XCHANOBIL 11
Jchikintatik li kʼusi chal Jeovae
«Liʼe jaʼ Jnichʼon [...]. Chikintaik li kʼusi chale» (MAT. 17:5).
KʼEJOJ 96 Jech kʼuchaʼal jkʼulejal li Vivliae
LI KʼUSI TA JCHANTIKE *
1, 2. 1) ¿Kʼuxi xchiʼinoj ta loʼil krixchanoetik li Jeovae? 2) ¿Kʼusi ta jkʼeltik li ta xchanobil liʼe?
LI Jeovae lek tajek chaʼi chchiʼinan ta loʼil li krixchanoetike. Jaʼ yuʼun, li ta mas voʼnee la stunes yaj-alkʼoptak, yaj-anjeltak xchiʼuk Xnichʼon sventa xakʼ ta naʼel li kʼusi oy ta yoʼontone (Amós 3:7; Gal. 3:19; Apok. 1:1). Pe avie jaʼ xa tstunes li Vivlia sventa jnaʼtik li kʼusi tsnop xchiʼuk li kʼusi tspase.
2 Li Jeovae oxib to velta kʼopoj tal ta vinajel sventa skʼopon Xnichʼon kʼalal liʼ toʼox oy ta balumile. Jkʼeltik batel kʼusi laj yal, kʼusi chakʼ jchantik xchiʼuk kʼuxi ta jtabetik sbalil li kʼusi laj yale.
«VOʼOT JNICHʼONOT, JKʼANOJOT»
3. Jech kʼuchaʼal chal li Markos 1:9 kʼalal ta 11, ¿kʼusi laj yal Jeova kʼalal laj yichʼ voʼ li Jesuse, xchiʼuk kʼusi laj yakʼ ta naʼel kʼalal jech laj yale?
3 (Kʼelo Markos 1:9-11). Liʼe jaʼo kʼalal kʼopoj tal ta sba velta ta vinajel li Jeovae, xi laj yale: «Voʼot Jnichʼonot, jkʼanojot, ximuyubaj avuʼun». Ta melel, patbat tajek yoʼonton Jesus kʼalal laj yaʼi ti kʼanbil yuʼun li Stote xchiʼuk ti spatoj yoʼonton ta stojolale. Jkʼeltik batel li oxtos kʼusi tsots skʼoplal laj yal Jeovae: ti jaʼ Xnichʼon li Jesuse, ti skʼanoje xchiʼuk ti xmuyubaj ta stojolale.
4. Kʼalal laj yichʼ voʼ li Jesuse, ¿kʼuxi ti jelel xa kʼot ta Xnichʼon Diose?
4 «Voʼot Jnichʼonot». Kʼalal jech laj yal li Jeovae, laj yakʼ ta naʼel ti jel kʼu yelan xil sba xchiʼuk li Xnichʼone. Kʼalal te toʼox oy ta vinajel li Jesuse, jaʼ xa onoʼox Xnichʼon Dios. Pe kʼalal laj yichʼ voʼe, laj yichʼ tʼujel ta chʼul espiritu. Vaʼun li Jeovae jaʼo te laj yal ti jaʼ stʼujbil Nichʼon li Jesuse xchiʼuk ti xuʼ xkʼot ta Ajvalil xchiʼuk ta mero Bankilal Pale kʼalal mi sut batel ta vinajele (Luk. 1:31-33; Evr. 1:8, 9; 2:17). Jech oxal, li Jeovae oy lek srasonal yuʼun ti xi laj yalbe Jesus kʼalal laj yichʼ voʼe: «Voʼot Jnichʼonot» (Luk. 3:22).
Kʼalal oy buchʼu tskʼupil kʼoptautik xchiʼuk tstij koʼontontike, jun koʼontontik chijkom yuʼun. (Kʼelo parafo 5). *
5. ¿Kʼusi skʼan jpastik jech kʼuchaʼal la spas ta stojolal Xnichʼon li Jeovae?
