirwa! Ekyokurorraho, akegesa abegeswa be omulingo gw’okutebezaamu amakuru amarungi, kandi akaikara nabatererra kwikara bulindaara. (Mat. 24:42; 28:19, 20) Akongera yabatererra kwekamba n’okutahwamu amaani. (Luk. 13:24) Yesu akabazaaho muno ensonga y’abahondezi be kugonzangana, kwikara omu bumu, n’okuhondera ebiragiro bye. (Yoh. 15:10, 12, 13) Obuhabuzi Yesu yahaire abegeswa be kabw’omugaso! Na hati, obuhabuzi bunu bw’omugaso muno nk’oku bwali bw’omugaso omu kasumi yabuheriiremu.

10-11. Twoleka tuta ngu nituhuliiriza Yesu?

¹⁰ Yesu akagamba ati: “Owamananu wena ahurra iraka lyange.” (Yoh. 18:37) Twoleka ngu nituhuliiriza iraka lye obutuhondera okutererewa okurukugamba “nimuculerrangana kandi nimuganyirangana inywenka.” (Bak. 3:13; Luk. 17:3, 4) Omulingo ogundi ogutwolekamu ngu nituhuliiriza iraka lye nubwo obutwekamba kutebeza amakuru amarungi omu biro “ebisemeriiremu nebitasemeriiremu.”​—2 Tim. 4:2.

¹¹ Yesu akagamba: “Entama zange zihurra iraka lyange.” (Yoh. 10:27) Abahondezi ba Kristo booleka ngu nibahuliiriza iraka lye obubatagarukira ha kuhurra ebigambo bye kwonka baitu n’obubabita omu nkora. Tibahugurwa ‘okutabaana okw’obwomeezi bunu.’ (Luk.  21:34) Halubo, kikuru muno kworobera ebiragiro bya Yesu n’omu nyikara ezigumire muno. Bagenzi baitu baingi nibagumisiriza ebizibu eby’amaani, abamu nibabarwanisa, banaku, kandi abandi nibabonabona habw’ebigwererezi. Byona babirabamu kandi basigara bali besigwa hali Yahwe n’obukibetagisa kuraba omu kubonabona kw’amaani. Halubo, ebigambo binu ebya Yesu bikuru muno: “Anyakuina ebiragiro byange nabikwata, nuwe angonza: Anyakungonza, aligonzebwa Ise nyowe.”​—Yoh. 14:21.

12. Mulingo ki ogundi ogutwolekamu ngu nituhuliiriza Yesu?

¹² Gunu nugwo mulingo gundi tusobora kwolekamu ngu nituhuliiriza Yesu: kukwataniza n’abo abaahaire obujunanizibwa omu kitebe. (Baheb. 13:7, 17) Ekitebe kya Yahwe kikozere empindahinduka nyingi omu myaka egi, nk’okukozesa ebikwato ebihyaka n’emiringo emihyaka ey’okutebeza, empindahinduka omu rusorrokano orwa hagati omu wiiki, omulingo twombeka, tusemeza, kandi tudabiriza Ebyombeko by’Obukama. Nitusiima muno habw’okuheebwa oburagirizi oburukwoleka okugonza n’okufaayo! Tukigumye ngu Yahwe naija kutuha emigisa habw’okutamu amaani kuhondera oburagirizi obututunga kuruga omu kitebe kye.

13. Tugasirwa tuta obutuhuliiriza Yesu?

¹³ Tugasirwa obutuhuliiriza ebintu byona Yesu yayegeseze. Yesu akaraganiza abegeswa be ngu ebiyayegeseze nibiija kubagarramu amaani. Akagamba ati: “Nainywe mulizora okuhumura okwomu mutima gwanyu. Baitu ekikoligo kyange [tikirukulemeera], nenketo yange neyanguhirra.” (Mat. 11:28-30) Ekigambo kya Ruhanga, ekinyakurumu n’ebitabu bbina eby’Enjiri ebirukubaza ha bwomeezi n’obuheereza bwa Yesu kitugarramu amaani omu by’omwoyo, kituhumuza, kandi kitufoora b’amagezi. (Zab. 19:7; 23:3) Yesu akagamba: “Banyina omugisa abarukuhurra ekigambo kya Ruhanga nibakikwata.”​—Luk. 11:28.

14-15. (a) Murundi ki ogwakasatu ogurukubazibwaho omu Yohana 12:27, 28 nambere iraka lya Yahwe lyahuliirwe kuruga omu iguru? (b) Habwaki ebigambo bya Yahwe bisobora kuba byahumwize Yesu kandi byamugarramu amaani?

