1, 2. а) Кызьы Иегова адямиосын вераське? б) Мае ми эскеромы та статьяын?

 ИЕГОВАЛЫ милемын вераськыны кельше. Азьвыл дыре Инмар малпанъёссэ пророкъёс, кылчинъёс но Иисус Христос Пиез пыр вералляз (Ам. 3:7; Гал. 3:19; Усьт. 1:1). Туннэ со вераське милемын аслаз Кылыз пыр, Библия пыр. Со милемлы сое кузьмаз, ми солэсь малпаськемзэ мед тодомы но солэсь ужъёссэ мед валаломы шуыса.

² Куке Иисус музъем вылын вал, Иегова куинь пол инмысен вераськиз. Ойдолэ эскеромы, мар Инмар вераз котькудаз со учыръёсын, малы солэн кылъёсыз милемыз дышетыны быгато но малы соосты кылзоно.

3. Мар вераз Иегова Иисуслэн пылатӥськемез дыръя, кызьы адӟиське Марклэн 1:9—11? Кыӵе кулэ луись зэмлыкъёсты ми тодӥськомы со кылъёсысь?

³ Марклэн 1:9—11 гожтэмын нырысетӥ учыр, куке Иегова инмысен вераськиз. (Лыдӟе.) Со Иисуслы вераз: «Тон Мынам Яратоно Пие, Тон бордын Мынам ӟеч эрике». Иисус туж шумпотӥз, луоз, куке кылӥз, Атаез сое яратэ но сое ярамонэн лыдъя шуыса. Иеговалэн кылъёсысьтыз ми Иисус сярысь куинь кулэ луись зэмлыкъёсты тодӥськомы. Нырысетӥез, Иисус — Инмарлэн Пиез. Кыкетӥез, Иегова аслэсьтыз Пизэ яратэ. Куинетӥез, Иисус Иеговалы ярамон луэ. Ойдолэ та зэмлыкъёсты пыр-почгес эскеромы.

4. Кыӵе нимысьтыз кусыпъёссы луизы Инмарлэн но Иисуслэн солэн пылатӥськемез бере?

⁴ «Тон Мынам Яратоно Пие». Та кылъёсын Иегова возьматӥз, солэн яратоно Пиеныз, Иисусэн, нимысьтыз кусыпъёсыз шуыса. Музъем вылэ лыктытозяз, Иисус Инмарлэн  духовной пиосыз пӧлысь одӥгез вал. Нош пылатӥськыкуз со святой духен зырӟемын вал. Озьы Инмар возьматӥз: Иисус, зырӟем Пиез луыса, табере оскыны быгатэ, инме берытскоз но Инмарен пуктэм Эксэй но Быдӟым священник луыса ужалоз-тыршоз шуыса (Лука 1:31—33; Евр. 1:8, 9; 2:17). Соин ик, куке Иисус пылатӥськиз, Иегова вераны быгатӥз: «Тон Мынам Яратоно Пие» (Лука 3:22).

5. Кызьы ми адӟем карыны быгатӥськомы Иеговалэсь, кудӥз Иисуслы яратэмзэ возьматӥз?

⁵ «Тон Мынам Яратоно Пие». Иеговалэн Иисуслы яратэмзэ возьматэмез дышетэ милемыз котькуд тупась учыре мукетъёсызлэсь мылкыдзэс ӝутыны (Иоанн 5:20). Куке со, кин милемлы дуно потэ, милемыз ушъя но вера, со милемыз яратэ шуыса, ми сяськаяськомы кадь. Семьяосмы, озьы ик кенешысь вын-агайёс но сузэр-апайёс кулэ каро, ми соосты мед яратомы но мылкыдзэс мед ӝутомы шуыса. Куке ми мукетъёссэ ушъяськомы, ми соослэсь осконзэс юнматӥськомы но Иеговалы оскымон ужаны-тыршыны юрттӥськомы. Анай-атайёслы тужгес но кулэ нылпиоссэс ушъяны. Куке анай-атайёс нылпиоссылы яратэмзэс но ушъямзэс уг возьмато, нылпиос шундытэк будӥсь будослы кельшо.

6. Малы ми Иисус Христослы оскыны быгатӥськомы?

