1-2. (a) Ne fesokotaki mai pefea a Ieova ki tino? (e) Ne a mea ka sau‵tala tatou ki ei i te mataupu tenei?

E FIAFIA a Ieova o fesokotaki mo tatou. I aso mua, ne fakaaoga ne ia a pelofeta, agelu, mo tena Tama, ko Keliso Iesu, ke fakaoko mai ne latou ana mafaufauga ki a tatou. (Amo. 3:7; Kala. 3:19; Faka. 1:1) I aso nei, e fesokotaki mai a ia ki a tatou e auala i tena Muna, ko te Tusi Tapu. Ne tuku mai ne ia ki a tatou ko te mea ke mafai o tauloto tatou ki ana mafaufauga kae malamalama i ana auala.

² I te nofoga a Iesu i te lalolagi, ne faipati mai a Ieova mai te lagi fakatolu taimi. Ke onoono nei tatou ki pati a Ieova ne fai, mea e mafai o tauloto ne tatou mai i ana pati, mo te auala e aoga ei ana pati ki a tatou.

3. Kafai e fai‵tau tatou ki te Maleko 1:9-11, ne a pati ne fai ne Ieova i te taimi ne papatiso ei a Iesu, kae ne a muna‵tonu tāua ne fakamautinoa mai i pati konā?

³ E fakamau i te Maleko 1:9-11 a te taimi muamua ne faipati mai ei a Ieova mai te lagi. (Faitau.) Ne fai mai a ia: “A koe ko taku Tama, ko taku fagasele; ko oti ne talia ne au a koe.” Ko oko eiloa i te otia o te loto o Iesu ke lagona ne ia te leo o tena Tamana e fakaasi atu ei tena alofa mo tena loto talitonu ki a ia! Ne faka‵mafa mai i pati a Ieova a muna‵tonu tāua e tolu e uiga ki a Iesu. Muamua la, a Iesu ko tena Tama. Te lua, a Ieova e alofa ki tena Tama. Kae ko te tolu, ne talia ne Ieova a tena Tama. Ke onoono nei tatou ki muna‵tonu tāua konei takitasi.

4. Se a te fesokotakiga fakapito mo te Atua ne maua ne Iesu i tena otiga ne papatiso?

⁴ “A koe ko taku Tama.” Mai pati konei, ne fakaasi mai ei ne Ieova me i tena Tama fagasele, ko Iesu, ne maua ne ia se fesokotakiga  fakapito mo Ia. I te nofoga a Iesu i te lagi, ne fai a ia e pelā me se tama faka-te-agaga a te Atua. Kae i tena papatisoga, ne fakaeke a ia ki te agaga tapu. I te taimi tenā, ne fakaasi atu ne te Atua i a Iesu ko Tena Tama fagasele eiloa e tokotasi telā ko oti ne fakaekegina, kae ko maua nei ne ia a te fakamoemoega ke toe foki atu ki te lagi kae fai mo fai te Tupu mo te Faitaulaga Sili. (Luka 1:31-33; Epe. 1:8, 9; 2:17) Tela la, i te papatisoga a Iesu, ne isi se pogai ‵lei ke fai atu tena Tamana penei: “A koe ko taku Tama.”—Luka 3:22.

5. E mafai pefea o tau‵tali tatou i te fakaakoakoga a Ieova i te fakaasi atu o te alofa mo tena taliaga?

⁵ “A koe . . . ko taku fagasele.” A te fakaakoakoga a Ieova e uiga ki te fakaasi atu o te alofa mo tena taliaga e fakamasaua mai ki a tatou ke ‵sala atu ki avanoaga ke fakamalosi atu a nisi tino. (Ioa. 5:20) E olaola ‵lei tatou māfai e fakaasi mai ne se tino te alofa ki a tatou kae fakamalo mai mō mea ‵lei e fai ne tatou. I se auala tai ‵pau, e manakogina ne taina mo tuagane i te fakapotopotoga mo ‵tou kāiga a te ‵tou a‵lofa mo fakamalosiga. Kafai e fakamalo atu tatou ki nisi tino, e fakamalosi ne tatou te lotou fakatuanaki kae fesoasoani atu ke tavini atu latou ki a Ieova mo te fakamaoni. E ‵tau eiloa mo mātua o fakamalosi a olotou tama‵liki. Kafai e fakamalo tonu atu a mātua ki olotou tama‵liki kae fakaasi atu te atafai ki a latou, ko fesoasoani atu loa latou ki olotou tama‵liki ke manuia.

