Tok ya “amen” i min se “hemia nao” o “i tru.” Hem i kamaot long Hibru tok we i minim “holemstrong” o “trastem.” Samtaem oli yusum tok ya blong tokbaot wan samting we i folem loa. Taem wan man i mekem wan promes, hem i mas talem “amen” blong soem se hem i agri se samting we hem i talem i stret, mo hem i rere blong kasem samting we bambae i kamaot from. (Nam. 5:22) Taem hem i talem “amen” long fored blong fulap man, hem i promes blong mekem samting we hem i talem.—Neh. 5:13.

Wan nambawan eksampol long fasin blong yusum tok ya “amen,” i stap long Dutronome japta 27. Taem ol man Isrel oli go insaed long promes lan, oli kam wanples bitwin long tufala hil ya Ebal mo Gerisim blong oli harem ol loa we Jehova i givim long olgeta. Oli no kam nomo blong lesin, be oli talemaot tu se oli akseptem loa ya. Oli mekem olsem taem oli talem “!Amen!” afta we Moses i talemaot panis we bambae oli kasem sipos oli no obei long ol loa ya. (Dut. 27:15-26) !Traem tingbaot noes blong ol taosen man, woman mo ol pikinini taem oli ansa! (Jos. 8:30-35) From samting ya, oli holem promes we oli mekem, mo i sua se bambae oli neva fogetem ol toktok we oli talem long dei ya. Stori i gohed se: “Ol laen blong Isrel oli stap biaen long Hae God oltaem nomo. Mo biaen, long taem we [Josua] i ded, be olgeta oli stap holem fasin ya yet, gogo kasem taem we ol lida ya we oli luk ol bigbigfala wok ya we Hae God i mekem long ol man blong hem oli ded evriwan.”—Jos. 24:31.

Jisas tu i yusum tok ya “amen” blong soem se samting we hem i talem i tru, be hem i mekem long wan spesel rod. Hem i no yusum tok ya “amen” blong agri long tok blong narafala, (long Bislama oli tanem tok ya se “tru”) be  hem i yusum blong soem se ol tok we hem i talem oli tru. Plante taem hem i ripitim tok ya se, “amen amen.” (Mat. 5:18; Jon 1:51) Hem i pulum ol man we oli lesin long hem se ol tok we hem i talem oli tru. Jisas i gat raet blong toktok olsem, from we hem nomo i kasem paoa blong mekem ol promes blong God oli kamtru.—2 Kor. 1:20; Rev. 3:14.

Ol man Isrel tu oli talem “amen,” taem oli mekem wosip mo oli prea long Jehova. (Neh. 8:6; Sam. 41:13) Taem olgeta we oli lesin oli talem “amen” long en blong wan prea, oli soem se oli agri long prea ya. I olsem se olgeta evriwan oli joen mo oli glad blong wosipim Jehova. Hemia nao samting we i hapen taem King Deved i tekem bokis blong kontrak i go long Jerusalem. Mo sam dei biaen, taem oli mekem lafet, hem i mekem wan gudfala prea we i olsem wan singsing, we i stap long 1 Kronikel 16:8-36. Nao olgeta man we oli stap long taem ya “oli talem se, ‘!Amen!’ mo oli stap presem [Jehova].” Yes, long taem ya oli glad tumas blong joen wanples blong wosipim Jehova.

Ol fas Kristin tu oli yusum tok ya “amen” taem oli presem Jehova. Plante taem, ol man we oli raetem Baebol oli yusum tok ya long ol leta we oli raetem. (Rom 1:25; 16:27; 1 Pita 4:11) Buk blong Revelesen tu i talem se olgeta samting we Jehova i wokem oli stap presem hem se: “!Amen! !Yumi presem Jah!” (Rev. 19:1, 4) Mo tu, ol Kristin long faswan handred yia oli talem tok ya “amen” long en blong ol prea we oli mekem long ol miting. (1 Kor. 14:16) Be, oli no talem tok ya olbaot nomo we oli no tingting gud long hem, nogat.

Naoia we yumi kasem save olsem wanem ol man blong Jehova oli yusum tok ya, hemia i mekem yumi kasem save from wanem yumi talem “amen” long en blong wan prea. Taem yumi talem “amen” long en blong ol prea blong yumi, hemia i soem se yumi tok tru. Mo nating se yumi talem  “amen” long wan smol voes nomo long wan miting, be hemia i soemaot se yumi agri long prea ya. Naoia bambae yumi tokbaot from wanem “amen” we yumi talem i impoten.

Yumi wok strong long wosip blong yumi. Yumi no presem Jehova nomo taem yumi prea long hem, be fasin blong yumi tu i impoten long taem blong ol prea. Sipos yumi tinghae long “amen” we yumi talem, hemia bambae i halpem yumi blong lesin gud long wan prea.

Yumi joengud long wosip. Taem wan brata i prea long fored blong kongregesen, yumi evriwan i stap lesin long hem. (Wok 1:14; 12:5) Taem yumi talem “amen,” i olsem we yumi joen long prea ya. Nating se yumi talem “amen” long wan bigfala voes o long tingting blong yumi nomo, yumi sua se Jehova bambae i ansarem prea blong yumi.

Yumi presem Jehova. Jehova i luk ol smosmol samting tu we yumi mekem blong wosipim hem. (Luk 21:2, 3) Hem i luk hat mo samting we i pusum yumi blong wosipim hem. Nating se yumi lesin long wan miting tru long telefon, be yet Jehova i harem “amen” we yumi talem. I olsem se yumi joen wetem ol narafala long miting blong presem Jehova.

Maet yumi ting se “amen” we yumi talem i nating nomo, be hem i sas tumas. Wan Bible encyclopedia i talem se: “Tru long wan tok ya nomo, ol man blong God oli save gat strong tingting, bilif, mo hop long tingting blong olgeta.” I gud we olgeta “amen” we yumi talem i mekem Jehova i glad.—Sam. 19:14.