Hata “amen” lapatanna “masa ma songon i” manang “tutu”. Sian hata Heber do hata on, na lapatanna “marsihohot”, “boi dihaporseai”. Molo adong acara na ringkot, dipangke do hata on. Jala tingki sasahalak marsumpa, ingkon didok do “amen” laho patuduhon na tutu do na didokna i. Jala, ingkon rade do ibana manjalo aha pe na masa alani sumpana i. (4 Mus. 5:22) Molo didok ibana “amen” di jolo ni na torop, ingkon dipasaut do na didokna i.​—Neh. 5:13.

Di 5 Musa bindu 27 disurat do taringot songon dia hata “amen” dipangke. Tingki masuk bangso Israel tu Tano na Dijanjihon, marpungu ma nasida di holang-holang ni Dolok Ebal dohot Dolok Gerizim laho manangihon Patik ni Debata. Ndang sae holan ditangihon nasida Patik i, alai ingkon dipaboa do na olo do nasida mangulahon i. Dung dibege nasida aha na masa molo ndang unduk nasida, ingkon didok nasida do “Amen!”. (5 Mus. 27:15-26) Bayangkon ma songon dia gogo ni soara ni marribu halak tingki mangalusi Patik i! (Jos. 8:30-35) Tontu ndang dihalupahon nasida i. Jala sai diingot nasida do janji ni nasida i. Didok Bibel, “Sai dioloi halak Israel do Jahowa saleleng mangolu si Josua, saleleng mangolu dohot sintua, angka na leleng mangolu dope di pudi ni si Josua, angka na umboto saluhut pambahenan ni Jahowa, angka na binahenna tu Israel.”​—Jos. 24:31.

Didok Jesus do hata “amen” laho patuduhon na tutu do na didokna i. Alai imbar do cara ni Jesus mandokkon i. Somalna hata “amen” didok dung sae sasahalak mandok hatana. Alai molo Jesus, didok  “amen” (terjemahan bahasa Batak Toba “situtu”) andorang so didok do hatana na patuduhon na tutu do na didokna i. Sipata, didok do hata “amen” sampe dua hali. (Mat. 5:18; Joh. 1:51) On laho patuduhon tu halak na manangihon ibana na tutu do hata na didokna i. Didok Jesus pe songon i ala marhite ibana do saut sude janji ni Debata.​—2 Kor. 1:20; Pgk. 3:14.

Halak Israel najolo mamangke hata “amen” tingki mangalehon pujian dohot martangiang tu Jahowa. (Neh. 8:6; Ps. 41:14) Dung sae martangiang, didok nasida do “amen” laho patuduhon na satolop do nasida tu tangiang i. Jala angka halak na ro pe mandapot laba jala marlas ni roha. On ma na masa tingki Raja Daud mamboan Poti Parpadanan ni Jahowa tu Jerusalem. Saleleng perayaan i, martangiang ma ibana sian nasa roha jala disurat do i di 1 Kronika 16:8-36. Las hian do roha ni angka na ro mambege tangiang ni si Daud i. Gabe sude ma “bangso i mandok: Amen! Jala pujipujian di Jahowa”! Las do roha ni nasida boi rap manomba Jahowa.

Dipangke halak Kristen di abad na parjolo do hata “amen” tingki mamuji Jahowa. Angka panurat Bibel pe jotjot do mamangke hata i di surat ni nasida. (Rom 1:25; 16:27; 1 Ptr. 4:11) Dipaboa do di buku Pangungkapon adong suru-suruan na mamuji Jahowa jala didok “Amen! Halleluya!” (Pgk. 19:1, 4) Somalna halak Kristen na parjolo mandok hata “amen” dung sae martangiang di parpunguan. (1 Kor. 14:16) Alai, ndang holan didok sambing hata i.

Dung taparsiajari songon dia naposo ni Jahowa najolo mamangke hata “amen”, taboto ma boasa ringkot tadok “amen” dung sae martangiang. Tingki sahalakta martangiang, tadok ma hata i laho patuduhon  na pos do rohanta tu tangiangta i. Jala tingki martangiang di natorop, molo tadok “amen” marsoara manang di bagasan roha patuduhon na satolop do hita tu na didokna i. Alai adong muse alasan na asing boasa ingkon tadok “amen”.

Denggan ma tangihon tingki adong na martangiang, alana on sada cara manomba Jahowa. Tingki martangiang, na ringkot di Jahowa ndang holan aha na tahatahon alai songon dia rohanta tingki martangiang. Ala ingkon tadok do “amen”, denggan ma taparrohahon jala tatangihon tangiang na dipasahat dongan na asing.

Mambahen hita marsada. Tingki dipasahat tangiang di huria, rap do angka dongan na asing manangihon tangiang i. (Ul 1:14; 12:5) Jala tingki rap hita mandok “amen” dohot angka dongan, on boi mambahen hita gabe lam marsada. Tingki tadok “amen”, marsoara manang di bagasan roha, on boi mangonjar roha ni Jahowa laho mangalusi tangiang i.

Laho mamuji Jahowa. Diparrohahon Jahowa do sude na taulahon. (Luk. 21:2, 3) Diboto do aha na adong di bagasan rohanta jala boasa tasomba Ibana. Nang pe marhite telepon tatangihon tangiang di parpunguan, pos ma rohanta tingki tadok “amen”, diparrohahon Jahowa do i. Jala, na rap do hita mamuji Jahowa dohot angka dongan.

Ra hira na so ringkot do tingki tadok “amen”, alai sasintongna mansai ringkot do i. Sada ensiklopedia taringot Bibel mandok, “Marhite mamangke hata on, sude naposo ni Jahowa boi do patuduhon pos ni roha, las ni roha, dohot pangkirimon ni nasida.” Anggiat ma tingki tadok “amen” boi mambahen las roha ni Jahowa.​—Ps. 19:15.