1, 2. a) ¿Ximodo huaniʼné Jiobá binni guidxilayú? b) ¿Xi zadúʼyanu lu artículo riʼ?

GUIZÁʼ riuulaʼdxiʼ Jiobá guiniʼné laanu. Ne rúnibe ni para ganda gunibiaʼnu modo riníʼ íquebe ne ni rúnibe. Ne para gunda guníʼnebe binni dxiqué la? biquiiñebe ca profeta, ca ángel ne Cristu Jesús, Xiiñibe (Amós 3:7; Gál. 3:19; Apoc. 1:1). Tiempu riʼ riquiiñebe Stiidxabe, Biblia para guiníʼnebe laanu.

² Ne dxi guyuu Jesús ndaaniʼ Guidxilayú riʼ, chonna biaje guníʼ Jiobá de guibáʼ. Guidúʼyanu xi guniʼbe, xi zanda guizíʼdinu de ca ni guniʼbe ca ne xi caquiiñeʼ gúninu para gaca beneficiarnu de laacani.

3. Casi ná Marcos 1:9-11, ¿xi guníʼ Jiobá ora guyuunisa Jesús, ne xi rusihuinni ca diidxaʼ guniʼbe riʼ?

³ (Biindaʼ Marcos 1:9-11). Ndiʼ nga primé biaje guníʼ Jiobá de guibáʼ. Guniʼbe: «Lii nga Xiiñe ni nadxiee ne ni rusieche naa». Nanna dxiichinu guizáʼ biecheʼ Jesús ora binadiaga gudxi Bixhoze laa nadxii ne napa confianza laa. Ca diidxaʼ ni gudxi Jiobá Jesús, rusihuinni ca ni chonna cosa risaca. Primé, Jesús nga Xiiñibe. Guiropa, nadxiibe Jesús. Ne guionna, rusiecheʼ Jesús laabe. Guni analizarnu guionnaʼ cosa risaca riʼ tobi pur tobi.

4. ¿Ximodo beeda gaca Jesús xiiñiʼ Dios de ti modo nacubi dxi guyuunisa?

⁴ «Lii nga Xiiñe». Né ca diidxaʼ riʼ, bisihuinni Jiobá napa ti relación nacubi né Jesús, Xiiñibe. Ante gueeda Jesús ndaaniʼ Guidxilayú riʼ la? maca naca tobi de ca xiiñiʼ  Dios. Peru dxi guyuunísabe beeda gácabe Xiiñiʼ Dios de ti modo nacubi. Purtiʼ guca ungirbe pur espíritu santu ne gucuaabe esperanza de guibiguétabe guibáʼ para gácabe Rey ne Sumo Sacerdote ni maʼ gulí Dios (Luc. 1:31-33; Heb. 1:8, 9; 2:17). Ngue runi, ora guyuunisa Jesús, gupa Bixhózebe stale razón para gabi laabe: «Lii nga Xiiñe» (Luc. 3:22).

5. Cásica Jiobá, ¿xi caquiiñeʼ gúninu?

⁵ «Lii nga Xiñee ni nadxieeʼ». Cásica bisihuinni Jiobá nadxii Jesús ne biʼniʼ animar laabe la? laanu laaca naquiiñeʼ guyúbinu oportunidad para guni animarnu xcaadxi ne gannaxhiinu laacaʼ (Juan 5:20). Guizáʼ riéchenu ora rusihuinni ti binni ni nadxii laanu napa cariñu laanu ne runi felicitar laanu pur xiixa galán ni bíninu. Nga runi, laaca caquiiñeʼ gannaxhiinu ne guni animarnu familia stinu ne ca hermanu de ra congregación. Pa gúninu ni la? zacanenu laacabe iguidxi fe stícabe ne gácacabe leal Jiobá. Ne nabé risaca guni animar ne guni felicitar ca padre ca xiiñicaʼ de guidubi ladxidoʼcaʼ ne gusihuínnicaʼ nadxiicaʼ laacabe. Zacá zacanecaʼ laacabe guni progresarcabe.

6. ¿Xiñee zanda gápanu confianza Jesucristu?

