1-2. (a) Kasi Yehova wakuyowoya wuli na ŵanthu? (b) Kasi tiwonenge vichi mu nkhani iyi?

YEHOVA wakutemwa kuyowoya nase. Mu nyengo yakale wakayowoyanga kwizira mu zintchimi, ŵangelo, na Mwana wake, Khristu Yesu, kuti timanye maghanoghano ghake. (Am. 3:7; Gal. 3:19; Chivu. 1:1) Mazuŵa ghano wakuyowoya nase kwizira mu Mazgu ghake, Baibolo. Wali kutipa Baibolo kuti timanye maghanoghano ghake na nthowa zake.

² Apo Yesu wakaŵa pa charu chapasi, Yehova wakayowoyaso kufuma kuchanya pa nyengo zitatu. Tiyeni tiwone ivyo Yehova wakayowoya, ivyo tikusambirako ku mazgu ghake, ndiposo umo tikusangira chandulo na ivyo wakayowoya.

3. Nga umo tikuŵazgira pa Mariko 1:9-11, kasi Yehova wakayowoya vichi apo Yesu wakabatizikanga, ndipo ni fundo wuli zakuzirwa izo mazgu agha ghakasimikizgiranga?

³ Pa Mariko 1:9-11 ndipo pakuyowoya nyengo yakwamba iyo Yehova wakayowoya kufuma kuchanya. (Ŵazgani.) Iyo wakati: “Ndiwe Mwana wane wakutemweka, nkhukondwa nawe.” Yesu wakwenera kuti wakakhozgeka chomene kupulika Adada ŵake ŵakuyowoya kuti ŵakumutemwa na kumugomezga. Mazgu gha Yehova ghakasimikizga fundo zitatu zakuzirwa chomene zakukhwaskana na Yesu. Yakwamba, Yesu ni Mwana wake. Yachiŵiri, Yehova wakumutemwa Mwana wake. Ndipo yachitatu, Yehova wakukondwa na Mwana wake. Tiyeni tiwone mwakupwelelera fundo yiliyose payekha.

4. Kasi Yesu wakanjira mu ubwezi wuli uphya na Chiuta pa nyengo iyo wakabatizikanga?

⁴ “Ndiwe Mwana wane.” Na mazgu agha, Yehova wakalongora  kuti Mwana wake wakutemweka, Yesu, wali paubwezi uphya na Iyo. Apo Yesu wakaŵa kuchanya, wakaŵa waka mwana wauzimu wa Chiuta. Kweni wati wabatizika, wakaphakazgika na mzimu utuŵa. Panyengo iyi Chiuta wakalongora kuti Yesu wakaŵa Mwana Wake wakuphakazgika uyo sono wakalindizganga kuwelera kuchanya kukaŵa Themba ndiposo Wasembe Mukuru wakwimikika na Chiuta. (Luka 1:31-33; Heb. 1:8, 9; 2:17) Ntheura apo Yesu wakabatizikanga, Adada ŵake ŵakaŵa na chifukwa chakupulikikwa chakuyowoyera kuti: “Ndiwe Mwana wane.”—Luka 3:22.

5. Kasi tingamuyezga wuli Yehova pa nkhani ya kulongora chitemwa na kukhozga ŵanji?

⁵ “Ndiwe . . . wakutemweka.” Chiyelezgero cha Yehova pa nkhani ya chitemwa na kukhozga ŵanji chikutikumbuska kuti nase tikwenera kupenja mipata iyo tingakhozgera ŵanji. (Yoh. 5:20) Tikukhozgeka chomene para uyo tikumutemwa watilumba pa viwemi ivyo tikuchita kweniso para nayo wakulongora kuti wakutitemwa. Mwakuyana waka, ŵabali na ŵadumbu ŵithu mu mpingo na mu mbumba yithu ŵakukhumba kuti tiŵatemwenge na kuŵakhozga. Para tikuŵalumba ŵanyithu, tikukhozga chipulikano chawo na kuŵawovwira kuti ŵateŵetere Yehova mwakugomezgeka. Chomenechomene ŵapapi ŵakwenera kukhozga ŵana ŵawo. Para ŵapapi ŵakuŵalumba ŵana ŵawo kufumira pasi pa mtima na kuŵatemwa, ŵakovwira ŵana ŵawo kuti ŵakure mwauzimu.

