Jehovah nih “Amen” Na Timi Kha A Sunsak”
JEHOVAH nih kan biaknak kha a sunsak. A salle “an bia cu a theihpiak hna i a ngaihpiak hna.” Thil hmete a si hmanhah amah thangṭhat awkah kan tuahmi paoh kha a sunsak. (Mal. 3:16) Tahchunhnak ah, voi tampi kan chimmi bia pakhat hi ruathmanh. Mah cu “amen” a si. A sawhsawh te a simi mah bia kha Jehovah nih a sunsak maw? A sunsak. Zeicah a sunsak ti hngalh awkah mah bia a sullam cu zeidah a si ti le Baibal ah mah bia kha zeitindah a hman ti kha zoh hna u sih.
“Mi Vialte nih ‘Amen’ An ti Lai”
Mirang biafang a simi “amen” timi a sullam cu “cutin si ko seh” asiloah “si hram ko seh” tinak a si. “Zumhawktlak a simi,” “bochan awk tlak a simi” tiah sullam a ngeimi a hrampi Hebru biafang in lakmi a si. A caan ah mah bia cu upadi he aa tlai zongin hman a si. Mi pakhat nih chiatserh in bia aa kam hnuah a chimmi cu a hmaan i a phichuak a cohlan kha langhter awkah “amen” tiah a chim a hau. (Nam. 5:22) Zapi hmaiah “amen” tiah a ti tikah a biakam fek tein kaa tlaih zungzal lai ti kha a langhtermi a si.—Neh. 5:13.
“Amen” timi bia hmannak ah zohchunh awk ṭha bik a simi kong kha Deuteronomi dal 27 ah langhter a si. Biakammi Ram an luh hnuah Israel mi pawl cu Nawlbia relmi ngaih dingin Ebal tlang le Gerizim tlang karah an i pum. Mah cu Nawlbia ngaih awk lawngah si loin Nawlbia an cohlan langhter awk zongah a si. Nawlngaih lonak ruangah a chuakmi thil ṭhalo kong an rel tikah “Amen” tiah an lehnak thawngin an cohlan kha an langhter. (Deut. 27:15-26) Thong tampi a simi pa, nu le ngakchia nih aw thangpi in an lehmi kha na mitthlam ah cuanter hmanh. (Josh. 8:30-35) Israel mi nih mah ni ah an chimmi bia kha zeitikhmanh ah an philh bal lai lo ti cu a fiang ko. An chimmi ningin an zulh kha hitin a langhter: “Israel mi nih Joshua nunchung vialte le, Joshua hnu i a nung i BAWIPA nih Israel mi caah a tuahmi rian vialte a hngaltu upa hna nunchung cu BAWIPA rian kha an ṭuan.”—Josh. 24:31.
Jesuh zong nih a chimmi biatak fehternak caah “amen” timi bia kha a hman. Asinain a ṭha bikmi lam in a rak hman. Pakhatkhat nih bia an chim hnuah “amen” timi bia kha a chim lo. Mah canah biatak kong a chim hlannah a chimmi cu a hmaan ti langhternak caah “amen” timi bia kha a chim. A caan ah “amen, amen” timi bia kha atu le atu a chim. (Matt. 5:18; Johan 1:51) A chimmi bia cu a hmaan taktak ti kha a bia a ngaitu pawl a zumhter hna. Pathian biakam vialte tlinter khawhnak nawl a ngeimi cu amah lawng a si caah Jesuh nih mah bia kha fiang tein a chim khawh.—2 Kor. 1:20; Biat. 3:14.
