1-2. (a) Uw rogon ni i non Jehovah ko girdi’ kakrom? (b) Mang e gad ra weliy ko re article ney?

BAADAG Jehovah ni nge non ngodad. Kakrom e ma non ko girdi’ rok u daken e pi profet, nge pi engel, nge Jesus Kristus ni Fak. (Amos 3:7; Gal. 3:19; Rev. 1:1) Ma ngiyal’ ney e ma non ngodad u daken e Thin rok, ni aram e Bible. Ke pi’ e Bible ngodad ya nge yag nda nanged rogon e lem rok nge tirok e kanawo’.

² Nap’an ni immoy Jesus u fayleng, ma dalip yay ni non Jehovah u tharmiy ngak. Chiney e ngad weliyed e n’en ni yog Jehovah, nge n’en ni gad ra fil ko thin ni yog, nge rogon angin nra yib ngodad.

3. Mang e yog Jehovah u nap’an nni taufenag Jesus nrogon ni bay ko Mark 1:9-11? Mang e ba ga’ fan ni be tamilangnag e pi thin ney?

³ Mark 1:9-11 e be weliy e yay nsom’on ni non Jehovah u tharmiy ngak Fak. (Mu beeg.) I gaar: “I gur Fakag, ni gab t’uf rog, ni kari felan’ug ngom.” Dariy e maruwar riy ni kari felfelan’ Jesus u nap’an ni rung’ag laman e Chitamangin ni be yog nib t’uf rok mab pagan’ ngak! Thin ni yog Jehovah e be tamilangnag dalip ban’en u murung’agen Jesus nib ga’ fan. Bin som’on e tamilangnag ni Jesus e ir Fak. Bin l’agruw e yog nrib t’uf rok. Ma bin dalip e yog Jehovah nib fel’ Fak u wan’. Ere ngad weliyed e re dalip i n’ey.

4. Mang tha’ nib beech e tabab u thilin Got nge Jesus u nap’an ni un Jesus ko taufe?

⁴ “I gur Fakag.” Nap’an ni yog Jehovah e pi thin ney ma be yip’ fan ni ke tabab reb e tha’ nib beech u thilrow Jesus. Nap’an ni immoy Jesus u tharmiy, ma ir fak Got nib kan. Machane nap’an ni un ko taufe, ma aram min dugliy nga gelngin Got nib thothup. Nap’an e ngiyal’ nem ma aram me tamilangnag Got ni  ke yag e athap ngak Jesus nrayog ni ngki sul nga tharmiy ni nge mang Pilung nge Prist nib Tolang. (Luke 1:31-33; Heb. 1:8, 9; 2:17) Aram fan nnap’an ni un Jesus ko taufe, ma bay fan ni yog e Chitamangin ni gaar: “I gur Fakag.”​—Luke 3:22.

5. Uw rogon ni ngad folwokgad rok Jehovah u rogon ni dag nib t’uf Fak rok mab fel’ u wan’?

⁵ “Gab t’uf rog.” Rogon ni dag Jehovah nib t’uf Fak rok mab fel’ u wan’ e be puguran ngodad ni ngad guyed rogon ni ngaud pied e athamgil nga laniyan’ yugu boch e girdi’. (John 5:20) Faanra be’ nib t’uf rodad e ke dag e t’ufeg ngodad ara ke yog fel’ngin e tin nib fel’ ni kad rin’ed, ma ra k’aringdad ni ngkud rin’ed boch ban’en nib manigil. Ku arrogon e pi walag u lan e ulung nge chon e tabinaw rodad nib t’uf ni ngad daged ngorad ni yad ba t’uf rodad, mad pied e athamgil nga lanin’rad. Nap’an ni gad ra yog fel’ngin e tin nib fel’ ni ke rin’ be’, ma aram e gad be gelnag e michan’ rok maku gad be ayuweg ni nge pigpig ngak Jehovah u fithik’ e yul’yul’. Piin gallabthir e ba ga’ nrib t’uf ni ngar pied e athamgil nga laniyan’ pi fakrad. Faanra u rogned fel’ngin e tin nib fel’ ni be rin’ pi fakrad mar daged e t’ufeg ngorad, ma aram e yad be ayuwegrad ni ngkur rin’ed boch ban’en nib manigil.