⁶ «Тон бордын Мынам ӟеч эрике». Кызьы адӟиське та кылъёсысь, Иегова оскиз, Иисус солэсь эриксэ одно ик быдэстоз шуыса. Соин ик ми но оскыны быгатӥськомы, Иисус Инмарлэсь вань кыл сётонъёссэ быдэстоз шуыса (2 Кор. 1:20). Куке ми Иисуслэн адӟем каронэз сярысь малпаськиськомы, милям эшшо но золгес солэсь дышетскеммы но солэн пытьы кузяз мынэммы  потэ. Иегова милемлы но оске. Со тодэ, ми, солэн дышетскисьёсыз, азьланяз но Иисуслэсь дышетскомы шуыса (1 Пётр 2:21).

7. Ку Иегова инмысен кыкетӥзэ вераськиз, кызьы адӟиське Матфейлэн 17:1—5? Мар со вераз?

⁷ Лыдӟе Матфейлэсь 17:1—5. Кыкетӥзэ Иегова инмысен вераськиз, куке Иисус «воштӥськиз». Иисус ӧтиз Пётрез, Иаковез но Иоаннэз соин ӵош ӝужыт гурезь йылэ мыныны. Отын соос паймымон адӟонэз адӟизы. Иисуслэн ымнырыз яркыт пиштыны кутскиз, нош дӥськутэз тӧдь-тӧдь луиз. Соин артэ Моисеез но Илияез возьматӥсь кык пиосмуртъёс кылдӥзы, но соос Иисусэн вераськыны кутскизы солэн кулонэз но улӟонэз сярысь. Апостолъёсты «ум нюртыса возиз», нош изем потэмзэс вормыса, соос та паймымон адӟонэз адӟизы (Лука 9:29—32). Со бере соосты югыт пилем шобыртӥз, но соос пилем пушкысь куара кылӥзы — со Инмарлэн куараез вал! Иисуслэн пылатӥськемез дыръя кадь, Иегова нош ик Пизэ оскытӥз, со сое яратэ но солы ярамон луэ шуыса. Со вераз: «Та Мынам Яратоно Пие, Со бордын Мынам ӟеч эрике». Но таяз учырын Иегова ватсаз на: «Солэсь кылзӥське».

8. Кызьы воштӥськон сярысь адӟон Иисус но солэн дышетскисьёсыз вылын шӧдӥськиз?

⁸ Та адӟон возьматӥз Иисуслэсь данзэ но кужымзэ, куке со Инмарлэн Эксэйлыказ Эксэй луоз. Иисуслы курадӟонъёс пыр потоно но курадӟыса кулонэз чидано вал, но та адӟон солэсь мылкыдзэ ӝутӥз но сое юнматӥз. Озьы ик со Христослэн дышетскисьёсызлэсь осконзэс юнматӥз но соосты шуг-секытъёслы но секыт ужлы дасяз, кудзэ соослы трос аръёс ӵоже быдэсъяно вал. Иисуслэн воштӥськемез Пётрлэсь сюлэмзэ сокем бугыртӥз, со адӟонэз Пётр, 30 ар ортчыса но, тодаз возиз на (2 Пётр 1:16—18).

9. Кыӵе пайдаё визь-кенешъёс Иисус дышетскисьёсызлы сётъялляз?

⁹ «Солэсь кылзӥське». Та кылъёсын Иегова возьматӥз: солэн потэ, ми солэн Пиезлэсь мед кылзӥськомы но солэн кылъёсызъя мед уломы шуыса. Куке Иисус музъем вылын улӥз, со вераз сое, малэсь кылзӥськыны туж кулэ вал. Кылсярысь, со дышетскисьёссэ яратыса дышетӥз ӟеч иворез вераны но трос пол соослы тодазы вайытылӥз, сак улоно шуыса (Матф. 24:42; 28:19, 20). Со сяна, со соосты ӧтиз асьсэды жалясьтэмесь луыны но сётскытэк улыны (Лука 13:24). Иисус пусйылӥз, дышетскисьёсызлы ог-огзэс яратоно, огъя улоно но солэсь курон-косонъёссэ быдэсъяно шуыса (Иоанн 15:10, 12, 13). Солэн курон-косонъёсыз туж пайдаё вал. Соос туннэ но пайда ваё.

10, 11. Кызьы ми возьматыны быгатӥськомы, Иисуслэсь кылзӥськиськомы шуыса?