5 «Voʼot [...] jkʼanojot». Li voʼotik eke skʼan me jkʼeltik kʼuxi xuʼ jpatbetik yoʼonton yantik xchiʼuk ti xkakʼbetik yilik ti jkʼanojtik jech kʼuchaʼal la spas ta stojolal Xnichʼon li Jeovae (Juan 5:20). Kʼalal tskʼupil kʼoptautik li buchʼu xkojtikintik leke xchiʼuk ti chakʼ ta ilel ti oyutik ta yoʼontone, jun koʼontontik chijkom yuʼun. Li kutsʼ kalaltik xchiʼuk li ermanoetik ta tsobobbaile chtun yuʼunik ti jpatbetik yoʼontonik xchiʼuk ti xkakʼbetik ta ilel ti jkʼanojtike. Mi jech ta jpastike, tstsatsub xchʼunel yoʼontonik xchiʼuk tukʼ chakʼ sbaik ta stojolal li Jeovae. Li totil meʼiletik eke toj tsots skʼoplal ti stijbe yoʼonton li yalab xnichʼnabike, ti skʼupil kʼoptaike xchiʼuk ti xakʼbeik yil ti skʼanojike. Jaʼ me jech xuʼ skolta yalab xnichʼnabik yoʼ jaʼuk spasik li kʼusi leke.
6. ¿Kʼu yuʼun xuʼ jpat koʼontontik ta stojolal li Jesuse?
6 «Ximuyubaj avuʼun». ¿Kʼusi laj yakʼ ta ilel Jeova kʼalal jech laj yale? Jaʼ ti snaʼoj lek ti tspasbat li kʼusi tskʼan yoʼontone xchiʼuk ti spatoj tajek yoʼonton ta stojolal Xnichʼone. Li voʼotik eke xuʼ me jpat koʼontontik ti chakʼ kʼotuk ta pasel Jesus li kʼusitik yaloj tspas Jeovae (2 Kor. 1:20). Kʼalal ta jnopbetik skʼoplal li stukʼil yoʼonton Jesuse, tstij koʼontontik yoʼ xkojtikintik mas xchiʼuk ti jtsʼaklibetik li yav yoke. Li Jeovae spatoj yoʼonton ta jtojolaltik ti ta to jchantik batel mas ta stojolal li Xnichʼone (1 Ped. 2:21).
«CHIKINTAIK LI KʼUSI CHALE»
7. Jech kʼuchaʼal chal Mateo 17:1 kʼalal ta 5, ¿kʼusi ora kʼopoj tal yan velta ta vinajel li Jeovae, xchiʼuk kʼusi laj yal?
7 (Kʼelo Mateo 17:1-5). Li xchibal velta kʼopoj tal ta vinajel li Jeovae jaʼo kʼalal «la skʼatajes sba» li Jesuse. Jun veltae, li Jesuse laj yalbe Pedro, Santiago xchiʼuk Juan ti akʼo xbat chiʼinatuk ta jun toyol vitse. Oy kʼusi toj labal sba akʼbatik ta ilel yuʼun Dios li ta vits taje. Te laj yilik ti lik xojobajuk sat li Jesuse xchiʼuk ti lik sakubuk li skʼuʼe. Vaʼun, te vinaj tal li Moises xchiʼuk Eliase, lik yalbeik skʼoplal li slajel xchiʼuk xchaʼkuxesel Jesuse. Li oxvoʼ jtakboletike «solel tsmutsʼ xa sba stuk li satike, pe kʼalal vikʼ xaʼox lek satike», laj yilik li kʼusi labal sba kʼot ta pasele (Luk. 9:29-32). Maʼuk noʼox, yuʼun lik stsin sba tal tok ti xjapet xojobale xchiʼuk te kʼopoj tal li Diose, xi laj yale: «Liʼe jaʼ Jnichʼon, jaʼ li buchʼu jkʼanoje, jaʼ li buchʼu ximuyubaj yuʼune». Jaʼtik onoʼox jech la yalbe tal Xnichʼon kʼalal laj yichʼ voʼe. Pe avi une, xi to laj yale: «Chikintaik li kʼusi chale».
