Hata “amen” ibagas sahap Simalungun artini “saud ma sonai”, atap “sintong”. Humbani sahap Heber do hata ai, na mangartihon “setia”, “boi ihaporsayai”. Sipata igunahon do hata ai bani halak na iaduhon hu pangadilan. Dobkonsi marsumpah ia, maningon ihatahon ma “amen”. On mambuktihon tongon do hatani ai janah siap do ia manjalo aha pe na masa hu bani domu bani sumpahni ai. (4 Mus. 5:22) Anggo dong halak na mangkatahon amen i lobei halak na mabuei, on artini ra do ia mandalankon hatani ai.​—Neh. 5:13.

Bani buku 5 Musa bindu 27 ipatugah do sonaha halak Israel sapari manggunahon hata “amen”. Dobkonsi halak Israel masuk hu Tanoh Parpadanan, martumpu ma sidea i Dolog Ebal pakon Dolog Garisim laho manangar Titah ni Naibata ibasahon. Tapi lang sungkup pitah manangihon. Maningon ihatahon bangsa Israel ma “Amen!” dob salosei Titah ai ibasahon. On patuduhkon sirsir do sidea mandalankon haganup ampa manjalo uhumanni anggo lang idalankon sidea ai. (5 Mus. 27:15-26) Bayangkon ma sonaha gogoh ni sora ni marribu halak Israel age dalahi, naboru, ampa dakdanak sanggah mangkatahon ai. (Jos. 8:30-35) Tongtong do idingat janah itopati sidea ai. Bibel mangkatahon, “Sai ibalosi halak Israel do Jahowa sadokah manggoluh si Josua pakon sadokah manggoluh pangintuai, na dokah manggoluh ope i pudi ni si Josua, sagala na mambotoh haganup pambahenan ni Jahowa, na binahen-Ni hubani Israel.”​—Jos. 24:31.

Jesus pe manggunahon hata “amen”  laho patuduhkon sintong do hatani ai. Tapi legan do carani Jesus mangkatahon ai. Somalni halak mangkatahon “amen” dobkonsi salosei marsahap. Tapi anggo Jesus paima marsahap do ihatahon ia “amen”, (bani bahasa Batak Simalungun iterjemahkon “sintong”) na patuduhkon tongon do ganup hatani ai. Sipata ihatahon Jesus do homa “amen amen”. (Mat. 5:18; Joh. 1:51) On patuduhkon bani halak na mabuei sintong tumang do hatani ai. Ihatahon Jesus sonai halani marhiteihonsi do Naibata pasaudkon janji-Ni.​—2 Kor. 1:20; Pangk. 3:14.

Ihatahon halak Israel do homa “amen” sanggah sidea martonggo janah mamuji Jahowa. (Neh. 8:7; Ps. 41:14) On patuduhkon setuju do sidea bani ganup hata na ipadas ibagas tonggo ai. Anjaha gabe lambin toguh ma sidea janah marmalas ni uhur manombah Jahowa. On ma na masa sanggah Raja Daud mamboan Poti Parpadanan hu Jerusalem. Sadokah perayaan ai ibahen si Daud ma doding puji-pujian na isurat bani 1 Kronika 16:8-36. Gabe tarojur ma ‘ganup bangsa ai mangakatahon: Amen. Puji-pujian ma bani Jahowa’. Malas tumang do uhur ni sidea bani ari ai halani rup manombah Jahowa.

Sanggah malekat mamuji Jahowa, ihatahon sidea do homa, “Amen! Haleluya!” (Pangk. 19:1, 4) Bani abad na parlobei ihatahon halak Kristen do homa “amen” sanggah sidea mamuji Jahowa. Gati do homa panurat ni Bibel mangkatahon “amen” ibagas suratni. (Rom 1:25; 16:27; 1 Ptr. 4:11) Sonai homa do na ihatahon halak Kristen bani abad na parlobei dobkonsi salosei martonggo i partumpuan. (1 Kor. 14:16) Tapi sidea lang asal mangkatahon “amen”.

Dobkonsi iparlajari hita ganupan ai, gabe iarusi hita ma ponting tumang do mangkatahon “amen” dob salosei martonggo. On  artini tongon do na ihatahon hita ibagas tonggo ai. Anjaha anggo ihatahon hita “amen”, age ibagas uhur sanggah adong na mambobahon tonggo, on patuduhkon setuju do hita bani tonggoni ai. Ulas hita ma use alasan na legan mase ponting mangkatahon “amen”.

Dear do itangihon hita tonggo ai. Hita manombah Jahowa sedo pitah marhitei aha na ihatahon tapi sonaha uhurta sanggah na martonggo. Halani sihol mangkatahon “amen” humbani borsih ni uhur, gabe dear ma itangihon hita tonggo ai.

On mambahen hita lambin marsada. Sanggah tonggo ibobahon i kuria, ganup hita dihut manangihon. (Lah. 1:14; 12:5) Sanggah rup hita mangkatahon “amen”, gabe lambin marsada ma hita. Sanggah hita mangkatahon “amen” age ibagas uhur atap pe marsora, on ma na mambahen Jahowa ra mambalosi pangindoanta.

Hita mamuji Jahowa. Ipardiateihon Jahowa do ganup na ibahen hita laho mamuji-Si. (Luk. 21:2, 3) Ibotoh Ia do aha na dong ibagas uhurta. Hassi pe marhitei telepon hita manangihon acara partumpuan, tapi pos ma uhurta ipardiateihon Jahowa do homa sanggah hita mangkatahon “amen”. Dos do ai hita rup mamuji-Si ibagas partumpuan.

Jadi hassi pe pondok, ponting tumang do hata “amen” ai. “Marhitei hata on”, nini Ensiklopedia Pemahaman Alkitab taridah ma ganup juakjuak ni Naibata “porsaya, sauhur, janah sada pangarapan”. Andohar ma sanggah hita mangkatahon “amen”, ai boi pamalaskon uhur ni Jahowa.​—Ps. 19:15.