“Maan ɔ yo sɔ” mɔ e kan’n, ɔ ti Zoova i cinnjin
ZOOVA bu sulɛ mɔ e su i’n i like cinnjin. Ndɛ kwlaa nga i sufuɛ’m be kan’n, ‘ɔ fɛ i su sie i bo, ɔ ti.’ Yɛ like kwlaa nga be yo’n, ɔ fɛ i ɲin sie su. (Mal. 3:16) I wie yɛle “maan ɔ yo sɔ” mɔ kɛ e srɛ Ɲanmiɛn’n e kan’n. Zoova bu ndɛ kpe kan sɔ’n, i like cinnjin. ?Ngue ti-ɔ? ?Ngue yɛ ndɛ sɔ’n kle e-ɔ? ?Ndɛ sɔ’n i su ndɛ benin yɛ Biblu’n kan-ɔn?
“SRAN’M BE KWLAA BE TƐLI I SU KƐ: ‘MAAN Ɔ YO SƆ!’”
Ebre nun ndɛ mma nga be kacili i Wawle’n nun kɛ “maan ɔ yo sɔ,” i bo i wie yɛle kɛ “maan ɔ yo nanwlɛ,” annzɛ “maan be lafi su.” Blɛ sunman’n, kɛ bé dí jɔlɛ wie mun’n, be kan sɔ. Kɛ sran kun ta nda’n, ɔ kwla se kɛ “maan ɔ yo sɔ.” I liɛ’n, i wiengu’m be kwla lafi su kɛ ɔ́ yía nda ng’ɔ tali’n i nuan sakpa. Sɛ w’a yiaman nda sɔ’n i nuan’n, be kwla fɛ i su sa be yo i. (Kal. 5:22) Kɛ sran kun se kɛ “maan ɔ yo sɔ” nzra nun’n, ɔ fata kɛ ɔ yo ndɛ ng’ɔ kannin’n i nuan su sa.—Nee. 5:13.
Mmla’n ndɛ tre 27 nun’n, be klɛli i kpɛ sunman kɛ “maan ɔ yo sɔ.” Biblu’n nun ndɛ tre sɔ’n fa e ɲin sie i sa kun m’ɔ juli Izraɛlifuɛ’m be su’n i su. Kɛ ɔ́ yó sɔ’n, nn b’a wlu mɛn nga Ɲanmiɛn tali nda kɛ ɔ́ fá mán be’n i nun. Yɛ be ko yiali Garizimun oka’n nin Ebali oka’n be afiɛn’n nun. Kpɛkun be kanngannin Mmla’n nun kleli be. Nán Mmla’n mɔ be su kanngan nun’n, i tielɛ ngunmin ti yɛ be yiali lɛ-ɔ. Sanngɛ, ɔ fata kɛ be ta nda kɛ bé nánti Mmla’n su’n. Ɔ maan, kɛ bé kánngan Mmla’n nun mɔ be bo sa nga sɛ b’a nantiman Mmla’n su ɔ́ ɲán be’n su’n, be tɛli su kɛ: “Maan ɔ yo sɔ.” (Mml. 27:15-26) I yasua o, i bla o, i bakan o, be kwlaa be mannin be nɛn’n su yɛ be tɛli su kekle kpa. (Zoz. 8:30-35) Izraɛlifuɛ sɔ’m be wla w’a fiman nda nga be tɛli i cɛn sɔ nun’n, i su le. Yɛ be yiali nda sɔ’n i nuan. Afin, Biblu’n se kɛ: “Izraɛlfuɛ’m be suli Anannganman Zozie nyin su, ɔ nin kpɛnngbɛn nga be sili Zozie bɔ be wunnin sa nga Anannganman yo mannin Izraɛlfuɛ mun’n be nyin su.”—Zoz. 24:31.