8. ¿Kʼuxi koltaat-o Jesus xchiʼuk yajchankʼoptak li kʼusi laj yilike?
8 Li kʼusi kʼot ta pasele jaʼ noʼox yuni kʼelobil ti kʼu to stsatsal sjuʼel Jesus kʼalal mi och ta Ajvalil li ta Ajvalilal yuʼun Diose. Li Jesuse snaʼoj xa onoʼox ti tsots chil svokole xchiʼuk ti chopol tajek kʼu yelan chichʼ milele, pe li kʼusi kʼot ta pasele jaʼ patbat-o yoʼonton xchiʼuk tsatsubtasat. Li yajchankʼoptak eke ayan mas xchʼunel yoʼontonik, akʼbat yipalik yoʼ stsal yuʼunik li prevaetik tsnuptanike xchiʼuk ti spas yuʼunik li abtelal ti skʼan toʼox stsutse. Li jtakbol Pedroe te-o ta snopben li kʼusi laj yile yuʼun laj to yalbe skʼoplal kʼalal jutuk xa ox mu 30 jabil ti jech kʼot ta pasele (2 Ped. 1:16-18).
9. ¿Kʼusi lekil tojobtaseletik laj yakʼbe yajchankʼoptak li Jesuse?
9 «Chikintaik li kʼusi chale». Jamal xvinaj ti oy ta yoʼonton Jeova ti jchikintabetik kʼusi chal li Xnichʼone xchiʼuk ti jchʼuntike. ¿Kʼusitik laj yal Jesus kʼalal liʼ toʼox oy ta balumile? Ep kʼusitik laj yal ti xlokʼ venta jchikintatike. Kaltik junchibuk. Li stuke la xchanubtas yajtsʼaklomtak ta xcholbel skʼoplal li Ajvalilale xchiʼuk ep ta velta laj yalbe ti skʼan vikʼiluk satike (Mat. 24:42; 28:19, 20). Jech noxtok, xvokolet laj yalanbe ti akʼo xakʼ yipalike xchiʼuk ti mu xlubtsajike (Luk. 13:24). Laj yalanbe xtok ti toj tsots skʼoplal ti skʼan sbaik ta jujuntale, ti jmojuk noʼox oyikuke xchiʼuk ti xchʼunik li kʼusi chale (Juan 15:10, 12, 13). Ta melel, toj jtunel li tojobtaseletik laj yichʼik akʼbele xchiʼuk jech-o li avi eke.
10, 11. ¿Kʼuxi chkakʼtik ta ilel ti ta jchikintatik li kʼusi chal Jesuse?
10 Xi laj yal li Jesuse: «Ta me xaʼi kʼusi chkal skotol li buchʼutik te oy ta stojolal li kʼusi melele» (Juan 18:37). ¿Kʼuxi chvinaj ti ta jchikintatik li kʼusi chale? Jaʼ kʼalal ta jchʼuntik li tojobtasel liʼe: «Jechuk-o me tsʼikbo abaik ta jujuntal xchiʼuk mu me xajalanbe abaik ta jujuntal ti chapasbe abaik pertone» (Kol. 3:13; Luk. 17:3, 4). Yan ti kʼuxi chkakʼtik ta ilele, jaʼ mi ta jcholtik mantal «kʼalal muʼyuk vokolile xchiʼuk kʼalal oy vokolile» (2 Tim. 4:2).
