1-2. (a) Yehova wa siata oku vangula ndati lomanu? (b) Ovina vipi tu konomuisa vocipama cilo?

YEHOVA o sanjuka calua oku vangula letu. Kosimbu, wa vangula pocakati covaprofeto, covangelo kuenda Comõlaye, Yesu Kristu oco a pitiye kokuetu ovisimĩlo viaye. (Amo. 3:7; Va Gal. 3:19; Esit. 1:1) Koloneke vilo, Yehova o vangula letu pocakati Condaka yaye, Embimbiliya. Eye wa tu ĩha Embimbiliya oco tu kũlĩhe ovisimĩlo viaye kuenda oku kuata elomboloko liovituwa viaye.

² Eci Yesu a kala palo posi, Yehova wa vangulavo oku upisa kilu volonjanja vitatu. Vocipama cilo, tu konomuisa olondaka Yehova a popia, eci tu lilongisila kolondaka viaye kuenda ndomo tu kuatisiwa lolondaka viaco.

3. Ndomo ca tangiwa kelivulu lia Marko 1:9-11, nye Yehova a popia eci Yesu a papatisiwa kuenda olondaka viaco vi situlula nye?

³ Kelivulu lia Marko 1:9-11 ku lombolola onjanja yatete Yehova a vangula oku upisa kilu. (Tanga.) Eye wa popia hati: “Ove Vumõlange wa soliwa; nda ku sanjukila.” Yesu wa kuata esanju lialua poku yeva olondaka via Isiaye vi lekisa ocisola lepandiyo kokuaye! Olondaka via Yehova vi situlula ovina vitatu viatiamẽla ku Yesu vi kuete esilivilo. Catete, Yesu Omõlaye. Cavali, Yehova o sole Omõlaye. Catatu, Yehova wa sanjukila Omõlaye. Tu konomuisi elitokeko li kasi pokati kovio.

4. Yesu poku papatisiwa ukamba waye la Suku weya oku kala ndati?

⁴ “Ove Vumõlange.” Londaka eyi, Yehova wa lekisa okuti  pokati kaye Lomõlaye Yesu, pali ukamba wokaliye. Ocili okuti, eci Yesu a kala kilu wa kala ale omõla a Suku. Pole, Yesu noke yoku papatisiwa wa linga omõla a Suku lonjila yimue yokaliye okuti: wa wavekiwa lespiritu sandu kuenda wa kuata epuluvi lioku tiukila kilu oco a linge Osoma kuenda Ocitunda Cinene ca ñoliwa la Suku. (Luka 1:31-33; Va Hev. 1:8, 9; 2:17) Omo liaco, eci Yesu a papatisiwa, Isiaye wa kuata esunga liwa lioku popia okuti: “Ove Vumõlange.”—Luka 3:22.

5. Ongangu ya Yehova yoku lekisa ocisola loku sanjukila omõlaye, yi tu longisa nye?

⁵ “Ove . . . wa soliwa.” Ongangu ya Yehova yoku lekisa ocisola loku sanjukila omõlaye, yi tu longisa okuti tu sukila oku sanda apuluvi oku pamisa vakuetu. (Yoa. 5:20) Tu sanjuka eci omunu tua kuatisa a lekisa ocisola kokuetu kuenda o tu pandiya omo liocina tuo lingila. Ocili okuti, vamanji vekongelo kuenda vepata va sukila ocisola cetu kuenda oku pamisiwa. Eci tu pandiya vakuetu, tu pamisa ekolelo liavo kuenda tu va kuatisa oku vumba Yehova lekolelo. Olonjali vi sukila oku pandiya omãla vavo. Eci olonjali vi pandiya omãla vavo lutima wosi loku lekisa ohenda kokuavo, va kuatisa omãla vavo oku kula ciwa.

