1, 2. 1) ¿Bintik-utʼil skʼoponoj te ants winiketik te Jehovae? 2) ¿Bin ya kilbeytik skʼoplal ta artikulo ini?

TE Jehová mero ya smulan te ya skʼoponotike. Jich ya spas, melel ya skʼan te ya jnaʼtik te bin ya snop sok te bin ya spase. Jaʼ yuʼun ta namey kʼinal la stuuntes j-alwanejetik, chʼul-abatetik sok te Cristo Jesús te sNichʼane (Amós 3:7; Gál. 3:19; Apoc. 1:1). Ta ora ini ya skʼoponotik ta swenta te sKʼop te jaʼ te Biblia.

² Jaʼnix jich te kʼalal ay ta Balumilal-a te Jesuse, te Jehová kʼopoj tal kʼalalto ta chʼulchan oxeb buelta. Kiltik te bin la yal, bin ya jnoptik yuʼun te bintik la yale sok bin ya skʼan ya jpastik teme ya jkʼan ya jtatik te lekilaletik ya yakʼe.

3. 1) Jich bitʼil ya yal Marcos 1:9-11, ¿bin la yal te Jehová kʼalal la yichʼ jaʼ te Jesuse? 2) ¿Bin la yakʼ ta naʼel-a te bintik la yale?

³ (Kʼopona Marcos 1:9-11). Jaʼ te sbabial buelta kʼopoj te Jehová kʼalalto ta chʼulchan. La yal: «Haʼat Jnichʼanat te bayel cʼuxat ta coʼtan; buen lec coʼtan awuʼun». Bayal akʼbot stseʼelil yoʼtan te Jesús kʼalal la yaʼiybey skʼop te sTat te albot te kʼux ya x-aʼiyot sok te ay smukʼul yoʼtan ta stojole. Kiltik te oxchajp bintik mukʼ skʼoplal la yal te Jehovae, sbabial, te jaʼ sNichʼan te Jesuse, schebal, te kʼux ta yoʼtane, yoxebal, te lek yoʼtan yuʼune.

4. Kʼalal la yichʼ jaʼ te Jesuse, ¿bin-utʼil jajch yil sba sok te Jehovae?

⁴ «Haʼat Jnichʼanat». Kʼalal jich la yal te Jehová la yakʼ ta naʼel te jajch yachʼil skʼoplal te bitʼil jun yoʼtan yiloj sbaike. Kʼalal espiritu ta chʼulchan-a te Jesús, jaʼix snichʼan Dios-a. Pero kʼalal la yichʼ jaʼe, la yichʼ tsael ta swenta te chʼul espiritu. Ta yorail-abi, te Dios la yakʼ ta naʼel te jaʼix sNichʼan te tsabil yuʼune sok te ya sujt bael ta chʼulchan yuʼun ya x-och ta Ajwalil sok ta Mukʼul Saserdote (Luc. 1:31-33; Heb. 1:8, 9; 2:17). Jaʼ yuʼun kʼalal la yichʼ jaʼ te Jesuse, te sTate bayal rason yuʼun te jich la yal: «Haʼat Jnichʼanat» (Luc. 3:22).

5. Jich bitʼil te Jehová, ¿bin ya skʼan ya jpastik?

 ⁵ «Haʼat [...] te bayel cʼuxat ta coʼtan». Jich bitʼil te Jehová la yalbey te kʼux ta yoʼtan te Jesús sok te la yakʼbey yip yoʼtane, te joʼotik jaʼnix jich ya skʼan ya jletik bitʼil ya jpastik ta stojol te yantike (Juan 5:20). Te kʼalal ya yakʼ ta ilel yutsil yoʼtan ta jtojoltik te machʼa ay skʼoplal ta koʼtantike sok te ya yutsilkʼoptayotik yuʼun te ay bin lek la jpastike, lek ya kaʼiy jbatik yuʼun. Te machʼatik ayik ta kongregasion sok te jfamiliatike ya skʼanik akʼbeyel yilik skʼuxul koʼtantik sok akʼbeyel yip yoʼtanik. Teme jich ya jpastike, ya jkoltaytik ta stulantesel te schʼuunel yoʼtanik sok te jun yoʼtan ya yakʼ sbaik ta stojol Jehová. Jaʼnix jich te meʼil tatiletik mukʼ skʼoplal te sok spisil yoʼtan ya yakʼbeyik yip yoʼtan te yal snichʼanik, te ya yutsil kʼoptayik sok te ya yakʼbeyik yil yutsil yoʼtanike. Jich ya skoltayik te yal snichʼanik ta spasel ta stukelik te bin leke.