11 Xi laj yal xtok li Jesuse: «Li jchijtake chaʼiik li jkʼopojele» (Juan 10:27). ¿Kʼuxi to chkakʼtik ta ilel ti maʼuk noʼox ta jchikintatik li kʼusi chale? Jaʼ mi ta jchʼuntik li kʼusi chale. Mu me xkakʼtik ti xchʼay koʼontontik «li vul oʼonton ta sventa li kuxlejale» (Luk. 21:34). Li kʼusi xuʼ jpastike jaʼ ti tsotsuk tajek skʼoplal xkiltik li xchʼunbel smantal Jesuse akʼo mi oy kʼusi tsots ta jnuptantik. Oy ep kermanotik ti tsots chil svokolike: chichʼik kontrainel, chil svokolik ta povreal xchiʼuk chlajik ta nikel, nojelal ta voʼ xchiʼuk ta yan kʼusitik. Akʼo mi jech, tukʼ-o yakʼoj sbaik ta stojolal li Jeovae. Xi jamal ch-albatik yuʼun li Jesuse: «Jaʼ skʼanojun li buchʼu xchʼamoj li jmantaltak xchiʼuk ti chchʼune. Jech xtok, chkʼanat yuʼun Jtot li buchʼu skʼanojune» (Juan 14:21).
Li cholmantal ta jpastike jaʼ tskoltautik yoʼ jchikintabetik-o li kʼusi chal Jesuse. (Kʼelo parafo 12). *
12. ¿Kʼuxi to yan xuʼ xkakʼtik ta ilel ti ta jchikintatik li kʼusi chal Jesuse?
12 Yan xtok ti kʼuxi chkakʼtik ta ilel ti ta jchikintatik li kʼusi chal Jesuse jaʼo kʼalal jmoj chij-abtej xchiʼuk li buchʼutik svaʼanojan yoʼ sbeiltasutike (Evr. 13:7, 17). Ep xa kʼusitik sjeloj talel li s-organisasion Jeovae. Jech kʼuchaʼal liʼe: yakʼojbutik ep ta tos kabtejebtik sventa li cholmantale xchiʼuk ti kʼuxi xuʼ jpastike. Jech xtok, jelel xa kʼu yelan chichʼ jelubtasel li tsobajel ta xokol kʼakʼale, ti kʼu yelan chichʼ vaʼanel li Salonetik sventa Tsobobbaile, ti kʼu yelan chichʼ chabiele o kʼalal chichʼ chaʼachʼubtasele. Ta melel, toj ep sbalil chkiltik ti ta slekil oʼontonal chkichʼtik beiltasele xchiʼuk ti ta smelolal noʼoxe. Xuʼ me jpat koʼontontik ti chakʼbutik bendision Jeova ta skoj ti chkakʼtik persa xchʼunel li kʼusi chal s-organisasione.
13. ¿Kʼuxi ta jtabetik sbalil mi ta jchikintatik li kʼusi chal Jesuse?
13 ¿Kʼuxi ta jtabetik sbalil mi ta jchikintatik li kʼusi chal Jesuse? Jtose jaʼ kʼalal laj yalbe yajtakboltak ti chpatbat yoʼontonik li chanubtaseletik yuʼune. Xi laj yale: «Chata siketel avoʼontonik. Yuʼun li kʼatlom teʼ kuʼune kʼun ta kuchel xchiʼuk muʼyuk bu ol li kikatse» (Mat. 11:28-30). Xuʼ me sikubtas koʼontontik, xakʼ kipaltik ta mantal xchiʼuk chijpʼijub yuʼun mi ta jchantik sliklej li Skʼop Diose, ti te skʼoplal li chanib Evanjelioetik ti chalbe skʼoplal xkuxlejal li Jesuse xchiʼuk li cholmantal la spase (Sal. 19:7; 23:3). Xi onoʼox laj yal li Jesuse: «¡Jaʼ xmuyubajik noʼox li buchʼutik chaʼiik li skʼop Diose xchiʼuk ti tspasik li kʼusi chale!» (Luk. 11:28).