6. Mang fan nrayog ni nge pagan’dad ngak Jesus Kristus?

⁶ “Kari felan’ug ngom.” Pi thin ney e be dag nib pagan’ Jehovah nra rin’ Jesus e tin nib m’agan’ e Chitamangin ngay u fithik’ e yul’yul’. Faanra aram rogon Jesus u wan’ Jehovah, ma ere ku arrogodad nrayog ni nge pagan’dad ngak Jesus nra lebguy urngin e tin ke micheg Jehovah. (2 Kor. 1:20) Faan gad ra fal’eg i lemnag e n’en ni rin’ Jesus, ma aram e rayog ni ngad dugliyed u wan’dad ni ngad filed boch ban’en rok ma gad lek luwan ay. Kub pagan’ Jehovah ngay nra ulul e pi tapigpig rok ni ngar filed boch ban’en rok Fak.​—1 Pet. 2:21.

7. Mingiyal’ e non Jehovah u tharmiy nrogon ni bay ko Matthew 17:1-5, ma mang e yog?

⁷ Mu beeg e Matthew 17:1-5. Yay ni l’agruw ni non Jehovah u tharmiy ngak Jesus e nap’an ni “thil yaan.” I pining Jesus Peter, nge James, nge John ni ngar uned ngak nga ranod nga daken e burey. Nap’an ni yad bay u rom ma aram min pilyeg e changar rorad. Ra guyed Jesus ni ke galgal owchen me wechwech e mad rok. Ma aram mar guyed l’agruw ni’ ni bod yaan Moses nge Elijah ni yad be non Jesus ni yad be weliy murung’agen e yam’ nge fos ko yam’ nra tay. Yugu aram rogon ni “be mol” fa dalip i apostal rok Jesus, machane nap’an nra odgad mi yad guy e n’en ni ke buch rok Jesus. (Luke 9:29-32) Me migid ma aram me upunguyrad bangi manileng, mar rung’aged laman Got ni ke yib u fithik’ e gi manileng nem! Ma aram miki buch bayay e n’en ni buch rok Jesus u nap’an ni un ko taufe, ni aram e gaar Jehovah: “I gur Fakag, ni gab t’uf rog, ni kari felan’ug ngom.” Machane, ngiyal’ nem e ki gaar Jehovah: “Mu telmed ngak.”

8. Nap’an ni thil yaan Jesus, ma mang angin ni ke yib ngak nge pi gachalpen?

⁸ Re n’ey ni guy pi gachalpen Jesus e be dag buguwan nge gelngin boch nga m’on u nap’an nra mang Pilung u Gil’ilungun Got. Dariy e maruwar riy ni pi’ e re n’ey e athamgil nga laniyan’ Jesus miki pi’ gelngin ya nge yag ni athamgiliy e gafgow nge yam’ nra tay. Re n’em e ki gelnag e michan’ rok pi gachalpen Jesus miki pi’ gelngirad ya nge yag nra athamgilgad u fithik’ e skeng nra yib ngorad boch nga m’on nge maruwel nib gel ni bay ni ngar rin’ed. Sogonap’an 30 e duw nga tomuren, me weliy apostal Peter murung’agen e re n’ey nni pilyeg e changar rorad ngar guyed. Ma re n’ey e be dag nri kab tamilang u wan’ e n’en ni guy.​—2 Pet. 1:16-18.

9. Mang e fonow nib manigil ni pi’ Jesus ngak pi gachalpen?

⁹ “Mu telmed ngak.” I tamilangnag Jehovah ni baadag ni ngad motoyilgad ko thin rok Fak ma gad fol riy. Mang e yog Jesus u nap’an ni immoy u fayleng? Boor ban’en ni yog nrib ga’ fan ni ngad motoyilgad ngay. Bod ni, ke fil ngak pi gachalpen rogon ni ngar machibnaged fare thin nib fel’, maku boor yay ni puguran ngorad ni ngar pared ni yad ba od ko tirok Got ban’en. (Matt. 24:42; 28:19, 20) Ki tay ir ngorad ni ngar athamgilgad ndabi mulan’rad. (Luke 13:24) I yog nib t’uf ni ngar t’ufeged yad, mi yad par ni yad ba taareb, mar folgad ko pi motochiyel rok. (John 15:10, 12, 13) Rib puluw e fonow ni pi’ Jesus ngak pi gachalpen! Pi fonow nem e kub ga’ fan ngodad e ngiyal’ ney.

10-11. Uw rogon ni ngad daged ni gad be motoyil ngak Jesus?

¹⁰ I gaar Jesus: “En ni girdien e tin riyul’ e ra rung’ag e thin ni gu be yog.” (John 18:37) Ere ra m’ug ni gad be motoyil ko n’en ni be yog ni faanra ‘bagadad me ayuweg bagadad ko meewar rok u fithik’ e runguy, mu ud n’iged fan u wun’dad e n’en ni manga ke kirebnag bagadad u laniyan’ bagadad.’ (Kol. 3:13; Luke 17:3, 4) Ku ra m’ug ni gad be motoyil ngak ni faan gad ra machibnag e ‘thin rok Got ko girdi’ ndemturug ko kari mab e kanawo’ ngodad fa dawor.’​—2 Tim. 4:2.