Wie liɛ’n, kɛ Zezi kán ndɛ’n, ɔ se kɛ “maan ɔ yo sɔ,” naan sran’m be lafi su kɛ i ndɛ’n ti nanwlɛ. Sanngɛ, wafa ng’ɔ kan ndɛ’n sɔ’n, ɔ ti i liɛ ngunmin. Yɛle kɛ, nán ndɛ kun i su tɛlɛ ti yɛ ɔ kan sɔ-ɔ. Sanngɛ, ɔ kan sɔ fa bo ndɛ nanwlɛ ng’ɔ́ wá kán’n i bo. Ɔ ju wie’n, ɔ kan ndɛ sɔ’n i kpɛ nɲɔn lɔngɔ su. (Mat. 5:18; Zan 1:51) Ɔ yo sɔ naan i ndɛ tiefuɛ’m be lafi su kɛ i ndɛ’n ti nanwlɛ, be kwlá siman su akplowa kaan sa. Sɛ Zezi kan sɔ’n, ɔ ti su. Afin, i yɛ ɔ́ yía nda nga Ɲanmiɛn tali be’n, be nuan-ɔn.—2 Kor. 1:20; Ngl. 3:14.
“SRAN’M BE KWLAA BE TƐLI I SU KƐ: ‘MAAN Ɔ YO SƆ! E MANMAN ANANNGANMAN!’”
Kɛ Izraɛlifuɛ’m bé mánmán Zoova annzɛ bé srɛ́ i’n, be kusu be se kɛ “maan ɔ yo sɔ.” (Nee. 8:6; Jue. 41:14) Kɛ sran kun wie Ɲanmiɛn srɛ mɔ be nga be o lɛ’n, be tɛ su kɛ “maan ɔ yo sɔ’n,” i sɔ’n kle kɛ ndɛ nga sran’n kannin’n, ɔ ti be liɛ’n su. I sɔ’n kle wie kɛ be bo ti kun srɛlɛ’n nun. Ɔ maan be klun jɔ. I sɔ sa’n juli Famiɛn Davidi blɛ su. Kɛ Davidi fali Ɲanmiɛn i alaka’n ɔli Zerizalɛmun’n, Izraɛlifuɛ’m be dili i ti cɛn. Kɛ bé dí cɛn sɔ’n, Davidi tuli i klun srɛli Ɲanmiɛn. Srɛlɛ ng’ɔ srɛli’n, ɔ ti kɛ jue yɛ ɔ su to sa. Be klɛli ndɛ ng’ɔ kannin’n 1 Be Nyoliɛ 16:8-36 nun. Izraɛlifuɛ nga be o lɛ mɔ be tili i srɛlɛ sɔ’n, be “kwlaa be tɛli i su kɛ: ‘Maan ɔ yo sɔ!’ E manman Anannganman!” Nanwlɛ, kɛ mɔ be bo yoli kun be suli Zoova’n ti’n, be klun jɔli dan cɛn sɔ’n nun.
Kɛ Klisifuɛ klikli’m bé mánmán Zoova’n, be seli wie kɛ “maan ɔ yo sɔ.” Kɛ Ɲanmiɛn maan bé klɛ́ i nuan ndɛ’n, be klɛli ndɛ sɔ’n i kpɛ sunman. (Rɔm. 1:25; 16:27; 1 Piɛ. 4:11) I wie yɛle kɛ, Sa Nglo Yilɛ fluwa’n nun’n, akoto Zan kannin anzi wie mɔ be su manman Zoova’n be ndɛ. I waan anzi sɔ’m be se kɛ: “Maan ɔ yo sɔ! An manman Ya!” (Ngl. 19:1, 4) Kɛ Klisifuɛ klikli’m bé yó be aɲia mun mɔ be srɛ Ɲanmiɛn’n, be tɛ su kɛ “maan ɔ yo sɔ.” (1 Kor. 14:16) Sanngɛ, be kanman ndɛ sɔ’n sa ngbɛn.
?NGUE TI YƐ KƐ E SE KƐ “MAAN Ɔ YO SƆ’N,” I SƆ’N TI CINNJIN-ƆN?