6. Chifukwa wuli tingamugomezga Yesu Khristu?

⁶ “Nkhukondwa nawe.” Mazgu agha ghakulongora kuti Yehova wakagomezganga kuti Yesu wachitenge khumbo la Adada ŵake mwakugomezgeka. Chifukwa chakuti Yehova wakaŵa na chigomezgo ichi mwa Mwana wake, nase tingaŵa na chigomezgo chose kuti Yesu wazamufiska malayizgo ghose gha Yehova. (2 Kor. 1:20)  Para tikughanaghanirapo pa ivyo Yesu wakachita, tikuŵikapo mtima chomene kusambirako kwa iyo na kulondezga mendero ghake. Nga umo Yehova wakamugomezgera Yesu, wakugomezgaso kuti ŵateŵeti ŵake ŵalutilirenge kusambirako kwa Mwana wake.—1 Pet. 2:21.

7. Kuyana na Mateyu 17:1-5, kasi mphanyengo wuli apo Yehova wakayowoya kufuma kuchanya, ndipo wakayowoya vichi?

⁷ Ŵazgani Mateyu 17:1-5. Nyengo yachiŵiri iyo Yehova wakayowoya kufuma kuchanya ni apo Yesu “wakasintha mawonekero.” Yesu wakachema Petrosi, Yakobe, na Yohane kuti ŵalute nayo lumoza ku phiri litali. Apo ŵakaŵa ku phiri ili, ŵakawona mboniwoni yakuzizwiska. Chisko cha Yesu chikaŵala kweniso malaya ghake ghakaŵala. Ŵanthu ŵaŵiri awo ŵakimiranga Mozesi na Eliya, ŵakamba kuyowoya na Yesu vyakukhwaskana na nyifwa yake na chiwuka chake. Nangauli ŵapositole ŵatatu aŵa “ŵakaŵa mu tulo twakufwa nato,” ŵakawona mboniwoni yakuzizwiska iyi ŵakati ŵawuka. (Luka 9:29-32) Pamanyuma, bingu lituŵa likaŵabenekelera, ndipo ŵakapulika mazgu gha Chiuta kufuma mu mabingu. Nga umo Yehova wakachitira apo Yesu wakabatizikanga, apa napo wakayowoya kuti wakukondwa na Mwana wake kweniso wakumutemwa. Wakati: “Uyu ni Mwana wane wakutemweka, uyo nkhukondwa nayo.” Kweni pa nyengo iyi Yehova wakasazgirapo mazgu ghakuti: “Mupulikirani.”

8. Kasi mboniwoni yikamovwira wuli Yesu na ŵasambiri ŵake?

⁸ Mboniwoni iyi yikalongora uchindami na nkhongono izo Yesu wamuŵa nazo pakuŵa Themba la Ufumu wa Chiuta. Tikukayika yayi kuti Khristu wakakhozgeka chomene, ndipo wakaŵa wakunozgeka kuzizipizga masuzgo na vyakuŵinya vya nyifwa. Mboniwoni iyi yikakhozgaso chipulikano cha ŵasambiri. Kweniso yikaŵawovwira kunozgekera viyezgo ivyo nawo ŵakaŵa kuti ŵakumanenge navyo ndiposo kunozgekera mulimo wakusuzga uwo ŵakaŵa kuti ŵachitenge. Vyaka pafupifupi 30 vikati vyajumphapo, mpositole Petrosi wakazunuraso vya mboniwoni iyo Yesu wakasintha mawonekero, kulongora kuti wakaŵa wachali kuyikumbukira mboniwoni iyi.—2 Pet. 1:16-18.

9. Kasi ni ulongozgi wuli wakuzirwa uwo Yesu wakapeleka ku ŵasambiri ŵake?

⁹ “Mupulikirani.” Yehova wakayowoya mwakupulikikwa makora kuti wakukhumba kuti tipulikirenge mazgu gha Mwana wake na kughalondezga. Kasi Yesu wakayowoya vichi apo wakaŵa pa charu chapasi? Wakayowoya vinthu vinandi vyakuzirwa ivyo tikwenera kupulikira. Mwachiyelezgero, wakasambizga mwachitemwa ŵalondezgi ŵake umo ŵangapharazgira makani ghawemi, kweniso mwakuwerezgawerezga wakaŵakumbuska kuti ŵaŵenge maso. (Mat. 24:42; 28:19, 20) Wakaŵachiskaso kuti ŵajipeleke na mtima wose kweniso ŵaleke kuthera. (Luka 13:24) Yesu wakadidimizgaso kuti ŵalondezgi ŵake ŵakwenera kutemwana, kulutilira kukolerana, ndiposo kupulikira malango ghake. (Yoh. 15:10, 12, 13) Ulongozgi uwo Yesu wakapeleka ku ŵasambiri ŵake ukaŵa wakuzirwa chomene. Ulongozgi uwu uchali wakuzirwa mazuŵa ghano nga umo ukaŵira apo Yesu wakawupelekanga.

