1-2. (a) Paonan-o nakikigkomunikar hi Jehova ha mga tawo? (b) Ano an aton hihisgotan hini nga artikulo?

KARUYAG gud ni Jehova nga makigkomunikar ha aton. Hadto, gin-gamit niya an mga propeta, mga anghel, ngan an iya Anak nga hi Jesu-Kristo basi isumat ha aton an iya panhunahuna. (Amos 3:7; Gal. 3:19; Pah. 1:1) Yana, nakikigkomunikar hiya ha aton pinaagi han iya Pulong, an Biblia. Iginhatag niya ito ha aton basi mahibaroan naton an iya panhunahuna ngan masabtan an iya mga paagi.

² Han nakanhi hi Jesus ha tuna, nagyakan hi Jehova tikang ha langit ha tulo nga higayon. Aton hisgotan kon ano an ginyakan ni Jehova, kon ano an aton mahibabaroan tikang hito, ngan kon paonan-o kita nagpapahimulos ha iya mga ginyakan.

3. Sumala ha Marcos 1:9-11, ano an ginsiring ni Jehova han nabawtismohan hi Jesus, ngan ano nga importante nga mga kamatuoran an ginpamatud-an hito nga mga pulong?

³ Mababasa ha Marcos 1:9-11 an siyahan nga higayon nga nagyakan hi Jehova tikang ha langit. (Basaha.) Hiya nagsiring: “Ikaw an akon Anak nga hinigugma, ikaw an akon nalilipayan.” Sigurado nga nabantad gud an kasingkasing ni Jesus han nabatian niya an iya Amay nga nagpapahayag han Iya gugma ngan pagsarig ha iya! An ginsiring ni Jehova nagpamatuod han tulo nga importante nga kamatuoran mahitungod kan Jesus. Siyahan, hi Jesus an iya Anak. Ikaduha, hinigugma ni Jehova an iya Anak. Ngan ikatulo, nalilipay hi Jehova ha iya Anak. Aton usisahon an tagsa hini.

4. Han nabawtismohan hi Jesus, nagkaada hiya ano nga bag-o nga relasyon ha Dios?

⁴ “Ikaw an akon Anak.” Pinaagi hini nga mga pulong, iginpakita ni Jehova nga an iya hinigugma nga Anak nga hi Jesus nagkaada bag-o nga relasyon ha Iya. Han nakadto hi Jesus ha langit, usa hiya nga espiritu nga anak han Dios. Pero durante han iya bawtismo,  gindihogan hiya pinaagi han baraan nga espiritu. Hito nga higayon, iginpakita han Dios nga hi Jesus nga Iya dinihogan nga Anak may paglaom na nga bumalik ha langit basi magin Hadi ngan Hitaas nga Saserdote nga pinili han Dios. (Luc. 1:31-33; Heb. 1:8, 9; 2:17) Salit han bawtismo ni Jesus, may-ada maopay nga rason an iya Amay ha pagsiring: “Ikaw an akon Anak.”​—Luc. 3:22.

5. Paonan-o naton masusubad an susbaranan ni Jehova ha pagpahayag hin gugma ngan pag-uyon?

⁵ “Ikaw an akon . . . hinigugma.” An susbaranan ni Jehova ha pagpahayag hin gugma ngan pag-uyon nagpapahinumdom ha aton nga sadang kita mamiling hin mga higayon ha pagdasig ha iba. (Juan 5:20) Nag-uuswag kita kon an mga tawo nga importante ha aton nagpapakita ha aton hin gugma ngan naghahatag ha aton hin kumendasyon tungod han aton ginbuhat nga maopay. Ha pariho nga paagi, an aton kabugtoan ha kongregasyon ngan mga kapamilya nagkikinahanglan han aton gugma ngan pagdasig. Kon ginkukumendasyonan naton an iba, ginbubuligan naton hira nga magin marig-on an ira pagtoo ngan magin maunungon ha pag-alagad kan Jehova. Labi nga kinahanglan dasigon han mga kag-anak an ira mga anak. Kon sinsero nga ginkukumendasyonan han mga kag-anak an ira mga anak ngan ginpapakitaan hira hin gugma, ginbubuligan nira an ira mga anak nga mag-uswag.