Zoova i sufuɛ’m be su ndɛ nga e wunnin i lɛ’n ti’n, e si sa nga ti yɛ kɛ e srɛ Ɲanmiɛn’n, ɔ fata kɛ e guɛ i bo kɛ “maan ɔ yo sɔ’n.” Kɛ e tinuntinun e srɛ Ɲanmiɛn mɔ e guɛ i bo sɔ’n, i sɔ’n kle kɛ ndɛ nga e kannin’n ti e cinnjin. Yɛ kɛ bé srɛ́ nzra nun mɔ e tɛ su kɛ “maan ɔ yo sɔ’n,” kannzɛ bɔbɔ e kɛnnin i e klun lɔ’n, i sɔ’n kle kɛ ndɛ nga e tili’n, ɔ ti e klun su. ?Sa benin ekun ti yɛ kɛ e se kɛ “maan ɔ yo sɔ’n,” ɔ ti cinnjin-ɔn?
I sɔ mɔ e kan’n, ɔ ti Zoova i sulɛ wie. Kɛ é srɛ́ Zoova’n, ndɛ nga e kan’n, ɔ nin e ayeliɛ bɔbɔ’n be manman Zoova. I sɔ’n ti, kɛ bé srɛ́’n, ɔ fata kɛ e ɲin tran ndɛ nga be kan’n su. Yɛ maan e ayeliɛ’n kle kɛ ɔ ti like cinnjin. I liɛ’n, kɛ e tɛ su kɛ “maan ɔ yo sɔ’n,” i sɔ’n jɔ́ Zoova klun.
Ɔ yo maan e nin Ɲanmiɛn i sufuɛ onga mun e bo yo kun. Kɛ bé srɛ́ nzra nun’n, e nin e niaan onga mun e sie e su e tie ndɛ kunngba’n. (Yol. 1:14; 12:5) Ɔ maan kɛ e ngba e tɛ su kɛ “maan ɔ yo sɔ’n,” e bo yo kun. Kɛ é tɛ́ su sɔ’n, sɛ e mannin e nɛn’n su o’n, annzɛ e tɛli su e klun lɔ o’n, i sɔ’n kwla yo maan Zoova fa like nga e srɛ i’n man e.
Kɛ e se kɛ “maan ɔ yo sɔ’n,” i sɔ’n manman Zoova wie.
Kɛ e kan sɔ’n, e manman Zoova. Zoova sie like kwlaa nga e yo e fa su i’n i nzɔliɛ. (Lik. 21:2, 3) Ɔ si e klun akunndan’n. Like nga ti yɛ e su i’n, ɔ si i wie. Sɛ sa wie ti’n, telefɔnun nun yɛ e tie ndɛ nga be kɛn i e aɲia’m be bo lɔ’n, e kwla lafi su kɛ “maan ɔ yo sɔ” mɔ e kan’n, Zoova i ɲin kpaman su. Asa ekun’n, ndɛ sɔ mɔ e kan’n, ɔ kle kɛ e nin be nga be o aɲia’n i bo lɔ’n, e bo ti kun yɛ e manman Zoova-ɔ.
Kɛ e srɛ Ɲanmiɛn mɔ e guɛ i bo kɛ “maan ɔ yo sɔ’n,” e kwla bu i kɛ ndɛ ngbɛn-ɔn. Sanngɛ, ɔ ti ndɛ cinnjin kpa. Fluwa kun seli kɛ, kɛ Ɲanmiɛn i sufuɛ’m be “kan ndɛ kpe kan sɔ’n, be yi i nglo kɛ be lafi Ɲanmiɛn su, naan like nga be srɛ’n ɔ ti be klun su, naan be lafi su kɛ bé ɲán like sɔ’n.” I sɔ’n ti, “maan ɔ yo sɔ” kwlaa nga e kan’n, maan ɔ jɔ Zoova klun.—Jue. 19:15.