10-11. Kasi tingalongora wuli kuti tikumupulikira Yesu?

¹⁰ Yesu wakati: “Waliyose uyo wali ku chigaŵa cha unenesko wakupulika mazgu ghane.” (Yoh. 18:37) Tikulongora kuti tikupulikira mazgu ghake para ‘tikulutilira kuzizipizgirana na kugowokerana na mtima wose.’ (Kol. 3:13; Luka 17:3, 4) Kweniso tikulongora kuti tikupulikira mazgu ghake para tikulimbikira kupharazga makani ghawemi “mu nyengo yiwemi na nyengo ya suzgo.”—2 Tim. 4:2.

¹¹ Yesu wakati: “Mberere zane zikupulika mazgu ghane.” (Yoh. 10:27) Ŵalondezgi ŵa Khristu ŵakulongora kuti ŵakupulikira Yesu para  ŵakutegherezga waka mazgu ghake pera yayi, kweniso para ŵakughalondezga. Ŵakutimbanizgika yayi na “vyenjezgo vya umoyo.” (Luka 21:34) M’malo mwake, iwo ŵakuwona kuti ntchakuzirwa chomene kupulikira malango gha Yesu, nanga chingaŵa chakusuzga wuli. Ŵabali ŵithu ŵanandi ŵakuzizipizga viyezgo vikuru. Vinyake mwa viyezgo ivi nkhuwukilika na ŵakususka, ukavu, na masoka gha chilengiwa. Nangauli ŵakukumana na masuzgo ghose agha, kweni ŵakulutilira kugomezgeka kwa Yehova nanga ŵangasuzgika wuli. Yesu wakuŵalayizga kuti: “Waliyose uyo wali na malango ghane na kughasungilira, ndiyo wakunitemwa. Ndipo waliyose uyo wakunitemwa watemwekenge na Adada, ndipo nimutemwenge na kujilongora kwa iyo.”—Yoh. 14:21.

12. Kasi ni nthowa wuli yinyake iyo tingalongolera kuti tikupulikira Yesu?

¹² Paliso nthowa yinyake iyo tingalongolera kuti tikumupulikira Yesu: tikwenera kukolerana na awo ŵimikika kulongozga pakati pithu. (Heb. 13:7, 17) Gulu la Chiuta lasintha vinthu vinandi mu vyaka vyasonosono apa. Vinyake mwa vinthu ivi ni umo tingagwiliskira ntchito vinthu viphya na nthowa ziphya mu uteŵeti withu, umo maungano gha mukati mwa sabata ghakwendera, ndiposo umo tikuzengera na kunozga Nyumba zithu za Ufumu. Tikuwonga chomene ulongozgi wachitemwa na wamahara uwu. Tikugomezga kuti Yehova watitumbikenge apo tikuyezgayezga kupulikira ulongozgi wa panyengo yake uwo gulu likupeleka.

13. Kasi ni vyandulo wuli ivyo tikusanga para tikupulikira Yesu?

¹³ Tikusanga vyandulo para tikupulikira vinthu vyose ivyo Yesu wakasambizga. Yesu wakalayizga ŵasambiri ŵake kuti ŵapumuzgikenge na visambizgo vyake. Iyo wakati: “Muzamupumuzgika. Chifukwa joko lane ndipusu na katundu wane ngwakupepuka.” (Mat. 11:28-30) Mazgu gha Chiuta, agho ghakusazgapo Mabuku Ghanayi gha Makani Ghawemi ghakuyowoya za umoyo wa Yesu na uteŵeti wake, ghakutipembuzga, kukhozga umoyo withu wauzimu, na kutovwira kuŵa ŵavinjeru. (Sal. 19:7; 23:3) Yesu wakati: “Ŵakukondwa ni awo ŵakupulika mazgu gha Chiuta na kughasungilira!”—Luka 11:28.

14-15. (a) Nga umo pakuyowoyera pa lemba la Yohane 12:27, 28, kasi ni nyengo wuli yachitatu iyo Yehova wakayowoya kufuma kuchanya? (b) Chifukwa wuli mazgu gha Yehova ghakwenera kuti ghakamupembuzga na kumukhozga Yesu?

¹⁴ Ŵazgani Yohane 12:27, 28. Buku la Makani Ghawemi la Yohane ndilo likuyowoya nyengo  yachitatu iyo Yehova wakayowoya kufuma kuchanya. Kukati kwakhala mazuŵa ghachoko waka kuti wafwe, Yesu wakaŵa ku Yerusalemu kuti wachite Paska lake laumaliro. Iyo wakati: “Umoyo wane ukukweŵeka.” Pamanyuma wakalomba kuti: “Adada, chindikani zina linu.” Adada ŵake ŵakazgora kufuma kuchanya kuti: “Nalichindika ndipo nilichindikengeso.”