6. ¿Bin yuʼun ya xjuʼ smukʼulin koʼtantik te Jesucristoe?

⁶ «Buen lec coʼtan awuʼun». Kʼalal jich la yal te Jehová, la yakʼ ta naʼel te smukʼulinej yoʼtan te ya xkʼot ta pasel yuʼun Jesús te skʼanojel yoʼtane. Teme bayal la yakʼ smukʼul yoʼtan ta stojol te sNichʼane, jaʼnix jich te joʼotike ya skʼan schʼuunej koʼtantik ta lek te ya skʼotes ta pasel Jesús spisil te bintik yaloj ta jamal te Jehovae (2 Cor. 1:20). Kʼalal ya jnopilantik te ejemplo yuʼun Jesús te bitʼil jun yoʼtan la yakʼ sbae, ya stijxan koʼtantik ta snopbeyel skʼoplal sok ta stʼunbeyel stalel. Te Jehová jaʼnix jich ay smukʼul yoʼtan te ya snopikxan ta swenta te sNichʼan te j-abatetik yuʼune (1 Ped. 2:21).

7. Jich bitʼil ya yal Mateo 17:1-5, ¿bin-ora kʼopoj ta schebal buelta te Jehová kʼalalto ta chʼulchan, sok bin la yal?

⁷ (Kʼopona Mateo 17:1-5). Te schebal buelta kʼopoj te Jehová kʼalalto ta chʼulchane jaʼ te kʼalal kʼatpʼuj te Jesuse. Te Jesús la yalbey  te Pedro, Jacobo (Santiago) sok te Juan te yakuk xjokinot bael ta jun toyol wits. Ay bin chajpnax la yilik ta najalsitil tey-a. Xojobaj te sit yelaw te Jesús sok kʼax sak kʼot ta ilel te skʼuʼ spakʼe. Tey-abi chiknajik chaʼtulxan te jaʼik yilel te Moisés sok te Elías, kajik ta kʼop sok Jesús ta swenta te slajel sok te chaʼkuxajel yuʼune. Manchukme bayal swayelik te oxtul jpuk-kʼopetik, la yilik te chajpnax najalsitil kʼalal wijkʼ sitik ta lek (Luc. 9:29-32). Ta patil potsotik ta sakal tokal sok tey kʼopoj tal-a te Diose. Jich bitʼil la spas te kʼalal la yichʼ jaʼ te Jesuse, te Jehová la yakʼxan ta naʼel te kʼux ta yoʼtan sok te lek yoʼtan yuʼun te sNichʼan, jaʼ yuʼun jich la yal: «Ha Jnichʼan ini te cʼux ta coʼtan, te bayel yutsil coʼtan yuʼun». Pero ta ora ini ay bin la yalxan: «Aʼiybeya awaʼiyic scʼop».

8. ¿Bin-utʼil koltayot te Jesús sok te jnopojeletik te najalsitile?

⁸ Te najalsitil-abi ya yakʼ ta ilel yutsilal sok yuʼel te Jesús kʼalal ya x-och ta ajwalil yuʼun te Wentainel yuʼun Diose. Ta melel akʼbot yip yoʼtan sok mukʼub kʼinal la yaʼiy swenta jich ya xkujch yuʼun te wokoliletik sok te tulan utsʼinel ya sta kʼalal ya yichʼ milele. Jaʼnix jich tulantesbot te schʼuunel yoʼtanik te jnopojeletik sok la stsak yip yoʼtanik ta sitintayel te tsajel ta swenta te schʼuunel yoʼtanik sok te tulan aʼtel ya spasik ta patile. Treinta jaʼbil ta patil, te jpuk-kʼop Pedro la yalbey skʼoplal te najalsitil-abi, jich yuʼun ya yakʼ kiltik te maba chʼayem ta yoʼtan spisil te bin kʼot ta pasele (2 Ped. 1:16-18).