6. Kaia e mafai ei o loto tali‵tonu tatou ki a Iesu Keliso?

⁶ “Ko oti ne talia ne au koe.” E fakaasi mai i pati konei me ne loto talitonu a Ieova me ka fakamaoni eiloa a Iesu o fai te loto o tena Tamana. Ona ko te mea e loto talitonu a Ieova ki tena Tama, tela la e mafai foki o loto tali‵tonu katoatoa tatou me ka fakamaoni eiloa a Iesu o fakataunu te tautoga a Ieova. (2 Koli. 1:20) Kafai e mafau‵fau tatou ki te  fakaakoakoga a Iesu, ko fakamalosi aka ei ‵tou fakaikuga ke tauloto mai i a ia kae tau‵tali atu i ana kalafaga. Mai te tau‵tali ki te fakaakoakoga a Ieova, e pelā me se potukau, ka tumau eiloa ana tavini i te tauloto mai tena Tama.—1 Pe. 2:21.

7. E ‵tusa mo te Mataio 17:1-5, ko te taimi fea ne faipati mai ei a Ieova mai te lagi, kae ne a ana pati?

⁷ Faitau te Mataio 17:1-5. A te lua o taimi ne faipati ei a Ieova mai te lagi ko te taimi ne “‵fuli ei a foliga” o Iesu. Ne ‵kami ne Iesu a Petelu, Iakopo mo Ioane ke olo tasi mo ia ki luga i se mauga maluga. I te ‵nofoga i konā, ne lavea ne latou se fakaasiga fakaofoofogia. Ne maina malosi a mata o Iesu kae ko ana gatu ne ‵kena pakipaki eiloa e pelā mo te mainaga. E lua foitino e sui ei a Mose mo Elia, ne kamata o fai‵pati ki a Iesu e uiga ki tena mate mo tena toetuga. E tiga eiloa ne “‵moe pala‵pala” a apositolo konei e tokotolu, ne lavea ne latou a te fakaasiga fakaofoofogia tenei i te taimi ne ala faka‵lei ei latou. (Luka 9:29-32) E se gata i ei, ne ufi latou ne se mainaga mai se kaumana, kae ne lagona ne latou se leo mai te kaumana—ko te leo o te Atua! E pelā mo te mea ne tupu i te papatisoga a Iesu, ne fakaasi atu ne Ieova ki tena Tama a tena alofa mo tena taliaga, mai te fai atu: “Tenei eiloa taku Tama, ko taku fagasele telā ko oti ne talia ne au.” Kae i te taimi tenei ne toe fakaopoopo atu a Ieova, penei: “Faka‵logo ki a ia.”

8. Se a te aoga o te fakaasiga ki a Iesu mo ana soko?

⁸ Ne fakaasi mai i te fakaasiga tenei se ata foliki o te ‵malu mo te malosi o Iesu e pelā me ko te Tupu o te Malo o te Atua. E mautinoa eiloa, me ne malosi kae fakamalosigina a Keliso ona ko te puapuaga mo te mate fakalogo‵mae ka fakafesagai a ia ki ei. Ne fakamalosi foki ne te fakaasiga a te fakatuanaki o soko kae fakamalosi latou mō te tofotofoga o te olotou fakamaoni mo te galuega lasi telā e moe mai i olotou mua. I se 30 tausaga fakamuli ifo, ne fakasino atu te apositolo ko Petelu ki te fakaasiga e uiga ki te ‵fuliga o foliga, se fakaasiga me ne masaua faka ‵lei ne ia.—2 Pe. 1:16-18.

9. Se a te polopolokiga tāua ne tuku atu ne Iesu ki ana soko?

⁹ “Faka‵logo ki a ia.” Ne fakaasi manino mai ne Ieova me e manako a ia ko tatou ke faka‵logo ki pati a tena Tama kae faka‵logo ki ei. Ne a pati a Iesu i tena nofoga i te lalolagi? Ne fai mai ne ia a mea tāua kolā e ‵tau o faka‵logo ki ei! E pelā me se fakaakoakoga, ne akoako ne ia mo te alofa ana soko ke talai atu te tala ‵lei, kae fakamasaua atu faeloa ki a latou ke tumau i te matapula‵pula. (Mata. 24:42; 28:19, 20) Ne fakamalosi atu foki a ia ki a latou ke loto ma‵losi, kae fai atu ke mo a ma ‵fiu. (Luka 13:24) Ne faka‵mafa mai ne Iesu a te tāua ko ana soko ke fakatau a‵lofa, ke tumau i te fakamaoni, kae ke faka‵logo ki ana fakatonuga. (Ioa. 15:10, 12, 13) Mafaga o fakatakitakiga aoga ne tuku mai ne ana soko! A te polopolokiga tenā koi aoga eiloa i aso nei e pelā eiloa mo te taimi ne tuku mai i ei ne Iesu.

10-11. E mafai pefea o fakaasi atu ne tatou me e faka‵logo tatou ki a Iesu?