6. Momo lie tu sukilila oku kolela ku Yesu Kristu?

⁶ Ame “nda ku sanjukila.” Olondaka evi vi lekisa okuti Yehova wa kolelele okuti Yesu wa ponduile oku tẽlisa ciwa ocipango ca Isiaye. Yehova wa kolelele muẽle okuti Omõlaye o ci tẽlisa kuenje tu pondolavo oku kolela okuti, Yesu o ka tẽlisa ciwa olohuminyo viosi via Yehova. (2 Va Kor. 1:20) Eci tu sokolola kongangu ya Yesu, tu vetiyiwa oku lilongisa ovina vialua viatiamẽla kokuaye  loku kuama ongangu yaye. Ndeci Yehova a kolelele Yesu, eye o kolelavo okuti afendeli vaye vosi va ka amamako oku lilongisa catiamẽla Komõlaye.—1 Pet. 2:21.

7. Ndomo ca lomboluiwa kelivulu lia Mateo 17:1-5, vepuluvi lipi Yehova a vangula oku upisa kilu kuenda nye a popia?

⁷ Tanga Mateo 17:1-5. Onjanja yavali Yehova a vangula oku upisa kilu, ceci Yesu a “pongoluiwa.” Yesu wa laleka Petulu, Tiago kuenda Yoano oco va endele kumosi komunda yimue ya lepa calua. Osimbu va kalako va mola ocinjonde cimue ci komõhisa. Ocipala ca Yesu ca tua ndekumbi kuenda uwalo waye wa kala oku nina. Kuenje omanu vavali, Mose la Eliya va molẽha, yu va kala oku sapela la Yesu catiamẽla kolofa viaye kuenda kepinduko liaye. Ndaño okuti ovapostolo vatatu va kala ‘loku suñila,’ eci va pasuka va mola ocinjonde cimue ci komõhisa. (Luka 9:29-32) Noke, elende li nina, lia va sitika kuenje vayeva ondaka ya tunda velende, okuti ondaka ya Suku! Eci Yesu a papatisiwa, Yehova wa lekisa okuti wa sanjukila Omõlaye kuenda wa lekisa ocisola kokuaye, poku popia hati: “U Omõlange wa soliwa, ndo sanjukila.” Pole, onjanja eyi Yehova wamisako hati: “U yeveleli.”

8. Ocinjonde ca vetiya ndati Yesu kumue lolondonge viaye?

⁸ Ocinjonde ca lekisa otembo Yesu a laikele oku viala Ndosoma Yusoma wa Suku. Ocili okuti, Kristu wa vetiyiwa kuenda wa pamisiwa oco a pandikise kovitangi kuenda kevalo liolofa a laikele oku pita lavio. Ocinjonde caco, ca pamisa ekolelo liolondonge. Ca va kuatisavo oku lipongiyila ovitangi va laikele oku liyaka lavio kuenda upange walua va ponduile oku linga. Noke lioku pita 30 kanyamo, upostolo Petulu wa tukula ocinjonde caco, oco a lekisa okuti handi wa kala oku ivaluka ulandu waco.—2 Pet. 1:16-18.

9. Elungulo lipi Yesu a eca kolondonge viaye?

⁹ “U yeveleli.” Yehova o yongola okuti tu yevelela olondaka Viomõlaye loku vi kapako. Nye Yesu a popia eci a kala palo posi? Wa popia ovina vialua tu sukila oku yevelela! Ndeci, locisola calua wa longisa olondonge viaye ndomo va ponduile oku kunda olondaka viwa kuenda olonjanja vialua wa va sapuila oco va amameko oku lavulula. (Mat. 24:42; 28:19, 20) Handi vali, wa va vetiyavo oco va likolisileko kuenda wa va pamisa oco kavakatokoke. (Luka 13:24) Yesu wa sapuila olondonge viaye esilivilo lioku li sola pokati, loku likuata omunga kuenda oku kuama olonumbi viaye. (Yoa. 15:10, 12, 13) Ocili okuti, elungulo Yesu a eca kolondonge viaye lia kuata esilivilo lialua! Elungulo liaco, li kuetevo esilivo koloneke vilo ndeci lia kuata kotembo Yesu a lieca.

10-11. Tu lekisa ndati okuti tu kasi oku yevelela Yesu?