¹⁵ Yesu wakakweŵeka chifukwa cha mulimo ukuru uwo wakaŵa nawo wakuti wakhalilire wakugomezgeka kwa Yehova. Wakamanyanga kuti watambuzgikenge chomene na kukomeka mwankhaza. (Mat. 26:38) Kuluska vyose, wakakhumbanga kuchindika zina la Adada ŵake. Yesu ŵakamupa mulandu wakuti wakutuka Chiuta, ndipo wakafipanga mtima kuti nyifwa yake yitukiskenge Chiuta. Nadi, mazgu gha Yehova ghakwenera kuti ghakamukhozga chomene Yesu. Wakaŵa na chigomezgo kuti zina la Yehova lichindikikenge. Mazgu gha Adada ŵake ghakwenera kuti ghakamupembuzga chomene Yesu na kumukhozga kuti wazizipizge masuzgo agho wakaŵa pafupi kukumana nagho. Nangauli wakwenera kuti ni Yesu pera uyo wakapulika na kupulikiska ivyo Adada ŵake ŵakayowoya pa nyengo iyi, kweni chifukwa cha ise Yehova wakawoneseska kuti mazgu Ghake ghalembeka.—Yoh. 12:29, 30.

16. Chifukwa wuli nyengo zinyake tingafipira mtima za kubinkhiskika kwa zina la Yehova?

¹⁶ Nga ni Yesu, nase tingafipira mtima za kubinkhiskika kwa zina la Yehova. Panji nga ni Yesu, nase ŵanji ŵakutichitira vinthu mwambura urunji. Panji tingatimbanizgika na nkhani zautesi  zakukhwaskana na ise izo ŵakususka ŵakuthandazga. Tingaghanaghana chomene umo nkhani izi zikubinkhiskira zina la Yehova na gulu lake. Panyengo za nthena izi, mazgu gha Yehova ghangatipembuzga chomene. Tikwenera kwenjerwa mwakujumphizga yayi. Tingagomezga kuti “mtende wa Chiuta uwo ukuluska maghanoghano ghose, uvikilirenge mitima [yithu] na maghanoghano [ghithu] kwizira mwa Khristu Yesu.” (Fil. 4:6, 7) Yehova watondekengepo yayi kuchindika zina lake. Kwizira mu Ufumu wake, wazamuwuskapo masuzgo ghose agho Satana na charu ichi ŵiziska pa ŵateŵeti Ŵake ŵakugomezgeka.—Sal. 94:22, 23; Yes. 65:17.

17. Mwakuyana na lemba la Yesaya 30:21, kasi Yehova wakuyowoya nase wuli mazuŵa ghano?

¹⁷ Yehova wachali kuyowoya nase mazuŵa ghano. (Ŵazgani Yesaya 30:21.) Mbunenesko nadi kuti Chiuta wakuyowoya nase kufuma kuchanya yayi. Ndipouli, watipa Mazgu ghake, Baibolo, ndipo ndimo wakutipira ulongozgi. Kweniso mzimu wa Yehova ukovwira “muteŵeti mulara wakugomezgeka” kulutilira kupeleka chakurya ku ŵateŵeti ŵake. (Luka 12:42) Tikupokera chakurya chinandi chauzimu. Chakurya ichi ni mabuku agho ghakupulintika, vinthu ivyo vikuŵikika pa Intaneti, mavidiyo na vinyake vyakutegherezga waka.

18. Kasi mazgu gha Yehova ghangazenga wuli chipulikano chinu na kumupani chikanga?

¹⁸ Tiyeni nyengo zose tikumbukenge mazgu agho Yehova wakayowoya apo Mwana wake wakaŵa pa charu chapasi. Mphanyi mazgu gha Chiuta, agho ghali kulembeka mu Baibolo, ghatipa chigomezgo kuti Yehova wakumanya kuti vyose vili mu mawoko ghake, ndipo wazamuwuskapo masuzgo ghose agho Satana na charu chake chiheni ichi ŵiziska pa ise. Kweniso mphanyi taŵikapo mtima kupulikira mazgu gha Yehova. Para tichitenge nthena, tikwaniskenge kuzizipizga masuzgo ghose agho tikukumana nagho sono ndiposo ghose agho tikumanenge nagho munthazi. Baibolo likutikumbuska kuti: “Mukukhumbikwira kuzizipizga, mwakuti para mwachita khumbo la Chiuta, muzakapokere ivyo Chiuta walayizga.”—Heb. 10:36.