6. Kay ano nga makakasarig kita kan Jesu-Kristo?

⁶ “Ikaw an akon nalilipayan.” Ini nga mga pulong nagpapakita nga nasarig hi Jehova nga bubuhaton gud ni Jesus an kaburut-on han iya Amay. Hi Jehova may-ada sugad nga pagsarig ha iya Anak, salit makakasarig gud liwat kita nga tutumanon ni Jesus an ngatanan nga saad ni Jehova. (2 Cor. 1:20) Kon ginpapamalandong naton an susbaranan ni Jesus, mas nagigin determinado kita nga mahibaro tikang ha iya ngan sundon hin maopay an iya mga pitad. Hi Jehova nasarig liwat nga sugad nga grupo, an iya mga  surugoon padayon nga mahibabaro tikang ha iya Anak.​—1 Ped. 2:21.

7. Sumala ha Mateo 17:1-5, ha ano nga higayon nagyakan hi Jehova tikang ha langit, ngan ano an iya ginsiring?

⁷ Basaha an Mateo 17:1-5. An ikaduha nga higayon nga nagyakan hi Jehova tikang ha langit amo an panahon diin “nabag-o an hitsura ni Jesus.” Igin-upod ni Jesus hira Pedro, Santiago, ngan Juan ngadto ha usa nga hitaas nga bukid. Didto, nakakita hira hin urusahon nga bisyon. Nagsilaw an nawong ni Jesus ngan naglamrag an iya panapton. Duha nga lalaki, nga nagrirepresentar kanda Moises ngan Elias, an nakiistorya kan Jesus mahitungod han iya tiarabot nga kamatayon ngan pagkabanhaw. Bisan kon “nanhingaturog” an tulo nga apostol, nakita nira inin urusahon nga bisyon han nakamata na hira. (Luc. 9:29-32) Katapos, nalandongan hira hin malamrag nga dampog, ngan may nabatian hira nga tingog tikang ha dampog​—an tingog han Dios! Pariho han ginbuhat ni Jehova durante han bawtismo ni Jesus, iginpahayag ni Jehova an iya pag-uyon ngan gugma ha iya Anak pinaagi ha pagsiring: “Ini an akon Anak nga hinigugma, nga akon nalilipayan.” Pero hini nga higayon, hi Jehova nagdugang: “Pamati kamo ha iya.”

8. Ano an epekto kan Jesus ngan ha mga disipulo han bisyon?

⁸ An bisyon abanse nga nagpapakita han himaya ngan gahum ni Jesus ha tidaraon sugad nga Hadi han Ginhadian han Dios. Sigurado nga nadasig ngan naparig-on hito an Kristo kay makakaeksperyensya hiya hin pag-antos ngan masakit nga kamatayon. An bisyon nagparig-on liwat ha pagtoo han mga disipulo. Nakabulig ito ha ira nga magin andam ha mga pagsari nga ira maieksperyensyahan ngan ha buruhaton nga kinahanglan nira buhaton. Mga 30 ka tuig an naglabay, gin-unabi ni Pedro ito nga bisyon, nga nagpapakita nga klaro pa ito ha iya hunahuna.​—2 Ped. 1:16-18.

9. Ano nga praktikal nga mga sagdon an iginhatag ni Jesus ha iya mga disipulo?

⁹ “Pamati kamo ha iya.” Iginpatin-aw ni Jehova nga karuyag niya nga mamati kita ha mga ginsiring han iya Anak ngan sundon ito. Ano an mga ginsiring ni Jesus han nakanhi hiya ha tuna? Damu an iya ginsiring nga kinahanglan gud naton pamatian! Pananglitan, mahigugmaon nga gintutdoan niya an iya mga sumurunod kon paonan-o isasangyaw an maopay nga sumat, ngan pauroutro nga ginpahinumdoman niya hira nga padayon nga magbantay. (Mat. 24:42; 28:19, 20) Gin-aghat liwat niya hira nga maniguro gud ngan diri umundang. (Luc. 13:24) Ginpabug-atan ni Jesus ha iya mga sumurunod nga kinahanglan higugmaon nira an usa kag usa, magpabilin nga nagkakaurosa, ngan tumanon an iya mga sugo. (Juan 15:10, 12, 13) Praktikal gud an mga sagdon nga iginhatag ni Jesus ha iya mga disipulo! Importante ito yana sugad la nga importante ito ha panahon nga iginhatag ito ni Jesus.

10-11. Paonan-o naton maipapakita nga namamati kita kan Jesus?