¹⁰ Иисус вераз: «Котькудӥз зэмлык бордын возиськись Мынэсьтым куараме кылзӥське» (Иоанн 18:37). Ми солэсь куаразэ кылзӥськомы, куке ог-огмылы чиданмес возьматӥськомы но ог-огмес вань сюлмысьтымы простить кариськомы (Кол. 3:13; Лука 17:3, 4). Кылзӥськеммы адӟиське соку но, куке ми ӟырдыт мылкыдын ӟеч иворез тодытӥськомы «тупась дыре но, тупасьтэм дыре но» (2 Тим. 4:2).

¹¹ Озьы ик Иисус вераз: «Мынам ыжъёсы Мынэсьтым куараме кылзӥсько» (Иоанн 10:27). Христослэн дышетскисьёсыз, солэсь верамзэ кылзэм сяна, озьы ик уло солэн кылъёсызъя. Соос та улонлэн сюлмаськонъёсыз пӧлы быдэсак уг выё (Лука  21:34). Соос понна валтӥсез — Иисуслэсь курон-косонъёссэ быдэсъян, со туж ик капчи ӧвӧл ке но. Тросэз вын-агайёс пумисько секыт югдуръёсын: осконзы понна уйылон-уллянъёсын, куанер улонэн но инкуазь шимучыръёсын. Но кыӵе гинэ секыт соослы медам луы, соос Иеговалы оскымон кылё. Иисус сыӵе христианъёсты оскытэ: «Кин Мынэсьтым курон-косонъёсме кабыл басьтэ но соосты быдэсъя ке, со Монэ яратэ. Нош кин Монэ яратэ, сое Мынам Атае но яратоз» (Иоанн 14:21).

12. Кытысь эшшо адӟиське на Иисуслэсь кылзӥськеммы?

¹² Иисуслэсь кылзӥськеммы адӟиське соку но, куке ми кыл кутӥсь агайёслэн верамзыя лэсьтӥськомы (Евр. 13:7, 17). Берпум аръёсы Инмарлэн организацияз трос воштӥськонъёс ортчизы. Потӥзы тодытон понна выль тӥрлыкъёс, воштӥськизы тодытон амалъёс но арня куспысь пумиськонлэн ортчытӥськемез, кутӥсько выль амалъёс Эксэйлык юртъёсты пуктонын, эскерон-тупатъянын но утялтонын. Ми туж тау кариськомы вын-агайёслы дырыз дыръя кутэм ужпумъёссы понна но ми сярысь яратыса сюлмаськемзы понна! Оскыны луэ: Иегова бакель кароз со кутэм ужпумъёсъя улыны тыршеммес.

13. Кыӵе пайда вае милемлы Иисуслэсь кылзӥськеммы?

¹³ Ми Иисуслэн вань кылъёсызлэсь кылзӥськиськомы ке, со милемлы пайда вае. Иисус дышетскисьёсызлы кыл сётӥз, солэн дышетэмез соосты юнматоз шуыса. «Лулдылы каньылан шедьтоды,— вераз со но ватсаз: — Мынам зӥбетэ ӟеч, ныпъетэ капчи» (Матф. 11:28—30). Инмарлэн Кылыз, кудаз Иисуслэн улонэз но ужан-тыршонэз сярысь ньыль Евангелиос пыро, милемлы духовной кужым сётэ, озьы ик эшшо но визьлыко луыны юрттэ (Пс. 18:8; 22:3). Иисус пусйиз: «Шудоесь Инмарлэсь кылзэ кылзӥсьёс, сое быдэсъясьёс» (Лука 11:28).

14, 15. а) Ку Иегова куинетӥзэ инмысен вераськиз, кызьы адӟиське Иоаннлэн 12:27, 28? б) Малы вераны луоз, Иеговалэн кылъёсыз Иисусэз буйгатӥзы но юнматӥзы шуыса?

¹⁴ Лыдӟе Иоаннлэсь 12:27, 28. Иоаннлэн ӟеч ивораз гожтэмын куинетӥез учыр, куке Иегова инмысен вераськиз. Кулон азяз кӧня ке нуналъёслэсь азьло Иисус  Иерусалимын вал, кытын со дышетскисьёсыныз Пасхаез берпуметӥзэ пусйыны кулэ вал. «Мынам лулы бугырскиз»,— вераз со. Собере Иисус Инмарлы таӵе кылъёсын вазиськиз: «Атае! Аслэсьтыд нимдэ данъя». Та веранлы инмысен куара кылӥськиз: «Данъяй ни, но эшшо но данъяло на».