¹⁰ Yesu wa popia hati: “Wosi wa tiamẽla kocili, o yeva ondaka yange.” (Yoa. 18:37) Tu lekisa okuti tu yevelela ondaka ya Yesu, eci tu ‘amamako oku likapako omunu lukuavo, oku liecela pokati lutima wosi.’ (Va Kol. 3:13; Luka 17:3, 4) Tu lekisavo okuti tu yevelela ondaka yaye, poku lekisa ombili kupange woku kunda olondaka viwa, “ci kale votembo yiwa ale votembo yovitangi.”—2 Tim. 4:2.

¹¹ Yesu wa popia hati: “Olomeme viange vi yeva ondaka yange.” (Yoa. 10:27) Olondonge via Kristu via lekisa okuti ka via sukilile lika oku yevelela olondaka via Yesu,  pole, via sukililevo oku vi kapako. Ovio via sukilile oku yuvula ‘asakalalo omuenyo.’ (Luka 21:34) Kokuavo, ca kuatele esilivilo oku pokola kovihandeleko via Yesu ndaño ceci va liyaka lovitangi. Vamanji valua va kasi loku pandikisa kovitangi vialua, ndeci, oku lambalaliwa lovanyali, uhukũi kuenda ovilunga. Ndaño lovitangi viosi evi, va kasi oku amamako lekolelo oku vumba Yehova. Yesu wa eca kolondonge viaye ohuminyo yokuti: “Wosi o kuete ovihandeleko viange kuenje o vi pokola, eye o ndi sole. Wosi o ndi sole, o soliwa la Isiange.”—Yoa. 14:21.

12. Yipi onjila yikuavo tu lekisa okuti tu kasi oku yevelela Yesu?

¹² Onjila yikuavo yoku lekisa okuti tu kasi oku yevelela Yesu yeyi: Poku talavayela kumosi la vana eye a nõla oco va tu songuile. (Va Hev. 13:7, 17) Vanyamo a sulako, ocisoko ca Yehova ca linga apongoloko alua ndeci, ndomo tu talavaya ciwa lovimalẽho viokaliye kupange woku kunda, ndomo olohongele vi lingiwa vokati kosemana kuenda onjila ndomo Olonjango Viusoma vi tungiwa, vi semuluiwa kuenda oku tatiwa. Esanjukuolio tu kuete omo lioku songuiwa lonjila yi lekisa ocisola! Tu kolela okuti Yehova o ka sumũlũisa alikolisilo etu oku kapako lonjanga olonumbi viocisoko caye.

13. Asumũlũho api tu pondola oku kuata poku yevelela Yesu?

¹³ Tu kuatisiwa eci tu kapako ovina viosi Yesu a longisa. Yesu wa sapuila olondoge viaye okuti alongiso aye a ponduile oku va kavuluisa. Eye wa popia hati: “Vu sanga ekavuluko kovimuenyo viene. Okanga yange ya sunguluka kuenda ocitele cange ca lela.” (Mat. 11:28-30) Ondaka ya Suku okuti mua kongela Avanjeliu akuãla, a lombolola omuenyo wa Yesu kuenda upange waye woku kunda, yi tu ka vuluisa, yi pamisa ekolelo lietu kuenda yi muisa olondunge. (Osa. 19:7; 23:3) Yesu wa popia hati: “Va sumũlũha vana va yeva ondaka ya Suku kuenje va yi kapako!”—Luka 11:28.

14-15. (a) Yipi onjanja yatatu ya lomboluiwa kelivulu lia Yoano 12:27, 28 Yehova a vangula oku upisa kilu? (b) Momo lie olondaka via Yehova via vetiyila Yesu loku u pamisa?

¹⁴ Tanga Yoano 12:27, 28. Evanjeliu lia Yoano li tukula olonjanja vitatu, Yehova a vangula oku upisa kilu. Eci pa kambele oloneke  vimue violofa via Yesu, eye wa enda ko Yerusalãi oco a linge ocipito ca sulako co Paskoa. Eye wa popia hati: “Utima wange wa tokotelua.” Noke wa likutilila poku popia hati: “A Tate, muisa ulamba onduko yove.” Kuenje kilu kua tunda ondaka ya Isiaye ya tambulula hati: “Ame nda yi muisa ale ulamba kuenda ndi yi muisa vali ulamba.”