¹⁰ Ne fai mai a Iesu: “A tino katoa kolā e ‵kau ki te feitu o te munatonu, e faka‵logo ki toku leo.” (Ioa. 18:37) E fakaasi atu ne tatou me e faka‵logo tatou ki tena leo māfai e “fakatau fa‵ki faeloa [tatou] i a [tatou] eiloa kae fakatau fakamagalo atu te suā tino ki te suā tino.” (Kolose 3:13; Luka 17:3, 4) E fakaasi atu foki ne tatou me e faka‵logo tatou ki tena leo mai te talai atu mo te loto finafinau a te tala ‵lei “i taimi ‵lei mo taimi faiga‵ta.”—2 Timo. 4:2.

¹¹ Ne fai mai a Iesu: “E faka‵logo aku mamoe ki toku leo.” (Ioa. 10:27) E fakaasi atu ne soko o Keliso me e faka‵logo latou ki a Iesu mai te tau‵tali i ana pati kae fakagalue foki ne latou. E se fakalavelave latou i ‘manavasega o  te olaga nei.’ (Luka 21:34) I lō te fai penā, e fakamuamua ne latou a te lotou faka‵logo ki te fakatonuga a Iesu, faitalia me e fakafesagai atu latou ki tulaga faiga‵ta. E tokouke a ‵tou taina e kufaki i mea faiga‵ta kese‵kese, e aofia i ei a ‵tekemaiga, tulaga mativa, mo fakalavelave ‵tupu o te natula. Faitalia a mea katoa konei, e tumau eiloa latou i te fakamaoni ki a Ieova, faitalia a logo‵maega ka fe‵paki mo latou. E fakatalitonu atu eiloa a Iesu ki a latou, penei: “So se tino e nofo mo aku fakatonuga kae fakalogo ki ei, ko ia tenā e alofa mai ki a au. Kae ko so se tino e alofa mai ki a au e alofa foki toku Tamana ki a ia.”—Ioa. 14:21.

12. Se a te suā auala e mafai ei o fakaasi atu ne tatou a te ‵tou faka‵logo ki a Iesu?

¹² Tenei te suā auala e mafai o fakaasi atu me e faka‵logo tatou ki a Iesu: mai te ga‵lue fakatasi mo latou kolā ne ‵tofi aka ne ia ke takitaki ne latou a tatou. (Epe. 13:7, 17) Ko oti ne fai ne te fakapotopotoga a te Atua a fakama‵fuliga e uke i tausaga fakamuli nei, e aofia i ei te fakaaogaga o mea faigaluega mo auala ‵fou i te ‵tou galuega talai, ‵tou fakatasiga i vaiaso, mo te auala e faite, faka‵fou kae faka‵lei aka i ei a ‵tou Fale Tapuaki. Ko oko eiloa i te ‵tou loto fakafetai ki te takitakiga alofa kae atafai tenei! E mafai o mautinoa i a tatou me ka fakamanuia eiloa ne Ieova a ‵tou taumafaiga ke tau‵tali i so se fakatakitakiga e tuku mai ne tena fakapotopotoga i te taimi tonu.

13. Ne a mea aoga e maua mai i te faka‵logo ki a Iesu?

¹³ E maua ne tatou a mea aoga mai te faka‵logo ki mea katoa ne akoako mai ne Iesu. Ne fakatalitonu atu a Iesu ki ana soko me ka maua ne latou te malosi fou mai i ana akoakoga. “Ka maua ne koutou i ei se malosi fou,” ne fai mai a ia. “Me e amogofie taku amo, kae māmā foki taku amoga.” (Mata. 11:28-30) A te Muna a te Atua, telā e aofia i ei a tusi Evagelia e fa e uiga ki te olaga mo te galuega talai a Iesu, e maua ne tatou i ei te malosi fou, telā ko te malosi faka-te-agaga, kae fai ne ia ke ‵poto tatou. (Sala. 19:7; 23:3) Ne fai mai a Iesu: “E fia‵fia a latou kolā e lagona ne latou te muna a te Atua kae tausi ki ei!”—Luka 11:28.

14-15. (a) Se a te tolu o taimi, telā ne fakamatala mai i te Ioane 12:27, 28, ne faipati mai ei a Ieova mai te lagi? (e) Kaia ne mafai ei o fakamafanafana kae fakamalosi loto a pati a Ieova ki a Iesu?

¹⁴ Faitau te Ioane 12:27, 28. E fakamatala mai i te Evagelia a Ioane a te tolu o taimi ne faipati mai ei a Ieova i te lagi. I nāi aso mai  mua o tena mate, ne nofo atu a Iesu i Ielusalema ke fakamanatu a tena toe Paseka. “Ko se toka toku loto,” ne fai atu a ia. Telā ne ‵talo atu, penei: “Toku Tamana, faka‵malu tou igoa.” E se leva, kae ne faipati mai tena Tamana mai i te lagi, penei: “Ko oti ne faka‵malu ne au kae ka toe faka‵malu foki ne au.”