9. ¿Bintik tojobtesel te maba wokol ta pasel la yakʼtiklanbey Jesús te jnopojeletik yuʼune?

⁹ «Aʼiybeya awaʼiyic scʼop». Te Jehová la yal ta jamal te ya skʼan yoʼtan te ya kaʼiytik sok ya jchʼuuntik spasel te bin ya yal te sNichʼane. Kʼalal ay ta Balumilal-a te Jesuse, bayal bintik mukʼ skʼoplal la yal te ya skʼan ya jchʼam kaʼiytik ta lek. Jun ejemplo, te Jesús la snojpteslan te jnopojeletik yuʼun ta scholel te lek yachʼil kʼop yuʼun te Wentainele sok bayal buelta la sjultesbey ta yoʼtanik te ya skʼan wikʼiluk sitik (Mat. 24:42; 28:19, 20). Jaʼnix jich la skʼantiklanbey spisil-ora te yakuk spasik tulan chikan bantito kʼalal ya xjuʼ yuʼunik sok la yaltiklanbey te manchuk ya xlujbike (Luc. 13:24). Soknix la yakʼbey snaʼik te mukʼ skʼoplal te talel kʼaxel kʼux ya yaʼiy sbaik, te junuk ayik sok te yakuk schʼuunik spasel te mantaliletik yuʼune (Juan 15:10, 12, 13). Ta melel te tojobtesel la yakʼtiklanbey te jnopojeletike maba wokol ta pasel-a, jaʼnix jich ta ora ini.

10, 11. ¿Bin-utʼil ya kakʼtik ta ilel te ya jchʼam kaʼiytik te skʼop Jesuse?

¹⁰ Te Jesús jich la yal: «Spisil te machʼatic ayic ta scuenta te smelelil cʼop, ya yaʼiybonic jcʼop» (Juan 18:37). Ya kakʼtik ta ilel te ya kaʼiybeytik skʼop kʼalal ya jchʼuuntik spasel te tojobtesel ini: «Talel cʼaxel cuhchuc awuʼunic soc pasbeya abahic perdón» (Col. 3:13; Luc. 17:3, 4). Jaʼnix jich ya kakʼtik ta ilel kʼalal ya jcholtik sok sbujtsʼ koʼtantik te lek yachʼil kʼop, manchukme ay o maʼyuk wokolil (2 Tim. 4:2).

¹¹ Te Jesús jaʼnix jich la yal te ya x-aʼiybot skʼop yuʼun te tuminchijetik yuʼune (Juan 10:27). Ya kakʼtik ta ilel te ya kaʼiybeytik te skʼope kʼalal ya jchʼuuntik spasel te bin ya yale ma jaʼuknax te ya jchʼam kaʼiytike. Ma xkakʼ schʼaytes koʼtantik snaʼulanel te bin-utʼil ya xkuxajotik (Luc. 21:34). Te bin mukʼ skʼoplal ta jkuxlejaltike, jaʼ te schʼuunel spasel te mantalil yuʼun te Jesuse, manchukme yorail wokol. Bayal ermanoetik yakik ta sitintayel tulan wokoliletik, jich bitʼil nutsel, pobreil sok tulan yikʼal jaʼal o yantikxan te bin ya xlajinwan jilele. Pero chikan bintik ya xkʼax ta skuxlejalik jun yoʼtan yakʼoj sbaik ta stojol Jehová. Te Jesús jich jamal ya yaltiklanbey: «Te machʼa yichʼoj te mandariletic cuʼun soc te ya schʼuhun spasel, ha me te cʼuxon ta yoʼtan abi. Te machʼa  cʼuxon ta yoʼtan, cʼux me ya xʼaʼiyot yuʼun te Jtate» (Juan 14:21).

12. ¿Bin-utʼil ya xjuʼ ya kakʼtikxan ta ilel te ya kaʼiybeytik skʼop te Jesuse?