¹⁵ Yesu wa kala lesakalalo omo liocikele cinene coku amamako lekolelo ku Yehova. Yesu wa kũlĩhĩle okuti o ka tatiwa lungangala kuenda o ka pondiwa lonjila yimue yesepu. (Mat. 26:38) Ndaño muẽle lovina evi, eye wa yonguile oku kemalisa onduko ya Isiaye. Yesu wa tatiwa lesepu kuenje wa sakalalele loku sima okuti olofa viaye via laikele oku nena esepu ku Suku. Olondaka via Yehova via pamisa calua Yesu! Yesu wa kolelele okuti onduko ya Suku ya ponduile oku kemãlisua. Olondaka via Isiaye via pamisa Yesu, oco a pandikise kovitangi a laikele oku pita lavio. Ndaño eye lika wa kuata elomboloko ondaka Isiaye a popia kotembo yaco, Yehova wa ecelela okuti olondaka Viaye vi sonehiwa, oco vi tu kuatise.—Yoa. 12:29, 30.

16. Momo lie olonjanja vimue tu sakalalela eci onduko ya Suku yi sepuiwa?

¹⁶ Ndeci Yesu a linga, pamue tu kalavo lesakalalo omo lioku sepuiwa kuonduko ya Suku. Handi vali, pamue tu tatiwa lekambo liesunga ndeci, Yesu. Ale pamue tu sakalala omo liovolandu uhembi ovanyali va sandula  atiamẽla kokuetu. Pamue tu sakalala omo okuti ovolandu aco a pondola oku nena esepu ku Yehova kuenda ocisoko caye. Kapuluvi a-a, ondaka ya Yehova yi pondola oku tu lembeleka calua. Ka tu sukila oku yokoka. Tu kolela okuti ‘ombembua ya Suku yina ya piãla olondunge viosi, yi lava ovitima vietu kuenda ovisimĩlo vietu vu Kristu Yesu.’ (Va Fil. 4:6, 7) Yehova olonjanja viosi o kemãlisa onduko yaye. Pocakati Cusoma, eye o ka imula ũvi wosi Satana kuenda oluali luaye lua siata oku kokela afendeli vaye vakuekolelo.—Osa. 94:22, 23; Isa. 65:17.

17. Ndomo elivulu lia Isaya 30:21 li lekisa, Yehova o vangula ndati letu?

¹⁷ Yehova toke etaili handi o vangula letu. (Tanga Isaya 30:21.) Ocili okuti, ka tu yevi Suku oku vangula letu oku upisa kilu. Eye wa tu ĩha Embimbiliya, muna tu sanga olonumbi viaye. Handi vali, espiritu lia Yehova li vetiya “kalei wa kolelua”, oco amameko oku eca okulia kuespiritu kafendeli vaye. (Luka 12:42) Tua siata oku tambula okulia kualua kuespiritu ndeci, alivulu, ovipama vo internet, olovideo kuenda ovipama viangalavaliwa!

18. Olondaka via Yehova vi pamisa ndati ekolelo liove kuenda viu ku ĩha ndati utõi?

¹⁸ Tuamamiko oku kapako olondaka Yehova a vangula eci Omõlaye a kala palo posi! Olondaka via Suku vi sangiwa Vembimbiliya, vi tu ĩha ekolelo liokuti Yehova wa kũlĩha ovina viosi kuenda o ka malako ovitangi Satana kumue loluali luaye va siata oku tu kokela. Omo liaco, tu amamiko oku yevelela ondaka ya Yehova. Nda tua ci linga, tu ka tẽla oku pandikisa kovitangi viosi tua siata oku liyaka lavio kuenda kovitangi vikuavo vi laika oku iya. Embimbiliya li tu sapuila hati: “Vu sukila oku kuata epandi oco okuti noke yoku linga ocipango ca Suku, vu mola oku tẽlisiwa kuohuminyo.”—Va Hev. 10:36.