TA JTOYBE SKʼOPLAL YAN VELTA LI JBIE
14, 15. 1) Jech kʼuchaʼal chal li Juan 12:27 xchiʼuk 28, ¿bakʼin kʼopoj talel ta yoxibal velta li Jeovae? 2) ¿Kʼu yuʼun patbat-o yoʼonton Jesus xchiʼuk akʼbat-o yipal li kʼusi albat yuʼun Stote?
14 (Kʼelo Juan 12:27, 28). Li ta Evanjelio yuʼun Juane jaʼ te chalbe skʼoplal kʼalal kʼopoj tal ta yoxibal velta ta vinajel li Jeovae. ¿Bakʼin kʼot ta pasel? Jaʼo kʼalal junchib xa ox kʼakʼal skʼan xcham li Jesuse xchiʼuk ti jaʼo te oy ta Jerusalen sventa spas ta slajeb velta li kʼin Koltaele. Kʼalal laj xa ox yal ti chat yoʼontone, xi laj yalbe li Stot ta vinajele: «Tot, akʼo yichʼ toybel skʼoplal li abie». Li Jeovae xi la stakʼ talel ta vinajele: «La jtoybe skʼoplal xchiʼuk ta jtoybe skʼoplal yan velta».
15 Li Jesuse snaʼoj xa onoʼox ti chichʼ tsitsel xchiʼuk ti chichʼ milele, jech oxal, laj yat yoʼonton yuʼun snaʼoj ti skʼan tukʼ xakʼ sba ta stojolal li Jeovae (Mat. 26:38). Oy tajek ta yoʼonton ti xichʼ toybel skʼoplal li sbi Stote. Ta skoj ti laj yichʼ pakʼtael ta jchopolkʼoptavaneje, la svul yoʼonton ti chopol skʼoplal xkom Stot kʼalal mi chame. Pe li kʼusi albat yuʼun Stot ta vinajele jaʼ akʼbat xchʼun ti chichʼ onoʼox toybel skʼoplal li sbi Jeovae. Ta melel, patbat-o yoʼonton li kʼusi albate xchiʼuk akʼbat yipal sventa xkuch yuʼun li vokolil tsnuptane. Akʼo mi stuk noʼox van Jesus laj yaʼibe smelolal li kʼusi laj yal talel Stot li vaʼ orae, li Jeovae laj yakʼ ti teuk tsʼibabil xkom sventa jtabetik sbalil eke (Juan 12:29, 30).
Li Jeovae tstoybe skʼoplal yan velta li sbie xchiʼuk tspoj li steklumale. (Kʼelo parafo 16). *
16. ¿Kʼu yuʼun ta jvul koʼontontik ti xichʼ ikʼubtasbel sbi li Jeovae?
16 Li voʼotik eke xuʼ van ta jvul koʼontontik ti xichʼ ikʼubtasbel sbi li Jeovae. Xuʼ van muʼyuk tukʼ kʼusi chkichʼtik pasbel jech kʼuchaʼal la snuptan li Jesuse. Xuʼ van ta jvul-o koʼontontik xtok kʼalal jecheʼ noʼox tstikʼ jmultik li kajkontratike yuʼun xuʼ sok-o skʼoplal li Jeovae xchiʼuk li s-organisasione. Pe skʼan mu jaʼuk xbat jchʼuleltik ta snopbel skʼoplal taje, xuʼ spat koʼontontik li kʼusi laj yalbe Xnichʼon li Jeovae. Yuʼun persa onoʼox tstoybe skʼoplal li sbie. Jaʼ tstunes li Ajvalilal yuʼun sventa slajes li vokoliletik chakʼbutik Satanas xchiʼuk li sbalumile (Sal. 94:22, 23; Is. 65:17). Xuʼ jpat koʼontontik ti chkʼot ta pasel li kʼusi chal Vivlia liʼe: «Li jun oʼontonal yuʼun Dios ti toj echʼ xa noʼox leke, ti jaʼ mu sta li snopben krixchanoetike, chchabi avoʼontonik xchiʼuk anopbenik ta stojolal li Kristo Jesuse» (Filip. 4:6, 7).