⁶ «Lii nga Xiñee [...,] ni rusieche naa». Ra guníʼ Jiobá ca diidxaʼ riʼ, cusihuinni zuni Jesús ni nabe. Pa gupa Jiobá stale confianza Xiiñiʼ la? laanu laaca zanda chuʼnu seguru zuni cumplir Jesús guiráʼ ca promesa stiʼ Jiobá (2 Cor. 1:20). Ora guiníʼ íquenu pabiáʼ guca Jesús fiel Jiobá, racané ni laanu chuʼnu decididu guizíʼdinu jma de laabe ne chinándanu ejemplu stibe. Ne laaca napa Jiobá confianza qué zusaana ca xpinni de guiziidicaʼ de Jesús (1 Ped. 2:21).

7. Casi ná Mateo 17:1-5, ¿xi sti ocasión guníʼ Jiobá de guibáʼ, ne xi guniʼbe?

⁷ (Biindaʼ Mateo 17:1-5). Guiropa biaje guníʼ Jiobá de guibáʼ nga dxi bidxaa «modo bihuinni Jesús» o dxi guca transfigurarbe. Gunabaʼ Jesús Pedro, Santiago ne Juan chinecaʼ laabe lu ti dani nasoo. Raqué bíʼyacabe ti visión guizáʼ galán. Bizaaniʼ lú Jesús ne xhaba. Ne málasi bihuinni chupa hombre ni biʼniʼ representar Moisés ne Elías bizulú caníʼnecaʼ Jesús de guendaguti ne resurrección stiʼ. Neca maʼ cadaa bacaandaʼ lú guionna apóstol que la? bibánicaʼ ne óraque bíʼyacaʼ visión guizáʼ galán que (Luc. 9:29-32). Despué bitaaguʼ ti zá ni nabé ruzaaniʼ laacabe, ne biree voz stiʼ Dios lade zá que. Cásica biʼniʼ Jiobá dxi guyuunisa Jesús, biaje riʼ laaca bisihuínnibe nadxiibe ne runi aprobarbe Xiiñibe ora gúdxibe laa ca diidxaʼ riʼ: «Ndi nga Xiiñe ni nadxiee ne ni rusieche naa». Peru biaje riʼ guniʼbe: «Laucaa diaga laabe».

8. ¿Ximodo gucané visión que Jesús ne ca discípulo stiʼ?

⁸ Visión riʼ bisihuinni ni gloria ne poder ni zapa Jesús ora maʼ gaca rey lu Reinu stiʼ Dios. Nanna dxiichinu guizáʼ biʼniʼ animar ne guluu visión riʼ gana Jesús, purtiʼ zuni sufrirbe ne nabé feu modo guuticabe laabe. Laaca biquidxi ni fe stiʼ ca discípulo ne bidii ni stipa laacaʼ para gudxiilucaʼ ca prueba ra naquiiñeʼ gusihuínnicaʼ nácacaʼ íntegro ne purtiʼ zúnicaʼ xhiiñaʼ Jiobá stale iza. Treinta iza despué bizeeteʼ apóstol Pedro de visión riʼ, ndiʼ rusihuinni qué ñaandaʼ visión que laabe (2 Ped. 1:16-18).

9. ¿Gunáʼ nga ca conseju risaca bidii Jesús ca discípulo stiʼ?

⁹ «Laucaa diaga laabe». Rihuinni dxiichicaʼ racalaʼdxiʼ Jiobá gucaʼdiáganu ne guzúʼbanu stiidxaʼ Jesús. Dxi guyuu Jesús ndaaniʼ Guidxilayú riʼ guníʼ stale cosa ni caquiiñeʼ quíxhenu atención. Guzéʼtenu ti ejemplu, bisiidibe ca discípulo stibe guni predicarcaʼ ca noticia galán stiʼ Reinu ne gatigá bisietenaláʼdxibe laacaʼ caquiiñeʼ gatanacaʼ (Mat. 24:42; 28:19, 20). Laaca gunabaʼ Jesús laacabe gúnicabe stipa pur gúnicabe ni ná Dios, ne biʼniʼ animar laacabe cadi guireecabe gana (Luc. 13:24). Ne laaca gúdxibe laacaʼ gannaxhiisaacaʼ, chuʼcaʼ tobi si ne gúnicaʼ ni ná ca mandamientu stibe (Juan 15:10, 12, 13). Guizáʼ risaca ca conseju bidiibe ca discípulo ne yanna riʼ laaca risácaruʼ ca ni.

10, 11. ¿Ximodo rusihuínninu rucaʼdiáganu Jesús?