“Mi Vialte nih, ‘Amen’ tiah An ti i BAWIPA kha An Thangṭhat”
Israel mi pawl nih Jehovah sin thla an cam tik le an thangṭhat tik zongah “amen” timi bia kha an hman. (Neh. 8:6; Salm 41:13) Thlacam dih hnuah a ngaitu hna nih “amen” tiah an tinak thawngin thlacamtu nih a chimmi an cohlan kha an rak langhter. Cuticun Jehovah kha lunglawm tein an rak biak. Mah cu Siangpahrang David nih Jerusalem ah Jehovah Biakamnak Kuang a luhpi lioah a cangmi a si. Mah ni ah David nih lungtak tein thangṭhat thlacamnak hla a sakmi kha 1 Chanrelnak 16:8-36 ah langhter a si. Aa pummi hna nih David bia an theih tikah “‘Amen’ tiah an ti i BAWIPA kha an thangṭhat.” Jehovah kha hmunkhat ah an biakṭi caah an i lawm tuk.
Cu bantukin kumzabu pakhatnak i Khrihfa hna zong nih Jehovah an thangṭhat tikah “amen” timi bia kha an hman. Baibal ṭialtu hna nih an ṭialmi ca ah “amen” timi bia kha atu le atu an telh. (Rom 1:25; 16:27; 1 Pet. 4:11) Vancungmi hna hmanh nih Jehovah an thangṭhat tikah “Amen! Pathian cu thangṭhat ko u” tiah an timi kha Biathlam cauk ah kan hmuh khawh. (Biat. 19:1, 4) Hmasa Khrihfa hna nih pumhnak i thla an cam dih hnuah “amen” tiah an ti. (1 Kor. 14:16) Asinain mah bia kha ṭha tein ruat hmasa loin an chim sawhsawhmi a si lo.
“Amen” tiah Na timi a Biapitnak a Ruang
Jehovah salle nih “amen” timi bia an rak hman ning kong kan hlathlainak thawngin thlacamnak a donghnak ah “amen” timi bia chim cu zeicah sullam a ngeih tuk ti kha kan hngalh khawh. Kan thlacamnak a dih hnuah “amen” tiah kan ti tikah kan chimmi ningin kan tuah taktak kha kan langhtermi a si. Zapi ca thla an cam tikah “amen” tiah kan lungchung in kan ti hmanhah thla an cammi bia kan hna a tlak kha kan langhtermi a si. “Amen” tiah kan timi a biapitnak a dang a ruang zong kha zohhmanh hna u sih.
Kan biaknak ah hliphlau tein kan um kan langhtermi a si. Thla kan cam lioah kan biachim lawngin si loin kan umtu ning zongin Jehovah kha kan biak. “Amen” tiah lungtak tein chim kan duh, mah nih thlacammi ah lungthin pek awk le aa tlakmi ziaza langhter awkah a kan bawmh.
Pumhnak ah kan lung a rualter. Zapi ca thlacamnak nih Khrihfabu ah theih hngami program cungah lungthin pek awkah a kan forh. (Lam. 1:14; 12:5) Unau pawl he hmunkhat te ah “amen” tiah kan ti mi nih kan lung a rualter chin. Lungchung in asiloah awchuah in hmunkhat te ah “amen” tiah kan ti tikah kan thlacammi nih kan halmi pek awkah Jehovah kha a forh men lai.
“Amen” tiah kan timi nih Jehovah thang a ṭhatter
Jehovah kan thangṭhatmi a si. Pumhnak ah kan tuah mi thil paohpaoh kha Jehovah nih a hngalh. (Luka 21:2, 3) Kan lungthin ah zeidah a um ti le zeidah kan ruah ti kha a hmuh. Pumhnak kha telephone in kan ngaih tik hmanhah toidor tein “amen” tiah kan timi kha Jehovah nih hngalh loin a um lo. “Amen” tiah kan timi nih Jehovah a thangṭhatmi mah pumhnak ah kan i tel ve ti kha a langhter.
“Amen” tiah kan timi cu a biapi tuk lomi a lo men lai nain mah cu a biapi lomi a si lo. Baibal encyclopedia cauk pakhat nih “mah biafang pakhat hmannak thawngin” Pathian salle nih “an lungthin chungah a ummi zumhnak, hnatlaknak le ruahchannak” kha an langhter khawh tiah a ti. “Amen” timi bia in Jehovah kha lungtak tein thangṭhat hna u sih.—Salm 19:14.