¹⁰ Hi Jesus nagsiring: “An tagsa nga nadapig ha kamatuoran namamati ha akon tingog.” (Juan 18:37) Iginpapakita naton nga namamati kita ha iya tingog kon ‘padayon nga nag-iinantosay ngan kinasingkasing nga nagpipinasayloay kita.’ (Col. 3:13; Luc. 17:3, 4) Iginpapakita liwat naton nga namamati kita ha iya tingog pinaagi ha madasigon nga pagsangyaw han maopay nga sumat “ha maopay nga mga panahon ngan ha makuri nga mga panahon.”​—2 Tim. 4:2.

¹¹ Hi Jesus nagsiring: “An akon mga karnero namamati han akon tingog.” (Juan 10:27) Iginpapakita han mga sumurunod han Kristo nga namamati hira kan Jesus diri la pinaagi ha paghatag hin atensyon ha iya mga ginsisiring kondi ha pagbuhat liwat hito. Diri hira nagpapaulang ha “mga kabaraka ha kinabuhi.” (Luc. 21:34) Lugod, ginpaprayoridad nira ha ira kinabuhi an pagtuman han mga sugo ni Jesus, bisan ha makuri  nga mga sitwasyon. Damu han aton kabugtoan an nakakaeksperyensya hin magkuri nga pagsari, upod na an pag-atake han mga parakontra, sobra nga kapobrehan, ngan kalamidad. Bisan pa hito, nagpapabilin hira nga matinumanon kan Jehova, anoman an ira gin-aantos. Hi Jesus naghahatag ha ira hini nga pasarig: “An nakarawat han akon mga sugo ngan nagtutuman hito, nahigugma ha akon. An nahigugma ha akon hihigugmaon liwat han akon Amay.”​—Juan 14:21.

12. Ano an usa pa nga paagi nga maipapakita naton nga namamati kita kan Jesus?

¹² Ini an usa pa nga paagi nga maipapakita naton nga namamati kita kan Jesus: pinaagi ha pagkooperar ha iya mga ginpili nga manguna ha aton. (Heb. 13:7, 17) An organisasyon han Dios naghimo hin damu nga pagbag-o hinin naglabay nga mga tuig, upod na an paggamit han bag-o nga mga garamiton ngan pamaagi ha ministeryo, an pormat han aton midweek nga katirok, ngan an paagi han pagtukod, pag-ayad, ngan pagmintinar han aton mga Kingdom Hall. Mapasalamaton gud kita tungod hinin mahigugmaon ngan ginhunahuna hin maopay nga mga giya! Makakasiguro kita nga bibendisyonan ni Jehova an aton mga pangalimbasog nga sundon an napapanahon nga giya han organisasyon.

13. Ano an mga kapulsanan ha pagpamati kan Jesus?

¹³ Nagpapahimulos kita tikang ha ngatanan nga igintutdo ni Jesus. Hi Jesus nagpasarig ha iya mga disipulo nga an iya mga katutdoan makakarepresko ha ira. “Makakapahuway an iyo mga kalag,” siring niya. “Kay an akon yugo masayon pas-anon ngan an akon iginpapapas-an ha iyo magaan.” (Mat. 11:28-30) An Pulong han Dios, nga nag-uupod han upat nga rekord han Ebanghelyo mahitungod han kinabuhi ngan ministeryo ni Jesus, nakakarepresko ha aton, nakakapahiuli han aton espirituwal nga kusog, ngan nakakabulig ha aton nga magin maaramon. (Sal. 19:7; 23:3) Hi Jesus nagsiring: “Malipayon an mga namamati han pulong han Dios ngan nagbubuhat hito!”​—Luc. 11:28.

14-15. (a) Sumala ha Juan 12:27, 28, ano an ikatulo nga higayon nga nagyakan hi Jehova tikang ha langit? (b) Kay ano nga nakaliaw ngan nakaparig-on kan Jesus an ginsiring ni Jehova?

¹⁴ Basaha an Juan 12:27, 28. Mababasa ha Ebanghelyo ni Juan an ikatulo nga higayon nga nagyakan hi Jehova tikang ha langit. Pipira ka adlaw antes han kamatayon ni Jesus, nakadto hi Jesus ha Jerusalem basi isaurog an iya ultimo nga Paskua. “An akon kalag nasusubo gud,” siring niya. Katapos, nag-ampo hiya: “Amay,  himayaa an imo ngaran.” Sugad nga baton, an iya Amay nagyakan tikang ha langit: “Ginhimaya ko na ito ngan paghihimayaon ko utro.”