¹⁰ Jesús guníʼ: «Irá ni zinanda ni dxandí la? rucaa diaga naa» (Juan 18:37). Rusihuínninu rucaʼdiáganu laabe ora rúninu ni ná conseju riʼ: «Cadi ixhacalaʼdxi saa tu, ne laguni perdonar ni guni stobi laatu» (Col. 3:13; Luc. 17:3, 4). Laaca rusihuínninu ni ora runi predicarnu né stale gana, ora nuunu galán ne ora cadídinu lu guendanagana (2 Tim. 4:2).

¹¹ Jesús guníʼ rucaadiaga ca dendxuʼ stiʼ laa (Juan 10:27). Rusihuínninu rucaʼdiáganu laabe cadi ora si riguíxhenu atención ni riniʼbe, sínuque né ora rúninu ni nabe. Pur nga la? qué rudiʼnu lugar guni distraer ca cosa ni riguu xizaa laanu guiráʼ dxi (Luc. 21:34). Ne rúninu stipa pur guzúʼbanu stiidxaʼ Jesús, dede né ora cadxaagalunu guendanagana. Stale hermanu cayuni huantar stale  problema nabé nagana, nuu tu laa rucaalú binni laacaʼ, qué gápacaʼ bueltu o raca desastre natural ra nabézacaʼ. Peru neca zacá nácacabe fiel Jiobá. Nga runi, cayabi Jesús laacabe dxandíʼ ni ná ca diidxaʼ riʼ: «Ni ma napa stiidxaʼ ne guni ni na ni la? ngue nga ni nadxii naa. Ne ni nadxii naa la? zanaxhii Bixhoze laa» (Juan 14:21).

12. ¿Gunáʼ nga xcaadxi modo zanda gusihuínninu rucaʼdiáganu Jesús?

¹² Sti modo rusihuínninu rucaʼdiáganu Jesús nga ora runinenu dxiiñaʼ ca ni maʼ biʼniʼ nombrarbe para guni dirigir laanu (Heb. 13:7, 17). Lu ca últimu iza riʼ, maʼ bichaa stale cosa ndaaniʼ organización stiʼ Dios. Guzéʼtenu ti ejemplu, maʼ bidiicabe laanu caadxi método nacubi ne xcaadxi herramienta para guni predicarnu. Laaca maʼ bichaacabe modo raca ca reunión ni raca ndaaniʼ semana ne modo naquiiñeʼ cuí, modo gaca remodelar ne modo gudiicabe mantenimientu ca Yoo stiʼ Reinu. ¿Cadi dxandíʼ rudiʼnu xquíxepeʼ purtiʼ nadxiicabe laanu ne pur riníʼ ique chaahuicabe modo guni guiarcabe laanu la? Zanda chuʼnu seguru zaguu Jiobá ndaayaʼ laanu pur cuzúʼbanu stiidxaʼ organización stiʼ.

13. ¿Ximodo raca beneficiarnu ora rucaʼdiáganu Jesús?

¹³ Gucaʼdiáganu guiráʼ ni bisiidiʼ Jesús runi beneficiar ni laanu. ¿Ximodo yaʼ? Guzéʼtenu ti ejemplu, gúdxibe ca discípulo stibe zaguixhedxí ca ni rusiidibe ladxidoʼcaʼ. Sicaríʼ guniʼbe: «Latáʼ ra nuaaʼ, zaziilaʼdxiʼ ladxidóʼ to. Laudxiiba ayubu stinne xa yanni tu purti nasisi ni» (Mat. 11:28-30). Stiidxaʼ Dios ne guidapaʼ relatu ni caníʼ de xquendanabani ne predicación stiʼ Jesús racané ni ne riguu ni gana laanu gácanu ti binni naguidxi en sentidu espiritual ne gácanu binni nuu xpiaaniʼ (Sal. 19:7; 23:3). Jesús guníʼ: «Jma dichoso cani ucaa diaga stiidxa Dios ne guni ni na ni» (Luc. 11:28).

14, 15. a) Casi ná Juan 12:27, 28, ¿gunáʼ nga guionna biaje guníʼ Jiobá de guibáʼ? b) ¿Xiñee gutadxí ladxidóʼ Jesús ne gucuaa stipa pur ca diidxaʼ ni gudxi Jiobá laa?