¹⁴ Soma Yohana 12:27, 28. Enjiri ya Yohana n’ebazaaho omurundi gwakasatu nambere Yahwe yabaliize omu iguru iraka lye lyahulirwa omu nsi. Yesu akaba ali omu Yerusalemu kwijuka omukoro gw’Okuhingurwaho obuhakaba hasigaireyo ebiro bike aitwe. Akagamba ati: “Omutima gwange gutuntuire.” Hanyuma,  akasaba yagamba ati: “Isenyowe, nyumiza ibara lyawe.” Yesu akahurra Ise namugarukamu kuruga omu iguru nagamba ati: “Nkalinyumiza, kandi ndigaruka okulinyumiza.”

¹⁵ Yesu akaba ayetuntwire habwokuba akaba aine obujunanizibwa bw’amaani obw’okulinda obwesigwa bwe hali Yahwe. Akaba akimanyire ngu akaba nagenda kubonabonesebwa muno kandi aitwe omu mulingo omubi. (Mat. 26:38) Ekintu ekikaba nikikirayo obukuru hali Yesu kyali eky’okuhaisa ibara lya Ise ekitiinisa. Yesu bakamujunaana omusango gw’okujuma Ruhanga, kandi akaba ayeralikiriire ngu okwitwa kwe kukaba nikugenda kujumisa ibara lya Ruhanga. Ebigambo bya Yahwe biine kuba byagarwiremu Yesu amaani! Akakimanya ngu ibara lya Yahwe likaba nirigenda kunyumizibwa. Ebigambo bya Ise biine kuba byamuhumwize muno kandi byamugarramu amaani nukwo yayetegekera ebintu ebikaba nibigenda kumuhikaho. N’obukiraaba ngu omu bantu boona abaali baroho Yesu wenka nuwe asobora kuba yayetegeriize ebigambo Ise yabalize, obwire bukahika Yahwe yahandikisa ebigambo ebi omu Kigambo kye nukwo itwena tugasirwe.​—Yoh. 12:29, 30.

16. Habwaki obwire obumu nitusobora kweralikirra habw’ibara lya Ruhanga kujumwa?

¹⁶ Nka Yesu, naitwe nitusobora kweralikirra muno tutarukugonza ibara lya Yahwe kujumwa. Kandi nitusobora kuba nituhikwaho obutali bwinganiza. Rundi nitusobora kuba nitwehurra kubi habw’ebisuba abantu barukutubazaaho. Nitusobora kuba nitutekerezaaho omulingo ebisuba byabo birukusiisa ibara lya Yahwe n’ekitebe  kye. Omu bwire nk’obu, ebigambo bya Yahwe nibisobora kutuhumuza muno. Tikirukwetagisa kweralikirra ekihinguraine. Tukigumye ngu ‘obusinge bwa Ruhanga oburukukira okumanya kwona bulirinda emitima [yaitu] nebitekerezo [byaitu] omu Kristo Yesu.’ (Baf. 4:6, 7) Yahwe taliremwa kuhaisa ibara lye ekitiinisa. Naija kukozesa Obukama bwe kumaraho ebintu byona ebibi Setani n’ensi ye ebibahikizeeho abaheereza Be abesigwa.​—Zab. 94:22, 23; Is. 65:17.

17. Kusigikirra ha Isaya 30:21, Yahwe abaza naitwe omu mulingo ki?

¹⁷ Nahati Yahwe nabaza naitwe. (Soma Isaya 30:21.) Mananu ngu tituhurra iraka lye niriruga omu iguru. Baitu atuhaire Ekigambo kye Baibuli ekirumu oburagirizi bwe. Okwongerezaaho, omwoyo gwa Yahwe guletera omwiru omwesigwa kandi ow’amagezi kwikara naheereza abantu be eby’okulya byabo eby’omwoyo. (Luk. 12:42) Katwine eby’okulya bingi eby’omwoyo ebiija omu mulingo ogw’ebitabu, vidiyo, amaraka agakwasirwe, hamu na ha mukura gwaitu!

18. Ebigambo bya Yahwe nibyombeka bita okwikiriza kwawe kandi nibikugarramu bita amaani?

¹⁸ Twikale nitwijuka ebigambo Yahwe yabalize Omwana we obwakaba ali omu nsi. Leka Ekigambo kya Ruhanga kyongere kutugumya ngu buli kimu kyona kiri omu mikono ya Yahwe, kandi ngu naija kumaraho okubonabona kwona okuleserwe Setani n’ensi ye. Kandi leka tucweremu kimu kuhuliiriza iraka lya Yahwe. Obuturakora tuti, nitwija kusobora kugumisiriza buli kizibu kyona ekiturukutunga n’ekitusobora kutangatangana omu busumi obw’omu maiso. Baibuli n’etwijukya eti: “Baitu [nimwetaga] okugumisiriza, nukwo obumulikamara okukora Ruhanga ebyagonza, mugaruke muhabwe ebimwaraganiziibwe.”​—Baheb. 10:36.