OY SBALIL MI TA JCHIKINTATIK LI KʼUSI CHAL JEOVAE
17. Li kʼusi chal Isaías 30:21, ¿kʼuxi xa tskʼoponutik avi li Jeovae?
17 Li Jeovae jech-o tskʼoponutik li avie (kʼelo Isaías 30:21). Pe muʼyuk xa chkaʼibetik yechʼomal ye ta vinajel. ¿Kʼuxi xa tskʼoponutik talel? Jaʼ xa tstunes li Vivlia sventa tsbeiltasutike. Jech xtok, chakʼbe xchʼul espiritu «li tukʼil jchabina» sventa xakʼ jveʼeltik ta mantale, jech kʼuchaʼal vunetik ti chichʼ pasel imprimire, li kʼusitik oy ta jpajinatik ta Internete, li videoetike xchiʼuk li vunetik ti stakʼ chikintaele (Luk. 12:42). Ti melel xkaltike, busanbil noʼox chkichʼtik akʼbel li jveʼeltik ta mantale.
18. ¿Kʼu yuʼun tstsatsubtas xchʼunel koʼontontik xchiʼuk chakʼ kipaltik li kʼusi laj yal Jeovae?
18 Teuk-o me ta joltik li kʼusi laj yalbe Xnichʼon Jeova kʼalal liʼ toʼox oy ta balumile. Li kʼusi laj yal ti te tsʼibabil kom ta Vivliae tspat koʼontontik, yuʼun snaʼoj kʼusi tspas li Diose xchiʼuk tslajesbe skʼoplal li vokolil chakʼbutik Satanas xchiʼuk li sbalumile. Jech oxal, ta sjunuluk koʼontontik jchikintatik li kʼusi chal Jeovae, vaʼun jech tstsal kuʼuntik li jvokoltik avie xchiʼuk li kʼusi chtal ta tsʼakale. Xi chalbutik li Vivliae: «Skʼan xkuch avuʼunik, yuʼun chavichʼik li kʼusi onoʼox albil skʼoplal chkʼot ta pasel mi laj xaʼox apasbeik li yabtel Diose» (Evr. 10:36).
KʼEJOJ 4 Li Jeovae chchabiun kʼuchaʼal yuni chij
^ par. 5 Li Jeovae oxib to velta kʼopoj tal ta vinajel sventa skʼopon tal Xnichʼon kʼalal liʼ toʼox oy ta balumile. Li ta xchibal velta kʼopoje laj yalbe yajtsʼaklomtak Kristo ti akʼo xchikintabeik li Xnichʼone. ¿Kʼuxi tskʼoponutik avi li Jeovae? Jaʼ tstunes li s-organisasione xchiʼuk tstunes li Vivliae yuʼun jaʼ te tsloʼilta li kʼusitik laj yakʼ ta chanel li Jesuse. Li ta xchanobil liʼe ta jkʼeltik kʼusi sbalil ta jtabetik kʼalal ta jchikintatik li kʼusi chal Jeova xchiʼuk Jesuse.
^ par. 52 LI KʼUSI XVINAJ TA LOKʼOLE: Jun mol ta tsobobbail ta slekil yoʼonton tskʼupil kʼopta jun jtunel ta tsobobbail ti chkoltavan ta skusel li salone xchiʼuk ta spukel li vunetike.
^ par. 54 LI KʼUSI XVINAJ TA LOKʼOLE: Jun nupultsʼakal ta Sierra Leona yakal chakʼbe jun jtsak choy li takel ta ikʼel sventa tsobajele.
^ par. 56 LI KʼUSI XVINAJ TA LOKʼOLE: Li ermanoetike te tstsob sbaik ta jpʼej na yuʼun li ta slumalike mu xakʼik xichʼ pasel li kabteltike. Sventa mu x-ilatik yuʼun li krixchanoetike, maʼuk jech tslap batel skʼuʼik kʼuchaʼal li ta tsobajele.