¹⁴ (Biindaʼ Juan 12:27, 28). Lu Evangeliu stiʼ Juan riete guionna biaje guníʼ Jiobá de guibáʼ. Chupa chonna dxi  ante gatiʼ Jesús, nuube ndaaniʼ guidxi Jerusalén para guni celebrarbe últimu saa Pascua. Ne despué de guniʼbe nuube xizaa, gúdxibe Dios ca diidxaʼ riʼ lu ti oración: «Bixhozeʼ, bisisaca lá lu». Ne óraque binadiágabe bicabi Jiobá laabe de guibáʼ ne ná: «Ma bisisaca ni, ne zusisaca ruaʼ ni sti tiru».

¹⁵ Guyuu Jesús xizaa purtiʼ gunna nabé risaca responsabilidad de gaca fiel Jiobá. Gúnnabe zuninácabe ne zuuticabe laabe (Mat. 26:38). Peru ni jma risaca para laabe nga gusisácabe lá Bixhózebe. Guníʼ binni caniʼbe mal de Dios ne pur nga guyuube xizaa guni biidiʼ guendaguti stibe lá Dios. Peru ca diidxaʼ gudxi Bixhoze Jesús laa gudixhedxí ca ni ladxidóʼ purtiʼ gudxi Dios laabe zusisaca lá. Nanna dxiichinu gudixhedxí ca diidxaʼ riʼ ladxidoʼbe ne bidii ni stipa laabe para guni huantarbe ni chidxagalube. Neca Jesús si nga biene ca diidxaʼ ni gudxi Jiobá laa la? bicaa Jiobá ca ni lu Biblia para gacané ca ni laanu (Juan 12:29, 30).

16. ¿Xiñee cadi naquiiñeʼ chuʼnu xizaa ora guni biidiʼ binni lá Jiobá?

¹⁶ Cásica Jesús, laanu laaca zándaca chuʼnu xizaa ora guni biidiʼ binni lá Jiobá. Zándaca gúnicabe laanu xiixa injusticia cásica bizaaca Jesús. O zándaca chuʼnu xizaa pur ca cosa ni cadi dxandíʼ ni riníʼ ca binni ni rucaalú laanu. Zándaca  riníʼ íquenu pabiáʼ zuni biidiʼ ni guiníʼcabe ca lá Jiobá ne organización stiʼ. Peru cadi naquiiñeʼ chúʼpenu xizaa pur ca cosa riʼ. Nga runi, ora guidxaagalunu tipu guendanagana riʼ zaguixhedxí ca diidxaʼ ni gudxi Jiobá Jesús ladxidoʼno. Siempre rusisaca Jiobá lá. Nga runi zaquiiñebe Reinu stibe para guni chaahuibe intiica cosa malu guni Binidxabaʼ ca xpínnibe ni naca fiel (Sal. 94:22, 23; Is. 65:17). Nuunu seguru zaca cumplir ca diidxaʼ riʼ: Zaguixhedxí Dios «ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Filip. 4:6, 7).

17. Casi ná Isaías 30:21, ¿ximodo riniʼné Jiobá laanu tiempu riʼ?

¹⁷ Riníʼneruʼ Jiobá laanu tiempu riʼ (biindaʼ Isaías 30:21). Ya, qué runadiáganu stídxibe de guibáʼ. Peru riquiiñebe Stiidxabe, Biblia, para gábibe laanu xi gúninu. Ne racané espíritu santu mayordomo ni runi ni jneza para gudii laanu alimentu espiritual, casi ca publicación ni raca imprimir, ni nuu lu sitiu de Internet, ca videu ne ca audio (Luc. 12:42). ¿Cadi dxandíʼ stale alimentu espiritual ricaanu la?

18. ¿Xiñee racané stiidxaʼ Jiobá laanu para guiroobaʼ fe stinu ne gápanu valor?

¹⁸ Qué chuʼ dxi guiaandaʼ laanu ni guníʼ Jiobá dxi guyuu Jesús ndaaniʼ Guidxilayú riʼ. Ne zacané ca diidxaʼ stiʼ Dios ni zeeda lu Biblia laanu para gápanu confianza zápabe laanu ne zuni chaahuibe intiica cosa malu guni Binidxabaʼ ne ca xpinni laanu. Quixhe íquenu gucaʼdiáganu stidxi Jiobá né stale atención. Pa gúninu ni la? zanda gudxíʼlunu intiica guendanagana guidxaagalunu yanna ne despué. Biblia rusietenalaʼdxiʼ laanu: «Caquiiñeʼ guni huantartu, ti ora maʼ bíʼnitu ni ná Dios la? guicaatu ni maʼ biʼniʼ prometerbe laatu» (Heb. 10:36, TNM).