¹¹ I gaar Jesus: “Saf rog e yad ma rung’ag lungug.” (John 10:27) Pi gachalpen Jesus e yad ma dag ni yad be rung’ag laman Jesus ni aram e gathi kemus ni yad ma motoyil ko n’en ni be yog ya ku yad ma fol riy. Darur paged e “pi n’en ni ma magafan’uy ngay ko biney e tamilang” ni nge soreg lanin’rad nga bang. (Luke 21:34) Rib ga’ fan u wan’rad ni ngar folgad ko thin rok Jesus ni yugu aram rogon ni bay yu ngiyal’ nrib mo’maw’ ngorad. Boor ko pi walagdad e yad be mada’nag boch e skeng nrib mo’maw’. Bod ni,  bay boch i yad ni yibe togopuluw ngorad, ara yad be gafgow ko par, ara kar gafgowgad ni bochan e yoko’, ara durru’ ara boch ban’en ni ma yib ni yima gafgow riy. Yugu aram rogon, ma ka yad be par ni yad ba yul’yul’ ngak Jehovah. Ere, baaray e n’en ni ke micheg Jesus ngorad: “En nra fel’ u wan’ e tin ni kug ta’ chilen ngomed me fol riy, e ereram e cha’ ni gub t’uf rok. Chitamag e ra t’ufeg e cha’ ni gub t’uf rok.”​—John 14:21.

12. Ku mang reb e kanawo’ ni ngad daged riy ni gad be motoyil ngak Jesus?

¹² Ku baaray reb e kanawo’ nrayog ni ngad daged riy ni gad be motoyil ngak Jesus. Aram e ngad folgad ko piin ni ke dugliyrad ni nga u rogned e thin rodad. (Heb. 13:7, 17) Fapi duw ni ka fini yan e boor ban’en ni kan thilyeg u lan e ulung rodad nib muun ngay boch ban’en ni kab beech ni gad be maruwel ngay u nap’an e machib, nge boch e kanawo’ nib beech ni gad be machib riy, nge rogon e muulung ni gad ma tay u lan e wik, nge rogon e dimow naun ni gad be tay, nge rogon ni yibe fal’eg e gin ni ke kireb u boch e naun, nge rogon ni yibe ayuweg. Ri gad ba felfelan’ ko pi ayuw ney ni yibe pi’ ngodad! Ku rayog ni nge pagan’dad nra tow’athnag Jehovah e athamgil ni gad ma tay ni ngad folgad ko pi yaram ni be ngongliy e ulung rok.

13. Mang angin nra yib ngodad ni faan gad ra motoyil ngak Jesus?

¹³ Gad ra motoyil nga urngin ban’en ni be fil Jesus ngodad, ma ra fel’ rogodad riy. I micheg Jesus ngak pi gachalpen ni pi n’en ni i fil ngorad e ra pi’ e toffan ngorad. I yog ni gaar: “Gimed [ra] pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matt. 11:28-30) Thin rok Got nib muun ngay fa aningeg i Gospel ni be weliy murung’agen e yafos rok Jesus nge machib ni i tay e ma pi’ e toffan ngodad, maku ma gelnag e michan’ rodad, me pi’ e gonop ngodad. (Ps. 19:7; 23:3) I yog Jesus ni gaar: “Ri kab felan’ e piin ni kar rung’aged e thin rok Got ma kar pired ni yad be fol riy!”​—Luke 11:28.

14-15. (a) Wuin e yay ni dalip ngay ni non Jehovah ngak Jesus u tharmiy nrogon ni bay ko John 12:27, 28? (b) Mang fan ni thin ni yog Jehovah e ke fal’eg laniyan’ Jesus me pi’ gelngin?

¹⁴ Mu beeg e John 12:27, 28. Fare Gospel rok John e weliy murung’agen e yay ni gaman e dalip ngay ni non Jehovah u tharmiy ngak Jesus. In e rran u m’on ni nge yim’ Jesus, ma aram me yan nga Jerusalem ni nge madnomnag fare Paluk’af. I yog ni gaar: “Chiney e ke  magaf lanin’ug.” Miki meybil ni gaar: “Chitamag, mu ta’ fan fithingam!” Ma aram me non e Chitamangin u tharmiy ngak ni gaar: “Kug ta’ fan ma bay kug rin’ bayay.”

