1-2. (a) Which ways Jehovah don use talk with human being? (b) Wetin we go talk about for this topic?

JEHOVAH de like to talk with us well-well. For Bible time, e use prophets, angels, and e Son Jesus Christ, to let us know wetin dey e mind. (Amos 3:7; Gal. 3:19; Rev. 1:1) Today, e de use e Word wey be Bible talk with us. E give us Bible so that we go fit learn the way e de think and understand the way e de do things.

² Jehovah still talk from heaven three times when Jesus dey this earth. Make we talk about the things wey Jehovah talk those three times, wetin we fit learn from the things, and how we go fit benefit from them.

3. As e dey for Mark 1:9-11, wetin Jehovah talk when Jesus baptize, and which important truth dey inside wetin Jehovah talk?

³ For Mark 1:9-11, we go see the first time wey Jehovah talk from heaven. (Read-am.) E talk say: “You be my Son wey I love well-well; you get my favor.” Jehovah use this one show say e love and trust e Son. This thing wey God talk go don really touch Jesus! Three important truth dey inside wetin Jehovah talk about Jesus. Number one, Jesus na the Son of God. Number two, Jehovah love e Son. And number three, Jehovah favor the Son. Make we talk about them one by one.

4. For the time wey Jesus baptize, which new way e become Son of God?

⁴ “You be my Son.” With this thing wey Jehovah talk, Jehovah show say Jesus don become e Son for new way. Jesus na spirit son of God when e dey heaven. But God anoint Jesus with holy spirit for e baptism. Na that time God  show say Jesus, as anointed Son of God, don get the hope to go back to heaven to be High Priest, and King wey God choose. (Luke 1:31-33; Heb. 1:8, 9; 2:17) So the time wey Jesus baptize, e dey clear why e Father talk say: “You be my Son.”​—Luke 3:22.

5. How we fit imitate Jehovah to show people love and encourage them?

⁵ “I love [you] well-well.” Jehovah show say e love e Son and e dey happy with e Son. This one na fine example wey remind us say make we de look for ways to encourage people. (John 5:20) We de do well when person wey we value show say e love us and e tell us well done for the good wey we do. Na so our brothers and sisters for congregation and our family members want make we show them love and encourage them. When we praise people for wetin they do, we de make their faith strong and we de help them to hold Jehovah tight. God want make papa and mama de encourage their children. When they praise their children from their heart and show them love, e de help the children do well for the work of God.

6. Why we fit trust Jesus Christ?

⁶ “You get my favor.” This thing wey Jehovah talk show how e trust Jesus reach say e go do everything wey the Father want. Because of the way Jehovah trust Jesus, we self fit trust Jesus say e go do everything wey Jehovah don promise. (2 Cor. 1:20) When we think about the example of Jesus, e de make us want really learn from Jesus and follow e example. Jehovah trust all e servants as group, just as e trust Jesus. E trust them say they go continue to learn from e Son.​—1 Pet. 2:21.

7. According to Matthew 17:1-5, which time Jehovah talk from heaven, and wetin e talk?

⁷ Read Matthew 17:1-5. The second time wey Jehovah talk from heaven na when Jesus “face start to de shine like sun. And e cloth start de shine like light.” Jesus tell Peter, James, and John make they go one high mountain together. As them dey the place, they see one vision wey they never see before. Jesus face and e clothes begin shine well-well like bright light. And for the eyes of the apostles, e just be like say they see two men. This men appear as Moses and Elijah, and they start to talk with Jesus about e death and resurrection wey de come. Even though say “sleep de catch” the three apostles, they see this wonderful vision when the sleep clear from their eye. (Luke 9:29-32) The next thing wey happen be say, bright cloud cover them, and they hear the voice of God from heaven! Just the way Jehovah do when Jesus baptize, this time e still show say e love and dey happy with e Son. Jehovah talk say: “This one na my Son wey I love, e get my favor.” But this time Jehovah still talk say: “Make wuna do the things wey e talk.”

8. How the vision affect Jesus and the disciples?

⁸ The vision show how the glory and power of Jesus go be when e don be King of God’s Kingdom. True-true, this one really encourage and make Jesus dey strong. E help Jesus endure the suffer and pain wey e go face before e die. This vision still make the faith of the disciples strong. E prepare them to fit face the problems and do the hard work wey de come. After about 30 years, apostle Peter talk about that vision. This one show say Peter still remember the vision well.​—2 Pet. 1:16-18.

9. Which advice Jesus give e disciples wey help them?

⁹ “Do the things wey e talk.” Jehovah make-am clear say e want make we listen to the things wey Jesus talk and obey them. Wetin Jesus talk when e dey this earth? Jesus talk many things wey person suppose listen to because them dey important well-well. For example, e use love teach e followers how to preach the good news, and tell them many times say make them de watch. (Matt. 24:42; 28:19, 20) Jesus still advice them make they continue to struggle and make they no tire. (Luke 13:24) E make-am clear say e followers need to love each other, they need to remain as one, and do the things wey e command. (John 15:10, 12, 13) The advice wey Jesus give e disciples really help them! The way the advice dey important that time, na so e still dey important for our time.

10-11. How we fit show say we de listen to Jesus?

¹⁰ Jesus talk say: ‘Anybody wey de support the truth de listen to my voice.’ (John 18:37) When we ‘no tire to endure wetin we do each other and de always use our heart forgive each other,’ we de show say we de listen to the voice of Jesus. (Col. 3:13; Luke 17:3, 4) Another thing dey wey we fit do to show say we de listen to the voice of Jesus. We go put all our heart for the preaching work and preach “for good time or hard time.”​—2 Tim. 4:2.