¹⁵ Nababaraka hi Jesus tungod han iya daku nga responsabilidad nga magpabilin nga matinumanon kan Jehova. Maaram hi Jesus nga makakaeksperyensya hiya hin brutal nga pagkastigo ngan masakit nga kamatayon. (Mat. 26:38) Labaw ha ngatanan, karuyag ni Jesus nga himayaon an ngaran han iya Amay. Gin-akusaran hi Jesus hin pagpasipara, salit nabaraka hiya nga bangin magpasipara ha Dios an iya kamatayon. Sigurado nga an ginyakan ni Jehova naghatag kan Jesus hin marig-on nga pasarig! Makakasiguro hiya nga mahihimaya an ngaran ni Jehova. An ginyakan han iya Amay sigurado nga nakaliaw gud ngan nagparig-on kan Jesus basi mailob an pag-antos nga iya maieksperyensyahan. Ha ngatanan nga presente, posible nga hi Jesus la an nakasabot ha ginsiring han iya Amay hito nga higayon, pero ginsiguro ni Jehova nga mairekord an iya ginyakan para ha kapulsanan naton ngatanan.​—Juan 12:29, 30.

16. Kay ano nga usahay bangin nababaraka kita nga mapasiparahan an ngaran han Dios?

¹⁶ Pariho kan Jesus, bangin nababaraka liwat kita nga mapasiparahan an ngaran ni Jehova. Bangin biktima kita hin diri patas nga pagtratar pariho kan Jesus. O bangin nababaraka kita tungod han buwa nga mga istorya mahitungod ha aton nga iginpapasarang han mga parakontra. Bangin ginhuhunahuna naton an pasipara nga maihahatag hito nga mga istorya ha ngaran ni Jehova ngan ha iya organisasyon. Ha sugad nga  mga kahimtang, makakaliaw gud ha aton an ginyakan ni Jehova. Diri kita sadang mabaraka hin sobra. Makakasiguro kita nga “an kamurayawan han Dios nga labaw ha ngatanan nga pagsabot magbabantay han [aton] kasingkasing ngan han [aton] panhunahuna pinaagi kan Kristo Jesus.” (Fil. 4:6, 7) Diri gud mapapakyas hi Jehova ha paghimaya han iya ngaran. Pinaagi han iya Ginhadian, wawad-on niya an ngatanan nga kadaot nga ginpapahinabo ni Satanas ngan han iya kalibotan ha matinumanon nga mga surugoon ni Jehova.​—Sal. 94:22, 23; Isa. 65:17.

17. Uyon ha Isaias 30:21, paonan-o hi Jehova nakikigkomunikar ha aton yana?

¹⁷ Hi Jehova nakikigkomunikar pa gihapon ha aton yana. (Basaha an Isaias 30:21.) Oo, diri naton nababatian an Dios nga nagyayakan ha aton tikang ha langit. Pero igintagana niya an iya sinurat nga Pulong, an Biblia, diin naghahatag hiya ha aton hin instruksyon. Dugang pa, ginpapagios han espiritu ni Jehova an “matinumanon nga tinaporan” basi padayon nga maghatag ha iya mga surugoon hin espirituwal nga pagkaon. (Luc. 12:42) Hura gud nga espirituwal nga pagkaon an aton nakakarawat​—mga publikasyon nga inimprinta ngan mga materyal nga makikita ha online, mga video, ngan audio nga mga rekording!

18. Paonan-o an mga pulong ni Jehova nagpaparig-on han imo pagtoo ngan naghahatag ha imo hin kaisog?

¹⁸ Pirme naton hinumdoman an mga ginyakan ni Jehova han nakanhi ha tuna an iya Anak! Hinaot an mga pulong mismo han Dios, nga nakarekord ha Biblia, magpasarig ha aton nga kontrolado ni Jehova an ngatanan ngan wawad-on niya an bisan ano nga kadaot nga ginpahinabo ha aton ni Satanas ngan han iya maraot nga kalibotan. Ngan unta magin determinado kita nga mamati ha tingog ni Jehova. Kon bubuhaton naton ito, maiilob naton an bisan ano nga problema nga aton gin-aatubang yana ngan an anoman nga pagsari ha tidaraon. An Biblia nagpapahinumdom ha aton: “Kinahanglan magpailob kamo, basi katapos niyo buhaton an kaburut-on han Dios, makarawat niyo an katumanan han saad.”​—Heb. 10:36.