¹⁵ I magafan’ Jesus ni bochan e manang nib milfan ngak ni nge par nib yul’yul’ ngak Jehovah. Manang ni yira gafgownag nib gel min li’ nge yim’. (Matt. 26:38) Bin th’abi ga’ fan riy e baadag Jesus ni nge n’uf fithingan e Chitamangin. I yog boch e girdi’ ni be darifannag Jesus Got. Ku i magafan’ nri chey min darifannag Got ko yam’ nra tay. Ere ba mutrug ni thin ni yog Jehovah e pi’ e athamgil nga laniyan’ Jesus! Ya rayog ni nge pagan’ ngay ni yira tayfan fithingan Jehovah. Dariy e maruwar riy ni thin ni yog e Chitamangin e ri fal’eg laniyan’ me pi’ gelngin ni nge yan u fithik’ e tin nra mada’nag boch nga m’on. Yugu aram rogon nsana yigoo ir e manang fan e thin ni yog e Chitamangin e ngiyal’ nem, machane ke guy Jehovah rogon ni ngan yoloy e pi thin Rok nem nga lan e Bible ni fan ngodad.​—John 12:29, 30.

16. Mang fan ni yu ngiyal’ e ma magafan’dad nri chey min darifannag fithingan Got?

¹⁶ Sana taareb rogodad ngak Jesus ni ku be magafan’dad nri chey min darifannag fithingan Jehovah. Sana rayog ni yibe rin’ boch ban’en nde mat’aw ngodad ni bod e n’en ni buch rok Jesus. Fa reb e be magawon lanin’dad ni bochan boch ban’en nde riyul’ ni yibe wereg u murung’agdad. Sana rayog ni be magafan’dad nri chey min darifannag fithingan Jehovah nge ulung rok ni bochan e pi n’ey. Faanra buch rodad  ni aray rogon, ma fapi thin ni yog Jehovah ngak Jesus e rayog ni nge fal’eg lanin’dad. Ere dariy rogon ni nge magafan’dad nib pag rogon. Ya rayog ni nge pagan’dad ni ‘gapas rok Got ndabi chuchugur ni nge nang e girdi’ fan e ra yororiy gum’ircha’dad nge tafinay rodad ngi i par rok Kristus Jesus.’ (Fil. 4:6, 7) Ba mudugil nra n’uf Jehovah fithingan. Ra fanay Gil’ilungun ni nge chuweg urngin e gafgow ni be tay Satan nge re fayleng ney ko pi tapigpig Rok ni yad ba yul’yul’.​—Ps. 94:22, 23; Isa. 65:17.

17. Uw rogon ni be non Jehovah ngodad e ngiyal’ ney nrogon nib puluw ko Isaiah 30:21?

¹⁷ Ka be non Jehovah ngodad e ngiyal’ ney. (Mu beeg e Isaiah 30:21.) Riyul’ ndabiyog ni ngad rung’aged laman ni be non u tharmiy. Machane, ke pi’ e Thin rok ngodad ni aram e Bible ni bay e fonow rok riy. Maku reb e, bay gelngin nib thothup ni be pow’iy “fare tapigpig nib yul’yul’ ma ba gonop” ni nga i pi’ e tin nib t’uf ko pi tapigpig Rok. (Luke 12:42) Riyul’ ni boor ban’en nib t’uf rodad ni fan ko tirok Got ban’en ni be pi’ e re tapigpig ney ngodad ni aram e pi babyor, nge boch ban’en u online, nge pi video, nge boch ban’en ni kan ngongliy nrayog ni ngan motoyil ngay!

18. Uw rogon ni be gelnag e thin rok Jehovah e michan’ rom ma be ayuwegem ni nge dab kum rus?

¹⁸ Dab da pagtalin e thin ni yog Jehovah u nap’an ni non ngak Fak ko ngiyal’ ni ka bay u fayleng! Gad be athapeg ni thin rok Got ni bay u Bible e ra ayuwegdad ni ngari pagan’dad ni bay Jehovah ni be pow’iy urngin ban’en, ma ra chuweg urngin e gafgow ni be fek Satan nge re fayleng rok ney i yib ngodad. Manga yugu da pared ni ke mudugilan’dad ni ngaud fal’eged e motoyil ko n’en ni be yog Jehovah. Faan gad ra rin’ ni aray rogon, ma aram e rayog ni ngad gelgad ko pi magawon ni be yib ngodad e chiney nge tin ni bay yib boch nga m’on. Be puguran e Bible ngodad ni be gaar: “Thingari gum’an’med, ni fan e nge yog ni mu ngongliyed e tin nib m’agan’ Got ngay me yog ngomed e tin ni ke yog nra pi’ ngomed.”​—Heb. 10:36.