¹⁵ Иисус туж сюлмаськиз, малы ке шуоно солы туж бадӟым уж сётэмын вал: солы Иеговалы оскымон кылёно вал. Со тодӥз, сое сюлоен туж лек жугозы, нош собере со курадӟыса кулоз шуыса (Матф. 26:38). Атаезлэсь нимзэ данъян сяна, Иисус понна номыр кулэезгес ӧй вал. Иисусэз янгыше уськытъязы, со Инмарез сантэма шуыса, но со сюлмаськиз, кулонэныз Инмарлэсь нимзэ сапталоз шуыса. Иеговалэн кылъёсыз Иисуслэсь мылкыдзэ зэм ик ӝутӥзы. Табере со оскиз, Инмарлэн нимыз данъямын луоз шуыса. Атаезлэн кылъёсыз Иисусэз буйгатӥзы но юнматӥзы, луоз, вуоно шуг-секытъёс пыр потон понна. Иисус гинэ валаз, дыр, мар верамез потэ вал Атаезлэн, озьы ке но Инмар сюлмаськиз, со кылъёсты ваньмы асьмеос мед тодомы шуыса (Иоанн 12:29, 30).

16. Малы ми куддыръя сюлмаськиськомы, куке адӟиськомы, Инмарлэсь нимзэ саптало шуыса?

¹⁶ Ми но, Иисус сямен, сюлмаськиськомы, вылды, куке адӟиськомы, Инмарлэсь нимзэ саптало шуыса. Оло нош ми шонерлыктэм  ужен пумиськимы. Яке ми сюлмаськиськомы, тушмонъёс ми сярысь кыл нулло шуыса, Инмарлэсь нимзэ но организацизэ сантэмаса. Соку Иеговалэн Иисуслы верам кылъёсыз милемыз но буйгатозы. Ортчыт зол сюлмаськоно ӧвӧл. Оскыны луэ, Инмарлэн каньыллыкез, кудӥз котькыӵе визьлэсь но вылӥын, милесьтым сюлэммес но, малпанъёсмес но Иисус Христос бордын утьыса возёз шуыса (Флп. 4:6, 7). Иегова аслэсьтыз нимзэ одно ик данъялоз. Эксэйлыклэн юрттэменыз, Инмар быдтоз вань уродзэ, кудзэ вае оскымон ужась-тыршисьёслы Шайтан но солэн ки улаз возиськись дунне (Пс. 93:22, 23; Ис. 65:17).

17. Кызьы Иегова вераське милемын, кызьы адӟиське Исаиялэн 30:21?

¹⁷ Иегова вераське милемын туннэ но. (Лыдӟе Исаиялэсь 30:21.) Валамон, солэн куараез инмысен уг кылӥськы шуыса. Но со милемлы Библиез кузьмаз, кудӥз пыр со милемыз дышетэ. Со сяна, Иеговалэн духез «оскиськымон... юртэн кивалтӥсьлэсь» мылкыдзэ ӝутэ ужась-тыршисьёсызлы духовной сиён сётыны (Лука 12:42). Духовной сиёнлэн туж трос луэмез паймытэ: со пӧлы пыре печатлам литература но, онлайн-публикациос но, видеороликъёс но, аудиогожтэмъёс но!

18. Кызьы Иеговалэн кылъёсыз тӥлесьтыд оскондэс юнмато но кышкасьтэм луыны юртто?

¹⁸ Ойдолэ котьку тодамы возёмы кылъёсты, кудъёссэ Иегова аслаз Пиезлы инмысен вераз. Библиын гожтэм Инмарлэн кылъёсыз мед оскытозы милемыз, со ваньзэ чакла но быдтоз шуыса вань уродзэ, кудзэ вае Шайтан но солэн лек дуннеез. Ваньмылы асьмелы Иеговалэсь куаразэ сак кылзоно. Соку ми котькыӵе шуг-секытъёс пыр потыны быгатомы — али но, азьланяз но. Библиын гожтэмын: «Инмарлэсь эриксэ быдэсъяны но Солэсь сӥзем люкетсэ басьтон понна тӥ котьмае чидаса улыны кулэ» (Евр. 10:36).