¹² Yanxan te bitʼil ya kakʼtik ta ilel te ya kaʼiybeytik skʼop te Jesuse, jaʼ te ya jkoltaytik te machʼa yakʼojbey yaʼtel yuʼun ya stojobtesotike (Heb. 13:7, 17). Te cheʼoxeb jaʼbil kʼaxem tale, te organisasion yuʼun Dios ay bayal bintik sjelontesoj. Jun ejemplo jaʼ te yachʼil te bintik-utʼil ya jcholtik te skʼop Dios sok te bintik ya jtuuntestike. Jaʼnix jich la yichʼ jelontesel te bitʼil ya yichʼ kʼasesel te tsoblej ta yolil semana sok jelon te bin-utʼil ya yichʼ pasel yachʼil sNail Tsoblej, schaʼpasel sok te bitʼil ya yichʼ kanantayele. ¿Mabal jichuk te ya kaltik bayal wokol yuʼun te ya yakʼik tojobtesel sok skʼuxul yoʼtanik soknix te nopbil ta lek yuʼunike? Jnaʼojtik ta lek te ya yakʼbotik bendision Jehová teme ya jpastik tulan ta schʼuunel spasel te tojobtesel ya yakʼbotik te organisasione.

13. ¿Bintik lekilal ya jtatik kʼalal ya kaʼiybeytik skʼop te Jesuse?

¹³ Te kʼalal ya kaʼiytik stojol spisil te bin la yakʼ ta nopel te Jesuse bayal ya jtatik lekilal yuʼun. ¿Bin-utʼil? Jich bitʼil, te Jesús la yalbey te jnopojeletik yuʼun te ya x-akʼbotik slamalil kʼinal yaʼiyik te bin la yakʼ ta nopele. Jich la yal: «Hich yac atahic cux-oʼtanil yuʼun achʼuhlelic a, como ma ba wocol ta ichʼel te yugo cuʼun soc ma ba al te ihcatsil cuʼune» (Mat. 11:28-30). Te sKʼop Dios jich bitʼil te chaneb Ebangelioetik te ya scholbey skʼoplal te yaʼtel sok skuxlejal te Jesuse ya yakʼ smukʼul koʼtantik, ya yakʼ kiptik ta swenta te schʼuunel koʼtantik sok ya spʼijubtesotik (Sal. 19:7; 23:3). Jich jamal la yal te Jesuse: «Ha bayel yutsil te machʼatic ya yaʼiyic te scʼop Dios soc te ya spasique» (Luc. 11:28).

14, 15. 1) Jich bitʼil ya yal te Juan 12:27, 28, ¿bin-ora kʼopoj tal ta chʼulchan ta yoxebal buelta te Jehovae? 2) ¿Bin yuʼun mukʼubtesbot sok tulantesbot yoʼtan Jesús te bin la yal te Jehovae?

¹⁴ (Kʼopona Juan 12:27, 28). Te Ebangelio yuʼun Juan ya scholbey skʼoplal te yoxebal buelta kʼopoj tal ta chʼulchan te Jehovae. Cheʼoxebxanix kʼajkʼal skʼan ya xlaj-a, te Jesús ay ta Jerusalén-a yuʼun ya spas ta slajibal buelta te kʼin Pascuae. Kʼalal la yal te ay ta mel-oʼtan-ae jich la skʼanbey te Dios kʼalal la skʼopone: «Jtat, acʼa ta ichʼel ta mucʼ te abihile». Ta patil sutbot skʼop yuʼun Jehová kʼalalto ta chʼulchan: «Cacʼojix ta ichʼel ta mucʼ, soc ya cacʼ xan ta ichʼel ta mucʼ».

 ¹⁵ Te Jesús la snaʼulan yoʼtan snopel te kʼax tulan skʼoplal te jun yoʼtan ya skʼan ya yakʼ sba ta stojol te Jehovae. Snaʼoj-a te ya yichʼ tulan majel sok te ya yichʼ milele (Mat. 26:38). Pero te bin kʼax mukʼxan skʼoplal la yile jaʼ te ya yakʼbey ta ichʼel ta mukʼ te sbiil te sTate. La smel yoʼtan teme ya sbolobtesbey skʼoplal te Dios yuʼun te ya xlaje, melel akʼbot smulin sbolkʼoptayel Dios. Pero te bin la yal te sTate akʼbotxan snaʼ te ya yichʼ ichʼel ta mukʼ te sbiil te Jehovae. Ta melel, te bin la yal te sTate akʼbot slamalil yoʼtan sok akʼbotxan yip yuʼun ya xjuʼ yuʼun stsʼikel te wokolil yak ta talel ta stojole. Manchukme jaʼnaxniwan stukel kʼot ta yoʼtan te bin albote, te Jehová la yakʼ jilel ta tsʼibayel ta Biblia yuʼun ya xtuun kuʼuntik ta ora ini (Juan 12:29, 30).

