Yehova Onottittimiha Orumela Wawo “Amen”
YEHOVA onottittimiha venjene omwebedha wehu. Iyene ‘onovuruwana’ alabeli aye agamuttittimihaga, masiki mwa dhilobo dhing’ono. (Mal. 3:16) Motagiha, katanalela mazu ankaletxa iyo ologavi dila dhinjene Mazu aba “amen.” Koddi onovaha ttima mazu aba mang’onovi anloga iyo omamalelo wa nlobelo? Ndde! Mbwenye wila ninonelemo pama ndoweni none entamulele mazu aba “amen” vina mukalelo onlabihedha Bibilia.
“ATTU OTENE ANOFWANYELA OLOGA ‘AMEN!’”
Mazu aba “amen” antapulela “ekale dhawene” obe “mohaganyedha.” Mazuya aba abaliwe na elogelo ya Ebraiko entapulela “elobo yororomeleya” obe “okala elobo yokuluveleya.” Dila dhina mazu aba anolabihedhiwa vamattongelo a makani. Akala muttu wela okosa nlibelo, wanloga vina “amen” wi avahe nikuluvelo dhologa dhaye ninga nlibelo arumele nipikirelo na ejile enfuna opadduwa na muladdu waye. (Oleb. 5:22) Muttu agaloga mazu aba “amen” vari vanamwinji, wahikana nikokomezo na wakwaniha nlibelo a mazu aye.—Nem. 5:13.
Nivuru na Olibiha kapitulu 27 ninologa nsaka notikiniha nalogiwe mazu aba “amen.” Ana Izrayel ahimala ovolowa Mwilabo Yolibeliwa, ahidhowa otugumana Vamwangoni Ebal vina Vamwangoni Garizim wi avuruwane wengesiwa wa Nlamulo. Ottiya ovuruwanavi awene vina ahirumeela ovirihamo Nlamulona. Awene ahirumela mumodhani “amen!” musogoromwa awene ahivanya esile dhahengesiwe. (Olib. 27:15-26) Karoma wubuwela lizu na ayima, anddimuwa, ayana na alobwana arumelaga mumodhani “amen!” (Jos. 8:30-35) Mohaganyedha awene kadduwalile mazu abale. Mowiwanana na dhologa dha Bibilia ana Izrayel ahakwanihedha mazu awa sabwani Biliha onologa: “Nlogo na Izrayel nimwimelela Nabuya nsaka notene nikalilewo Josuwé, vina malabo akalilewo anddimuwa attiyiwe na Josuwé, aziwa dhotene dhawirele Nabuya ana Izrayel.’—Jos. 24:31.
Yezu wanlabihedha vina mazu aba “amen” (mazu aba agatapuleliwa kuloga “ebaribari”) wi arumele mazu aye na mukalelo wavawoka. Ottiya ologa “amen” omamalelo wa dhologa iyene waloga omaromo elagihaga wi dhinfuna iyene ologa ebaribari. Dila dhina iyene waniyelela mazu aba eraga “amen, amen.” (Mt. 5:18; Jo. 1:51) Obu wali mukalelo wopikirela vari va anamewa aye wi mazu aye ali ebaribari. Yezu wanloga na ekuluvelo sabwani modhela iyene Mulugu onowakwanihedha malibelo aye —2 Kor. 1:20; Ovuh. 3:14.
“ATTU OTENE AHILOGA ‘AMEN!’ VENEVO AHIMUTTITTIMIHA YEHOVA”
Ana Izrayel vina anloga “amen” agamuttittimihaga Yehova na malobelo. (Nem. 8:6; Masal. 41:13) Mwalogani “amen” omamalelo wa malobelo, abale avuruwana antonyihedha wi anorumeliwa na esile dhilogiwe. Attu etene anrumela, etapulelaga wi anvaha ttima dhipaddi dha webedha womuyani. Yakakene yahipadduwa nsaka na Mwene David mweyelele Yobo ya nipagano o Jeruzalemi wakalani. Mudhidhi obule David wahikosa nlobelo nozivela, nlobelona nankosa epaddi ya jibo enfanyeya va 1 Map 16:8-36. Alivo ahiziveliwa vaddiddi na mazu okoddela alogile David ‘otene ahiloga ‘amen!’ vina ahimuttittimiha Yehova.’ Awene ahagalala sabwa ya omulabela Yehova mummodhani.
Vyaka zana dhoroma Akristu anloga mazu aba “amen” wi amuttittimihe Yehova. Anamaleba a Bibilia ahiloga mazu aba dila dhinjene. (Rom. 1:25; 16:27; 1 Ped. 4:11) Nivuru na Ovuhulela ninologa vina wi dhottanddiwa dha odhulu (angelo) dhinologa: “Amen!” Wi amuttittimihe Yehova!” (Ovuh. 19:1, 4) Akristu a vyaka zana dhoroma anziveliwa ologa mazu aba “amen” omamalelo wa webedha wawa obe wa matugumano awa. (1 Kor. 14:16) Mbwenye aweneya karumela bure-bure.
OLOGA WAWA “AMEN” OKALELENI WA TTIMA
Ovano mmalelehu osunza entapulela mazu aba “amen” nihifiyedha ononelamo ekalelani yofwanyela ologa omamalelo wa nlobelo. Ologa wehu “amen” omagomelo wa dhologa dhehu nanya, nintonyihedha wi dhilogile iyo mwari mwa nlobelo s’ebaribari. Nigaloga ‘amen’ mutxiddo-mutxiddo obe na mmirimani, entonyihedha wi ninorumela esile dhilogiwe. Ndoweni nitanalele elobo yina enilogiha “amen.”
Iyo ninkala wotxenjerene mwari mwa matugumano ehu. Mwari mwa malobelo ankosiwa muwebedhani mwehu enofuneya okala txenjewa wi niziwege entapulela ttima ya malobelo. Ologa wehu “amen” omagomelo wa malobelo onomuttittimiha Yehova vina enowoniha ekalelo yehu akala muttu mwina onokosa malobelo.
Ninokala wowiwanana na abali ena. Nigakosiwaga nlobelo na mmulogoni abali otene anowodha okala mumodhani avuruwanaga esile dhinlogiwa. (Mer. 1:14; 12:5) Attu otene agaloga “amen” mumodhani abali na arogora anowodha ofwanya olibiheya wokala mumodhani. Masiki akala orumela wehu kwa mmirimani obe kwawiweya, ninowodha okala mumodhani na abalihu vina arogora.
Ologa wehu “amen” mukalelo wa omwebedha Yehova
Ninomuttittimiha Yehova. Yehova onowodha ozinddiyela dhilobo dhig’ono dhinkosa iyo mwari mwa nlobelo. (Lk. 21:2, 3) Yehova onowona ejile eli mmirimani mwehu. Masiki akala ninvuruwana na muttitto matugumanoya, ovyeviha wehu modhela wakula “amen” Yehova onowona. Yehova onorumela nttittimiho notene na mulogo.
Mazu ehu “amen” masiki akale mang’onovi Yehova onovaha ttima. Ninga munlogela enciclopédia bíblica. “Mwa ologa mazu aba mang’onovi” adhari a Mulugu anowoniha “nikuluvelo nawa, orumeliwa wawa na Mulugu, njedhelo nawa ninfwanyeya mmirimani mwawa.” Mwebaribari ologa wehu amen onomwagalaliha Yehova.—Masal. 19:14.