¹¹ Jesus talk say: “My sheep de listen to my voice.” (John 10:27) To do wetin dey this verse, followers of Jesus de do the things wey Jesus talk, no be just to listen to them. They no de allow “problems for life” make them no listen to the voice of Jesus. (Luke 21:34) Instead, they see the things wey Jesus command as wetin really dey important for life and they obey, even when e  hard for them well-well. For example, plenty brothers and sisters de endure serious problems, like strong poverty, when people wey no like our work attack them, and when things like heavy rain scatter their property. Even with all this one, they continue to hold Jehovah tight no matter the things wey them de suffer. Na this kind people Jesus give this promise: “Any person wey e accept my commandments and obey them, na that person love me. And my Father go love any person wey e love me.”​—John 14:21.

12. Which other way we fit show say we de listen to Jesus?

¹² Another way dey wey we fit show say we de listen to the voice of Jesus. Na when we de obey the people wey Jesus don choose among us to direct the work. (Heb. 13:7, 17) Jehovah’s organization don change many things for this our time. Some of them na, the new tools and style wey we de use for our preaching work, the pattern of our midweek meeting, and the way we de build, repair, and maintain our Kingdom Halls. They really take time think this things well, and this one show say they love us and care about us. We thank Jehovah as e de guide us like this! We fit dey sure say Jehovah go bless everything wey we de do to make sure say we follow the direction from the organization.

13. Wetin person go benefit when e de listen to Jesus?

¹³ We de benefit when we listen to all the things wey Jesus don teach. Jesus promise e disciples say the things wey e teach go make them dey strong. E talk say: “Wuna go dey strong again. Because my yoke easy to carry, and my load no heavy.” (Matt. 11:28-30) The Word of God de give us power and sense. Part of the Word na the four Bible books (Matthew, Mark, Luke, and John) wey talk about the life of Jesus and e preaching work. (Ps. 19:7; 23:3) Jesus talk say: “People go dey happy if them de hear wetin God talk and them de do-am.”​—Luke 11:28.

14-15. (a) Which time be the third time wey Jehovah talk from heaven according to John 12:27, 28? (b) Wetin make the thing wey Jehovah talk go don comfort and make Jesus strong?

¹⁴ Read John 12:27, 28. The book of John talk about the third time wey Jehovah talk from heaven. Some days before Jesus die, e dey Jerusalem to celebrate e last Passover. Jesus talk say: “Now I de  worry.” Then e pray say: “Father, do something so that people go praise your name.” E Father come answer from heaven say: “I don do wetin go make people praise my name and I go do-am again.”

¹⁵ Jesus go need to hold Jehovah tight till the end. This one na big work wey e get. No wonder e feel stress. E know say e go suffer flogging and pain before e die. (Matt. 26:38) Wetin dey important pass for Jesus na to do wetin go bring praise to the name of e Father. They lie for Jesus head say e de insult God, and e feel pain because the way e go die go bring shame to the name of God. True-true, wetin Jehovah talk go don give Jesus strong heart! Jesus fit dey sure say the name of Jehovah go get praise. Jesus go don really get comfort from wetin e Father talk. And e go don get power from this things to fit endure the suffer wey e go face. For all the people wey dey the place that time, maybe na only Jesus understand wetin Jehovah talk. Even with that one, Jehovah make sure say the thing wey e talk dey for Bible for us.​—John 12:29, 30.

16. Why e be say sometimes, e de worry us as people de spoil the name of God?

¹⁶ Like Jesus, e de worry us when people spoil the name of God. Maybe people no treat us fine, just as they do Jesus. Or, e fit be say people wey they no like our work de spread fake news about us, and this things de worry us for mind. We fit de think about the shame wey their  lie de cause for the name of Jehovah and e organization. When e happen like that, the thing wey Jehovah talk for John 12:27, 28 fit make our mind come down well-well. We no need to worry too much. We fit dey sure say “the peace wey God de give wey e pass anything wey person fit understand, go protect [our] heart and how [we] de think through Jesus Christ.” (Phil. 4:6, 7) Jehovah go always make people praise e name. E go use e Kingdom heal all the wound wey Satan and this wicked world don cause for us.​—Ps. 94:22, 23; Isa. 65:17.

17. According to Isaiah 30:21, how Jehovah de talk to us today?

¹⁷ Jehovah still de talk to us today. (Read Isaiah 30:21.) Na true say, we no de hear God de talk from heaven today. But e don write the things wey e talk give us for Bible. Apart from that one, Jehovah de use e spirit de move “the faithful steward” to teach us wetin we need to know about God. This things be like food wey we need. (Luke 12:42) We fit get plenty of them from our books, website, videos, and audio publications. Them de make our faith strong!

18. How the things wey Jehovah talk de give you strong faith and strong heart?

¹⁸ Make we no ever forget the things wey Jehovah tell e Son when e dey this earth! Make the things wey we read for Bible make us trust Jehovah say e get the power to do anything wey e want do. And so we get the mind say e go heal any wound wey Satan and this wicked world don cause for us. Make we ready our heart to really listen to the voice of Jehovah. If we do like that, we go fit endure any problem wey we de face now and any one wey de come for future. Bible remind us say: “Wuna need to de endure, so that after wuna don do the thing wey God want, make the thing wey God promise happen to wuna.”​—Heb. 10:36.