16. ¿Bin yuʼun ay baeltik ya jmel koʼtantik yuʼun te ya yichʼ bolkʼoptayel sbiil te Jehovae?

¹⁶ Jich bitʼil kʼax ta stojol te Jesús, te joʼotike ayniwan ya jmel koʼtantik yuʼun te ya yichʼ bolkʼoptayel sbiil te Jehovae. Ayniwan ya kichʼtik pasbeyel te bin ma stojiluk jich bitʼil kʼax ta stojol te Jesuse. O ayniwan ma lek ya kaʼiy jbatik yuʼun te lotiletik ya yalik ta jtojoltik te jkontrainwanejetike. Yaniwan jnoptik te ma lek skʼoplal ya xkʼot te Jehová sok te organisasion yuʼune. Pero spisil-abi ma skʼan ya yakʼ jmel koʼtantik ta jkʼaxel. Kʼalal jich ya xkʼax ta jtojoltik, bayal ya yakʼ smukʼul koʼtantik te bin la yal te Jehová ta stojol te Jesús. Te Jehová spisilnanix-ora ya yakʼ ta ichʼel ta mukʼ te sbiile. Ya xbajtʼ stuuntes te Wentainel ta slajinel te utsʼinel ya yakʼ te Satanás sok te balumilal ini  ta stojol te j-abatetik te jun yoʼtanike (Sal. 94:22, 23; Is. 65:17). Jchʼuunejtik ta lek te ya xkʼot ta pasel te kʼopetik ini: «Te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel, ya me scanantaybeyex awoʼtanic soc apensaric ta scuenta te Cristo Jesús» (Filip. 4:6, 7).

17. Ta swenta te bin ya yal Isaías 30:21, ¿bin-utʼil ya skʼoponotik te Jehová ta ora ini?

¹⁷ Te Jehová yato skʼoponotik ta ora ini (kʼopona Isaías 30:21). Ta melel maba ya kaʼiybeytik skʼop kʼalalto ta chʼulchan. Pero ya yakʼbotik tojobtesel ta swenta te Biblia. Jaʼnix jich te chʼul espiritu ya stijbey yoʼtan te «jcanan te jun yoʼtan» swenta ya yakʼbotikxan te jweʼeltik ta swenta skʼop Dios, jich bitʼil te junetik te ya yichʼ pasel imprimir, ta Internet, ta bideo sok ta audio (Luc. 12:42). Ta melel bayal weʼelil ta swenta skʼop Dios ya kichʼtik akʼbeyel.

18. ¿Bin yuʼun ya yakʼ xmukʼub schʼuunel koʼtantik sok yip koʼtantik te skʼop Jehovae?

¹⁸ Maʼyuk bin-ora ya skʼan ya xchʼay ta koʼtantik te bin la yal te Jehová kʼalal ay ta Balumilal-a te sNichʼane. Spisil te skʼop Jehová te la yichʼ tsʼibayel jilel ta Biblia akʼame yakʼ smukʼul koʼtantik te spisil ya snaʼ stukel te bin ya xkʼot ta pasele sok te ya schajpan spisil te wokolil ya yakʼbotik te Satanás sok te chopol balumilal yuʼune. Akʼa kakʼ ta koʼtantik yaʼiyel ta lek te skʼop Jehová. Teme jich ya jpastike, yame xjuʼ kuʼuntik stsʼikel chikan bintik wokolil ya xkʼax ta jtojoltik ta ora ini sok ta pajel chaʼbej. Te Biblia jich ya sjultes ta koʼtantik: «Ya scʼan te ya xcuhch awuʼunic, scuenta yuʼun te cʼalal apasojiquix te bin ya scʼan yoʼtan te Dios, ya me awichʼic te bin yaloje» (Heb. 10:36).