¹⁵ Ne mafatia malosi a Iesu ona ko tena tiute sili ke tumau i te fakamaoni ki a Ieova. Ne iloa ‵lei ne Iesu me ka logo‵mae a ia i ‵kini mo se mate fakamasiasi. (Mata. 26:38) Kae sili atu la, me ne manako a Iesu ke faka‵malu te igoa o tena Tamana. Ne fakasala a Iesu ona ko ‵losiga ‵se me i a ia ne pati masei, kae ne manavase eiloa a ia me e mafai o taku fakamasei i ei te Atua. Ko oko eiloa i te fakamalosi loto o pati a Ieova ki a Iesu! E manako a ia o fakamautinoa aka me ne faka‵malu te igoa o Ieova. Ko oko eiloa i te fakamafanafana o pati a tena Tamana ki a Iesu kae fakamalosi atu a ia ke kufaki i logo‵maega ka fakafesagai mo ia. E tiga eiloa a Iesu ko te tino fua e tokotasi telā ne malamalama i pati a tena Tamana i te taimi tenā, ne fakamautinoa aka ne Ieova me i Ana pati ne fakamau eiloa ki lalo mō tatou katoa.—Ioa. 12:29, 30.

16. Kaia e mafai ei o manava‵se tatou i nisi taimi e uiga ki te fakamaseiga o te igoa o te Atua?

¹⁶ E pelā mo Iesu, e mafai foki o manava‵se tatou e uiga ki fakamaseiga ki te igoa o Ieova. Kāti e pelā mo Iesu, e fai fakamasei tatou ne tino. Io me e mafai o fakasalalau ne tino ‵teke a tala sē ‵tonu e uiga ki a tatou. E mafai o mafau‵fau tatou e uiga ki te fakamaseiga e aumai ne lipoti e uiga ki te igoa o Ieova mo  tena fakapotopotoga. I vaegā taimi penā, e fai eiloa a pati a Ieova e pelā me se fakamafanafanaga ki a tatou. E se ‵tau mo tatou o sōna manava‵se. E mafai o mautinoa i a tatou me i “te filemu o te Atua telā e sili fakafia atu i mea katoa kolā e malamalama i ei a tino ka puipui ne ia [‵tou] loto mo te malosi o [‵tou] mafaufau e auala i a Keliso Iesu.” (Fili. 4:6, 7) Ka faka‵malu faeloa ne Ieova a tena igoa. E auala i te Malo, ka faka‵lei ne ia a fakamaseiga katoa ne aumai ne Satani mo tena lalolagi ki Ana tavini fakamaoni.—Sala. 94:22, 23; Isa. 65:17.

17. E ‵tusa mo pati i te Isaia 30:21, e faipati mai pefea a Ieova ki a tatou i aso nei?

¹⁷ A Ieova koi faipati mai eiloa ki a tatou i aso nei. (Faitau te Isaia 30:21.) E tonu, e se lagona ne tatou a te Atua e faipati tonu mai ki a tatou mai te lagi. Kae ne tuku mai ne ia tena Muna tusia ko te Tusi Tapu, telā e maua i ei ne tatou a pati fakatonutonu. E se gata i ei, e fakamalosi ne te agaga o Ieova a “situati fakamaoni” ke tuku atu faeloa ki Ana tavini a olotou mea‵kai. (Luka 12:42) Ko oko eiloa i te uke o mea‵kai faka-te-agaga e maua ne tatou e auala i tusi kolā ne ‵lomi mo tusi i te itaneti, ata vitio, mo tusi kolā ko oti ne puke ke fakalogo‵logo ki ei!

18. E fakamalosi aka pefea ne pati a Ieova a tou fakatuanaki kae tuku atu ki a koe te loto malosi?

¹⁸ Ke tuku i ‵tou mafaufau a pati ne fai mai ne Ieova i te taimi ne nofo ei tena Tama i te lalolagi nei! Ke fai eiloa a pati a te Atua, kolā ne fakamau ki te Tusi Tapu, pelā me se fakatalitonuga me e fai faka‵lei ne Ieova a mea katoa kae ka faka‵lei ne ia so se fakamaseiga ne aumai ne Satani mo tena lalolagi masei ki luga i a tatou. Kae ke na fakaiku aka ne tatou ke faka‵logo faka‵lei ki te leo o Ieova. Kafai e fai tatou penā, ka kufaki eiloa tatou mo te manuia i so se fakalavelave e fe‵paki mo tatou i te taimi nei mo aso mai mua. E fakamasaua mai te Tusi Tapu ki a tatou: “E manakogina ke kufaki koutou, ko te mea ke maua ne koutou te fakataunuga o te folafolaga māfai ko oti ne fai ne koutou te loto o te Atua.”—Epe. 10:36.